苗：其實佢就係表達緊，就喺個時間裏面，佢個波究竟有幾勁囉。有幾大……個波有幾大？
靳：個波有幾大？
苗：真係吖嘛。
以：小學雞。小學雞！啊！
靳：我哋係一個合家歡嘅節目嚟緊㗎。好似啱啱上集已經唔合家歡，anyway。
苗：係。
[jingle]
以：歡迎返到嚟《絮言．狂想》第七十四集，我係以色列。
苗：我係三苗。
靳：我係靳尼啊。
以：發生咩事啊？點解一個拉長咗，一個就撞車嘅？
靳：唔緊要，分開錄㗎嘛。
苗：唔係，你剪開咪唔會撞車囉。
以：我就唔剪開，點睇？
苗：即係唔好次次都一樣吖嘛。好悶㗎嘛。
靳：其實我哋係可以三個同時講自己個名㗎。係冇問題㗎。
以：想唔想試下吖？嚟！好！歡迎返到嚟《絮言．狂想》第七十四集，我係以色列。
苗：我係三苗。
靳：我係靳尼啊。我反應唔到啊。
苗：慣咗。
以：呢個撞機遊戲嚟㗎。
靳：但係個目標就係要撞機。
以：係啊，目標就係要撞機。但係其實唔容易喎，你玩……你考反應嘅話呢，係唔知咩見到個……盞燈，之後㩒個掣嗰啲遊戲，係咪啊？
靳：係啊。用把聲嚟玩아파트 아파트。
苗：乜嘢啊？
以：咩嚟㗎？
苗：同嗰個有咩關係啊？同嗰個最近流行嘅……
靳：咩啊！아파트係酒game嚟㗎嘛！
苗：啊，我冇玩過。
靳：아파트係韓國嘅酒game嚟㗎嘛！
苗：哦，我以為係apartment嘅簡稱嚟。
以：唔飲酒，唔識啊。
苗：아파트，因為日文係アパート。
靳：佢真係apartment嘅簡稱，就係因為啲人用啲手疊上去，所以變……就係apartment吖嘛。
以：可唔可以解釋下成個遊戲啊？
靳：其實我唔知點玩㗎。
以：哦，OK，你有個印象。
苗：因為我隱約記得呢個term，即係普通嗰個解……即係一間屋嗰個term。
以：哦，我淨係識アパート。
苗：係啊，아파트。
以：係啊，我哋上次講到三苗唔知飲咩酒呢，其實答案係佢……佢唔飲嘅。
靳：就係佢唔飲酒。
以：因為上次三苗話：乜呢隻酒咁少酒精嘅？之後講到好似三苗成日飲開咩六十percent噉，但係唔係，其實三苗係……係唔飲嘅。
靳：係飲開零percent嘅。
苗：零percent。
以：所以我哋要揾次灌佢，要灌佢，我哋下次。講開飲酒呢，喂，我啱啱見到個Threads嘅post呢，就係一條片嚟㗎喎，就係啲人喺度唱K啦。噉但係呢……
苗：吓？嘩，噉都……噉都過場，可以。
以：個字幕望落去我有啲迷失啊，我覺得。
靳：《東張西望》嚟㗎。
以：《東張西望》轉場。「講起乜呢！」
以：嘩，幾多年前啊？
靳：而家仲有㗎！
以：仲有㗎？
苗：係啊。你幾多年前啊？
以：我……我二十八年前啦，發生咗二十年。我好似send咗出嚟，係咪啊？你哋有冇睇到嗰條片啊？我睇到真係迷惘啊。
苗：我啱啱先睇咗啊。
以：有咩感受啊？
苗：首先要講下條片係咩嚟嘅。總之就係一條唱K嘅片啦。佢係一首廣東歌嚟㗎啦，但係佢個字幕呢，就唔係你平時見到嗰啲中文字。佢係用普通話嘅音呢，嚟模仿廣東話嘅音。即係好似呢，普通話人講「好犀利」呢，佢會用「猴塞雷」三個字。就hóu sāi léi噉樣，噉佢就拼咗個廣東話音。噉佢就成首歌都係噉樣囉。然之後係本身識唱嗰首歌嘅人，都會變咗唔識唱嗰首歌囉。
以：我話，感覺就好似……咩啲人講呢，如果你將個單車左右調轉，之後嘗試踩呢，你就會唔……唔記得咗點樣踩單車㗎。
苗：完全踩唔到單車，係咪啊？
以：踩唔到單車。你係會成個肌肉記憶都喪失埋。有少少噉嘅感覺，就係望……望住嗰樣嘢，之後本來……我就唔算熟嗰首歌嘅，但係我聽過囉。之後我望緊：吓？咩嚟㗎？即係你望住個漢字，你connect唔到個意思囉。唔單止connect唔到，係disconnect咗添啊，直情。越嚟越遠，越行越遠，好似攞住啲橙噉。
苗：即係大家通常嗰個漢字，見到個漢字嘅時候，香港人通常會個腦裏面有兩個音啦：第一就係廣東話音，第二就係普通話音啦，通常。噉你兩樣呢，大家都做得好多㗎，就係見到……見到中文字，讀廣東話音，就知道個意思。或者讀普通話音，知道個意思。但係而家係，你見到個字，你要讀普通話音，但係你要諗佢代表緊廣東話咩音，然之後再連去個意思度囉。就中間就隔多咗一層。但係就係因為隔呢層，所以就完全唔明囉，變咗。要諗好耐先至明。
以：同埋你係要特登制止你一邊個腦，嚟到去畀另一邊個腦去到揾到嗰個連接囉。
靳：即係你個視覺同埋聽覺係……係斷咗噉樣。
苗：即係好似嗰啲test呢，咩有個黃色嘅字，但係個字係寫住「綠色」噉樣，你要講個字嘅顏色，而唔係講個文字嘅內容囉。好難㗎嘛，嗰個。如果大家有玩過。
以：其實好似啊。好似啊。叫咩test？唔記得咗喇。
苗：咩Stroop test啊？好似叫做。
靳：Stroop test，係啊。
以：啊，係。之後我就諗起，其實平時睇開啲台灣人寫台語呢，exactly係……係噉樣寫㗎喎。
苗：哦，即係嗰啲咩「三小」嗰啲。
以：啊，「三小」啊，仲有咩啊？
苗：共三小。
靳：你在衝三小。
苗：衝三小。
以：咩咩美賣話？
苗：咩「蝦米」嗰啲。
靳：美……（台）「袂䆀」啊。
以：（台）「有影」佢點樣寫㗎？咩「午壓美賣」吖嘛！
苗：咩「靠北」嗰啲呢……
靳：（台）有影袂䆀。
以：我而家係三層喎。我而家將個台語變成嗰個所謂華星文……
苗：然之後再廣東話讀返出嚟。
以：……之後再將個華星文用廣東話讀出嚟。
苗：笑死。
以：午壓美賣！
靳：完全係真係三重華星文，呢個係。
以：係啊。係囉，但係最常見就係咩三小啊……粗口嗰啲囉。
苗：你……咩你是咧講蝦米？
以：咧……
靳：林北。
以：蝦……蝦……
苗：林北。靠北。
以：林……我全部喺度process緊啊。你一路講……你每講一個，我就用一秒鐘諗下咩漢字先，之後再……
靳：唔緊要㗎。廣東話人腦係噉樣運作㗎。你諗下我哋全部嗰啲地名嘅譯音，都係噉咋嘛，其實。
以：可唔可以解釋啊？
苗：日本嗰啲地方名咋嘛，即係。即係都係見到個漢字，用返我哋自己嘅語言讀出嚟。噉其實個概念差唔多囉。
以：都係。
靳：係。唔係啊，同埋嗰啲咩弗吉尼亞州啊、嗰啲咩啊沃爾瑪啊，嗰啲囉。
以：哦！係喎！
苗：係喎。其實exactly係同一樣嘢嚟㗎喎。我哋好熟喎。其實廣東話人係好熟呢樣嘢。
以：係喎。但係你係內化咗㗎嘛。即係譬如話你想譯一個你未聽過嘅英文字嘅時候，你……我唔知你會唔會係啦，噉但係你做咗咁多年香港人，你會……可能會自然而然噉將個r變成個「爾」字㗎嘛。
苗：啱啊，見到k就係「克」。
以：係囉，係囉。見到k就係「克」。即係明明廣東話唔係噉work㗎嘛。
苗：馬克龍。
以：即係「爾」係冇理由會有個r聲㗎嘛。但係你內化咗囉。
苗：嗰啲啦。係。
以：所以其實唔係隔咗一層，而係你腦裏面係有第二個system，係專係愛嚟connect漢字同埋外語發音嘅。
苗：啱啊。
靳：噉所以可能啲台灣嘅人，見到呢啲華星文，都係好似有一個噉樣嘅……噉樣嘅處理噉樣囉。
以：我有時就話，某程度上係將漢字當成一種syllabary囉。即係類似日文五十音噉樣，但係instead of五十音，你係有唔知n咁多個漢字嘅普通話發音。然之後你就用呢啲發音，嚟到去表達你想講嗰句台語囉。
靳：漢字表音大法。
苗：係。其實本身假名都係噉樣發展出嚟咋嘛。即係同一個音，以前有好多個字可以表達嘅。但係之後就慢慢慢慢，就大家com咗一套標準出嚟。總之，呢個音呢，我哋唔用咁多個漢字，淨係用呢個，就代表呢個音噉……只不過呢個係嗰個過程嘅早期啲嘅……嘅一個……一個部分。
以：係喎。你講起嚟呢，我諗起有同人傾過一樣嘢，就係即係中國係興點樣譯呢啲外語名㗎。之後我話：點解你哋譯名，好似次次都係用嚟用去都幾個字噉樣嘅？即係譬如啱啱講嘅嗰……凡親有k就「克」啦，噉樣。之後我話……
苗：係啊，呢個我知道個答案。
以：某程度上真係好似係……係有一個alphabet噉樣逐個音譯出嚟喎。之後佢話……
苗：係真係有嘅，因為。
以：係嘞。
苗：如果……我……我……我嗰陣時呢，year one呢，就上過introduction to translation。噉嗰陣時呢，就學識咗呢，原來呢，中國嘅新華社呢，係有一啲表啊，有一啲譯音表，係標準嘅譯音。噉佢就會……譬如英文有個表，西班牙文有個表，俄文有個表，等等啦。噉佢每一個字母，或者……即係每一個音、每一個組合呢，佢都會有一個相應嘅漢字囉。
靳：即係真係k就係寫住「克」字噉樣。
苗：冇錯嘞。即係譬如呢個外語譯音表。噉呢，佢個表呢，佢有分開頭嘅聲母啦，同埋嗰個元音嘅。噉譬如你要譯rhapsody噉樣啦，係咪？噉……噉呢，我首先就揾/ɹæ/啦。噉/ɹæ/個/ɹ/，跟住下面再揾/æ/。噉佢就係譯做個「拉」字囉，推拉嗰個「拉」。
以：哦哦哦。OK。
苗：噉然之後……噉個p呢，就要自己分出嚟嘞。
以：普？
苗：p呢，冇嘢呢，就係「普」喇，係嘞。所以就係「拉普」。/sə/，/sə/係咩呢？/ɹæpsədi/，噉就係……如果係……
以：係咪會用/soʊ/啊？我諗。
苗：Schwa嘅話呢，就係「瑟」啊，亞瑟個「瑟」。
以：吓？
靳：sè吖嘛。
苗：即係上面兩個王，下面一個……一個必字嗰個……嗰個瑟。sè。
以：但係我想問佢係會用嗰個phonetic嘅發音，定係佢用返原本嗰個/oʊ/啊？因為如果你個個音都stress嘅話，係/ɹæpsoʊdi/吖嘛，英文。

The rest of the transcript is available to Patreon members.