靳：Leo十四世吖嘛，噉咪即係里奧十四世囉，係咪啊？
苗：噉但係佢又唔係喎，佢係一個字喎，譯做個良字喎。良好個良喎。噉所以啲人又喺度問：啊，點解Leo唔係里奧呢？點解係良咁奇怪，個NG喺邊度嚟㗎？
以：係咪想好聽啲咋？覺得佢好人，係咪啊？
苗：即係其他就唔好嘅，即係佢係第十四個好嘅教宗，有二百幾個，得十四個好嘅啫。
靳：好似你打呢個咩《太鼓之達人》嗰啲音game，跟住就會有良……
以：良……
靳：可……
苗：乜嘢啊？
以：之前嗰個係可，而家係……
靳：良、可、同不可吖嘛。佢就係良嘅。
以：黐線。
靳：因為之前可能有一個就係可嘅教宗噉樣。
苗：哦，係咪啊？
以：哦，呢個就係個review嚟嘅。即係大家就抌個印落去，一上台就……一上台就「良」，睇好佢喇，因為美國人噉樣。
[jingle]
以：歡迎返到嚟《絮言．狂想》第八十一集，我係以色列。
苗：我係三苗。
靳：我係靳尼啊。
以：喂，我哋呢，睇到片嘅人，或者我哋主持而家有緊video call啦，就見到三苗背景好似唔同咗樣嘅喂！唔認得喎。邊度嚟㗎？
苗：其實可能啲人都冇理個背景係咩。轉咗都未必知㗎。
以：哎啊，噉所以咪講畀佢知囉！
靳：所以咪……咪要知囉！呢個好重要㗎。
以：揭你瘡疤！
苗：冇嘅，純粹就係搬咗屋啫，然之後所以就有個新嘅background嘞。就係噉。
以：嘩，但係都幾似樣。
苗：好啦，我哋去我哋今日嘅topic。
以：怕醜。
苗：係啊，唔係，呢個係……
以：都見到你個殿軍嘅。
苗：稍微佈置下噉囉。因為本來係周圍擺啲嘢，而家仲係啲嘢周圍擺。噉所以係噉意……係噉意執一執後面囉。我係發覺呢，原來呢一個cam嗰個……嗰個角度，都真係幾闊㗎。佢睇到好多嘢，所以佢連我道門後面嗰啲我都睇到，不過算啦，我就唔理喇。本來我以為睇唔到嘅，嗰個位。
以：唔理喇。
靳：OK㗎，以色列會幫你剪咗佢㗎。
苗：係，淨係……淨係睇到……
以：睇心情啦。
苗：吓，噉㗎？
以：睇下擺唔擺你上thumbnail啦。
靳：得個頭兩邊㗎咋嘛，應該會。
以：正常都係嘅。所以咪……佢咪特登擺到你後面見到佢支冰島旗，見到佢個麻雀殿軍。
苗：仲有隻……
以：就喺正佢個頭後面，make sure我哋點剪都見到。
苗：仲有隻Highland Cow喺度。
以：係，係嘞。之後阿靳尼又唔知喺度玩緊啲咩喇。
苗：靳尼呢個係咩爛gag嚟㗎？
靳：玩燈啫。我見到大家……大家都容光煥發呢，得我黑面呢，所以我就拆咗個燈落嚟想睇下點樣……點樣……可以好睇啲。
苗：哦，我都有。係，我都係可以……欸，噉就容光煥發。欸，噉就黑面喇。
以：一個一個喺度玩打燈。
苗：玩燈啊。好玩唔玩……
以：好玩唔玩……玩……玩咩？下一句係咩啊？
苗：玩燈？
靳：玩咩啊？好玩唔玩玩咩啊？
以：我哋……我哋嗰次嗰集好似係好玩唔玩玩字囉，我哋嗰集係。
靳：係啊，講書寫系統㗎嘛，好似係。
以：我記得我哋有講過你嗰個咩聖誕禮物吖嘛，你個Language Games嗰本書。
苗：哦，嗰個好耐之前喇喎。
以：係好耐之前啊。個title係〈好玩唔玩玩字？〉。
苗：啊。嗰本書而家喺我呢間房入面。嗰度好亂㗎。
以：哦，所以三苗就特登執靚淨係我哋見到呢一忽，噉就畀大家睇喇。可以……就係到時……睇下睇唔睇到啦。不嬲都係噉㗎喇，其實。我屋企人嚟度都話：咦，你間房亂葬崗噉嘅？我話：唔係！上鏡嗰part唔係！係喇。其他就……
靳：上鏡嗰part好靚。
以：大家唔知㗎喇。最緊要呢樣嘢啫。
[03:47]
以：好，講起有咩新update呢，好似最近全城熱話喎……全球熱話喎！
苗：全球啦，係囉。
以：全球。
靳：全球。
以：我哋個世界觀好窄㗎嘛，所以全城……全城係成個愛丁堡，係咪啊？唔係。
苗：嘩，全個梵蒂岡城。
以：係，成個梵蒂岡城，其他冇人care㗎喇。
苗：全城熱話。
靳：係成個。係喇。
苗：係啊……
以：淨係得嗰一個城。
苗：係，都係唔知幾時出啦，不過最近……即係我哋錄呢，就係有咗新教宗幾多日啊？兩日到咋喎，係咪啊？唔係好耐。
以：係啊！一日兩日？
靳：一日！係咪啊？等陣時，一日定兩日啊？
苗：兩日喇。佢係五月八號，今日係十號，佢係五月八號……
靳：今日已經十號嗱？嘩！已經過咗兩日喇。
苗：係啊。
以：係啊，時間過得好快啊。
苗：兩日之前呢，就……就係我哋就知道有呢個新嘅教宗啦，噉就係天主教嘅教宗啦。噉就叫做……叫做咩啊？
以：唔係其他教宗。
苗：係啊，有好多其他教宗㗎嘛。即係最多人信嗰個教嘅領袖啦，係啦。
以：最多人信嗰個有教宗嘅教。
苗：啊，係囉。
以：好似其他教冇教宗，其他大……
苗：有嗰啲冇咁大囉。
靳：唔係有教宗先至叫宗教㗎咩？
苗：即係教主同主教噉樣，就有宗教同教宗。
靳：好似……好似啱喎。
以：咦？咦？
苗：不過唔關事，主教同教主都係兩個……都係人嚟嘅。但係宗教同教宗係……得一個係人嚟嘅。
靳：噉如果我校鬧鐘呢？
以：就有人嚟到嗌醒你嘞，係，好。
靳：好。
苗：噉唔係就唔使有人嗌醒你啊！
靳：又啱喎，係，啱。
以：嗰個鬧鐘就係嗰個人吖嘛，係嘞。
苗：哦，係噉嘅，原來。
以：我見呢，嗰日呢，三苗有喺度睇直播㗎喎！即係其實你係咪好關心呢？你係咪……你係咪天主教教徒嚟嘅？快啲！講！
苗：第一，我唔係天主教教徒，我亦都唔係天主教嘅環境長大嘅，純粹係當一個……一個歷史嘅事件去……去睇囉。即係好似睇其他國家選舉噉樣，就算嗰個國家唔係……同我冇乜關係嘅，噉我都關心下囉，即係都係啲……呢個教宗都係影響力好大嘅人嚟㗎嘛。即係佢雖然冇一啲好實際嘅權力啦，可能佢唔可以出兵打邊個……即係以前可以啦，噉但係而家就唔得啦。
以：以前可以啦，係啊。
苗：噉但係佢嘅……
以：或者以前叫人哋出兵打。
苗：……影響力都係好大。噉因為好多天主教徒啦，呢個世界。噉有……應該都有十幾億啦，係咪啊？都有超過十億嘅。
靳：十幾億。
以：嘩，你噉樣問起喎。
苗：噉而佢嘅……因……因為我唔知啦，即係如果有天主教徒可以更正我。有一樣嘢叫做咩papal infallibility啊，係咪話？
以：嘩，咩嚟㗎？
苗：即係教宗講嘅嘢，係唔會錯㗎囉，因為佢係……
以：吓？
苗：……神嘅傳話者噉樣嘅……嘅……嘅概念囉。我唔係好知係咪啱啦。
以：定係喉舌啊？
苗：即係佢係代表神講嘢，噉所以呢……所以嗰個教宗有啲咩立場，其實係好影響到呢個天主教徒囉。即係之前上一位教宗阿方濟各，噉佢都係……因為佢自己……即係相對上比較開放嘅立場，噉就影響咗好多國家……尤其係南美洲啦，噉佢自己係南美洲人啦。就影響咗好多南美洲啊、拉丁美洲啊，嘅天主教徒囉。
以：啲天主教國家。
苗：係啊，係啊。
以：尤其是，係啊。我想講呢，你話「好似睇緊其他國家選舉噉樣」，其實唔係囉。
苗：係真係……
以：係直情係睇緊其他國家選舉囉。
苗：噉又係嘅，係。梵蒂岡係一個國家。你啱，你啱。
靳：佢係睇緊一個國家選舉。
苗：即係教宗佢同時係……
以：係一個國家，係一個選舉。
苗：同時係……教宗同時係梵蒂岡嘅君主嚟㗎嘛。即係佢有兩樣嘢，佢有聖座呢樣嘢，聖座就係個教會嘅。噉佢教會嗰個阿頭，就係教宗啦。噉但係佢個國家呢，梵蒂岡城呢個國家嘅領袖，就係……就係叫做同一個人囉。即係佢係同時佔咗呢兩個位置。
以：係國王囉。
靳：聖座係咪真係Holy See啊？
苗：係喇，係啊，聖座就係Holy See，跟住梵蒂岡城就係個國家囉。即係佢有少少唔同嘅概念。即係嗰啲……即係……即係類似共產黨同……同中國，即係類似嗰啲concept啦。其實真係好似嘅。即係國家主席同埋共產黨總書記，兩個身份，噉但係同一個人嚟㗎嘛。係囉。
以：係，明白。
苗：噉所以我哋真係見證緊一個國家嘅選舉。噉而梵蒂岡呢，亦都係一個絕對君主制嘅國家嚟。噉所以呢，我哋係見證緊一個……唯一一個投票選出嚟嘅絕對君主囉。
以：係，正啊。就唔係傳位嘅。
靳：嘩，好神奇啊，你噉樣一講就。
以：係啊。係好獨特嘅，呢個。
苗：即係全世界有幾個唔同嘅絕對君主，噉譬如……譬如咩沙地阿拉伯，仲有啲咩啊？咩奧曼（阿曼）嗰啲呢。噉佢……但係佢哋係純粹係……即係一代傳一代噉樣㗎嘛，佢唔係人哋選出嚟囉。
靳：世襲嘅。
苗：係喇，世襲。
以：係。噉即係如果梵蒂岡個領袖，佢心情差，佢可以斬你頭㗎喎。係咪呢？理論上。
苗：理論上呀？我唔知係咪理論上可以。
以：你喺……你喺梵蒂岡嘅話。
苗：係咪啊？
靳：唔熟悉呢個……
以：絕對君主吖嘛。
靳：唔熟悉呢個梵蒂岡嘅法律。
以：係，我哋要check下先。我哋得閒去睇下。
苗：即係你衝出去……你跑快啲就已經走咗，離開咗梵蒂岡喇喎。
靳：離開咗佢範圍。
以：你就係逃犯！
苗：逃犯啊！要羅馬警察捉你。
以：係啊。
靳：唔咪，啲瑞士衛隊會走出嚟。
苗：哦，係。
靳：因為梵蒂岡嘅軍……佢係咪軍隊呢？我就真係唔知道喎。總之佢有一個衛軍，就係……
苗：苗：應該類似嚟嗰啲嘢嚟㗎，係啊。
靳：就係由瑞士請返嚟嘅。噉呢個係已經沿用咗好多年嘅傳統嚟㗎喇嘛。即係佢哋每年都會係去瑞士揾啲精壯嘅天主教徒嚟做佢哋梵蒂岡嘅衛隊。噉就持續咗好似幾百年㗎喇，呢個傳統已經。噉所以佢哋傳統嘅衛隊全部都係瑞士人嚟嘅。就係瑞士衛隊嘞。噉佢哋着啲衫呢，係好……好正㗎。好有年代感㗎。

The rest of the transcript is available to Patreon members.