苗：佢係點樣教你去獲取聾人嘅注意啊？
靳：佢係總共教咗十三種唔同嘅方法，但係有好多方法好似嘅，其實係。
以：十三種……係咪即係……吓？但係都係基本上就係觸覺。
苗：都係觸覺，同埋視覺囉，基本上就係。
以：應該唔會嗅覺啦，係咪啊？即係放個屁，噉之後就吸引人注意力。
靳：嗅覺，呢個有啲難喎，你要叫我即刻放一個臭嘅屁出嚟，都有啲難喎，我想講。
苗：乜嘢啊？
靳：呢個唔係practical嘅一件事。
苗：黐線。
[jingle]
以：歡迎返到嚟《絮言．狂想》第七十七集，我係以色列。
苗：我係三苗。
靳：我係靳尼啊。
以：嘩，三苗今日好有delay啊，佢好似等咗兩秒鐘先講你係三苗。
苗：吓？真係㗎？
以：你係咪唔記得咗你係邊個啊？
苗：吓？我……我係邊個啊？你係邊……你係邊……呢度係邊度嚟㗎？
靳：你變咗四苗喇！你太慢！
苗：唔係！
以：呢度係邊度啊？我唔知我喺邊度啊。
苗：佢話多咗兩秒delay，所以我係五苗啊。
靳：哦……哦！係！啱喎！啱喎！
以：係！係！好！再嚟過！好！歡迎返到嚟，我係以色列，你係……五秒！
苗：五苗。
靳：五秒！
以：五苗。越嚟越長喎！你。點算啊？
苗：係啊。
以：遲啲變咗做三分鐘㗎喇。
苗：嘩！
以：之後就凍咗嘞。噉阿靳尼呢？你近嚟點啊？
苗：你靳尼點。
靳：嘩！嘩，我靳尼啊！
以：係喇。三苗就變咗五苗啦，靳尼就近嚟好好啊？
[01:34]
靳：我哋作為一個用手語講嘢……唔係，用……成日講關於手語嘅嘢嘅podcast，噉我都開始學緊手語，就係噉樣。
苗：好嘢！
以：話說呢，我哋而家有video喇喎，好似。
靳：係啊！
苗：可以講多啲手語嘅嘢。因為真係大家開始睇到喇。
靳：我淨係識拍手㗎咋，所以……
苗：拍手係噉樣。如果我哋有cut出嚟嘅話，你就會睇到。
以：拍手……哦！靳尼拍緊手。
靳：係啊。係……拍手係冇聲㗎，所以大家要睇video先至見到㗎。
以：係啊。靳尼就喺度……喺度……喺個膊頭上面揈緊對手囉，噉就係代表拍手嘅意思喇，係喇。鼓掌！
靳：好嘢！但係大家係聽唔到我喺度拍緊手㗎。因為我隻手係喺度揈緊，而唔係喺度敲擊緊。係喇。
苗：佢敲擊緊啲空氣。
以：係喇，喺度聽緊嘅觀眾就而家知道你做咗乜嘢嘞。
靳：係。你可以聽到我啲掌風嘅，大家如果細心嘅話，其實係應該係聽唔到嘅。
以：哦，掌風。係咪又返返去我哋嗰次喺布達佩斯講嗰樣嘢啊？就係……喺個……對住個咪用手語，就可以出咗好多掌風出嚟，畀大家聽到你個方向喇。
苗：係啊。
以：係啊。但係仲算唔算拍手？拍手係imply咗（拍）。噉先叫拍㗎嘛！
苗：噉用手語講嘢，都唔係真係「講嘢」。都一個比喻嚟嘅。
以：哦，即係將佢變成一個抽象嘅意思。
苗：係啊。
靳：啱啊！
以：又好似……
苗：因為呢，香港手語呢，「傾偈」呢，都係噉樣㗎。
以：係，可唔可以形容下？
苗：都係好似講……有個口，口噏噏噉樣講嘢。即係我用兩隻手對住對方，然之後就話「談話」囉，噉樣就係「講嘢」囉。跟住大家講嘢。噉所以都係抽象化咗囉，即係唔係真係用口講嘅，用手語嘅都可以噉樣表達囉。
以：啊，係。冇錯，冇錯。即係好似聾人都話：「啊！我最近聽過呢……」點點點。
苗：你有冇聽過啊？
以：你有冇聽過啊？
苗：你係咪真係聽到先？
靳：嘩！
以：嘩！
苗：Nice to see you！
以：好多時候聽人講呢個……好……好戇居嘅一個爭拗嚟㗎，之後話：啊！He is not really speaking噉樣。即係好多餘，即係已經講……用咗咁耐，大家習慣咗講I am talking to you，噉即係我同你傾偈，同你講嘢，噉之後就硬係有啲喺度自作聰明嘅人，就會話：啊！你都唔係真係講嘢嘅！你用緊手語㗎嘛，嘻嘻嘻！噉樣。就好厭囉。
苗：係，老婆餅都冇老婆。
靳：有啲煩。
苗：好多呢啲語言，都係有一啲比喻㗎嘛，即係有時有啲用字，我哋唔係講緊字面嗰個意思，即係譬如你講電話，「我收線喇」噉樣。噉呢個係指以前，可能真係要……即係要捲條線出嚟，或者收返條電話線，噉而家收線唔會收線㗎嘛，冇線㗎嘛。噉你英文你話hang up，噉你唔係真係將個電話掛起佢吖嘛。噉呢一啲已經變咗嘅嘢，但係我哋仍然保留呢一啲噉樣嘅講法囉，噉就將佢嗰個語義伸延咗，將佢變咗一個抽象嘅嘢。
以：咩撥號嗰啲都係啊。
靳：啱啊。
以：撥……撥呢個號碼。
苗：係啊，撥打，噉你唔係真係撥，唔係有個……撥個輪噉樣，以前就可以吖嘛，而家都唔係……
靳：你都唔係打緊個電話㗎嘛。
以：Dial……
靳：你唔係揾手拍個電話噉樣。
苗：呢個好似第二樣嘢嚟。
以：打就好多意思嘅，係嘞。係咪啊？打招呼都唔係打嘅，所以……
靳：係嘅。
苗：呢個係因為個打字本身好多意思啫。
靳：又好似啱。
以：係啊。但係撥字就正常係得一個意思嘅。
苗：係啊。
靳：撥個輪。
以：撥。啱啱靳尼想講咩啊？
[05:14]
靳：冇啊。
苗：咪正題囉！講返個手語吖嘛。
靳：啱啊。噉因為以色列呢，又識英國手語啦，跟住三苗又本身識香港手語，又學緊英國手語啦。噉我就喺香港，我係冇得學英國手語㗎喇，所以我就選擇咗……
以：哎啊！
靳：哎啊！哎啊，真係冇得學啊！學完應該都冇得用嘅，又真係有啲難用嘅，我諗就。
苗：係啊。
靳：噉所以我就開始學緊香港手語喇。噉但其實真係啱啱開始學嘅啫，啱啱學咗幾堂嘅啫。
苗：嘩。
靳：就係噉樣。係喇。噉但係我覺得個感覺係幾好嘅，因為其實就係真人小班噉樣教學呢，噉然後全程其實手語個老師都係用……即係可能寫字啊，或者純粹手語噉樣，去教噉樣樣囉。因為手語老師都係聾人嚟嘅，噉樣。噉我哋就可以用啲比較自然嘅方法，去學到呢個手語。
苗：哦，噉你嗰個聾人老師，佢係一開始會用文字吖，定係佢都直頭冇啊？因為我見好多……我都上過唔同地方嘅手語堂啦，唔同老師教。佢哋通常都一開始用PowerPoint去打下字噉樣，之後先至開始齋用手語。
靳：而家其實都一開始會用PowerPoint嘅，噉同埋之後其實都仲係會用文字去輔助噉樣啦。噉但係有好多時，即係佢喺一開始show一啲手語出嚟畀大家睇嘅時候呢，噉佢就會用手勢去……去描述畀大家聽呢樣嘢係乜嘢，跟住叫大家估係乜嘢囉。噉所以都會有呢個部分喺入面嘅。噉同埋呢，我覺得佢有一樣好好嘅嘢呢，就係佢唔係淨係教詞彙囉。因為我喺中學嗰陣時呢，好耐好耐之前啦，我都係去過第二個地方學手語嘅。噉我記得嗰度嗰陣時學手語，佢就會派一疊紙畀你啦，啲紙上高就有好多唔同嘅詞彙。噉跟住佢就會教你一堆嘅詞彙。噉但係你識咗嗰堆詞彙之後呢，其實你係串唔返埋個句子出嚟嘅，或者你可能淨係識得做一啲好簡單嘅句子。噉從來都冇人同你講過，就係例如話：聾人嘅文化係點啊？或者係一個句子結構係點樣啊？噉樣。係喇。
以：嗯。可能你齋估囉，要。係咪啊？
靳：就要齋估囉，或者真係要睇人做，跟住你自己估噉樣樣囉。
苗：即係好似我哋學文言文噉樣。
靳：係喇，係喇。即係冇人解釋文言文嘅grammar係點樣㗎嘛。
苗：係啊，齋估。
靳：即除非你有一個好好嘅中文老師啦，如果唔係通常你都唔會噉樣學。
以：憑感覺。
靳：係喇，你都唔會知道原來現代嘅中文，同埋文言文嘅語法，係唔同嘅！跟住就會mind blown噉樣，有人同你噉樣講嘅時候。係喇，噉同埋我記得佢上堂呢，教咗一樣好重要嘅嘢，就係點樣叫一個聾人。真係好重要啊！我覺得呢樣嘢。
以：係啊，係啊，係啊。
苗：係啊。你係點樣叫佢啊？
靳：唔係……唔係叫名喎，我哋講緊。即係當一個人……
以：叫即係嗌佢吖嘛。係喇，係喇。
靳：即係點樣嗌佢，點樣獲取一個聾人嘅注意吖嘛。
以：又係啱啱返去呢個所謂比喻嘅方面，即係唔係真係literally嗌佢下，因為冇用嘅。
靳：你嗌係冇用嘅。
苗：白車！
以：噉樣你係點樣呢？
靳：咩白車啊？
苗：Call白車，嗌白車。呢個周星馳《逃學威龍》。
以：咩「嗌破喉嚨」嗰啲啊。
靳：噉我好大聲嗌「驚」係咪喊驚啊？
以：喊，喊緊啊！
苗：係，anyway係啊，你係……
以：廣東話唔該。廣東話「喊」係……
[09:03]
苗：佢係點樣教你去獲取聾人嘅注意啊？
靳：佢會逐個逐個呢，叫你估佢做緊啲乜嘢啦，跟住就會有啲卡，上面會有啲字，跟住就擺上去嗰個白板度。跟住佢主……佢係總共教咗十三種唔同嘅方法，但係有好多方法好似嘅，其實係。
苗：哦。吓？咁多㗎？有。我諗唔到咁多喎。
以：我……十三種……係咪即係？吓？但係都係基本上就係進入佢嘅視線……
靳：係吖。
以：同埋或者掂到佢咋嘛，基本上就係。
苗：基本上就係呢兩樣嘢囉。
以：兩樣……係囉！噉點解會有十三種嘅？
苗：或者震到佢囉，揾啲方法。唔一定係用……
以：哦，係啊，係。即係……即係觸覺。
苗：唔一定係你掂佢，但係都係觸覺，同埋視覺囉，基本上就係。
靳：係喇。
以：不如你講下……應該唔會嗅覺啦，係咪啊？即係放個屁，噉之後就吸引人注意力。
靳：嗅覺，呢個有啲難喎，你要叫我即刻放一個臭嘅屁出嚟，都有啲難喎，我想講。
苗：乜嘢啊？
靳：呢個唔係practical嘅一件事。

The rest of the transcript is available to Patreon members.