以：噉我哋飲啖水先！
靳：（濁親）
以：唔好死！大家係咪可以live睇……
苗：佢濁緊……濁過水族館。佢就……你個水就濁緊你個管喇。
靳：嘩死喇，我仲要講嘢喎，大佬。
以：大家親眼睇阿靳尼濁死咗。
苗：濁……濁咗你個氣管。
以：我哋個canon就係靳尼而家就……就……就死咗，我哋就出個聲明話……
苗：RIP。
以：我哋好遺憾哋呢，靳尼過咗身，佢畀架Cybertruck撞死咗嘞。
苗：如果你哋認真學語言呢，佢就會返生啊。
以：係喇。如果大家學匈牙利文呢，或者大家認真練廣東話呢……
苗：匈牙利……復活。
以：係，佢就會返返嚟㗎喇。
靳：唔係，如果你係一個喺匈牙……唔係，你係一個匈牙利人學緊廣東話嘅話呢，你喺度留言呢，我就會返生。我就會嚟揾你㗎喇。
以：啊，係嘞。噉所以我哋要做戲做全套，我哋而家呢，就阿三苗去到講個outro，之後下一集係冇靳尼嘅，直至到有人……
苗：點啊？
以：直至到有人幫佢返生為止。
靳：做乜嘢？
[jingle]
以：歡迎返到嚟《絮言．狂想》第七十八集，我係以色列。
苗：我係三秒。
靳：我係靳尼啊。
以：你等我睇一睇我個cam先。係啊，我哋而家有video啊，所以要要check一check角度。
苗：唔係好慣啊。要……要影片。
以：係啊。我諗緊點樣可以對準個咪，好近噉講嘢，但係同時間喺條片度可以見到個嘴唇。
苗：哦。
以：係啊，諗緊點樣郁下佢先。
苗：即係畀人讀唇，可以。
以：我唔……係咪真係有人會讀呢？我唔知喇，應該難啲喇。但係……
苗：係咪啊？
以：可能……呢個係咪太過deaf aware？有少少慣咗，一見唔到自己嘴唇，就覺得好奇怪。
苗：係啊。你見唔到自己嘴唇，就會唔知自己講咩囉。要讀唇你先睇到自己講咩，係咪啊？
靳：讀返自己個唇。
苗：係啊。
以：讀返自己。好彩我就仲……我聽到自己講咩嘅，好彩目前都係。噉就唔使讀住嘅，係啊。如……如果……如果喺第二啲情況，就可能要喇。可能……哦！有陣時……我試過嗰次剪手語嗰條片呢，我發現係剪得快好多㗎，因為你可以好快睇到我講緊乜嘢囉。就唔使用耳仔聽囉。
苗：啊，幾好喎。
以：係啊。不過讀唇就難啲嘞，讀唇就……我本身都好弱啊。
苗：證明你純粹係唔識睇呢個spectrogram。如果識睇嘅話，你就會睇到自己講緊咩，好似係。
以：有冇咁快啊？
苗：唔得，講下啫。
以：有冇睇手語咁快……哦。
苗：冇……冇……冇咁快嘅。
以：你可以聽返我哋講呢個時頻譜嗰集，係啊。我哋拎返。噉但係呢，喂，話說呢，我最近嘗試緊練讀唇啦。因為我同人用手語溝通呢，我最大嘅弱點就係讀唇。噉我唔知香港手語係點啦，但係英國手語係OK依賴讀唇嘅。
苗：香港好似都少少囉，但係好似唔係好多嘅，感覺上。
以：唔係好多，係咪啊？因為有好多時候，英國手語就會有好多詞語呢，係兩個詞語個手勢一樣，但係個嘴唇唔同。或者更加麻煩嘅情況，就係咩呢？就係你唔同嘅方言呢，唔同地方口音呢，手勢完全唔同嘅。噉如果你未見過呢，你就靠個嘴唇囉。噉所以我而家呢，我成日都溝通唔到，就係我睇唔到佢嘴唇做緊咩啊。噉所以我最近喺度用緊個app呢，幫我逐個逐個詞語練囉。
苗：哦！即係佢唔係畀手語用嘅，即純粹係讀唇嘅啫。
以：佢係畀一般人用嘅，即係譬如話，你好想可以同人唔出聲傾到偈，即係好似返學同人……同人……同學嗲噉樣。噉你就可以噉樣練嘞。噉但係我就……我就用嚟幫我嘅手語囉。噉佢就真係……佢好有structure㗎喎。佢會教咗你consonant先，逐個consonant同你講係咩樣，噉之後就有一堆詞語就係focus喺嗰啲consonant度嘅。噉之後……其實我本身我都明㗎喇，即係我作為一個業餘嘅語言學家呢，噉我都kind of知道個嘴唇應該係咩樣嘅。噉但係發現知道同埋認到係兩樣嘢囉。尤其是啲元音呢，啲vowel呢，我成日都認錯㗎。好多時候我會以……即係我……我會望住個人嘅嘴唇啦，之後我腦裏面會聽到個聲，但係我會……嗰個聲會同佢actually……
苗：哦，會唔同。
以：……講緊個聲係唔同㗎囉，會大咗、會細咗噉樣。好多時候我以為佢講/ei/，佢講/ai/。
靳：哦。即係好似YouTube嗰啲bad lip reading嗰啲噉樣，係咪啊？
苗：係，變咗第二個字。
以：哦。噉但係嗰啲佢係真係有嗰個技能喺度㗎嘛。佢bad lip reading係因為佢同一個嘴唇，可以表示兩個唔同嘅詞語噉樣。因為……係啦，譬如話啲……咩啊？m、b、p，係一樣樣，係喇。
苗：係啊，係。
以：啊，同埋都係問題啦，就係即係呢個係聾人本身都會接觸到嘅問題，就係你點樣從呢個語境估到佢到底係m定b定p呢？噉我讀唇嘅時候，我個腦就會聽咗p先嘅，之後再用腦諗返：啊？唔係喎！噉睇嚟應該係m make sense啲喎！噉樣。噉但係……嗱，我最擔心係咩？就係呢，因為我而家練手越最大嘅動力呢，就係同我啲朋友傾偈吖嘛。我好想同佢哋可以溝通自如啦。噉但係呢，我有一個朋友呢，佢……點講好呢？即係……嗱，即係大家講嘢嘅方式，都有少少唔同㗎嘛。噉所以即係唔係……我唔想single out，但係佢講嘢用條脷嘅方式，有少少唔同啊。所以我成日都完全讀唔到佢講咩囉。於是呢，我就做咗一樣好kam嘅嘢。
靳：點樣好kam？
以：就係呢，我問：你可唔可……你可唔可以影自己，唔用聲，同我講一句嘢，之後畀我愛嚟練習？
苗：哦！
靳：好好啊！好有鍥而不捨嘅精神啊！我覺得呢個真係。
以：哦……嗱！我覺得係嘅！我……我真係好有心……即係我自己講出呢句，我都覺得有少少……係囉，怪怪地嘅感覺，即係……但係同時間，我係真係有個好好嘅原因吖嘛，因為我係真係目標就係想同佢溝通容易啲吖嘛，噉我覺得justify到囉。噉佢就問：噉你點解你唔可以就噉上網熄聲睇人哋講嘢呢？之後我就話：哦，因為……就係啱啱我講噉樣囉，每人講嘢啲啲多唔同嘅，噉如果我嘅priority係明白你講嘢，噉我用你嚟練習，咪最好囉。噉我哋平時傾偈嘅時候，佢講一次就講完㗎喇嘛。噉我就已經miss咗喇，已經。乜都……乜都睇唔到喇。
苗：佢冇得再睇多次。
以：係喇，冇得……冇得loop返轉頭，睇多次喇。噉唔通叫佢講十次咩，係咪？係啊。同埋係啊，我嗰個朋友佢有個習慣，因為佢本身唔係手語嘅母語者，噉但係佢係聾人，噉佢有時打打下手語，就……就懶得打囉，淨係郁嘴唇囉。噉但係因為佢聾人啦，噉佢……
靳：啊，可以噉樣㗎？原來。
以：可以㗎！咪……噉咪……噉佢唔慣吖嘛，佢……佢都學緊手語，係咪？噉但係因為佢聾人呢，佢控制唔到自己幾大聲㗎喎。噉所以好多時候就會勁細聲啦，甚至冇聲啦。噉我就完全get唔到囉。噉就變咗得返其他識讀唇嘅人會get到佢講咩。所以我就好努力，鍥而不捨，我好想學到呢個技能。
苗：舌而不寫？
以：係啊，所以就做咗啲……係喇，咁kam嘅嘢。但係呢個就係我個故事喇。
苗：係。我上堂都有少少呢個感覺。就係呢，好多時個老師做一個新嘅詞語嘅時候呢，佢會加埋個口形㗎嘛。噉然之後好多……大部分都係英國人啦，啲學生。有少少外國人啦，噉包括我自己啦。噉然之後好似在座嘅英國人，好多呢，都係讀唇都係OK嘅。即係佢……個老師佢唔會出聲，即係佢出出下聲，但係又唔係完全係同健聽人一樣嘅，講嗰個字，嗰個發音。噉但係嗰啲英國嘅同學，就會好似get到係佢講緊咩字囉。但係我好多時都係唔知佢講緊咩字囉。
以：係啊！我都係噉啊！我都係噉。好多時候……有時呢，即係我本身我上堂，我係比較advanced少少嘅……我嘅……
苗：勁啲嘅，即係。係。叻啲。
以：係喇。尤其是我打手語係……係……kind of係全班比較叻啲嘅。Anyway，噉但係有時老師佢用一個我冇見過嘅手勢，之後佢就會……係囉，用個嘴唇講出來啦，全班都get到，就係我get唔到囉。我去問隔籬：吓？講咩？佢講兩次我都get唔到。之後隔籬嗰個就話：啊，佢講star啊！我話：吓？Star呀？哦！噉我先……
苗：真。
以：係囉。我……所以我自己個理解嘅方式呢，就係……係咪因為……雖然我講英文係流利，噉但係我由細到大都係冇講英文。即係我哋香港人，我哋淨係讀同寫㗎咋嘛！冇機會講咁滯㗎嘛！
苗：係。
以：噉所以好多……可能如果英國人本身由細到大都係講英文呢，就潛意識地，已經學識咗少少讀唇喇。即係望住人哋講嘢，已經習慣咗喇。但係我就冇呢個經驗，所以我而家係catch up緊囉。
苗：係啊。
以：所以我成日噉樣同我啲朋友解釋，就覺得：唉，對佢唔住啊，我真係盡緊力啊。
[09:28]
苗：係，所以有時我覺得呢，呢樣嘢……我諗返起我哋之前同……我哋有一個嘉賓，阿Adam，講過嘅一樣嘢。佢之前提過，噉佢本身佢係英國人啦，噉佢係母語係英文，然之後佢學廣東話學到一個好高嘅程度。但係佢都會成日喺度感嘆呢，佢嘅廣東話程度同一個真嘅native嘅廣東話程度，係仲係差好遠好遠囉。都真係天淵之別噉樣。即係佢……好似佢身邊識嘅廣東話人呢，佢就會有時問佢，譬如呢個字點解啊？

The rest of the transcript is available to Patreon members.