靳：佢有展出好多唔同國家嘅人呢，都已經同呢個博物館呢，簽定咗呢，呢個協議呢，就係話佢哋過咗身之後呢，就會將呢個陽具捐畀呢個陽具博物館噉樣嘅。
以：哦，好偉大啊！
苗：係喎。
靳：係啊，為人類嘅唔知乜嘢作出好……貢獻。
苗：即係以後就唔使話咩「國際機場男廁」喇。呢個係「冰島首都購物街地庫」，就係「乜撚都有」。
以：乜撚都有。OK，梳。
[jingle]
以：歡迎返到嚟《絮言．狂想》第七十三集，我係以色列。
苗：我係三苗。
靳：我係靳尼啊。
以：係嘞，今日開始之前呢，有樣好緊要嘅嘢，要同大家講返先，一個温馨提示啦，係嘞。就係呢，因為而家已經十一月啦。噉……
苗：就……就嚟聖誕節喇！咦？唔係，sorry，繼續。
以：係。要快啲唱定聖誕歌先，同埋攞定啲羽絨褸出嚟先，噉樣。係喇，由十一月開始呢，如果有聽眾想加入我哋嘅Patreon，成為會員嘅話呢，噉如果你係用iOS嘅話呢，噉就麻煩你請移玉步，去到其他裝置，譬如電腦上面，嚟加入喇。因為暫時呢，iOS係join唔到嘅。噉我哋可以預告定先啦，因為我哋個Patreon呢，so far都係我哋逐集嚟到計錢嘅。噉但係我哋最遲出年十一月呢，我哋將會改做逐個月啦。噉我哋詳情呢，就仲未決定，噉但係大家有個心理準備先，係喇。係，望周知。
靳：如果去到呢度呢，大家都未join我哋嘅Patreon嘅話呢，快啲去join。因為每……有我哋每集嘅逐字稿，同埋我哋有個Discord server呢，我哋有時候去上高呢，開live嘅。
以：係啦，諗下幾時開live。我而家諗緊喇，我哋揾緊時間。所以大家可以密切期待吓。
苗：好。
以：係啊。我哋啱啱講緊呢，因為每集都係我剪podcast啦，之後我去打埋逐字稿啦。所以呢，三苗同靳尼呢，成日都問：啊，我哋上集講乜嘢㗎？點樣講㗎？之後我就成段背出嚟畀佢。
靳：人肉逐字稿。
苗：以色列係全世界聽《絮言》聽得最多嘅人。
以：呢個一定係真，一定。
苗：忠實聽眾。
以：每集我起碼聽咗五次啦。剪嘅時候聽咗起碼兩次啦，好仔細噉樣聽啦。之後打逐字稿又好仔細噉聽多一次啦。之後間唔中又㩒出嚟播下噉樣。
苗：係啊，好辛苦㗎。
以：可以聽到阿三苗同靳尼呢個天籟嘅聲音。
靳：天籟嘅聲音。
苗：個天要瀨喇，聽到。
以：好鍾意聽到啊。
靳：我最多係燒鵝瀨嘅聲音嚟㗎咋喎，呢啲。
以：你搞到我肚餓。我未食飯。係啊，因為我哋上次就講起呢個冰島吖嘛，或者我哋鍾意戲稱做呢個「伊斯蘭國」啦，係咪？
苗：伊斯蘭國。
靳：伊斯蘭國。喺bing1度啊？
苗：喺/piːŋ˥/度啊？
靳：喺冰度啊。
以：係啊。噉上次呢，我哋有提到呢個「煙涌」嘅。噉我哋如果唔記得咗嘅話呢，可以返去聽返，點解我哋將呢個伊斯蘭國……唔係，冰島嘅首都叫做煙涌啦，係啊。你解釋埋伊斯蘭國先。
靳：伊斯蘭國就好簡單啫，其實就係因為冰島係……喺伊斯蘭文……唔係，喺冰島文入面，係Ísland，所以就叫伊斯蘭。
苗：係，即係佢係串Ísland，嗰個i上面有一撇嘅，噉就/ˈistlant/。
以：Island？
苗：係好似island噉嘅，望落去。
靳：Ísland。
苗：但係係讀/ˈistlant/。
以：但係個s要發音嘅。
苗：冇錯啊。
以：係喇。
苗：Ís就係冰囉。
以：噉點解我哋上次會講起冰島嘅呢？
靳：因為我去完冰島？
以：嘩，有米。
苗：嘩。係咪好貴㗎？係咪會破產㗎？去完返嚟。
靳：OK嘅，唔會破產嘅，OK嘅。係幾貴嘅，但係唔會破產嘅。啲……啲嘢食畀我想像中，其實唔係咁貴？
苗：哦，會唔會係匯率嘅問題呢？我都唔知。因為我之前去，都唔覺得平嘅。
靳：我……我係唔覺得平嘅。
苗：唔係特別平囉，又唔係話好貴，其實。
靳：我覺得比起瑞士，可能平少少？如果淨係計食嘢嘅話。
以：嘩！你去齊晒啲最貴嗰啲歐洲國家喇喎。前排你又去瑞士，今次又去冰島，真係不得了。
靳：都……都……都……都幾前排㗎喇，去瑞士嗰陣時都。
苗：好耐喇喎，瑞士。
以：點解我噉深刻嘅？係咪因為我好熟個逐字稿，所以我覺得好……好深刻啊？
靳：瑞士我諗年幾兩年前？
苗：仲早過布達佩斯㗎喎！
靳：應該係。
以：係咩？
苗：應該係喇。
靳：早過布達佩斯！年頭嚟㗎喇。
苗：啱啊。
以：哦，OK。舊年年頭呀？
靳：而家已經覺得布達佩斯係好耐之前喇。
苗：係啊。一年前囉。
以：係吖，係吖。大概一年啦。
靳：但係一年前咋，其實。
苗：啱啱一年多啲囉。係因為今年嘅Polyglot Gathering又啱啱完咗喇，噉所以係……
以：Conference啊！
苗：哎，sorry。
靳：Gathering完咗好耐喇。
苗：我係未去過Gathering，但係我講錯咗。係因為今年嘅Polyglot Conference呢，係都係啱啱完咗。我哋而家錄緊就係十一月頭啦。噉佢哋啱啱完咗喺馬爾他嘅Polyglot Conference。噉我哋就未知道下一屆係邊度，噉就大家都係喺度拭目以待緊。噉所以……所以一年前呢，就係我哋喺布達佩斯去上一屆嘅Conference嘅時間囉。
以：係啊，就係我同靳尼第一次見面嘅時間。
苗：啱啊。
靳：網友，網友。
以：係啊。
苗：我哋仲做咗呢個直播吖嘛，噉大家可以返去聽返。我哋分開咗兩集嘅直播。
以：講咗好多啲超能力。
靳：係，以色列剪咗好多soundbite出嚟。
苗：啱啊。
靳：係啊，仲有個片添嘅，係。
以：哦。哦，係，你講嗰啲片。可以睇到靳尼嘅側面。係啊，唔知嚟緊佢哋去邊啦，可能……可能唔喺歐洲㗎喇。佢平時次次都唔同……
苗：卡啦卡啦㗎嘛，去歐洲、唔係歐洲，跟住……
靳：會唔會第一次喺非洲搞呢？
苗：唔係，我覺得其實非洲搞嗰個問題係……即係可能未必有人搞到啦，即係搞手通常係喺嗰個國家，或者佢好容易去到個國家。另外就係……我諗主要其實都係啲搞手囉，即係啲搞手方唔方便囉。因為你通常之前去其他國家，可能美國，噉又嗰度有搞手。你喺亞洲，又……本身亞洲都有啲……有啲搞手。之前日本又係有人係based in日本嘅。噉歐洲就都好容易啦，係囉。噉所以如果非洲嘅話，都唔知可以去邊度喎。
以：實有嘅，我就諗。噉但係我諗……即係呢個網上polyglot嘅羣體，都係偏歐美中心嘅，呢個真嘅。
苗：係嘅。
以：因為我識好多人，都冇乜印象有邊啲係非洲人。係囉。即係相對上少好多囉。噉之後再肯出嚟做搞手嘅，就會可能再少啲囉。
苗：更加少啊，係。
靳：但係呢個好有趣嘅，因為其實好多非洲……喺非洲住，或者非洲本土……即係大嘅人，其實通常都識嘅語言多……多過大部分歐美嘅人嘅，其實。
以：係吖，係吖。
苗：係啊。有好多撒哈拉以南嘅國家，佢哋嗰個文化，係好……即係多語環境係好正常嘅事囉。我之前睇過一個study，就係好似係喺塞內加爾啊，西非嘅一個國家啦。嗰度嗰啲人，係……六七個語言係正常㗎囉。因為佢哋係會喺唔同嘅環境底下，譬如佢去買嘢，就係用一個語言，佢屋企用另一個語言，跟住佢返學一個語言，佢去教會又另一個語言。佢每一個社會嘅情況……每一個social situation，佢都轉另一個語言。跟住有一啲文化呢，就係必須要……譬如你係結婚噉樣，你必須同一個唔同語言背景嘅人結婚囉。即係佢係有一啲噉樣嘅文化。
以：吓？
苗：噉阿爸阿媽就一定要唔同語言。
靳：一定……
苗：係啊，即係有少少似我哋禁忌話唔可以同姓結婚，佢哋就係唔可以同語言結婚囉。
以：同姓你講緊姓氏。
苗：姓氏……唔係……
靳：姓氏，姓氏，姓氏，係。
苗：當然兩樣都有呢個禁忌。唔同嘅社會，都有兩種唔同嘅禁忌。即係係啦，我哋講緊同一個姓氏嘅人結婚，有一啲地方有呢個禁忌㗎嘛。譬如韓國好似係都幾……仲係有呢樣嘢嘅，雖然佢哋嘅……佢哋嘅姓氏都係唔係好多囉。但係佢哋都好似係有呢樣噉樣嘅禁忌。跟住……
以：即係譬如冰島就要check下你係唔係cousins噉樣。
苗：係啊。
靳：我呢個我問過導遊喇，佢哋話唔係噉樣㗎！佢話唔係㗎。
苗：哦，冇嘅，假嘅。
靳：冇呢樣嘢㗎，假㗎。
苗：冇呢個app嘅。
靳：你同人結婚或者拍拖，唔使check係咪……
苗：唔使check。
靳：唔係一定要check係咪親戚囉，其實。
苗：唔係，噉唔係一定要check，但係有冇……有冇方法check先。
靳：噉你去邊度，都有方法check……check㗎啦。
苗：即係有冇database係公開嘅，可以check到。
以：我前排係Google咗呢，就係話有啲……即係研究嘅人呢，就……噉就有個database，去到map晒所有冰島人嘅籍貫……唔係籍貫。佢哋……
苗：OK㗎。我籍貫係Akureyri。
以：屋企人嘅歷史噉樣啦。係喇，噉之後……之後係有人用呢一個database，整咗個app出嚟，係有呢樣嘢。噉但係有冇人用，係另一回事囉。
苗：啊，OK。OK，即係係存在嘅。
以：有個服務囉。
靳：係，即係有一個噉嘅資源，但係你唔一定要用佢，都好似……
苗：都正常吖，唔通真係個個……
靳：因為我問起呢樣嘢，個導遊都有少少……有少少意外噉樣。跟住佢又話唔知有……有啲噉嘅嘢，噉樣囉。
以：應該係啲外國媒體吹大晒喇。
苗：係囉，自己……哦，自己唔知有。
以：所以我哋返返去冰島之前呢，我想講返。因為啱啱你講到即係非洲好多人都係識好多語言啦。噉但係喺呢個……即係我哋稱之為polygot嘅羣體，或者呢個movement裏面，係比較少啲。所以我自己，我對polyglot嘅定義，就係鍾意學語言嘅人囉。
苗：啱啊，係。
以：就唔係一定係識好多語言嘅人囉。
苗：識好多語言同polyglot係兩個概念嚟嘅。
以：即係polyglot原本個意思，就識好多語言嘅。噉但係我覺得現代個意思，即係因為定義係會變㗎嘛，語言會變㗎嘛。
苗：係啊，我哋用唔同嘅字根啊，我哋用呢個……
以：Multilingual。
苗：係喇，係喇。如果我哋用拉丁文字根，multilingual呢，就係純粹講好多語言。但我哋用希臘文呢，polyglot呢，就係鍾意學好多語言。一個身分認同嚟㗎。佢唔係純粹形容緊你識好多語言囉。

The rest of the transcript is available to Patreon members.