過去呢個星期一（2021-05-24），一年一度嘅Polyglot Gathering圓滿結束。

今年活動原定喺波蘭進行，但係同舊年一樣，因為疫情仍然肆虐，所以轉為網上活動，真人聚會再順延一年。

所以今日想同大家介紹一下Polyglot Gathering呢類型嘅活動、我今年嘅感想、同埋點解你都應該參與。

預先同大家講定先：今年十月嘅Polyglot Conference都一樣會喺網上進行，如果你比較難親身飛嚟飛去，記住捉緊機會，報名參與！

咩係語言迷（Polyglot）活動？

如果你少接觸西方嘅語言迷網上羣體，可能冇乜聽過polyglot呢個詞。Polyglot喺希臘文解「多種語言」（「語言」同「脷」係同一個詞，好多語言裏面都係噉），個字喺過去十年左右喺網上普及化，最常見係喺YouTube講好多語言嘅人。

後來受到世界語嘅羣體啓發，有比較出名嘅polyglot先後搞起咗Polyglot Conference、Polyglot Gathering等活動。前者每年都喺世界嘅唔同地方舉辦，後者主要for歐洲，一開始一直喺柏林，後來大約三年轉一次地方。但係因為武肺關係，舊年開始兩者都喺網上舉行。

我淨係識兩文三語，夠班參加咩？

當然夠！啱啱嘅介紹之中，之所以強調polyglot嘅廣義，就係想畀大家知道只要你鍾意語言，不論你係邊個、你識幾多語言，都一律歡迎！

一嚟對於「識唔識」一種語言嘅定義可以好個人，你可能識過唔同語言，但係冇乜學到高水準。

你亦都可能係對某一種語言（尤其是係少數語言）特別有愛，所以冇乜「儲」語言。

仲有就係，其實兩文三語已經算係好犀利㗎喇！甚至我見過有啲單語人士，因為對學語言嘅世界好好奇，都會照出席。

語言迷活動有咩做？

呢啲活動嘅形式係基於一個學術論壇，幾日之內，每日都有好多講座同工作坊。題目可以好廣泛，由最學術嘅（例如歷史）到最輕鬆嘅笑話、遊戲都有。好常見嘅講題亦包括學習方式／貼士同埋介紹一隻語言（或者語言入門班）。

但係我個人睇法係，呢啲活動都只係聚會嘅藉口。最緊要嘅，始終係去識朋友。

你喺個活動嘅時候，通常同時間會有兩三個talk進行，如果全部都唔啱心水，可以喺走廊、屋頂、吹水室等等吹水。我都仲記得喺2016年嘅Gathering，當時我啱啱夠秤，就學人把酒言……語。（你未試過嘅話，飲酒係會流利咗㗎，好似係！）

除此之外，活動期間，好多人會共進三餐。另外亦都流行同其他參加者一齊住，Gathering喺柏林、（嚟緊）波蘭嘅時候，主辦單位都卜咗成間酒店（旅舍），等大家可以全日留喺大廈裏面同新朋友交流。2019年喺布拉迪斯拉發（Bratislava）嘅時候，我就咁啱同另外一兩個參加者卜咗同一間賓館，所以又可以一齊進出。

至於呢兩年喺網上，就有少少唔同。Gathering啲講座、工作坊編排咗喺歐洲時間嘅日頭舉行，而為咗模擬真實活動嘅吹水室，就開咗三個視像吹水室畀大家用（其中一個叫Gufujo，規則係唔可以講母語同埋英文）。網上嘅形式特別嘅地方，就係24小時，每個鐘會有六間指定嘅語言練習室，你可以根據你識嘅語言出席。換着係真人活動嘅時候，就要睇你好唔好彩，主動去揾人練習。

2021年Polyglot Gathering感想

比起舊年，我覺得我今年嘅得益更加大咗。

之前去過一次柏林、一次布拉迪斯拉發、一次網上，一攞住個時間表，就想好似妙麗揀科噉，去晒所有我有興趣嘅嘢。仲記得有啲大粒嘅polyglot同我講，去玩好過啦，我都聽唔入耳。

的確，如果miss咗真人嘅talk，就要等半年先有得喺YouTube追返。但係喺網上聚會就唔同，因為所有講座，都有一個月時間，可以無限重温。雖然明知自己應該會拖到過咗死線，但係今年就的起心肝，主力去語言練習室，得閒先去下講座。結果係一個字：爽！

最大得益係乜？

啓發同動力

一年一度嘅活動（計晒兩個活動就一年兩度），彷彿係各位語言愛好者嘅加油站。

因為學語言唔係容易嘅事，尤其是如果你唔出國學習，不但冇機會用嗰隻語言社交，更會耗咗你本身社交嘅時間。頂多就係同網上老師傾偈，或者好彩嘅話，揾到人做語言交換。

每去到呢啲活動之前幾個禮拜，為咗可以試下同人用多啲唔同嘅語言，好多人都會落力磨好自己各種語言嘅能力，將沉睡嘅語言喚醒，等自己可以隨時用得到，濤哥就係一個例子。甚至有好多好多人會特登去學活動舉辦嘅地方嘅語言，例如Gathering由2019開始已經預告會喺波蘭舉行，但係已經順延咗兩次，我今年已經見到好多人用兩年時間，學到去比我更流利嘅程度。

活動期間，有機會結識到好多唔同種類嘅語言愛好者。最常見嘅就係學大量語言嘅人，例如Tim Keeley，差唔多喺間間練習室都會見到佢。喺呢啲人身上學到好多嘢，正如Tim旁聽咗一個希伯來文練習室之後，無意中用咗大半個鐘分享自己嘅經驗。又有啲人有特別嘅專門，不論係某種語言定係某個語言學嘅範疇，話唔定會喚起你對呢個專門嘅興趣。更多嘅係（尤其是因為網上聚會參加者特別多）同路人，都對某種或者某啲語言有興趣，可能進度快或者慢過你，都可以互相鼓勵、分享自己嘅挑戰。

活動完咗之後，回味無窮，仍然好想繼續練習，亦都好想提升自己嘅能力。所以我次次都會受到激勵，去訂立嚟緊嘅目標同埋具體計劃，感覺就好似入滿油，去支持我畀心機學習。

逼自己用外語，大量用

我之所以咁鍾意喺練習室流連，就係因為用外語真係好爽。我平時學習方法以輸入為主，學嚟學去都唔知道自己學到咩位。但係一去到練習室，同人（或者聽人）講起某啲有興趣嘅題目，就好快會忘記自己仲係學緊呢種語言。

對我嚟講，呢個就係學語言嘅佳境。

當然，講嘅時候，仲係會有好多棘嘅位，例如唔識某生字，或者用錯語法。但係呢個正正係大好機會，提醒自己：唔好怕錯，同埋唔識嘅話，就揾第二個方法講。

最重要嘅係，享受過程，因為個腦喺享受嘅期間，特別容易吸收。

的確，我今年最癲嘅時候，講咗兩個半鐘波蘭文、三個半鐘希伯來文，同自己學習係天淵之別，歡樂嘅時光過得特別快，而且仲要每當有人解釋啲生字，我可以即學即用，到而家仲記得。

識朋友

學外語好歹唔係一門主流嘅興趣，好多時候都好難揾到志同道合嘅人，更惶論係對同一種語言有興趣嘅人。

喺呢啲活動，你會識到兩種朋友：一種係嗰幾日都一齊過，但係過幾日就冇咗件事，另一種係會keep住聯絡嘅真朋友。我到而家仲可以隨時諗返起2016年喺柏林識嘅幾個朋友，有一個最近結咗緍，一個就恆常喺網上宣揚平等、台灣自主等訊息。

我亦都識到一個以色列人朋友，一見如故，喺佢度認識咗好多猶太家庭嘅習俗，例如安息日唔㩒手機。（寫到呢度，先突然醒悟，點解佢又識成日唔覆我機。）咁啱佢想學好中文去做交流生（真係可惜），於是就成為咗語言交換嘅好友。

粵語國際線？

你睇到呢度，相信都係粵語母語者，或者係好愛粵語嘅人。

我去過咁多呢次啲活動，可能因為一般都離東亞較遠（日本嗰次Polyglot Conference除外），好少見到香港人；唔知係咪宣傳不足，所以喺網上版都係如是。廣東話練習室往往空空如也，就算有母語者，都好多係粵裔嘅外國人，對廣東話熱誠唔大，反而接觸官話較多。

呢啲語言迷活動好需要你！要向世界介紹我哋嘅語言，介紹佢獨特嘅文化同歷史。每次畀人問你母語係咪Chinese，不論用咩語言問，你就用返佢嘅語言，大大聲講：係廣東話！

其實開辦講座嘅要求唔高，你有idea就得，所以有能力嘅，我都鼓勵你去開talk。唔係嘅話，都可以喺各種社交場合，推動粵語運動，話唔定仲會吸引到人學添！

幾多錢？點樣參加？

價錢方面，我只能夠從我經驗講。

網上Gathering嘅話，幾百蚊就得。但係因為已經完咗，而家畀€25可以睇啲講座（你等佢慢慢po上YouTube好過）。出年如無意外係親身出席，一般係幾千蚊，印象中包埋食宿。當然你要計埋飛機錢，所以特別推薦喺歐洲嘅朋友參加，今年應該多咗好多。

（我好彩啲，因為報咗本身2020波蘭嘅活動，結果佢每順延一次，都免費畀我參與網上版。）

詳情就要等佢再開放報名嘅時候，再喺官網睇。好似有學生價添！

Polyglot Conference嘅話，今年仲係網上搞。根據上年經驗，佢係以自願形式收費，預設收百幾蚊左右。有能力嘅建議畀多啲，冇能力嘅可以特別申請免費飛。

啱啱都有講，邊個都可以參加！雖然佢會問你你識咩語言，但係純粹係為佢編排嘅作用，唔係要篩選 😅

希望喺十月Polyglot Conference Online、出年五月波蘭嘅Polyglot Gathering，都可以見到你！