一講到學法文，好多人就講啲數字幾難計、啲男女冇可能記晒。其實學法文，係咪啲人講到咁難呢？

我就住每個難處，逐個為你解構。

【粵文字幕】下面足本版

其實法文係超級容易學！同電視機嘅觀眾都要講，法文係好簡單、好易學，三個月包學識。

大家好，我今日想快快拍一條回應片。事關我早兩日睇到一條片，由一個法國港僑向香港人解釋學法文四個最難嘅地方。如果有興趣，可以睇下佢條片先。佢去到條片最後有講到明:唔係想令人打退堂鼓、叫人唔好學法文、覺得好難、學唔成，但係已經係條片嘅最後，好多人都冇睇到嗰度。同埋我碌留言嘅時候，都見到好多人睇咗第一部份，已經覺得學唔掂，淨係計數已經搞唔掂，就唔想學。我就覺得好可惜，如果有人本來想學法文，但係睇到呢啲困難，就放棄學習
嘥晒動力。

我拍呢條片主要有兩個目的：第一，同大家講法文唔係你想像中咁難；第二，有咩方法幫你克服難嘅地方。

如果你第一次嚟到呢條channel，歡迎，我係Israel。我喺呢條頻道主要拍片講學習語言嘅方法，同埋我自己學嘅經歷。我亦都有一個關於語言、語言學嘅廣東話podcast，歡迎所有明或者學緊廣東話嘅人收聽。如果有興趣單對單得到我學外語嘅心得，都可以睇下「同我學外語」服務。

首先，第一個難處就係數字。我喺唔同嘅谷、唔同地方都見到人攞法文嘅數字講笑，可能半講笑、半嚇人，結果嚇走咗好多人。係咩一回事？佢條片講到法文，尤其是十位嘅數字，好多都好似要計數計出嚟，例如……

就諗：法國係咪個個都係數學天才？係咪唔識計數學唔掂？我同學習者、母語者都討論過呢個問題：唔同語言嘅數字都有啲奇怪嘅嘢，好似德文會講咗個位先講十位。但係你諗法，如果你識英文，其實英文都有奇怪嘅地方，例如……係調轉咗嘅。最有趣嘅係，你可能冇諗過，學中文、日文嘅人，都有反映類似嘅嘢，見到……佢就話：亞洲係咪個個都係數學天才？

我就問下你，你講「九十五」嘅時候，你會唔會計……？你唔會計數，你見到95，你就直接噏到九十五。同樣道理，法國人見到95，都係即刻撈咗……出嚟，就唔會同你計，計返條數出嚟。所以重點係唔好諗住學嘅過程係學計數，你要諗：呢個數字就係噉讀，就係事實，你就要慢慢熟習呢個事實，透過練習將佢內化，等你下次見到71嘅時候，你唔係諗老師教你幾難讀，而係即刻諗……

講到尾，計數本身唔係問題，問題係冇用相應方法去習慣啲數字。譬如如一至十，你逐個學，去到三、四十，你逐個學，去到七、八十，你都可以逐個將兩個位當成一個數字嚟記，就搞得掂。

佢講嘅第二樣係名詞嘅陰陽。呢個問題我已經寫過篇文，下面有拎，主要講歐洲語言裏面啲陰陽點樣處理、學習。但係簡短嚟講，我覺得名詞陰陽係好事。點解？因為學生字最難嘅嘢，唔係記每一個生字嘅特性，而係要記咁多個生字，擺晒入腦，可以隨時攞出嚟用。

學生字嘅時候，你個腦係靠咩記得？靠字同字之間嘅關係。譬如我之前拍片講觀察力，上面有拎，講你會記住啲字同字嘅配搭，或者近義詞、反義詞等等，或者同類別嘅詞語，噉樣去記。陰陽係畀咗更多方法，幫你將啲詞語歸類。到你熟晒嘅時候，你一諗到一個陰性詞，你就自然諗到類似嘅陰性詞。例如法文所有-ion都係陰性，凡親見到呢個字，你就諗起類似嘅字都係陰性，幫你更深刻記得啲字，隨時用到。

啱啱呢個例子，顯示法文有啲規律，某啲詞尾就係某個性別。嗰條片就問：點樣記得晒啲規律？我嘅答案就係唔好記。又係上次條片講過，規律唔係一個列表噉記，而係去發掘呢啲規律，喺睇、聽、寫嘅時候留意下，呢個規律喺呢度。譬如啱啱講ion係陰性，配搭嘅形容詞都係陰性。譬如你喺篇文見到information importante係陰性，你就特別留意佢。下次再見到類似嘅規律，你又深刻咗少少。重點係要靠經驗、輸入，去發掘、記得、內化呢啲規律。

你可能諗緊：廣東話本身冇陰陽，有個全新嘅概念喺個語言裏面，點樣掌握？其實廣東話係咪冇陰陽？的確冇陰、陽，但係有類似性別嘅嘢：廣東話裏面名詞嘅類別，係複雜過所有歐洲語言好多倍。唯一唔複雜嘅就係，有時個量詞同個名詞有關係，可能長嘅係一條，長又硬嘅係一支，又長又硬又粗嘅係一碌。好多時候係冇呢啲規則可循，譬如一盞燈、一張枱、一首歌，呢啲量詞係特定嘅嘢先會用到。學習者點樣記得？有啲量詞直程唔make sense，譬如一隻語言，語言唔係動物，仲有一條片、一嚿水、一件事、一條女、一條仔，都係好奇怪嘅用法。當初你係點樣學呢啲量詞？細個係咪攞個表逐個字背？唔係，係聽嘅時候留意人講一張枱、一盞燈，你就稍為記得；到你自己嘗試講一張枱、一盞燈，可能有時你講錯一個枱、一個燈，你父母就同你講係一張枱、一盞燈。你就透過犯錯，學習正確嘅方法。

所以你學法文詞性係一樣，同埋簡單啲，因為得陰陽，五十五十，可以撞。訣竅係多啲用個語言，睇聽講寫，用嘅時候嘗試犯錯，人哋講畀你知錯，你咪記得，憑經驗吸收。

嗰條片都有提到法文嘅性別包容語言，點樣喺一個名詞、形容詞裏面，包括晒男、女、單數、眾數嘅可能性。討論呢個問題就一匹布咁長，有興趣可以留意podcast第十六集，講關於性別嘅問題，中間提到性別包容語言。

第三個困難就係法文嘅元音，其實係講緊兩個唔同嘅問題：一個係元音嘅數目，第二係拼法。多數人可能諗緊拼法，但係講咗元音數目先。

法文的確好多元音，但係唔講唔知，佢只係多廣東話一個。我畀個表你睇，呢個就係廣東話有嘅元音，有十三個。你睇下法文嘅表，就算計埋鼻元音，都係多咗一個啫。係咪真係難？難唔係在多少，係在唔同。就算真係唔同，都唔係爭好遠。我第一條教學片已經講過，法文同廣東話嘅元音有唔少重疊，係好多英文冇嘅元音，例如ø、y。如果你用英文思維去諗，就覺得好難。但係我哋本身唔係講英文大，我哋講廣東話大，本身已經有ø、y等等，所以唔係咁多新嘅元音要學。

其次係法文串字。法文串字出名奇怪，但係你聽佢講就好複雜，好多唔讀嘅音、連讀音等等。但係佢有系統過英文好多。有個meme，就係好多方法串同一個音；調返轉諗，你見到咁多串法，都即刻知道點讀，因為佢唔會一個串法兩個讀音，大部份情況，一個串法得一個讀音，好處係你一睇就知道點讀。雖然串嘅時候有挑戰，但係起碼兩個方向其中一個係唔難，比起英文，英文真係亂嚟，無論係串字定係讀字，都係要估。佢有個例子，就係oiseau，如果用英文拼法，就係wazo。啲人就問，w a z o喺邊？問題係當你學新嘅語言有個好緊要嘅概念，就係唔可以有假設，唔好諗住佢嘅串法係你心目中諗嘅，唔好諗住佢嘅語法合符你預期。你要將所有嘢當成唔識去吸收。尤其是oiseau呢個情況係好清楚，喺法文嘅拼法規則裏面……其實佢係好清楚，只不過啲人用英文思維去諗，就嘗試用英文拼返出嚟，就覺得法文好傻。但係你要接受新嘅系統……

好多香港人都會透過英文嘅濾鏡睇世界，始終我哋主要學嘅字母語言係英文，我哋由細到大學英文，好少學法文、德文，所以香港人拼地名、人名、「港女拼音」……「港女拼音」都係唔講住，大家學粵拼！當你跳出英文嘅框框，譬如你學過粵拼，學過一種同英文唔同嘅拼寫系統，你會發覺唔同嘅系統只係唔同，唔等於複雜咗、難咗。

最後一樣，講到法文嘅動詞變法。首先不得不承認，法文動詞係幾複雜，佢OK多唔同嘅時態，每個時態都有自己嘅變法。首先畀個好消息大家，嗰條片講漏咗：就係好多時候，同一個時態嘅六個變化，有四個發音一樣，就係我、你、佢、佢哋。譬如現在式「我講嘢」，讀出嚟一模一樣，只不過串法唔同，因為後面有一個唔發音嘅部份。另外嗰兩個其實仲好，因為ons同ez兩個結尾非常常見，幾乎所有動詞類別、所有時態，「我哋」同「你哋」嘅結尾都係呢兩個。所以係咪真係咁複雜呢？

第二點，其實我從來冇背過動詞變法嘅表。點解？因為冇必要。你諗下法國人點樣學？佢哋細細個就識講法文，你哋係咪背嗰啲表？唔係，佢哋係點樣學？係聽人講，或者大個啲就睇書。因為佢哋有十幾廿年嘅時間，每日廿四小時去接觸呢個語言，可以想像到佢人生最少有一點，見過某一個詞語嘅某一個形態最少一次，所以就學識咗。或者可能未見過一個形態，就透過佢認識嘅其他動詞變法嚟估呢個動詞點變法。如果估錯，老師就話佢知，佢就從錯誤中學習，所以咪見過嗰個形態。

同樣道理，雖然我哋學法文嘅時候，我哋冇十二年、廿四小時接觸呢個語言，但係我哋有成熟嘅腦、有毅力，可以將呢十二年、廿四小時嘅時間，縮短到一半，甚至四份一。大不了我咪每日做一兩個鐘，頂多五年之內可以流利講法文。（利申冇心算，啲數字我亂噏，我唔係數學天才。）

我唔係叫大家唔好學文法、睇變法。可以睇下，我自己一開始都會攞個表睇下，但係我唔會背個表。我會認得個形態點樣變，見過一次之後，我就喺睇嘅書、聽嘅嘢，去揾呢啲變法，確認我睇過嘅嘢。每睇一次，就加深我嘅印象。

所以只要心態啱，好簡單，自然望下，你就吸收到。

最後總結（我唔知條片幾長，可能剪出嚟又廿分鐘，希望短啲啦）：重點係唔好驚、多啲犯錯、唔好驚犯錯，越犯錯越學得快，就係咁簡單，掰。