打字快過你講嘢!速記神技點樣學?

(en sub/粵字)

StenoKeyboards Uni YouTube

Aerick

嘩,點解打得咁快,係咪出cheat㗎?

你係咪都想打得咁快呢?係就睇落去喇!

大家好,我係Israel!喺呢個頻道上面,我一般拍關於語言同埋學語言嘅片。但係今次就有少少唔同,就係想同大家講打字。我今日特登嚟到愛丁堡揾我哋《絮言.狂想》podcast嘅主持三苗,同大家講一個我哋嘅興趣。

大家都知道我哋鍾意學語言,噉今次我哋係唔係學一隻新嘅語言?

又算係,又可以話唔係啦!點解?因為我哋今次想同大家講一樣嘢,叫做速記。一個以前係寫字,而家愛嚟打字嘅方法。

乜嘢係速記?

佢同一般打字,即係我哋平時用嗰個QWERTY鍵盤,有咩分別?

第一,速記同打字最唔同嘅地方,就係速記係用音做單位,而唔係用字母做單位。佢目的係用說話嘅速度去輸入文字,唔係好似打字,你打字嘅時候,硬係會慢過講嘢!我盡咗力,但係都未去到講嘢嘅速度。

喺操作方面,最大分別就係打字嘅時候,每撳一個掣,就會見到一個字元喺電腦上面。但係你用速記嘅時候,係一次過撳幾個掣,好似彈琴彈一個和弦。而你每撳一下,電腦就會將你撳嗰幾個掣,轉換成你想要嘅文字。嗰啲文字,同埋你撳咩掣出乜嘢,就可以自己去加、改。

邊個用速記?

成個概念對大家比較陌生,到底有乜嘢人會用速記?

如果外國嘅話,通常會喺法庭上面用,用嚟記錄啲人講啲乜嘢。因為法庭好多時講嘢好快,同埋一定要好準確記錄每一個人講嘢。

第二,譬如你睇電視嘅時候,有即時字幕,有時都係用速記去打出嚟嘅。我睇BBC成日都見到啲字幕逐個逐個字彈出嚟,尤其是前排女皇逝世嘅時候,我喺度睇緊直播新聞,睇住下面啲字幕,多數會遲咗少少,但係都好快跟住佢講嘅嘢而彈出嚟。

呢啲你見到嘅嘢,都係速記做出嚟㗎!

點解學速記?

我哋又點解想學速記?

我哋一般都好鍾意學唔同嘅技能,可以刺激下個腦,而我哋又鍾意學打字打得快。我哋喺學速記之前,平時都成日練打字。但係其中一樣好緊要嘅嘢就係速記係有好多語言嘅元素,而我哋學速記嘅過程,就好似學緊一種新嘅語言噉。

之前我哋睇到一條片,有一個法庭速記嘅學生介紹速記。我哋睇到就覺得好似好得意,我哋係咪學到㗎呢?但係我又見到佢哋有特別嘅儀器,所以就唔知係咪好專業嘅嘢,普通人學唔學到。好似仲要喺大學讀,跟住又要考試,呢樣嗰樣。我哋呢啲凡夫俗子,做唔做到?

但係後來又發現,原來係得!於是我哋就好想學識呢樣嘢。

如果你聽到呢度,都有興趣嘅話,記住喺下面撳like、訂閱,同埋撳埋嗰個鐘仔,繼續睇我哋其他速記嘅片!

點樣學速記?

啱啱話要有專業儀器先學到,我哋究竟係點樣學?

我哋就有呢個,叫做The Uni,係一啲好有心嘅速記愛好者整出嚟嘅一個鍵盤。你見到佢其實都係一啲普通鍵盤嘅掣,你見到呢啲普通機械鍵盤嗰啲掣,佢自己焊出嚟賣畀人。

大概半年前左右,我哋三個《絮言.狂想》嘅主持就一齊想學速記,於是我哋就一齊買咗呢一個Uni返嚟。

唔係賣廣告,我哋冇贊助,冇收錢。

我哋就一齊學咗半年左右,而家都未去到好快,但係都有啲進展。

大家見到呢個鍵盤,可能第一樣留意到嘅嘢,就係上面冇字,全部白色,好似無字天書,同平時鍵盤上面有晒ABCDE唔同。

其次可能留意到,佢個形狀同我哋平時嗰啲鍵盤爭好遠。佢淨係得……死,唔知幾多個掣?廿八個掣啫。到底用呢啲掣,點樣可以好快打到啲字出嚟?

速記點樣用?

如果我哋望下英文速記嘅鍵盤,分咗三大個部份。分別負責一個音節開頭嘅輔音、中間嘅元音、臨尾嘅輔音。開頭嘅輔音就喺呢度撳出嚟,佢嘅輔音包括STKPWHR,呢個特別鍵,唔詳細講住。

之後音節中間嘅元音,係用呢四個鍵撳出嚟。呢兩個又係特別鍵,呢四個鍵分別係AOEU。

最後音節結尾嘅輔音就係由呢邊打出嚟,你會留意到佢啲掣多啲。首先又有個特別鍵,唔詳細講,然之後有FRPBLGTSDZ,的而且確,同左邊啲輔音係有重疊。

而家大家一齊嚟睇下三苗點樣用呢啲掣,嚟到砌啲詞語出嚟?

最簡單,某啲詞語,用本身有嘅掣已經砌到,例如PAT、HARD。長啲嘅話有WORLD、SPORTS。

但係如果冇獨立嘅音,我哋又點樣打?我哋就會用組合嚟表示單一個音,例如音節開頭嘅B,就係PW呢兩個掣。音節尾嘅N,就係PB呢兩個掣。而/ɪ/呢個元音就係下面EU兩個掣。

睇下啲例子,例如BAT、HORN、STRINGS,就係噉樣打。

去到呢度,你可能會想問:明明大部份英文詞語都唔係單音節,噉點樣打?其實個軟件好聰明,你連續撳兩下,佢就會根據預先訂立咗嘅詞庫,將呢兩個或者更多嘅音節,自動拼埋,變成一個詞語。

例如你先撳a,再撳rive,就會出現ARRIVE。好多時候,為咗慳時間,會skip咗詞語中間比較弱嘅元音,例如你撳rem、di,就會變成REMEDY。或者kam、ra,就會變成CAMERA。

不過多音節字咁多,點樣先可以打得快?速記嘅其中一個元素就係捷徑brief,通常係用特定嘅規則省略某一啲音,一般都係用嚟打常用字。比較直觀嘅有delete,省略咗開頭嘅元音,當dlete係一個音節。SURPRISE都係省略咗第一個元音,當做sprise。EXPLAIN又係省略開頭,今次冇咗個ex,變咗splain。

仲有一啲比較不規則嘅,例如INTERESTING、CONTINUE、QUESTION。呢啲詞語係因為非常之常用,所以先特別整咗個捷徑畀佢。

除此之外,我哋講嘢嘅時候,有某啲詞語,甚至成個短句,經常會配搭一齊用。所以有時一個捷徑可以出晒成句出嚟,例如I HAVE NO IDEA、WOULD LIKE TO BE ABLE TO。

你個人都可能經常用某一啲句子、人名、地址,甚至號碼等等,都可以自訂一個捷徑,撳一下打出嚟。例如本頻道個名RHAPSODY IN LINGO,好歡迎大家嚟到BUY ME A COFFEE,仲有LLANFAIRPWLLGWYNGYLLGOGERYCHWYRNDROBWLLLLANTYSILIOGOGOGOCH。嘩,用一般嘅鍵盤打,就算識串,都唔知要幾耐先打到出嚟!

呢啲其實都係一啲好基本嘅原則,如果想詳細知道點樣學速記,可以睇一個我哋好尊敬嘅速記YouTuber,Aerick嘅片。我哋擺返啲拎喺下面。

學習過程心得

我哋喺過去呢半年左右,係點樣學速記?除咗學啱啱嗰啲基本原則之外,我覺得成個由零去到可以打到每分鐘八十至一百個字,呢個過程我覺得好似學倉頡

好多香港人識倉頡或者速成,我覺得真係感覺上好似。點解呢?因為個過程就係:首先,我哋學咗啱啱講嗰啲基本原則。就好似當初學倉頡嘅時候,學晒每一個掣有邊啲形狀。

之後就喺度拆字,諗下每一個字點樣分開。喺英文速記嚟講,就係每一個詞語點樣拆開,或者每一個音節。

其次,學完之後,其實就係噉練、係噉練。但係某程度上,其實係逐個詞語學,因為每一次學一個新嘅詞語,可能我哋就會估到點樣拆,但係同時間可能又會有更加快捷嘅方法打,或者又可能同我哋想像中唔同,所以就逐個學。

之後就係噉練、係噉練,直至到去到最後,呢啲就變成晒我哋嘅肌肉記憶。其實真係好似彈琴。

我哋而家一啲常用嘅字,就可以一諗到個字,即刻撳到出嚟。其實即係好似平時打字,你都係已經唔使點諗,只不過佢就係唔同咗嘅打字方法。

同埋我練得多之後,我發覺我平時周圍見到啲英文字,我會自然開始喺度諗點樣撳佢。即係好似我一開始學倉頡嗰陣,都係周圍見到啲字,都諗下:點樣拆呢?我喺個腦裏面,點樣去拆字呢?學速記都係一樣。

直至到後來你熟晒倉頡之後,就唔使再諗。

但係我哋速記仲未去到嗰個位。我都想儘快可以去到呢個速度。

速記嘅平民化

如果去到實質上,你要去買一個鍵盤,你又要去下載一啲軟件,你應該點樣做?

呢樣嘢以前的確係難少少,但係而家速記就開始平民化咗。有一啲好有心嘅人,就整咗一個叫做Plover嘅軟件,就喺全部電腦都可以用到。亦都有一啲好似啱啱呢個The Uni嘅鍵盤,唔止呢種,仲有好多唔同種類嘅速記愛好者整出嚟嘅硬件。靳尼好似就嚟買緊個新嘅。

因為一開始講到專業嘅速記學習者,嗰啲機好貴,同埋嗰啲軟件都係好似有版權,一定要去嗰啲學校度學,如果唔係用唔到。買幾千蚊美金嗰啲機,真係幾千蚊美金。呢個係一百美金,係平好多好多,因為佢其實係一個鍵盤嘅零件,一個機械鍵盤。應該香港都有好多鍾意玩呢啲機械鍵盤嘅人,佢哋買嗰啲可能都已經唔止呢個價錢。應該係,呢啲可以去到好貴。我都唔係好識。

點解要用特別鍵盤?

去到呢條片完之前,可能有啲人會有個問題:就係點解要特別用呢一個鍵盤,唔就噉用一般嘅鍵盤,去一次過撳幾個掣?

其實呢樣嘢有幾個問題。第一就係你見到呢一度,呢一個鍵盤嘅掣,唔係打直對齊,即係呢度佢會歪咗。呢一行,譬如呢個O同呢個L,佢唔係對齊。呢個I同呢個K都唔係對齊。佢就唔可以好容易噉好似你呢個鍵盤,一次過用一隻手指撳上下兩個掣。呢度就有啲難度。

第二就係呢一個普通嘅鍵盤,佢有太多個掣。淨係字母已經有三行,隻手就好難去郁,你隻手應該斷。令到就噉喺一個普通嘅鍵盤上面打速記,就非常之困難。但係如果有呢個速記鍵盤,佢係設計畀你一隻手指,通常淨係顧兩個掣,一係就呢個,一係就呢個,一係就兩個一齊撳,佢個分工好舒服。你隻手指唔會周圍郁。但係普通打字,你成日會走嚟走去,上下噉樣,左右都郁好多,一隻手指負責好多掣。但係呢個就簡單好多。

最後一個問題就係如果你要打好似pop或者dad,你點樣打?有重覆嘅字母。你有一個D,噉你冇第二個D。呢度P得一個,O又得一個,噉你打pop、poop,呢啲點樣去分?因為你同時間撳,你冇可能撳兩次。如果你要打幾次,係違反咗速記本身嗰個原則,我不如直接打返呢個鍵盤,好唔好?仲有你喺一般嘅鍵盤上面,你撳譬如話dab,你同時間撳,你同撳bad係冇分別。所以佢分唔到你係想解邊一個。但係速記鍵盤就有分前面同埋後面嘅聲,所以就好簡單可以分到dab、bad呢一啲噉樣嘅字。

廣東話速記???

我最後仲有一條問題,就係速記係唔係得英文?

唔係淨係得英文,好多語言都可以有速記嘅方法。英文係最多人用、最常見,亦都最容易去學,最容易有資源去學。

而現成係冇廣東話嘅系統,但係我哋就嘗試緊整一個廣東話嘅系統,嘗試緊設計當中。

仲有好多難處,因為英文始終同廣東話好唔同,你唔可以套用英文嗰個邏輯落去廣東話嘅聲。你知廣東話有聲調,或者有一啲聲母、韻母都係唔同,就用第二啲方法去設計。

而家整成點?而家就整緊,幫緊你、幫緊你。如果有機會下次整好嘅話,就可以同大家分享下。

我唔知幾時,或者喺邊度,再有機會可以同三苗同大家介紹我哋呢一個系統。

今日就講到呢度先,如果大家對語言或者學語言有興趣嘅話,我嘅頻道仲有好多片可以畀大家睇下。

我哋《絮言.狂想》都擺咗喺呢個channel上面,或者可以喺各大平台上面聽到。我哋會講好多關於語言同埋語言學嘅嘢,希望大家支持下我哋嘅podcast!噉我哋下次有機會再見