如果你有睇我條多語言片，可能會記得，我籌辦咗一個podcast。

個idea係喺我七月尾闊別香港嘅飛機上諗出嚟嘅，經過兩個月嘅計劃、構想、測試，而家終於可以好自豪噉講，第一集已經錄好，準備出爐喇！

由最初嘅構思，去到搵咗兩位朋友一齊主持，傾咗咁耐，叫做有個方向，知道我哋想做一個點樣樣嘅節目畀大家。每集將會圍繞一個同語言有關嘅主題去討論，又或者抽少少時間介紹某隻語言。

而最核心嘅問題就係，點解我哋要搞podcast呢？

唔怕同你講，我由頭到尾係諗住一雞兩味。

1. 語言議題大眾化

我喺2015、6年左右發現咗網上所謂嘅polyglot community（多語言者嘅群體），所謂多語言者引伸為語言迷，即係世界各地對學外語有興趣嘅人所組成嘅，只要對語言抱有熱忱，即使係初哥，佢哋亦都好歡迎。

隨即，我發現呢啲polyglot好多都有個blog、個YouTube、或者個podcast，向同儕分享佢哋嘅體會、討論同語言相關嘅概念、事物，或者向有需要嘅自學者提供協助。

弊在，因為係一個國際嘅community，呢啲絕大部份嘅polyglot，不論喺邊度出身，一律都會用英文，最多間唔中講下外語曬冷。

香港人平均英文水平唔差，但係又未去到北歐人噉，可以個個當英文係母語噉用。仲有，點解成為多語言者，一定要由英文入手呢？可能唔少香港人（或者粵語圈嘅人）都對英語文化興趣唔大，但係好鍾意日韓等語言，想自學嗰啲語言，而又因為語言上隔咗一層，未能向呢啲「大師」學習。

喺學術方面，都好多香港人係對譬如漢語族等題目尤其有興趣，但係外國啲podcast就下下都係講緊英語世界發生咗咩事，講少少其他歐語已經偷笑。

所以我把心一橫，決定廣東話係值得有自己嘅語言podcast。母語者八千萬，學習者亦都升緊，總有一批語言迷有興趣聽。

由於我同其他主持興趣廣泛，從音樂到社科、科學等等等等，而語言喺生活中係無處不在，所以我哋涉獵嘅範疇可以好廣，亦都可能不時會有嘉賓上嚟討論。

2. 粵語學習材料

正如上一篇文講，人離開咗家鄉，就會特別珍惜母語，想保護佢喺心中嘅地位。雖然廣東話同死亡仍然離好遠好遠，但係佢畀某政權主動打擊，係真嘅。有啲人，就想發展（未死得住，唔准講「保育」）廣東話嘅可能性，或者提倡本地人喺生活中多啲用。

而我不嬲係「向世界出發」少少，一直對外地風土人情有濃厚嘅興趣，亦都出咗國住。所以與其加入喺香港推動廣東話嘅行列，我比較想喺國際層面推廣廣東話。就算搲唔到好多外國人學粵語（其實都比你想像中多㗎！），起碼希望可以令粵語作為一種語言，得到更多人認受、認識。

睇住粵典、冚唪唥等教學材料出現，遺憾一直都冇乜能力丼時間落去幫手。交流嗰一年之後，誤打誤撞加入咗Cantonese Conversations嘅團隊，參與製作畀中級學習者嘅語料。我主要做粵英翻譯嘅部份，亦都有份校對粵拼，熟識咗成個製作流程。

而家喺牛津畢咗業，正正想做返同一件事。作為有幾年經驗嘅語言自學者，我知道一去到中級嘅程度，係有必要大量吸收聽讀嘅材料，先可以幫個腦熟習呢隻語言，自然而然噉汲取詞彙、句式。而Cantonese Conversations嘅發起人Olly就同我講，廣東話好缺乏呢啲材料。

噉梗係啦。明明廣東話母語者接近德文，但係世界上認同佢重要性嘅出版社少之又少，唔會好似北方話、歐洲話噉瘋狂出自學書。走去睇香港劇，字幕又係北方話，認真嘅學員都要自己嘗試寫返粵語出嚟，或者畀錢人寫。學西方語言嘅又好興對住本書聽audiobook，但係香港又唔興audiobook，而就算有，本書都係北方話。

講咗咁耐，你都明我咩意思。就係我要透過呢個podcast，嘗試去填補呢個空缺。雖然係以語言為主題，但係正如我講，上至天文、下至地理，希望可以引起學習者嘅興趣去多聽、多睇，甚至拋磚引玉，引發更加多人去整呢啲語料。我會為每一集內容忠實寫落嚟，幫助學習者邊睇邊聽，學習生詞。

所以，?實我個網站、我YouTube，或者Facebook/IG專頁啦。好快出㗎喇。