以：我哋好唔好開咗我哋個intro啊？
苗：哦，而家開呀？
靳：但係如果我哋開intro呢，就要交稅㗎喇喎。
以：咩話？
苗：煙草稅。喂，呢個未聽過喎。點解第一次聽嘅？點解……點解可以咁耐第一次先講？
靳：點解？因為我哋係……我哋啱啱成為咗intro商。
以：我哋賣intro嘅，而家就。你想要幾多個intro啊？
靳：係，賣intro。係啊。
以：唔該要兩個intro。我可以即刻歡迎你返到嚟《絮言．狂想》，噉就有一個intro。盛惠一百蚊噉樣。
靳：即係係噉喺度spam個intro噉啊。
苗：歡迎返到嚟，歡迎返到嚟……
[jingle]
以：歡迎返到嚟《絮言．狂想》二〇二四聖誕節直播！我係以色列。
苗：我係三苗。
靳：我係靳尼啊。
以：喂，生日快樂啊，生日快樂啊！
靳：生日快樂！生日快樂，啊，係啊，爭啲唔記得生日快樂添。
以：三苗生日快樂！大家快啲講，喺度嘅人，唔該即刻寫，唔准唔寫！
靳：大家快啲講，三苗生日快樂！
以：乖嘞，乖嘞。
靳：我都係好好奇呢個三苗點解把聲咁磁性嘅？
苗：咩啊？
以：係咪有咩特別嘅消息，可以同大家分享啊？
苗：特別嘅消息就係我換咗個咪囉。
以：你係咪換咗把聲？換咗聲帶？哦，唔係，換咗個咪啫。
靳：換咗個聲帶……
苗：換咗聲帶。
以：我哋成個人係modular，可以隨便換一part噉樣。我今日要個新嘅聲帶。
苗：即係人哋去整容，跟住我就去換……換個聲帶，係咪啊？
靳：呢個係咩手術嚟㗎？呢個。
苗：要個新嘅聲。
以：攞出嚟，擺落去囉。點解你要換咪嘅？
苗：因為其實一路都想換嘅。但係又好似個咪未壞，又唔想換噉樣囉。噉最後就都……都換咗啦。噉所以我換咗同靳尼同一個咪囉，其實我係。所以……
以：哦，杯我嘅。
靳：因為三苗鍾意我……個咪。
苗：係啊，我好鍾意你……個咪啊。
以：都鍾意你。
苗：係啊，鍾意你個支……咪啊。所以就呢個……係啊，你嗰大支咪。
靳：我哋合家歡節目嚟㗎。
以：咁快已經出事呀？幾好吖，噉大家可以喺留言講下，把聲好唔好聽啦。
苗：本身把聲唔好聽，就咩咪都冇用囉。
以：其實有冇磁性呢，（戳聲）係可以戳出嚟嘅。噉即係曾幾何時，《絮言．狂想》頭嗰幾集，我都係噉樣講嘢嘅。大家有冇印象啊？
靳：（戳聲）噉你係咪要戳返呢個聲出嚟啊？
苗：以色列係專業配音嚟㗎喎。
以：專業就見仁見智啦。但係係……
苗：Literally喎！你係做過㗎嘛。
以：我係做過嘅。
苗：噉就係專業囉，係咪？
以：我係有幫一套戲做旁白嘅。
苗：係囉！咪專業囉！
以：噉都有……唔可以話有訓練囉，但係有啲trial and error噉樣囉。即係做咗幾次，之後試下唔同聲、唔同嘅做法、唔同讀法、唔同口音。
靳：你啲L即刻變晒做N喇，而家。
以：吓？係咩？
靳：係啊，你啱啱個囉變咗no1。
以：係咩？嘩，我真係……我自己都唔知喎。有勤音。所以要人去分析下我講嘢啊，係喇。真係……真係唔aware。
苗：啱啊。
以：（戳聲）噉我使唔使繼續去到戳呢把聲啊？我就唔需要換咪，都可以有磁性嘅。
苗：（戳聲）咁犀利？
靳：（戳聲）係。同埋你會有勤音添！
以：（戳聲）有kang4音添㗎！
靳：（戳聲）kang4音。
以：（戳聲）你真係……
苗：（戳聲）勤音。
以：（戳聲）你講出嚟都嚇親我啊。其實係咪㩒低啲把聲，就係有個呢個……
[03:30]
苗：係，近排呢，喺Threads上面呢，有一個新嘅……嘅trend喎，係大家喺度不斷玩一個叫做accent oracle嘅物體。唔知大家有冇……有冇玩過呢？
以：係啊。阿Vamp已經估中咗我哋想講呢個喇。
苗：係啊，係啊，accent oracle啊。噉呢個其實係一個AI嘅嘢啦，噉你就係……佢會畀篇嘢你讀嘅，一篇英文畀你讀。噉你讀完之後，佢就話畀你聽，你有幾多percent係咩語言嘅母語者囉。即係佢會話譬如幾多percent英文噉樣，或者幾多percent中文，或者好多唔同嘅語言，佢都有㗎。噉所以都好多人喺度玩囉，就話：啊，我明明好努力已經試緊……已經試緊去戳一啲好native嘅英文口音，但係佢都係發現我係中文母語者噉樣囉。嘩，好勁啊，噉樣囉。即係好難……好難呃到嗰個accent oracle喎。
以：係咪好有挫敗感啊？大家都發現：啊，原來我係呃唔到人嘅。我呃到其他人，呃唔到AI。
靳：你呃唔呃到佢啊？
以：我……我冇玩啊，我唔想畀啲data佢。
苗：我係……我玩過一次……玩過幾次嘅。我第一次玩嗰陣，係佢話我八十幾percent English囉，佢嗰個結果係。
靳：犀利喎。
以：嘩！犀利喎！你戳嚟聽下！
靳：我畀人話五十幾percent係中國人囉。
苗：唔係！唔係中國人！嗰個係中文！
以：中國人？
苗：嗰個係語言嚟嘅。
靳：哦，中文，係。中文，係。
苗：嗰個唔係國籍嚟嘅。因為佢……佢English嗰個定義係總之母語者就係囉。即係佢包晒英國啊、美國、澳洲之類嘅，都……
以：哦，即係佢估你嘅母語係乜嘢。
苗：係啊，係啊。佢係分析你嘅口音，估你嘅母語囉。
靳：中文啊！
苗：你講晒啊！邊隻中……隻隻都係你嘅。
靳：隻隻都係我。我識……我識講所有中文。
苗：所有中文。
以：Poly-Chinese。
苗：跟住我之後呢，嘗試去戳其他口音啦，但係係唔係好成功囉。即係我嘗試戳比較蘇格蘭啲嘅口音，佢話我係日本囉，佢話我Japanese。跟住之後我嘗試英格蘭口音，佢話我Chinese囉。反而調返轉。
靳：噉……噉你戳……
苗：唔知係因為我唔自然，定係點樣。
靳：你本身嗰個口音，係你本身講英文嗰個口音喎。即係有少少rhotic㗎喎。
苗：係啊，我本身講英文嗰個口音係……係𨀤埋一堆囉，全部都四不像噉樣。阿……阿港島牛話佢玩咗次，係……係緬甸再加尼日尼亞喎。
以：緬甸加尼日……嘩！點……
靳：嘩，呢個好難戳喎，呢個都。
苗：嘩，呢個犀利喎。唔知點樣做。
以：應該又唔係加嘅。我睇……我嘅理解就係佢幾多percent係講緊佢嘅……有幾肯定吖嘛。
苗：哦，係，係。
以：即係佢有六成信心覺得你係……唔知咩，緬甸人。之後有五成信心覺得你係尼日尼亞人。而唔係你係六成緬甸口音，五成尼日尼亞口音。因為加埋都唔……唔係一百嘅。
苗：係，係，係。佢純粹係confidence。係啊，係啊。
靳：阿Sam話住喺日本太耐，而家唔識講英文。可以試下，睇下會唔會變咗日文噉樣囉。
苗：試下有冇人戳到。
以：阿Sam啱啱都話佢將佢全部讀成CVCVCV，即係……
苗：日文噉樣。
以：即係バースデーケーキ嗰啲friend啊。
苗：阿Vamp話蘇格蘭變咗日本，係咪因為嗰個gi[ɾə]l。好似冇嗰個字嘅。嗰篇嘢裏面。
以：嗰個叫做咩元音話？有個咩梵文名㗎嘛。
苗：Epenthetic啊。即係加插上去嘅一個……
靳：係啊，epenthetic係。
苗：一個音。即係解釋返啦，即係girl呢個字，喺……喺蘇格蘭好多人會讀做gi[ɾə]l囉。或者world佢會讀做wi[ɾə]ld。就會好似香港噉囉！goe1 lou4。但係world又唔係woe1 lou4喎。係woel1喎。噉所以有少少唔規則嘅。但係蘇格蘭就係佢會呢啲rl嘅呢啲字，佢都會加個vowel喺中間囉。譬如curl、world、girl噉樣囉。
靳：噉呢個係因為本身係咪Gaelic係都係噉樣㗎嘛。
以：係喎！
苗：係啊，係啊。
以：即係Glaschu嗰個……
苗：係啊，即係……係囉，即係蘇格蘭蓋爾語……
以：Alba。
苗：「蘇格蘭」嗰個字，Alba啦，係讀/ˈal̪ˠapə/啦，就唔係/ˈal̪ˠpə/啦。噉佢l同b中間，係加咗個vowel嘅。同埋啱啱阿以色列話Glasgow嗰個名呢，就係/ˈkl̪ˠas̪əxu/囉，就唔係/ˈkl̪ˠas̪xu/囉。噉所以係中間有啲嘢囉。因為佢哋唔識某一啲嘢加埋，係啊，係啊。
以：哦，好似日文噉樣，會攝返啲元音落去。
苗：即係好似蘇格蘭英文啦，讀film都係[ˈfɪləm]囉，有時……有啲人會讀[ˈfɪləm]囉。我諗都係類似嘅影響。
靳：菲林！
苗：係啊，係啊。菲林啊，[ˈfɪləm]。但係而家佢哋講英文，都會講囉。係啊，watch a film。
以：蘇格蘭文都係嚟自亞洲㗎咋！
苗：係啊，又有/iˈzɛd/，係咪先？
以：咩話？
苗：/(j)iˈzɛd/。
靳：/(j)iˈzɛd/係蘇格蘭嘢嚟㗎嘛。
苗：蘇格蘭嘢嚟㗎嘛。本身係咩izzard。
以：可唔可以解釋啊？咩意思啊？
苗：即係我哋港式口音讀Z呢個字母，嗰個來源，就係izzard吖嘛。即係z嘅其中一個讀音，以前係會加個vowel喺前面嘅，izzard。
以：吓？
苗：呢個迷你思源啊？係咪又要。
以：係啊！
苗：噉呢個就係啲人估港式口音嘅Z係呢度嚟囉。但係咪真係，其實我都唔肯定嘅。但係有人噉樣提議囉，有人提出呢個講法囉。
以：係咪喺香港仔嗰度傳過嚟㗎？
靳：可能係。
以：因為……因為……
苗：Aberdeen。
以：鴨巴甸。
靳：Aberdeen。
以：真係我冇聽過喎。
靳：阿Sam呢，第一次試嗰個Accent Oracle，跟住佢話something’s not right, try me again。我都係㗎，我都係去到第二次先至判斷到任何嘢。
苗：哦，佢以為……唔係啊，因為佢下面呢，佢話try again and make sure you stick to the prompt。即係佢……佢以為你唔係讀緊佢篇嘢囉。即係個口音係遠到係……
以：你口音太重！
苗：你係咪讀緊我篇嘢㗎？係咪？你係咪亂噏㗎？噉樣囉。
靳：即係點啊？外星人口音噉樣。
以：アイ リ……リセントリ トライド メディテーティング フォル……嗰啲呀？完全用カタカナ串出嚟。嘩！嚇親我，我睇……我睇片假名好慢㗎。
苗：阿Sam打咗一堆片假名出嚟。
靳：アイ リセントリ トライド メディケーティング フォー ザ ファースト タイム。哦，就係嗰個text啊。
以：好嘢！
苗：嗰篇嘢囉。
以：即係類似我啱啱讀出嚟噉樣囉。
[09:51]
以：我想知佢……佢嗰啲唔同嘅口音，係咪睇佢原本嗰個地區嘅本身個語言呢？定係純粹係佢英文慢慢發展嘅時候，就開始分開咗，發展唔同方向？

The rest of the transcript is available to Patreon members.