拖咗咁耐，終於認真寫下個粵文blog。（其實一早開咗，但係一直都冇乜寫、冇乜執佢。）
留意返，依家左邊menu有得揀語言。唔係每篇文都雙語，係嘅話會轉咗去相應嘅英文版，冇嘅話會去咗英文首頁。
呢個blog 2015年開，雖然嚴重地斷斷續續，都叫做寫咗五年。寫咗五年英文，然後又喺英國大學畢業，反而囉囉孿、要的起心肝開粵文版，都幾有趣。何況雙語blog係用雙倍嘅工夫，嚟分散自己嘅客源。
咩係粵文？好簡單啫，講英語寫英文，講粵語咪寫粵文囉。有人唔變調讀jyut6 man4，我就跟咗變調嗰派講jyut6 man2，呢啲嘢真係好隨心。
點解寫粵文？
諗起Language Stories裡面福建話嗰集提到，人離開咗家鄉，會特別珍惜自己嘅母語。計埋我去交流嗰年（咁啱就係我個英文blog開張之時），出咗埠三年，都係時候進入嗰個心境。況且而家香港搞到噉，睇怕返去嘅機會少之又少。
我估，彷彿係嗰網上建立一個bubble畀自己，將母語嘅思緒歸納、抒發出嚟噉啩。再者，學咗咁多外語，好似會潛意識想保護母語，會想喺腦海裡面劃返一個安全地帶出嚟畀佢唞氣。
Continue reading