上回講咗我點樣從零開始，受香港抗暴之戰啟發，構思咗一個將真實事件戲劇化、探「暴動」同「暴政」嘅劇本。然之後，就嗱嗱聲搵人寫劇本。

唔試唔知，搵人寫歌劇嘅劇本都幾難。一方面要識發展一個故事，同埋將個故事濃縮、設計成一個舞台表演，另一方面要識用（相對上比較）詩嘅語言嚟創作，最好有啲音樂感添。喺我呢個project裡面，就再加上要熟識香港時事、但係又要用英文寫嘅要求，更需要有至少一兩個月嘅空閒時間投放入去。

我一開始試過問喺自己嘅奇博學院（Keble College）識嘅創意寫作學生，佢本身有同我打算夾弦樂四重奏（最後拖下拖下拖到武肺），都好有興趣幫手寫，但係暑假忙住寫論文，皮爾修。又試過搵暴大音樂系有英詩底嘅師弟墊屍底，可惜佢文筆又生疏，又忙住搞音樂會。

最後friend搭friend搵咗一個寫開英詩嘅，見住佢有寫開……性質相近嘅題材（放過佢啦国安叔叔），就大膽向佢提出呢個構想。從此，呢套劇，就開始由一個人嘅project，漸漸變成一team人嘅project。

藝術家脾性，創作者同創作者合作，真係唔容易。啲諗法由我源起，交到佢手上反覆噉斟，經歷大改、細改，內容、情節褪嚟褪去，等到佢慢慢吟完詩，再交返畀我譜曲。成個過程由八月左右開始，要喺十月排練之前完成，其實好難；有時會偷雞寫咗音樂先再fit返落啲詞度，而且最後都遲遲先完工。

開工期間，牛津現代歌劇學會就開始招其他人幫手籌備。因為場音樂會會有三套微歌劇，所以一截止報名，我哋三個作曲家即刻開始爭人。我考慮過自己做音樂總監（指揮），但係指揮責任太重大，都係做返副總監（即係排練時嘅伴奏）算。反而一見到我好欣賞嘅本科音樂學生、斯洛伐克女指揮死線一刻報名，即刻mark住佢，同其他作曲家bargain咗返嚟。深思熟慮後，再揀埋標榜一生人睇過幾百套歌劇嘅德國人數學博士生做導演、玩少少音樂但係好有戲劇經驗嘅英國學生做副導。

十月中上旬，我飛返牛津，開始我個學位嘅第二年。星期日到埗，星期一朝早就喺哈里斯．曼徹斯特學院為organ scholar嘅職位試奏，星期二晚就輪到我同其他作曲家去遴選啲報咗名嘅歌者。好驚，成世人聽得兩三套歌劇，突然大權在握，要揀歌喉、揀演技、揀台風。都係嗰句，我本來以為淨係寫音樂㗎咋。

好彩學會個阿頭一早諗好曬程序：每一個參選者入嚟，我哋各自介紹我哋嘅構思，講下我哋作曲進度幾咁唔掂，然後佢就唱一首歌、讀一篇戲劇獨白（dramatic monologue）（隔籬兩個都係英國人，中學時已經熟習呢啲戲劇嘢，我都係要google咗先清楚咩嚟）。我好後悔自告奮勇做伴奏，搞到聽又難、寫碌屎又難。聽咗兩晚，終於聽曬，又要同人理論邊個套劇更需要最出色嗰啲歌者。好彩得我嗰套有男高音，另外兩個作曲家唯有睇住我擸走呢個貴族姓氏、戴頸巾、聲底靚、又勁有魅力嘅法國人哲學系博士生，成就我嘅「暴動」。相反，搵女高音就波折重重，但最後都搵到對呢個製作有熱忱嘅「暴政」。

同我個小團隊嘅初次開會，係角色遴選後一日、喺琴房嘅地下。當時有少少緊張、少少尷尬。始終我領導一個創作團隊嘅經驗欠奉（本身就冇諗住要），又係成間房裡面對歌劇認識比較少嘅一個。（就算演出後，次次re-u，一傾到歌劇話題，我都會保持緘默。）最擔心嘅係，我嘅題材咁本地、咁個人，對佢哋嚟講咁遙遠，喺佢哋知道故事內容之前捉佢哋入我條team，感覺好似氹咗佢哋落搭，或者拐咗佢哋幫我做嘢噉。

不過，我諗多咗喇。

佢哋都同學會主席一樣，認為歌劇係應該反映社會嘅。佢哋都覺得，香港嘅事，唔止係香港人嘅事；全世界注目之下，香港嘅浮沉，都係對世界嘅警惕。最重要嘅係，作為三套歌劇之中唯一唔係「全英班」嘅團隊，我哋係吸納緊唔同民族歷史嘅教訓嚟做呢一個製作。計埋演員，我哋一team人（除咗僅有嘅三個英國人）有香港人、德國人、斯洛伐克人、新加坡人、法國人，佢哋民族嘅近代史，都有同極權擦肩嘅慘痛經歷。佢哋都深明，而家嘅香港，就係慢慢、慢慢噉向住四十年代嘅西歐、六七十年代嘅中國、91前嘅蘇聯進發。香港人今日嘅故事，亦都係每一個民族嘅故事。

後來傾傾下，個故事嘅中心思想就變成從香港嘅出發點睇世界：每個國家、每個文化，不論係喺過去、現在、定係將來，都一定有類似嘅人物、事件出現過。往往都有為理想社會而無懼挑戰現狀嘅年青人、有只睇到癥狀而睇唔到病因嘅收成期分子、同埋有自以為主管公義嘅當權者。作品副題係「捏造嘅真相同反射嘅大話」（a chamber opera on manufactured truth and reflected lies，梳，我措詞唔係好掂），正正反映極權點樣用威權改寫現實、但係冷血嘅舉動只係掩飾佢嘅軟弱。

仲記得，我哋一路傾，大家都好雀躍噉話想有機會喺香港再演。可惜，佢哋而家可能連香港邊境都入唔到嚕。

籌備、排練嘅過程，下次再寫。

有關我嘅作曲生涯同埋作品，或者想睇下譜，請移玉步去我個音樂家主頁。