以：咦！話咁快又十二月喇喎！係咪就嚟到聖誕喇？
苗：係啊，仲有幾多日啊？
以：仲有……而家計就有兩個零禮拜啦！
苗：但係出嗰陣唔知㗎嘛。
靳：出嗰陣可能已經聖誕喇。
以：希望唔係啦。係啊，噉聖誕節呢，大家有咩做呢？
苗：吓，噉梗係同你傾偈啦。
靳：大家鍾意同你傾偈吖嘛。
以：同邊個啊？
苗：同以色列同靳尼囉！
靳：我哋煲電話粥㗎嘛！會。
以：係啊，尤其是三苗同靳尼啦。大家好似比較少機會同佢哋傾偈啊。噉呢，今年嘅聖誕節呢，我哋又做直播喇。因為對上一次呢，就已經係舊年我哋喺布達佩斯啦。嘩！唯一一次見過靳尼真人啊吓！
靳：合體啊。
以：合體。三為一體。噉我哋等咗一年以上喇……
苗：嘩。我係聖靈。
以：Tag yourself。
苗：Tag yourself I am 聖靈。
靳：我係……我係蟶子，可以愛嚟蒜蓉蒸……
以：傳聖旨！
苗：好好食喎。好似好好味噉。
以：我哋冇唔記得呢一個承諾嘅，就係我哋呢，不定時嘞……我哋講咗不定時嘅，就會同我哋親愛嘅會員，Patreon嘅會員做直播啦。噉即係點呢？我哋就會喺Discord上面呢，就傾偈啦，噉之後所有patron呢，就可以用文字方式同我哋對答嘞。
靳：噉聖誕節，嗰啲人唔會唔得閒㗎咩？噉所以我哋早啲做喇，應該係要。
以：哦，係喎。聖誕節可能大家忙住唔知做咩喇，係啊。香港人多數去拍拖啦，我諗。
靳：忙住……
苗：平安夜。
靳：食聖誕大餐，出去。
苗：啊，係啊。噉所以我哋今次呢，就會喺十二月廿三號，星期一，香港時間夜晚九點，或者英國時間嘅晏晝一點，就會開始呢個直播嘅。
以：希望大家廿三號放咗假啦！未放假就希望放咗工啦，九點鐘！
苗：廿三號我都放假喎。
以：咦？點解你放假嘅？
苗：我特登請假㗎！
靳：點解你會放假嘅？
以：嘩！
苗：我生日啊！
以：我以為為咗我哋嘅patron添！唓！
苗：係啊，我……吓？Sorry囉。我咁啱嗰日得閒，我先做㗎咋。
靳：所以大家嚟一齊到時直播呢，join我哋呢，一齊慶祝三苗生日。
以：慶祝生日啊。大家鍾意可以寄個蛋糕畀佢㗎。
苗：嘩！寄去邊度啊？
以：整個PO Box噉樣。
靳：Send……send個蛋糕emoji畀佢。
苗：哦，OK嘅，OK嘅。可以DM個蛋糕畀我。
靳：唔係，你可以……你可以咩……整一個咩愛丁堡郵政信箱七〇一〇〇號噉樣。
苗：OK喎。
以：噉呢，如果大家仲未join呢個Patreon嘅會員嘅話呢，噉就快啲嚟到加入我哋嘞。只要㩒下面條拎呢，就可以去到我哋嘅Patreon啦，噉就可以廿三號，香港時間夜晚九點鐘，英國時間晏晝一點鐘，其他就自己計啦，噉就嚟到同阿三苗慶祝生日，同埋同我哋傾偈嘞！噉我哋可以入正題！
[03:00]
以：歡迎返到嚟《絮言．狂想》第七十五集，我係以色列。
苗：我係三苗。
靳：我係靳尼啊。
以：唉，好彩今次冇撞嘞，唉。上次撞機噉樣呢，噉……
苗：撞？武藏？噉咪小次郎囉，今次咪。
以：我哋火箭兵團不嬲都來去如風！
靳：嘩！我係咪要……我係咪要拎返佢嗰個Threads度啊？
苗：點啊？啱啱開始第幾秒，就即刻有個gag。
以：即刻有爛gag。
靳：即刻有……即刻有show notes噉樣，下低有個……有條拎噉樣。
以：我諗……我唔識背……我細細我識背㗎！佢嗰段自介。
苗：哦，勁。
以：仲有咩齊天大聖嗰段呢，都係背到爛熟㗎嘛。
靳：咩花果山，咩水簾洞美猴王嗰啲……嗰啲乜嘢吖嘛。
以：可以再長啲㗎。
苗：仲有啲咩係你哋可以……你哋係細個背咗，好耐之前背得好熟，然之後突然間可以即刻講返出來嘅？即係你好耐都冇再諗過，但係你可以即刻背返出來嘅嘢。
以：三點一四一五九二六五三五八九七九三二三八四六二六四三三八三二七九五零二八八四一九七……
苗：……四六二六四三三八三二七九五零二八八四一九七一六九三九九三七五一零……
以：喂，你唔好騷擾我！
靳：成堆nerd坐埋喺度唔知喺度做乜。
以：你……你背咗幾多個位㗎？
苗：九十囉。我唔知點解冇背一百囉，淨係背咗九十停咗，跟住就冇再學過。
以：我當年喺學校嘅時候，佢搞個背pi比賽，我去到二百嘅。噉但係我retain咗六十囉，應該。
靳：犀利啊，真係。
苗：我retain到嗰九十嘅。
靳：我應該三十到，我諗。
以：我係純粹靠呢個肌肉記憶嚟retain囉，好似係。
苗：哦。個口嘅肌肉記憶？定係……定係點啊？
以：係啩。
苗：噉咪即係記憶囉。
以：四一九七一六九三九九三七五一零五……
苗：噉咪……你呢個普通記憶咋咩？乜唔係。
靳：我去到二八八四一咋喎。
以：我唔知點樣入咗長期記憶啦，總之。呢啲唔應該入到去㗎，但係somehow係入到嘅。
苗：哦。廣東話背數字都好方便喎。其實好多……
靳：好快添。
苗：譬如電話冧把呢，其實聽一次，已經記得囉。即係唔需要再人repeat，或者唔需要寫低。
靳：即係八一七七七七七八嗰啲。
以：係你咋，係咪啊？
苗：唔知喎。我硬係覺得嗰個buffer呢，好似……即係喺個腦裏面嗰個容量，嗰個RAM呢，對於廣東話數字個RAM係會容量大啲。我唔知純粹係因為係我母語吖，定係真係英文，或者其他語言，嗰個數字係難啲記呢？會唔會係。
以：我覺得可能兩樣都係囉。因為一嚟，係啊，廣東話母語啦。即係有人話「母語就係你用嚟數數字嘅語言」吖嘛。噉呢個係一個因素啦。但係其次就係……即係對我嚟講啦，廣東話你讀數字嘅話，佢個節奏同埋佢個旋律，都係比較清晰啲。
苗：係，比較穩定囉。即係數字同數字之間都係一個音節，個長度又差唔多嘅。但係最重要係有個聲調囉，我覺得。
以：係啦，即係唸口簧噉。
苗：都好大幫助喎。
靳：即係可以哼個數字出嚟。
苗：如果你係分……淨係分聲調嘅……即係形狀，同埋呢個長短嘅音節呢，你係可以分到晒基本上所有嘅數字囉，除咗一同七可能分唔到之外。
以：嗯，星期一到星期七，唔係。
苗：多勞多得！
以：可能係用咗少少你個音樂嘅記憶。即係唔係話個個都有呢個訓練啦，噉但係你聽開嘅話，你會對呢啲旋律嘅嘢比較敏感啲。即係講開廣東話，你都已經好sensitive啦。噉換着係英文，即係譬如我同人講電話號碼噉樣，或者任何數字啦。嗰陣時我阿妹都話：咦？點解阿哥你學咗英國人讀電話號碼啲方式嘅？就係啲咩one two THREE，four five six SEVEN噉樣講嘢嘅。噉但係你……你調轉個ONE two three又係得㗎喎。噉所以你冇咗嗰方面嚟幫你記住佢囉。
苗：即係你……係囉，唔同語言會用唔同嘅一啲方法去幫助佢哋去……一係幫自己記，或者幫人哋去聽、幫人哋聽得明你嗰串數字囉，即係都有唔同方法囉。會喺唔同嘅地方度cut開，或者個語調都會有啲特別。
以：哦。即係好似我講我個電話號碼，永遠都會講double-O seven噉啫。
苗：哦，你係有嘅。咁勁？
以：係。我唔會講成個畀你聽嘅。噉但係裏面係有。
靳：裏面係有嘅。
苗：你係會點樣分呢？即係譬如一個電話號碼……我唔記得有幾多個位，五加六，係囉，有十一個位吖嘛，係咪啊？
以：英國電話號碼，講緊。
苗：英國電話號碼，係。即係計埋個零嘅話，就有十一個位。你會點樣分呢？會點樣……點樣斬開佢啊？
以：正常都係五加六㗎嘛。噉但係我都發現譬如話我阿媽呢，佢係會唔同分法㗎。佢係咩……咩四加三加唔知咩噉樣㗎。
苗：哦，即係計埋個零都有㗎？
以：即係佢會喺中間揾個佢方便嘅位，嚟到割開佢囉。噉但係……因為佢唔係住喺度，我係住喺度吖嘛。噉我見開個個都係五加六噉樣，噉就分。即係譬如話香港你正常都係四加四，噉但係有時無啦啦就會有人係咩三加三加二噉樣，或者……
苗：三一八五個零！
以：係囉，三加五囉。唔係二一八咩？
苗：有兩個……兩個都係叫pizza嘅。一個係二一八五個零，一個係三一八五個零囉。兩間唔同嘅pizza。
靳：二一八五個零係邊間啊？我唔記得咗。三一八五個零係咩pizza博士嘅……類似噉嘅嘅嘢。PHD，係咪啊？
苗：KFC！KFC係二一八五個零。三一八五個零呢，就係……
靳：唔係PHD咩？
苗：Pizza Hut。
靳：哦，Pizza Hut！
苗：係囉，即係二一八係KFC，三一八係Pizza Hut。
靳：噉即係我可以call call下，如果㩒錯咗，我就會call咗KFC噉樣。跟住我本身想食pizza，就會食咗炸雞。
苗：突然間……本來諗住食Pizza Hut，點知鄭嘉穎㩒鐘。
以：慘，變咗第二個。我唔係想食你㗎！我係食你……講咗啲咩？
靳：食咗鄭嘉穎？
[08:54]
以：唔緊要啦。對英國人嚟講都係呢啲……嗰啲垃圾快餐嚟嘅。喂，話時話呢，我想問，如果你教人嘅話呢，你會講pizza定係講薄餅定係講比薩？
苗：Pizza。
靳：Pizza。
以：啱啊。
苗：即係我嘅用法。冇乜人聽……薄餅我覺得還可以。比薩真係唔得，搞唔掂啊。
以：搞唔掂，係咪啊？
靳：比薩係有斜塔嗰個地方，叫比薩。
以：pi1 saa4囉，都係。
苗：啱啊。Tower of Pizza。
以：廣東話都係pi1 saa4。
苗：pi1 saa4啊，都係。係，冇錯。
以：噉party定派對？
靳：Party。
苗：噉一定係party㗎喎。
以：因為我有時呢，教人哋呢，我會講話：嗱，你可以講派對嘅，噉但係我哋個個都係講party。開party㗎嘛。噉但係之後啲學生就會堅持講派對囉。
苗：係啊！
靳：你會寫派對，你唔會講派對囉。
以：你會㗎？
靳：會寫囉。
以：我唔會喎。
苗：我覺得某啲情況會嘅。
靳：寫派對跟住講party囉。有啲人會啦，我覺……我都會寫party囉。
苗：我想像到某啲……可能一啲商鋪，佢會……譬如喺啲廣告上面，或者係啲Facebook post啊，之類嘅嘢，寫派對兩個字。但係如果佢係一個……一條片噉樣，嗰個配音，我覺得會講party個機會會多啲囉，係喇。

The rest of the transcript is available to Patreon members.