如果你有睇我條多語言片，可能會記得，我籌辦咗一個podcast。
個idea係喺我七月尾闊別香港嘅飛機上諗出嚟嘅，經過兩個月嘅計劃、構想、測試，而家終於可以好自豪噉講，第一集已經錄好，準備出爐喇！
由最初嘅構思，去到搵咗兩位朋友一齊主持，傾咗咁耐，叫做有個方向，知道我哋想做一個點樣樣嘅節目畀大家。每集將會圍繞一個同語言有關嘅主題去討論，又或者抽少少時間介紹某隻語言。
而最核心嘅問題就係，點解我哋要搞podcast呢？
唔怕同你講，我由頭到尾係諗住一雞兩味。
我喺2015、6年左右發現咗網上所謂嘅polyglot community（多語言者嘅群體），所謂多語言者引伸為語言迷，即係世界各地對學外語有興趣嘅人所組成嘅，只要對語言抱有熱忱，即使係初哥，佢哋亦都好歡迎。
Continue reading
落筆嘅今日，已經喺英國揸咗一個月車。早兩年換個英國牌返嚟（有興趣嘅留言，我遲啲再講），其實係貪得意用嚟做身份證明，但係我嗰時住嘅牛津根本係歧視車輛。而家搬咗出大城市，又頻繁搬嘢，開始有揸車嘅需要，所以一個月前就買咗。
大家都知道香港係跟英國右軚。但係揸落就發覺，喺啲細節位有少少分別。有小部份係因為呢邊大國家，由一個又一個接壤嘅中小城市組成，所以規劃都會有些少唔同。平時因為專注喺我擅長嘅範疇，冇乜講生活嘅事，但係呢啲小不同幾有趣，就約略寫下啦。
首先戴頭盔：我喺邊度揸車都仲係半個初哥。
Wise低價國際轉賬，首次免手續費
Big Brother is watching，去到邊度都要保護自己！買兩年NordVPN，即送4個月！
VOXI送你£20加入無限社交媒體、無限睇片嘅平靚正電訊商
brsk光纖入屋，終於擺脫英國龜速上網
同我學外語
送你US$10搵老師學語言
講咗最明顯嗰個先。英國仲係用英制嘅單位，所以英國揸車全部都講英里，行路講碼（yard，三尺，用開公制嘅話大概係一米），想長住嘅最好儘快適應。一般大路行30mph（~50kmph），小路行20mph（30kmph），公路由40（65）起跳，我目前揸過最快嘅係70（110），係大嶼山嘅境界！
沿路間唔中都有相機測車速，個牌同香港一樣，連個橙黃色嘅相機都一樣樣。
我有一次等等下紅燈，突然轉咗黃燈，仲要喺度眨，即刻窒咗一窒！見其他人行我先行。
Continue reading
拖咗咁耐，終於認真寫下個粵文blog。（其實一早開咗，但係一直都冇乜寫、冇乜執佢。）
留意返，依家左邊menu有得揀語言。唔係每篇文都雙語，係嘅話會轉咗去相應嘅英文版，冇嘅話會去咗英文首頁。
呢個blog 2015年開，雖然嚴重地斷斷續續，都叫做寫咗五年。寫咗五年英文，然後又喺英國大學畢業，反而囉囉孿、要的起心肝開粵文版，都幾有趣。何況雙語blog係用雙倍嘅工夫，嚟分散自己嘅客源。
咩係粵文？好簡單啫，講英語寫英文，講粵語咪寫粵文囉。有人唔變調讀jyut6 man4，我就跟咗變調嗰派講jyut6 man2，呢啲嘢真係好隨心。
諗起Language Stories裡面福建話嗰集提到，人離開咗家鄉，會特別珍惜自己嘅母語。計埋我去交流嗰年（咁啱就係我個英文blog開張之時），出咗埠三年，都係時候進入嗰個心境。況且而家香港搞到噉，睇怕返去嘅機會少之又少。
我估，彷彿係嗰網上建立一個bubble畀自己，將母語嘅思緒歸納、抒發出嚟噉啩。再者，學咗咁多外語，好似會潛意識想保護母語，會想喺腦海裡面劃返一個安全地帶出嚟畀佢唞氣。
Continue reading
上次講過下變格法（cases）係點樣嘅概念，同埋可以點樣去理解。然之後嘅問題就係：我而家學緊德文嘞，可以點樣記住呢啲嘢？？點樣喺考試對話裡面用得上、用得啱？？？
阿媽係女人嘅答案，就係練習同複習。噉但係到底有咩方法，令複習更加有效率，而且記得啲規則之餘，仲可以流利噉活用呢？
我從經驗講，有幾點如果長期做到嘅話，係的確可以達到呢啲目的。
要記得，母語使用者唔讀係唔會識我哋學緊嘅嗰啲規則㗎。佢哋有嘅係語感，即係幾時用呢樣係啱，幾時用嗰樣係「怪怪地」。
換言之，一個德國人，理論上係會對die Nacht（主格）同der Nacht（與格），有少少唔同嘅抽象感覺。
呢個，就係我哋嘅最終目標。
Continue reading
上次講咗唔少歐洲語言裡面嘅名詞常見嘅特性——詞類（陰陽／男女），大概解釋咗下點樣去諗呢個概念，會比較容易接受、熟習。而家將話題轉去一種比較少見少少嘅特性，雖然佢淨係喺某啲日耳曼（如德文）、斯拉夫（如俄文）、或者古語言（如拉丁文）出現，但係非常有趣，而且一旦通咗腦裡面嗰個思路，學起嚟都事半功倍。
我有好多朋友喺大學時學德文，一去到第二個學期左右，都會畀名詞、形容詞變格法嚇一嚇。原因係喺呢啲語言裡面，每個名詞都要根據佢喺句子裡面嘅作用，有唔同嘅詞尾。四個格，加埋男男女女噉乘返開，每個字都好似要死背成個表噉，好易令人望而卻步。所以我想喺呢道嘗試解釋一下變格呢個概念，等下次有老師笪個表出嚟嘅時候，都知道發生緊咩事吖。
格，講到好高深噉，其實就係一種統稱，指改變一個詞嘅樣，去表達佢嘅作用。其實，你好可能已經喺日常生活用緊。
Continue reading
上回講咗我點樣從零開始，受香港抗暴之戰啟發，構思咗一個將真實事件戲劇化、探「暴動」同「暴政」嘅劇本。然之後，就嗱嗱聲搵人寫劇本。
唔試唔知，搵人寫歌劇嘅劇本都幾難。一方面要識發展一個故事，同埋將個故事濃縮、設計成一個舞台表演，另一方面要識用（相對上比較）詩嘅語言嚟創作，最好有啲音樂感添。喺我呢個project裡面，就再加上要熟識香港時事、但係又要用英文寫嘅要求，更需要有至少一兩個月嘅空閒時間投放入去。
我一開始試過問喺自己嘅奇博學院（Keble College）識嘅創意寫作學生，佢本身有同我打算夾弦樂四重奏（最後拖下拖下拖到武肺），都好有興趣幫手寫，但係暑假忙住寫論文，皮爾修。又試過搵暴大音樂系有英詩底嘅師弟墊屍底，可惜佢文筆又生疏，又忙住搞音樂會。
最後friend搭friend搵咗一個寫開英詩嘅，見住佢有寫開……性質相近嘅題材（放過佢啦国安叔叔），就大膽向佢提出呢個構想。從此，呢套劇，就開始由一個人嘅project，漸漸變成一team人嘅project。
Continue reading
話說，我寫咗套歌劇。
明明由細到大都比較少接觸歌劇呢個媒介，完全冇諗過成世人會有機會參與製作，更遑論喺學生時期。點知因緣際會，就喺牛津成為咗哎吖歌劇作曲家。做完先知，喺英國嘅作曲學生之間，係幾咁平常嘅事。
套劇十一月尾上演，三月放上YouTube，南華早報有個鬼鬼地黃黃地嘅記者仔見到就嚟訪問我，仲好有心機噉搵曬我成team人傾。後來遲遲未見報，諗下都知應該係上頭㩒住咗。報館拖到「武肺，好忙」嘅藉口都冇埋，就出現咗国安法。我見反正出街無望，心諗，頂，我自己寫算。終究係美好嘅回憶嚟，值得寫低，將佢一一記錄落嚟。
按：獲原創者批准，節錄並翻譯自《福建話的沒落與復興：被人調包的母語》嘅福建話原文。請去講福建話運動支持南方語言！
自從二十世紀開始，中國南方嘅語言開始沒落，由社會頂層開始，再漸漸向低下階層蔓延。因為講南方話嘅領袖都開始捧起北方嚟嘅華語（官話）嘅地位，所以推動咗成個社會跟佢哋轉去講北方話。
成件事要由1895年開始講起。嗰年，清朝政府喺甲午戰爭輸咗畀日本。畀自己以前嘅朝貢國打低，對中國嘅掌權人嚟講，無疑係好大嘅恥辱。之後，開始多咗好多人走去日本同西方國家讀書，希望將新嘅知識帶返中國。
其中一樣由西方世界引入嚟嘅理論就係種族主義，呢種主義講嘅係人類作為一種物種，係可以分成唔同嘅「人種」嘅。
Continue reading話說我最近喺大學上緊拉丁文暑期班喎。我本身已經對唔少歐洲語言都頗爲熟悉，見到啲複雜嘅語法都唔陌生。但係睇住個老師講解，又快又唔清楚，仲成日叫人死記硬背，就覺得，如果第一次接觸哩啲概念，頭都應該大埋。所以就諗，不如我一路學，一路喺哩道寫下我啲心得，俾有興趣嘅人睇下、認識下，都唔錯吖。
一嘗試講文法，啲人多數一係就從語言學角度講，一係就剩係同你講你要點點點用呢個字，無乜時間解釋箇中嘅原理或者因由。爲咗滿足啲好似我噉無乜語言學底、但係有鍾意一路讀規則一路思考下「點解」嘅人，我就決定從學外語嘅角度出發，講下啲文法嘅概念可以點樣去理解。
Continue reading