靳：即係財經及庫務局及廣東話局長！
苗：「降低食物中鹽和糖委員會」啊！叫做。
以：同埋提升食物中廣東話……
靳：即係啲食物唔夠廣東話，要畀多啲廣東話佢。
以：冇錯嘞！係喇。
苗：哦。有啲咩食物唔夠啊？
以：即係譬如話隻雞噉樣，你養緊佢嘅時候，你要對佢講廣東話，之後先劏。
苗：哦。即係呢隻唔係母雞，呢隻係雞乸！噉先至……先至可以食嘅。
[jingle]
以：歡迎返到嚟《絮言．狂想》第七十六集，我係以色列。
苗：我係三苗。
靳：我係靳尼啊。
以：同埋歡迎嚟到二〇二五年啊，好嘢！
苗：好嘢！
靳：好嘢！啊，係！應該要同大家拜年，其實。
以：係喎！就嚟過年喇喎！
苗：應該出嘅時候係……
以：呢啲係我會唔記得嘅嘢嚟㗎。
苗：睇下以色列剪得幾快啦。總之廿九號就係新年。噉睇下你剪唔剪得切。噉都預祝大家身體健康。
以：新年進步！
苗：新年進步……
以：龍馬精神！
苗：恭喜恭喜。
靳：身體健康。
苗：《絮言》仝人鞠躬。
靳：《絮言》仝人……係要鞠躬嘅。
以：好似啲新年嘅廣告噉樣呀？係咪咩咩仝人……即係啲登登登登登，登登……
苗：係啊，登登，登登登，登登，登登！
以：撐撐撐撐撐！係喇。紅卜卜嘅，成個電視。新年呢，一開電視，成個電視都係紅色嘅。
[01:34]
以：同埋呢，我哋錄嘅今日呢，仲有另一個節目㗎。呢個係比較鮮為人知啲嘅，就係……呢個……今日係威爾斯嘅情人節啊。
苗：哦！
以：係啊！
靳：威爾斯有自己嘅情人節㗎？
苗：除咗威爾斯之外，蘇格蘭都有節日喎！今日。
以：今日係咩節目啊？
苗：今日Burns Night喎。
以：吓？今日……今日係Burns Night呀？Burns Night呀？
苗：係啊！星期六。Burns Night，係啊，就係呢個Gaelic叫做Oidhche na Taigeise，就係食haggis嘅夜晚囉。haggis之夜。
以：哦！嗱，大家bingo咗喇，三苗已經講咗Gaelic喇。
苗：我已經講咗Gaelic。
以：一開波已經講咗喇。
苗：大家攞你嘅bingo sheet出嚟。
以：我哋可以介紹下呢兩個節日先啦！即係……即係雖然我哋唔係代表呢兩個國家……唔係，都算kind of係㗎喇……
苗：你係啦！
靳：已經係喇。
以：我哋上次拍咗嗰條片呢，我哋……我哋兩個代表緊呢兩個文化㗎喇。可以介紹下呢啲節日。今日係……by the way，係一月廿五號啊，要講返先，係喇。噉呢啲節日都係用西曆嘅，就唔似我哋農曆新年噉樣呢，係要褪嚟褪去嘅，係嘞。噉你……你個Burns Night係點嚟㗎？因為我都慶祝過嘅。
苗：我反而冇慶祝過嘅。
以：咦？咦？
苗：因為Burns Night，或者叫Burns Supper啦，噉就係紀念呢個蘇格蘭嘅詩人，阿Robert Burns，或者叫Rabbie Burns，噉佢好多個名嘅。噉佢就係用呢個低地蘇格蘭語，Scots，去寫好多嘅詩啦。
以：即係類似英文嗰個。
苗：有啲似係蘇格蘭版嘅莎士比亞囉，你可以話係。即係佢個地位係去到……去到嗰個程度。大家應該會聽過起碼佢嘅一首詩嘅。大家知唔知係邊一首啊？
靳：邊首呢？
以：我估！
苗：係。
以：《我靚晒》！
苗：係喇，冇錯喇，就係呢個《我靚晒》啦，《Auld Lang Syne》。噉佢就係用Scots嚟寫㗎啦。噉如果大家可能音樂堂，或者唔知咩情況學過呢隻歌呢，就會喺度諗：啊，點解佢啲英文咁奇怪嘅呢？點解old要auld，然之後syne係乜嘢嚟㗎？咩係syne啊？噉就係因為佢唔係英文嚟嘅，佢係Scots嚟嘅。噉所以嗰啲字有好多大家都差唔多，都明，但係有少少唔同囉。係囉。噉所以就……大家可以欣賞下呢一首……呢一首歌嘅字囉。即係如果……大家當大家知道係Scots之後，就……再去睇呢首歌，就會有第二個感覺囉，可能。
以：其實呢，我細個學呢首歌呢，我從來冇諗過佢係有意思㗎。我淨係知道有堆我唔明嘅字：吓？乜原來auld係解old㗎？我大個先發現，係啊。
苗：好深嘅英文囉。
以：Lang係long嚟㗎？
苗：係啊，係啊。三個字都唔係平時會見到嘅英文囉，其實。
以：係啊。噉你會點樣慶祝啊？你今晚會唔會慶祝啊？我冇……冇慶祝，其實。
以：冇慶祝。
苗：係啊，我係新蘇格蘭人，噉所以就……呢啲傳統我就暫時未建立到嘅。
以：建立。係咪要做啲文化fusion噉樣呢……
苗：文化fusion呀？
以：揾下啲方法，點樣可以將過農曆新年同呢個Burns Night融合埋一齊呢？
苗：點樣可以將啲haggis擺落去農曆新年度啊？
靳：諗下先。
以：係喇！新年食乜嘢㗎？擺啲haggis入去。
靳：揾蘿蔔糕送haggis。
苗：年糕呀？蘿蔔糕……蘿蔔糕撈haggis囉。
以：Haggis糕。
苗：即係你整嗰陣就係擺啲haggis落去囉。
以：嘩！正，正，擺入去。嘩。
苗：其實我要覺得好似夾喎！OK喎！
靳：哦！即係……即係啲臘腸就用haggis嚟……
以：係咪即刻想整啊？Haggis腸，go！
苗：唔想整啊，因為好麻煩，要刨蘿蔔啊，刨到我死啊。
靳：係蘿蔔糕麻煩！
以：重點係唔想刨蘿蔔！
苗：冇錯。係啊。
以：係……唔係想……唔係懶得搞嗰啲咩羊內臟，而係唔想搞啲蘿蔔。
苗：哎，嗰啲好簡單！嗰啲就噉買返嚟，煎完整碎佢咪得囉！但係你蘿蔔糕好麻煩㗎嘛。
以：阿靳尼有冇食過啊？
靳：我有食過蘿蔔糕啊！
苗：有冇食過呢個haggis……Haggis中文叫咩啊？其實。
靳：Haggis有中文名㗎咩？
苗：希格斯？希格斯牛？唔係。
靳：係咪又係……肉餡羊肚啊。
苗：羊咩餡，係咪啊？哦！
以：哦。
靳：肉餡羊肚。
苗：羊雜碎囉！或者叫做。
以：我以為哈根達斯添！
苗：哈根達斯係另一樣嘢。
以：我鍾意羊雜啊。雪糕嚟嘅。即係牛雜啲friend，噉但係羊雜……
苗：羊雜囉。
以：之後就攪碎晒，一擗噉樣。
苗：冇錯。
以：之後煎，或者炸。係咪有炸㗎？
苗：炸可以嘅，你想嘅可以嘅。同埋有呢個素食版㗎，素食版都好食㗎，我食過。
以：哦，有咩……咩素……素羊？
苗：我都唔知佢用咩做㗎，其實。
以：係咪豆呢？
靳：係咪啲豆製品？
苗：但係兩樣都好好食。我估係囉。
靳：菜？
以：如果係豆腐就好笑喇。
靳：OK喎！
以：過農曆新年食素haggis，就係豆腐嚟嘅噉樣。
苗：食齋吖嘛！
靳：豆腐易食！呢個素haggis同埋豆腐糕噉樣。
以：豆腐糕？好不安啊，豆腐糕呢件事。
靳：吓？豆腐糕好好食㗎喎！
以：吓？係咩？
靳：係有呢樣嘢㗎！有豆腐糕呢樣嘢㗎！我唔係講笑啊！
以：但係豆腐本身已經係糕狀㗎喇喎！
靳：但係你再mix其他嘢入去㗎嘛。
以：哦！
苗：OK。
以：係咪要試下先？
靳：係有豆腐膏呢樣嘢。
以：噉我又講下我點樣慶祝過呢個Burns Night啦！因為我係有呢個經驗嘅，因為嗰陣時我喺牛津嘅時候呢……嗱，呢個係咪bingo呢？牛津bingo啊。
苗：每次以色列講佢讀過牛津。
以：對住邊個都要提一提，係。我哋啲formal dinner呢，就間唔中都有啲特別啲嘅習俗噉樣嘅。噉譬如話聖誕又會唔同啲啦，當然。噉但係雖然我哋同蘇格蘭距離好遠吓！唔知幾多百咪噉樣，噉但係……咪係講緊mile啊。
苗：Mile。
靳：咪。
以：噉但係我哋係有呢個Burns Night嘅。噉其實好簡單，就係你入去食飯之前呢，就會有條友喺度吹蘇格蘭風笛啦，噉同埋入到去呢，就會食飯之前，定係唔……中間噉樣啦，就會有人讀一啲阿Rabbie Burns嘅一啲詩啦，噉同埋讀完之後，就會隊whisky啦，當然，係喇。
苗：當然啦。
以：噉同埋會食haggis囉，係喇。噉當然有haggis啦！噉問題就係咩呢？就係當年我嗰個college呢，佢個hall整緊啊，即係佢翻新啊、維修啊，噉樣啦，噉所以我哋呢，食飯呢，我哋喺一個會議室裏面食嘅，即係OK大嘅，噉但係係一個好封閉嘅一個空間嚟㗎啦。噉所以你想像下，佢喺嗰度吹風笛呢，就……係嘞。
苗：嘩！震耳……咩……欲聾。
以：欲聾啊！真係。
靳：好有包圍感。
以：真係……真係欲聾。我寧願聾咗啊。
苗：欲聾，我想聾啊。
以：係啊，我唔想聽到啊。
苗：嘩！都……嘩，好chur喎。
以：幾時到你吹啊？
苗：我唔識……我要學㗎喎。
靳：要學吹啊。
以：唔識喇。
苗：唔識㗎喎。
靳：因為你係新蘇格蘭人。
苗：所以就要學嘞。
以：所以你要學整haggis，要學吹風笛，係嘞。
苗：原來係噉。
以：擸返條裙出嚟先！
苗：係，我都冇啊！我第時有錢嘅時候，要整返條啊。
靳：訂條裙。
以：係咪好……好fancy好貴嗰啲啊？
苗：係，都係㗎。即係如果認真嘅話，因為佢係好多……好多樣嘢，好多層嘅。即係又有……即係嗰件衫啦，即係嗰個suit，跟住真係條裙，跟住有個袋㗎嘛，有個細細個……
以：啊！嗰個袋啊！
苗：有個袋仔，跟住有把劍，要插喺對襪度！
以：裏面裝威士忌。
苗：有好多唔同嘅嘢囉。
靳：好複雜。
苗：所以係……
以：係咪要成套噉整㗎？
苗：好fancy。係啊，要……同埋你要識着囉，真係。如果唔係會畀人鬧㗎。
靳：要有特別嘅着法嘅。
苗：係啊。
以：唔着底褲嗰啲？
苗：噉嗰啲就係傳統嘅着法。如果現代少少就可以嘅。
以：哦，係㗎？OK。
苗：佢係……即係總之有啲……有好多蘇格蘭嗰啲Reddit呢，佢會成日鬧啲外國人亂咁着嗰啲……嗰啲蘇格蘭裙啊，如果你去呢個Reddit去kilts嗰一個subreddit呢，你會見到好多美國佬亂咁着嗰啲蘇格蘭裙，然之後啲蘇格蘭人就好嬲，就話：唉！呢啲噉嘅死美國佬，全部都亂咁着啊，喺度……
以：梗係美國佬。
苗：喺度文化挪用我哋囉。
靳：永遠都係美國佬。
苗：係啊，基本上都係。
以：哦，其實都係即係啲咩遊客亂着和服、漢服嗰啲啫，類似。
苗：係喇。即係當你個文化係一個cosplay噉樣……噉樣玩囉。
以：噉佢哋又cosplay得開心吖嘛。噉所以你要認真噉樣學啊，走去問啲專家同你……揾個裁縫同你整、畀把劍你……我唔知，裁縫應該唔整劍啊吓

The rest of the transcript is available to Patreon members.