以：噉之後佢get唔到囉。佢話吓？
苗：佢唔expect你講波蘭文，你個樣唔似識波蘭文。
以：係喇！
苗：唔夠似越南人啊，你個樣。
以：我係粵……粵人，唔係越南人啊。
[jingle]
以：歡迎返到嚟《絮言．狂想》第八十三集，我係以色列。
苗：我係三苗。
靳：我係靳尼啊。
以：我已經連續第三次講呢句喇。噉我哋……
苗：又有技術問題。
以：係好多蝦碌嘅嘢。
靳：我哋一開始問有冇技術性嘅問題，跟住就出現咗技術性嘅問題。
以：技術性被擊倒咗，係。噉但係聲音畫面而家……OK。
靳：係冇問題嘅，好似係。
以：冇問題，係喇。
苗：聲音畫面冇問題！
以：冇問題，我哋上次講好多蝦碌嘢吖嘛，之後今次到我哋自己蝦碌喇。係咪……𦧲啖口水再講過！但係……係喇，我哋又返返嚟喇。我哋今次講完耶穌嘞，終於。我哋可以講下其他嘢啦，我哋……但係開始之先呢，係喇，噉因為大家都嚟到我哋當中一齊聽我哋講吖嘛，噉我哋開始之先呢，讓我哋一齊睇下我哋最近收到一封聽眾來信喎。都好少發生嘅事啊，所以呢，一收到都覺得好……好榮幸啊吓。
靳：係啊，我哋第一次收到讀者來信喎。
苗：受寵若驚啊。
以：係啊。我一開始我……我冇睇，因為呢，嗰晚呢，我同一個朋友……呢個朋友喺好多唔同嘅絮言嘅片啊，或者節目裏面，已經提起過好多次㗎喇。噉我嗰晚係同佢飲緊嘢啦，之後突然間喺手機見到呢封信喎，之後我心諗：啊，好多中文字啊，睇得好辛苦啊。之後畀阿三苗同靳尼睇先。噉所以你哋有呢個第一個reaction啊吓。所以問下你哋感覺點先！
苗：咩好辛苦啊？
以：咩話？
苗：唔識睇中文。
以：唔識睇中文。
靳：唔識睇中文，太耐冇睇中文。
以：係啊，我就嚟……就嚟……就嚟變竹升㗎喇，我，大佬。唉。
靳：噉……噉你啲逐字稿係用咩文打？
苗：唔係，你講嘅所謂中文係咩先？
以：用粵文嘅，係喇，係喇。即係中文字。
靳：中文字。
以：好多中文字。
苗：中文字。
以：喺度……因為已……已經飲咗好多喇，所以就眼花繚亂。就唔……唔係話……唔係話篇嘢好難睇，係……係我嘅錯！對唔住！係。係飲大咗。係。噉你哋嗰時一睇有咩……有咩感覺先？一開始。
苗：咪就係受寵若驚噉嘅感覺囉。好似都從來未試過有人寫咁多嘢。即係可能一兩句會有啦。但係真係去到寫信呢個level，即係佢唔單只係留言囉，我覺得。佢係寫信囉。明唔明嗰䭅分別喺邊度？
以：係啊，即係有個……有個條理，即係佢係由頭到尾，講一個故事，想表達某啲嘢噉樣。而唔係純粹一個諗法。因為佢係一個嚟自中國大陸嘅聽眾嚟嘅。噉我問咗佢，佢話可以分享啦。噉佢講咗佢成個人生故事，即係佢……廣東話，佢細個識聽唔識講，但係之後到大個咗，就開始對語言感興趣，然後自己再執返啲廣東話返嚟。噉就原來……哦，受……好受到絮言嘅啓發。
苗：嘩，我哋可以啓發到人，竟然。
靳：我覺得好感動啊。因為真係……我哋做呢個節目，至少……至少喺我嘅角度嚟講，其實我純粹係想抒發對於我對語言嘅興趣。即係純粹係幾個朋友一齊喺度傾下關於語言嘅嘢啦。噉都估唔到其實係可以對人係有啲啓發，或者甚至係令到佢對呢樣嘢多咗興趣，或者甚至係對自己嘅母語係……係多咗一分嘅……點樣講啊？感情喺度。即係成件事係好奇妙㗎，我覺得。
以：係啊。尤其是即係我哋當初做絮言其中一個原因……即係除咗我哋可以自己朋友之間傾下啲對語言嘅興趣之外，都係想發掘呢一個用廣東話講語言嘅呢一……開呢個坑出嚟啊，係咪啊？即係冇乜人做呢樣嘢。即係譬如話我哋見到有人用廣東話講哲學嘅，喺網上。噉但係好似冇乜人係真係專係講唔同語言啊、語言學啊、學語言啊，呢啲噉嘅題目。噉然之後估唔到真係吸納到一啲係真係好想用廣東話聽語言嘅人囉。噉所以都好……好開心，即係揾到啱嘅聽眾啊，我哋。好……好……呢樣嘢成功咗。
苗：係啊。佢仲話佢畀我哋啓發，走咗去讀語言學啊，係咪啊？或者佢將來會揀啊。
以：係啊，係啊，係。嘩，我哋培養啲語言學嘅學生出嚟。係。即係我哋亂……亂咁噏㗎咋嘛，噉但係可能人哋聽完之後，又……就感覺有興趣，自己去學多啲啦。嗱，唔好……唔好跟我哋學嘢，我哋唔識嘢㗎。三苗識嘢，三苗識啲語言學嘅。
靳：我哋係分享啲嘢嘅啫。即係分享自己覺得有趣嘅嘢。
以：係喇。都做咗幾年㗎喇。即係真係睇住……聽絮言大啊。
苗：唔係，佢係㗎！佢係噉樣形容自己㗎喎。即係佢啱啱……佢讀高中嗰四年吖嘛，就係佢聽絮言嗰四年囉，差唔多。
以：你想像下，人哋細細個已經聽你絮言喇。係啊，即係你已經發覺你自己原來已經唔係咁細個囉。即係好奇妙，我覺得呢樣嘢。即係細個呢，就自己會受到一啲前輩啓發，可能我細個係睇到呢個蕭叔叔嘅……嘅片啦，我睇佢嘅Yahoo Blog啦，跟住去到進化到睇佢嘅YouTube片啦。噉原來而家就會有另一啲人去睇自己喺度喺度……喺度講嘢囉。其實都係……我哋都係亂噏㗎咋嘛。即係我哋又唔會去到好似學術研究噉樣咁……做得咁深入嘅研究。又唔會去到好嚴謹，所有嘢。即係有時都係自己聽過嘅嘢，或者去見過嘅嘢，去分享返出嚟囉。係啊，估唔到有人咁重視。
以：因為出面都有啲podcast，係真係好學術噉樣講語言學㗎嘛。即係揾啲係做呢方面研究嘅人。雖然佢哋切入點都係比較……即係親民啲，噉但係我哋就有啲唔同囉，我哋就係本身就係淨係對語言有興趣嘅人，然之後發覺：咦？哦！呢個幾得意喎！不如講下先！噉然後之後可能我哋做少少（咳）研究，即係……即係睇喺Wikipedia噉樣。噉然後之後就……就解釋下啲嘢。噉可能大家都一齊學習緊。我諗起呢，都有啲聽眾話呢，啊，聽絮言好似次次都有啲嘢講錯，要改正返嘅。噉I guess呢個都係我哋嘅形象嚟嘅。我哋係……即係一班朋友，係傾下呢啲有趣嘅嘢。噉如果有人覺得好正嘅話，都可以自己去學多啲嘢。所以係囉，好多謝呢位匿名聽眾嘅來信啦！噉如果大家想同我哋講自己嘅故事，或者想分享下其他各種有趣嘅語言嘢呢，噉都不妨可以嚟send email畀我哋啦，或者更加好嘅，就係加入我哋嘅Patreon個Discord啦！噉就嚟到po啲有趣嘅嘢，同我哋分享啦，噉我哋就會揾機會講下㗎喇。同埋我哋最近開咗一個喺Discord上面嘅論……即係討論區啊，噉就會好清楚噉樣每一集呢，就會有一版噉樣，噉就好方便噉，可以大家去討論下每一集內容啦，或者其他有……有趣嘅嘢，都可以po上去嘅，所以好歡迎大家嚟到參與啊。
苗：係，噉我想再講多次呢個……我哋呢個《絮言．狂想》節目呢，雖然講唔出咩大道理，不過都希望令大家覺得有啲親切感啦。
以：呢個係咪一個quote嚟㗎？感覺似係。
靳：呢個係一個meme嚟嘅。
苗：明嘅人就會……明嘅人就會明。
靳：明嘅人就會明㗎喇。
以：喊出嚟。
靳：噉都再次多謝呢位寫呢封信畀我哋嘅聽眾，即係我哋收到真係覺得好感動，都係令到我哋繼續做呢個節目嘅一大嘅動力嚟嘅。真係好多謝你。
以：係啊。
[08:17]
以：噉我哋講返我哋自己喇。即係我哋講完我哋聽眾嘅故事，講下……講下絮言嘅故事啦。聽講呢，阿靳尼呢，有埞去喎！今次。今次唔係我喇，嗱！
苗：嘩！終於有。
靳：嗱，邊個近嚟有埞去先！
苗：你……你靳尼近嚟有埞去囉！
以：靳尼……靳尼近……唔係……唔係近嚟，係嚟緊！
苗：嚟緊……靳尼嚟緊有埞去。
靳：靳尼嚟緊有埞去。我係……我係要講我要去邊嘅。
苗：係啊，梗係要講啦。
以：噉你……問得你，梗係覺得好有趣㗎啦。
靳：又好似啱喎。
以：唔係咩咩……去開返鄉下嗰啲，唔係。
苗：咪住先，唔……唔有趣係……哦，就係你講咗喇，已經。
靳：係噉嘅。
以：有……我講「有趣」嘅意思，係有驚喜。係喇，呢個有驚喜。即係當初我哋……我哋係突然發現靳尼去呢個地方。因為呢，我又講下呢個故事先。因為呢，阿三苗同靳尼有啲咩咩app呢，可以畀佢哋track下對方去邊度旅行，去飛邊度噉樣嘅。
苗：係啊，呢個係一個iPhone先至有嘅app嚟嘅，所以呢，阿以色列呢，就玩唔到喇。
以：係啊，係啊，我冇嘅。
靳：係冇嘅。
苗：我哋嗰陣時係……好似我哋係去Polyglot Gathering嗰一班朋友呢，係真係得以色列冇呢……冇iPhone，噉所以呢就，我哋全部朋友都有……
以：被杯。
苗：即係裝咗呢個app啦，就叫做Flighty啦，噉可能好多人都聽過，噉就可以記錄你自己搭過或者將會搭嘅航班嘅。噉所以我就突然間嗰度見到：咦？靳尼過兩個禮拜就去……邊度啊？你講一講吖。
靳：我今次呢，係跟我啲中學同大學同學呢，會去呢個哈薩克同埋吉爾吉斯嘅。係喇，如果大家可能唔知喺邊呢，其實就係中亞嘅地方嚟嘅。

The rest of the transcript is available to Patreon members.