我係邊個

大家好!我係Israel,以作曲/演奏爲正職,學習外語爲興趣。先後畢業於中文大學、牛津大學,本科生時喺瑞典隆德大學做交流生生活咗一年,目前住喺英國。

喺大學讀德文嘅時候,我先發掘咗我對學習、研究語言嘅熱忱,而家閒時教、學各種外語。我亦都係粵語運動嘅支持者,曾經以粵英翻譯嘅身份參與Cantonese ConversationsEasy Cantonese、粵語電影對白語料庫、粵典等工作,同時間亦係撰樂嘅中英翻譯。

2020年十月開始,成立咗絮言.狂想podcast節目,旨在用粵語討論同粵人比較切身嘅語言議題,同埋製作聆聽材料畀粵語學習者。如果想支持節目運作,或者閱讀每集足本逐字稿,歡迎嚟到Patreon做貢獻。

呢個blog嘅成立,係爲咗喺我開始自己探索世界之時,記錄低我旅遊嘅經歷;亦都係爲咗寫下我學習外語嘅途中,各種成功同失敗所帶嚟嘅心得。呢個網站嘅粤文版本最近先開始寫,有興趣嘅話亦都可以用左手邊嘅連結,去瀏覽一下英文嘅文章。

我希望我寫嘅文章可以引起你嘅興趣,甚至啓發到你對學一門新嘅外語踏出第一步,又或者加把勁改進你現有嘅外語。如果你睇嘅期間想同我分享一下你嘅睇法、或者向我問一條問題,可以喺下面留個言,或用聯絡表格send個message畀我。

我學過嘅語言

記住開粵文字幕!

其實所有以語言爲樂嘅人都知道,永遠都好難講實到底識定係唔識一隻語言。我可以講下嘅係,我學過邊啲語言,而可以用佢哋做到啲乜嘢。如果你有興趣學呢度嘅某一種語言,可以睇下我有冇寫過關於佢嘅嘢,或者又可以留個message,我睇下有啲咩經驗、貼士同你分享下。

我對英/法/德/瑞/波/粵語經驗比較深,有個人學習嘅心得。如果你學緊呢啲語言,我作為一個粵語母語者,我可以以過來人嘅身份,同你講解有啲咩要注意嘅地方,或者有啲咩捷徑、貼士可以學得快啲。想知多啲嘅,不妨留個言搵我試堂添。

粵語:母語。

英語:接近母語。我除咗日常同家人朋友講嘢,其餘情況都多數用英文,書寫嘅話我甚至係英文最順暢。

華語/官話/國語/普通話:聆聽流利,但係因爲少用,所以棘棘哋。

法文:由細個開始學,而家可以自然地睇一本書,或者喺法國生存嘅程度。

德文:學咗好多年,而家有每日聽德文新聞嘅習慣。除咗高等學術環境之外,我都認爲自己純熟㗎喇。

日文:學下停下噉,所以喺日常生活都剩係勉強溝通到。

荷蘭文:玩玩下啫。

俄文:當年去德國之前用咗俄文嚟試下Glossika,成個課程做咗一半,最後結果係說話能力超乎所想,但係聆聽就一竅不通。但係自從學波蘭語之後,發覺我對個文法系統熟識咗、加上基本嘅俄文知識,竟然都聽得明唔少。

瑞典文:基本上流利,更加考咗張證書,俾我可以用瑞典文讀書。

波蘭文:我目前嘅摯愛。間唔中查下字典就可以睇到書,亦都好鍾意講。

意大利文:喺大學上咗兩個course,雖然學得幾快,但係還返咗畀老師。

哈薩克語:當興趣玩咗一陣,但係冇幾耐就冇咗動力。

臺語:貪得意玩緊,原來學一種接近母語嘅語言,係咁有趣。

冰島語:學咗幾個月都幾享受,但係因爲武漢肺炎取消咗冰島嘅行程之後,就失去咗動力。

拉丁語:因爲女朋友喺大學讀咗個暑期班,所以陪佢學識咗啲基本要素

希伯來文:而家主力學緊!程度仍然算係入門。