粵語隨想 – Rhapsody in Lingo

寫！粵！文！

打廣東話真係好難。

唔似得上面有漢拼、台灣有注音，粵語有萬七咁多種輸入法，種種都有好大嘅弊處。

倉頡就難學，速成就揀字揀到傻，粵拼就香港人冇用開（雖然我強烈建議各位讀者用一粒鐘學咗佢），漢語拼音就……唔使講啦。

唔少人都要喺手機手寫先寫到粵字，又或者會打咗啲「o係」「o羅」噉嘅奇怪字出嚟。

你問我嘅話，對於廣東話嘅母語者，就算唔集體轉過去，都好應該試一試粵語反切輸入法。佢淨係需要記26個鍵，唔使學拆字、唔使學拼音，揀字就淨係需要喺同音字之間揀，最緊要嘅係兩個掣就打完一個字，又快又準又易學。

我覺得簡直係粵文輸入嘅未來。

不過首先，都要同大家講解下咩叫粵切先。

拖咗咁耐，終於認真寫下個粵文blog。（其實一早開咗，但係一直都冇乜寫、冇乜執佢。）

留意返，依家左邊menu有得揀語言。唔係每篇文都雙語，係嘅話會轉咗去相應嘅英文版，冇嘅話會去咗英文首頁。

呢個blog 2015年開，雖然嚴重地斷斷續續，都叫做寫咗五年。寫咗五年英文，然後又喺英國大學畢業，反而囉囉孿、要的起心肝開粵文版，都幾有趣。何況雙語blog係用雙倍嘅工夫，嚟分散自己嘅客源。

咩係粵文？好簡單啫，講英語寫英文，講粵語咪寫粵文囉。有人唔變調讀jyut6 man4，我就跟咗變調嗰派講jyut6 man2，呢啲嘢真係好隨心。

諗起Language Stories裡面福建話嗰集提到，人離開咗家鄉，會特別珍惜自己嘅母語。計埋我去交流嗰年（咁啱就係我個英文blog開張之時），出咗埠三年，都係時候進入嗰個心境。況且而家香港搞到噉，睇怕返去嘅機會少之又少。

我估，彷彿係嗰網上建立一個bubble畀自己，將母語嘅思緒歸納、抒發出嚟噉啩。再者，學咗咁多外語，好似會潛意識想保護母語，會想喺腦海裡面劃返一個安全地帶出嚟畀佢唞氣。

按：獲原創者批准，節錄並翻譯自《福建話的沒落與復興：被人調包的母語》嘅福建話原文。請去講福建話運動支持南方語言！

自從二十世紀開始，中國南方嘅語言開始沒落，由社會頂層開始，再漸漸向低下階層蔓延。因為講南方話嘅領袖都開始捧起北方嚟嘅華語（官話）嘅地位，所以推動咗成個社會跟佢哋轉去講北方話。

成件事要由1895年開始講起。嗰年，清朝政府喺甲午戰爭輸咗畀日本。畀自己以前嘅朝貢國打低，對中國嘅掌權人嚟講，無疑係好大嘅恥辱。之後，開始多咗好多人走去日本同西方國家讀書，希望將新嘅知識帶返中國。

其中一樣由西方世界引入嚟嘅理論就係種族主義，呢種主義講嘅係人類作為一種物種，係可以分成唔同嘅「人種」嘅。