我教學生同埋指導人自學外語，已經差唔多十年嘞。
一方面，我可以準備有結構嘅課堂，而另一方面，我主要嘅教學方法係「解難」。我作為粵語母語者，學過咁多唔同嘅語言，可以搵到最有效、最啱你嘅方法同埋捷徑，嚟幫你解決你遇到嘅障礙、達到你學語言嘅目標。
每堂後，我都會整理返嗰堂學過嘅生字、用語畀你。因為，噉樣嘅老師，正正係我自己都會想跟嘅老師。
如果你聽落覺得啱你嘅，
目前，我提供個人化課堂嘅語言有：
粵文
最適合學粵語嘅時間，就係而家。我個blog開咗咁耐以嚟，一直有一個角落，專係寫粵語最新嘅發展，或者特別之處。如果你學緊粵語而睇得明呢段，恭喜你！好歡迎你搵我練習對話、讀寫等等，我可以繼續向你介紹最地道、最新嘅表達方法。凡係我熟嘅語言，都可以用嚟做上堂嘅語言。
對於粵語母語者，我亦有幫教學材料拼寫、校對粵拼嘅經驗，可以提供粵拼讀寫嘅課程，等你唔單只睇得明粵典裡面呢一套可靠嘅系統，更能夠喺書寫上用有音無字嘅詞句表達自己，甚至加入支持、推廣、壯大我哋最親切嘅廣東話嘅行列。
英文
我自從網絡時代以嚟，就大部分時間都浸淫喺英語世界裡面，而家就住緊喺英國。HKDSE straight 5**、牛津大學哲學碩士，都證明我嘅英文喺唔同領域都應用自如。不論你想搬去英語區生活、想輕鬆享受英語媒體、定係考試，我都可以用香港人嘅角度，幫你搵到最容易吸收嘅方法，同埋令你發音、用語都更自然。
德文
我喺大學副修德文，期間喺香港大學生德語演講比賽贏咗獎。後來海外交流時，有攻讀德文文學，同埋用德文上唔同嘅堂。德文文法、結構看似複雜，但係我可以從學習者嘅角度，為你解畫。初學者、中階都歡迎！
法文
我由小學開始就有修讀法文。我知道點樣可以最容易掌握到法文裏面棘手嘅發音，同埋喺眾多嘅文法課題入面，挑出最有用嘅語法嚟學咗先，等你可以盡快開口講呢個咁靚嘅語言。現正接受初學者報名！
瑞典文
有冇諗過點解瑞典人講嘢好似唱歌？或者宜家家俬啲奇怪名到底係咩意思？瑞典又啱旅行又啱住，學咗一隻語言仲可以同鄰近國家溝通添。我喺瑞典住咗一年，仲喺三個月之內考咗高級嘅瑞典文試。換言之，我真係好識搵窿路、搵捷徑嚟極速掌握呢種語言，融入喺當地人之間。初學者、中階都歡迎！
波蘭文
個個都話波蘭文係世界上最難嘅語言，但係我就唔認同。點解？因為我學咗囉！當初彷彿空手入白刃噉開始，後來過五關、斬六將，可以暢快噉享受波蘭語嘅YouTube、Netflix，我儲埋咗好多貼士，將個語言拆解成易學嘅課題，易於反覆操練。如果想認識哥白尼、蕭邦嘅母語，就嚟同我一齊學啦！
自學咨詢
鍾意自修多過畀人教？冇問題！不論你學緊咩語言，我都可以用我學外語嘅經驗，引導你進入有效率嘅自學過程，討論點樣可以盡用你手頭上嘅學習資源，提升你嘅自學能力，同埋透過定期報告同自我檢討，確保你進度理想，可以達到你嘅目標。
用以下表格，可以問我攞價同埋安排上堂，試堂仲有半價添！
調堂、遲到條款
除非學生特別要求，一般課堂為四十五分鐘。Email提供嘅價格亦都會以呢個長度嘅課堂為標準。
上堂前十二個鐘或以上，學生可以要求調時間或者取消上堂。
上堂前三個鐘或以上，學生可以要求調時間，但係唔可以取消。
課堂開始後首十五分鐘，如果有合理原因（通常係未知因素，例如技術問題），學生可以要求調時間，但係唔可以取消。
如果學生遲到少過十五分鐘，視乎課堂內容同進度，我有機會補時間。
如果學生遲到多過十五分鐘，將會被視為缺席。學生唔可以要求調時間，而且必須畀全費。課堂時間完結之前，學生可以選擇用淨餘時間照常上堂（唔會額外補時間），或者可以請我用淨餘時間提供其他相關嘅服務。我亦都保留直接取消課堂嘅權利。