霽：見到啲阿婆喺度擺檔，我又啱啱嚟，冇朋友，走去撩佢：Hey, how do you think about Welsh independence？
以：黐線！
苗：嘩！咁chur嘅？喂！
靳：嘩，一嚟就問啲噉嘅嘢嘅？
苗：喂，好chur喎！
靳：嘩，呢個……呢個好chur喎！呢個真係。
苗：得唔得㗎？我都唔敢喎。
[jingle]
以：歡迎返到嚟《絮言．狂想》第八十四集，我係以色列。
苗：我係三苗。
靳：我係靳尼啊！
以：大家好，我哋又去完旅行返嚟喇，係啊。恭……恭喜晒阿靳尼呢……
苗：係你又去完旅行返嚟。
靳：係……係你又去完旅行。
苗：我冇去嘅。
以：靳尼去完旅行返嚟！
苗：你哋兩個去完旅行，我冇去嘅。
以：係，係喇。係喇。大家都冇穿冇爛。
苗：好在啊。我見阿靳尼係好……好似好驚險喎，去啲……去啲冒險嘅地方喎。
靳：其實又唔係好……
以：係啊，我哋上次有提到少少啊。
靳：又唔係好驚險嘅，係好辛苦啫。係啊。因為去做咗好多運動啦，係啊。同埋有好多日冇沖涼啦，基本上就係。
以：喂。講呢啲？
苗：你要講多次你去邊喎？
以：嗱，你話有兩個啱啱去完旅行返嚟啦。其實呢，我哋仲有一個人喎。噉就係佢唔係去完旅行返嚟，佢係去緊旅行嘅，係喇。目前係去緊旅行嘅，都kind of我哋都去咗個trip返返嚟。係啦，噉不如介紹下呢個就係我朋友阿Melody啦，哈囉！
靳：哈囉！
苗：哈囉！
霽：Hi。大家好。
以：係啊，噉呢，佢就係喺Swansea啦，或者……係咪應該譯天鵝海啊？定係點啊？我都唔知喎。
霽：唔係㗎，係史旺……史……史雲斯。
苗：史雲斯。雞精……
霽：唔係，應該係噉。Swansea係有三個譯名嘅。即係佢有史雲斯、斯旺西、同埋斯旺市。但係冇人知邊一個係official囉。啊，天鵝海都係一個。
苗：Official應該冇㗎，係咪啊？
以：Official應該冇。
苗：即係應該唔會有一個係official，都係大家用㗎啫。
以：我有個非正式嘅……我……我譯嘅名，係叫咩盜……死喇，浢……浢口啊，好似。浢啊。係啊，係啊。
苗：浢係邊個浢啊？
霽：點解啊？
以：係三點水個豆字啊。我唔知有冇讀錯。
靳：三點水個豆字。
以：係我特登揾返嚟㗎。
苗：哦，係即係Tawe……哦，Tawe嗰個。
以：係啊，嗱。
苗：豆。口呢，就係Aber，就係河口吖嘛，Aber。
以：係啊。因為本身Swansea係英文名啦，佢個威爾斯文名係完全唔同㗎，佢係叫Abertawe。Aber就係河口嘅意思啦，之後Tawe就係條河嘅名囉。噉浢字係本來係一……都係一個河名嚟嘅，噉我見：咦，又河名，又可以聽落好似Tawe喎。我……呢個我譯嘅，係喇。冇人識嘅，係。第一次講出嚟嘅啫。
苗：第一次公開使用。
以：所以我都唔識……我都唔記得點讀嘅。係啊。但係anyway，係喇，噉你係喺呢個Swansea做乜嘢嘅呢？
霽：我而家係學生會入面全職做緊一個Welfare Officer㗎囉。
以：係。但係你嘅言論唔代表學生會立場，係啊。
霽：係啊，唔代表㗎。
以：係，好緊要嘅。
苗：個人……即係要整個字幕喺度喎。
靳：本人言論……
苗：嘉賓言論並不代表……
霽：唔係，我要維持返學生會嘅形象。即係陣間可能講得太high go wild，好多嗰啲鳩嘢啊，或者係太政治不正確噉樣，唔關學生會事嘅，我啫，我啫，我啫。
苗：好多人聽得明㗎。
靳：唔緊要，我哋係一個……我哋係一個好健康嘅podcast嚟㗎，你啱啱個鳩字都會嘟咗佢㗎。
霽：哦，好。
苗：你做乜畀嘢……
以：你講得出，我就唔嘟咗佢。
苗：你做乜畀嘢以色列做啊？
以：係囉。
霽：唔係，噉……
苗：你話嘟人哋就要嘟㗎喇喎，吓？
霽：噉我講多啲囉，每一句多加一個啦。
以：喂喂喂，你畀嘢我做喎，變咗。係。
苗：OK喎。
以：嗱，噉我哋噚日呢……即係講開你個名啦，我哋噚日喺度傾偈啦，噉就係因為你就住喺威爾斯啦，噉我就發現呢，我聽人講呢，而家有一個係……你嗰代？係咪……係咪我係老人家？
靳：你……你嗰代。
以：係而家後生一代啊。
苗：而家啲後生呢……
以：好……好興嘅一個女仔名，就叫Alaw。
苗：Alaw。
以：Alaw。係啊。係一個威爾斯名，係。佢個意思就係melody囉。
苗：A-L-A-W？
以：係喇。
霽：A-L-A-W？
苗：Alaw。
靳：A-L-A-W。
以：係，就係旋律嘅意思囉。之後我就諗：咦，係喎，咁啱你個名係可以譯……譯入一個……一個即係難聽啲講，公廁嘅威爾斯文名。
靳：我……我就係啱以為「阿劉」係廣東話嚟㗎。
以：係咪啊？唔係啊。
苗：雅……
以：佢個姓冇咁行㗎。
霽：我姓練習個練。
苗、靳：哦。
以：係咪好型啊？
苗：幾型喎。
靳：好型喎，呢個。
以：係。噉我哋點識嘅呢？其實都……都同絮言係息息相關，因為其實我哋係因為三苗而識㗎。
苗：係咩？
霽：你記唔記得點解啊？
苗：我記得有個post係唔知乜嘢……喺Threads度唔知有個post囉，跟住我就之後就冇乜記憶喇。
霽：嗱，係純粹呢，係我有一排趕緊deadline好大壓力啦，跟住身邊就好多Welsh嘅人，就喺度撩佢哋講啲independen(ce）嘅嘢。噉我嗰晚就出咗個post，我就話：我唔要……我唔要我哋乜乜獨立啦，要所有全世界都要獨立，威爾斯獨立、蘇格蘭獨立噉樣。噉……唔係，但係……但係interesting個位係呢……唔係，嗰個post下面，其實係有一堆人都係comment問我話：第一下諗緊點解你會喺威爾斯親王醫院住咗三年。你有咩病住咗三年？
苗：喺威爾斯住咗三年……
靳：喺威爾斯住……
苗：OK喎，呢個。
以：呢兩條友呢，聽我講威爾斯多呢，已經冇嗰個反應㗎喇。
苗：我冇啊。
以：但係我感覺上香港人，正常都係會諗咗醫院先嘅。
苗：啱啱get到啊。係喎，入咗威爾斯。
靳：入咗威爾斯三年都幾嚴重。
以：昏迷不醒。
霽：所以……所以三苗係少數知道我講緊啲咩嘅人。跟住之後我㩒入個profile就係：吓？蘇格蘭嘅獨派港人？好少有喎，然後我就……
苗：我冇……我個profile係冇獨派㗎喎，我係……我講……
霽：嗱，我唔知……
以：爆你大鑊！
苗：篤我出嚟？報串？唔好話畀Kier聲……聽。
霽：唔係，總……總之就係我……我……唔係，跟住我係……我係講咗句話：威爾斯幾時有獨派嘅港人？然後三苗就tag咗佢出嚟囉。
苗：哦，係啱啊。
以：之後我就話：喂，嗱嗱嗱嗱嗱嗱嗱嗱嗱嗱嗱，咪……咪噉……咪噉樣塞字入我口！係喇，我等……起碼等我宣誓埋先！之後再算。
苗：用威爾斯文宣誓完就……就得喇，係咪啊？
以：前提係可以做到，呢個比較難啲。係喇，呢個就係我哋點識個故事啦，之後呢……阿……阿Alaw呢，係喇，就……呢幾日就走咗上嚟曼城揾我啦，之後我哋就噚……你前晚先到，好忙㗎你。
霽：唔係，其實technically我唔係你揾你嘅，純粹係因為我要去嗰個Wrexham呢，係……梳，唔係，係真係好遠囉，我南威爾斯去北威爾斯係要講緊五、六個鐘囉，噉不如我前一晚上嚟Manchester，跟住第二日再落去會快好多。
以：係啊，係啊。之後我哋就一齊去咗Wrexham，睇呢一個Eisteddfod啦，即係威爾斯一年一度……唔係，最大嗰個係一年一度啦，係喇……嘅文化節嘞。
苗：「企喺度」。
以：「坐喺度」，坐……係喇。
苗：坐……係喎。
靳：「坐喺度」。
以：「坐喺度」嘅意思，係喇。
苗：因為我諗咗嗰啲……嗰啲石呢，佢戙喺度吖嘛，噉所以係坐喺度，啲石。
以：話說我成日都搞錯呢幾個詞語，不過我哋可以陣間再講，係喇，企同坐呢樣嘢，係喇。因為呢，我哋想講返我哋上次講緊嗰樣嘢喎。
[07:34]
以：就係呢，阿靳尼呢，你近嚟……去咗喇，今次……去咗某個地方喇。係，大家記唔記得呢？
靳：係啊，我去咗呢個……如果唔記得，喺comment問返。跟住對返答案。
以：係喇，係喇。
苗：博流量！
以：但係，嗱，記得都好，喺comment度寫，睇下你啱唔啱啦。
靳：係。我咪去咗哈薩克同埋呢個吉爾吉斯囉。
苗：嘩。
以：係啊。
苗：都算係冷門嘅地方喎……
以：有咩感受啊？
苗：對於香港人嚟講。
靳：冷唔冷門呢？我有個感覺，就係可能嚟緊幾年開始會冇咁冷門，因為越嚟越多飛機去，好似遲啲會開直航去阿拉木圖定係阿斯塔納嘅，好似。
苗：哦，香港呀？
靳：係喇，即係都係哈薩克嘅城市噉樣啦。係喇。
苗：OK。
以：哦，係咪一帶一路㗎？
靳：係一帶一路㗎，係得確係一帶一路㗎，係啊，係啊。
苗：冇錯。
靳：沿途係見到好多中文㗎。
以：哦。咦，嗱，呢個就係你嘅research嘅一部分喇！沿途見到好多中文，首先有呢樣嘢先。
苗：Linguistic landscape啊。
靳：喺……喺啲唔……唔會特別發覺嘅地方見到中文噉樣啦。
苗：佢嗰度好法國㗎咩？
靳：唔法國嘅，我諗俄國比較多啲，法國就會少啲。係，係喇，我係去咗十四日嘅哈薩克同吉爾吉斯嘅，噉就同幾個中學同學一齊去噉樣啦。
以：係咪全程都露營啊？
靳：唔係全程都係露營嘅，係有幾日喺城市嘅，但係喺吉爾吉斯，大部分嘅時間其實都係行山同埋……即係喺呢啲營地度住啦，其實就真係冇自己紮營咁犀利嘅，因為我係冇相關嘅知識嘅，係嘞。我都係被半……半知會嘅情況之下，即係做咗一啲比較辛苦嘅運動，就係行山噉樣喇，噉就行咗四日山噉樣喇，噉所以你見到我而家呢，係一嚿炭嘅狀況嚟嘅，因為我係搽得唔夠防曬嘅。係喇，但係啲皮已經甩咗喇，噉所以而家就叫做好睇返少少啦吓。但係都係好黑噉樣喇。
以：幾時都咁好睇啊。係，大家如果聽緊嘅話呢，可以上YouTube睇返阿靳尼而家咩樣啊。
靳：係，係喇。噉就……辛唔辛苦呀？少少啦，就因為行咗四日山啦，基本上係由一個二千幾米嘅地方行咗上三千九百幾米，跟住再落返返嚟噉樣啦。

The rest of the transcript is available to Patreon members.