- 絮言．狂想#079：心靜自然快 - 2025-04-11
- 絮言．狂想#078：有cert有真相 - 2025-03-21
- 絮言．狂想#077：Monolingual（單語）& Monomanual（單捂） - 2025-02-28
今日係2021年二月一號。
弊。好似仲係未接受到2021已經開始呢個事實添。
但係我今決定咗定一啲語言學習嘅目標。仲可以同大家分享下我做緊嘅嘢添！
點解等一個月先訂立目標？
個個都許新年願望，我偏偏就遲咗一個月。點解呢？
一嚟，而家許已經馬後炮。我上個月諗緊第啲嘢……
二嚟，好多人喺一月一號，都會誇下海口，訂立啲好有大志嘅目標。因為新年許嘅係願望，所以多數人都係諗啲長遠嘅嘢，例如學一隻新語言．或者建立新習慣。
如果一個月後冇可觀嘅進度，好容易會氣餒。
所以我就等咗一等。我想睇定啲，feel下2021年諗住點樣整蠱我先，又或者乜都試一試，然之後先根據呢啲經驗，訂立一啲可行嘅目標。
語言學習目標
雖則語言界嘅我，慢慢變成緊一個網上嘅創作者，但係我首先係一個語言迷。所以我哋由語言目標開始啦！
而家嘅狀況
我成日都要阻止自己開新嘅坑、學新嘅語言，以免分身不暇，但係老實講真係好難。我就係噉樣明知我最想提升我波蘭文同台語嘅能力，都開始認真學希伯來文。
去到而家，希伯來文成為咗我日常嘅一部份，我又開始畀其他語言分散緊注意力：早兩個月籌備緊手語嗰一集嘅時候，玩咗一陣英國手語；我又想救返生我嘅法文；我又想將波蘭文同瑞典文都推上C1嘅高級，等我可以真正感覺到佢哋係我嘅一部份。
波蘭文可能係我第一集想認真帶上真．C1嘅語言。德文同瑞典文都喺嗰個level附近揈緊，但係我一唔得閒，就由得佢哋跌一跌。
到底有冇得玩語言之餘，同時間唔分散專注力呢？我都仍然覺得係得嘅，但係我有啲擔心。
計劃！
所以我開始畫緊一個每季嘅時間表。每幾個月，我會專注喺學或者提升一隻語言，玩（最多）一隻語言，然後再維持一兩隻。
而家嚟講，就會同過去幾個月一樣，分別係希伯來文、台語、波蘭文。
畀我呻一呻先：講希伯來文好好玩，但係睇書嘅時候真係好痛苦。唔單止因為文字既陌生又欠缺元音，好難掃讀，亦都係因為好難搵到啱水平嘅文去睇。
有啲語言，迫不得已要放手，始終時間有限，而且大腦係冇可能keep到咁多語言喺隨時用得嘅高水準。所以目前嚟講，我會放低冰島話同埋日文。但係我都會去到一個中級左右嘅level先放低，等我想再pick up返嘅時候，好快會返到嚟。（第九集有提到，只要去到一個level可以講到大部份日常嘅話題，就好難會完全消失。）
我一路學呢啲語言，會繼續一路搵啲有用嘅資源同埋工具，喺呢個blog上面為大家介紹。講開又講……
網站上嘅改變
如果你睇咗我個blog一段時間（多謝晒！），你可能會留意到，我開始寫少咗文，將啲時間擺喺其他平台上面。
我發現，如果我想放棄某種神祕嘅大師嘅形象，將自己表現成一個真實、有性格嘅人物，拍片係有效過寫文。一幅圖勝過千言萬語，一條30fps嘅片就有九百萬言九千萬語。好似抵玩啲。
所以我啲學習進度、挑戰、報告等，所有關於我嘅嘢，都會去咗我個YouTube頻道上面㗎喇。
但係唔好走住！我仲會一直寫下學習方法同埋評測語言產品。只不過我已經有自己嘅學習模式，所以已經一排冇試過新嘅方法。如果你有啲咩方法或者工具，想我從我嘅角度討論下，不妨留個言同我講吖！
當然啦，自從我喺網站上增添咗粵文版，都分散咗寫文嘅時間，所以可能每隻語言嘅文會少咗，但係我會一直寫嘅！
我個YouTube嘅方向
你可能會諗：好囉，你擺多啲時間落channel，擺少啲落blog嘞。噉你諗住喺channel做乜先？
哈，睇住嚟啦。
成立到而家，有一堆唔同語言嘅片，同埋有《絮言．狂想》嘅影片版穿插其中。
某程度上，我係喺YouTube嘅空間建立緊一個語言迷嘅形象，介紹下我係點樣嘅人、我做乜嘢等等，同埋匯報下我學語言嘅進度（例如台語、希伯來文）。
我個頻道同個blog一樣，會繼續分為粵語同埋多語言嘅部份。如果你淨係對一個部份有興趣，麻煩你都耐心噉繼續訂閱先啦！
我可以肯定，我會一直講我有興趣嘅語言，或者講關於呢啲語言嘅嘢，一啲可能冇乜人知嘅嘢。話唔定我會拍片，教大家搞掂廣東話聲調、台語變調等等麻煩嘢添。我又可能會講下我嘅母語、文化。唔知呢？
個podcast又有咩大計呢？
語言及語言學節目《絮言．狂想》已經做咗四個月，接近十集嚕。
我哋而家研究緊唔同嘅節目風格，或者邀請咩嘉賓一齊傾偈。
我哋主要嘅目標觀眾唔單止有廣東話人，仲有中至高級廣東話學習者添。
其他內容
雖然我多數內容都同語言有關，但係其實我個網站標語係寫 language | music | travel.
我舊年寫咗一系列嘅文章，憶述我寫作同埋演出一套抗爭歌劇嘅心路歷程。寫到眼濕濕。
唔講你唔知，我成個blog一開始其實係寫一個月德國遊記，而且仲未寫完添……
之不過今年都冇乜旅遊可言，所以「旅遊」嗰part就變成咗居英佚事系列，尤其是係幫助嚟緊英國嘅香港人融入、建立新生活。我而家仲慢慢剪緊伯明翰搬屋記系列嘅片……
2021個人目標？
今年有好多嘢我想做。我而家仲gap year緊，乜都試下，發掘下我做啲乜嘢最適合。
即係點？我做乜都得囉！（……大概啦，我仲要好好教我啲學生嘅！）
我一定會花好多時間將新屋變成最正嘅屋企！
我亦都想從研究方向繼續讀書，喺作曲之間摻入語言學同文化研究嘅點滴。
亦都即係話，我會繼續開展各種創作，甚至可能比之前更加多樣化，同埋一有機會，就會同唔同嘅藝術人合作。
如果你有興趣追蹤我嗰一方面嘅工作，記住去?實我嘅音樂頻道啦。
2021會變成點，大家一齊拭目以待！
