絮言.狂想#031:百事有可樂,Grice時有美心

冬奧運動員5+1秒輕鬆移民中國,得到手嘅,竟然係御賜姓名!

講嘢唔想1999,原來語言學幫到手!唔單止寫潮文,仲有棟篤笑、以色列喺網上激嬲人,都有一個共通點?同我哋一齊發掘下Grice(隔離時?)嘅合作原則(美心?)啦。

今集嘅〈飲水.思源〉,同大家講下漫遊嘅咖啡。

喺YouTube收聽

成爲 Patreon 會員除咗有足本逐字稿,仲有得投票、參與Discord添!

如果想單次打賞,亦都可以請我哋飲杯咖啡

本集特別鳴謝:Klaus、Anthony、サム、阿擇、Ceci

Subscribe to our newsletter!

00:00 北京冬奧又有笑點
13:08 乜嘢係合作原則?
16:00 四大合作原則
23:34 大家樂白汁雞皇飯潮文
26:51 違反合作原則有咩後果?
29:43 曲到直
32:45 我用一條問題嚟答你嘅問題 
35:38 空前絕後滿天飛
40:15 飲水.思源:漫遊詞
45:32 飲咖啡

連結:

意見反饋 Feedback/建議題目 Suggest topics

社交媒體

以:即係舉個例子,就係譬如話《哈利波特》噉樣,噉佢封面呢,就有中文字「哈利波特」啦,同埋之後有啲漢語拼音,就係halibote噉樣啦。

苗:係。

以:好……呢個例子唔好啊,因為本身係英文名嚟㗎喎。

苗:哦,噉呀?

以:有啲咩係出名嘅書?《天演論》。

苗:《演員的自我修養》。

以:乜嘢嚟㗎?

苗:史坦尼夫拉夫斯基……

靳:斯坦尼斯拉夫斯基……

苗:斯拉夫斯基……《演員的自我修養》。

[jingle]

以:歡迎大家返到嚟《絮言.狂想》第三十一集,我係以色列。

苗:我係三苗。

靳:我係靳尼啊。

以:係喇,唔知大家有冇留意到,今次我個音質有少少唔同咗。曬下命先。

苗:係好咗定唔好咗先?

以:係喇,噉大家聽下會好咗定差咗啦,係。因為呢,我而家多咗個……呢啲板呢,去到擋住我講嘢嘅回音啦,所以理論上呢……

苗:好pro啊。

以:係喇,好似懶pro噉樣。就會冇咗後面周圍啲回音噉樣啦。應該聽唔到間房嘅聲音,好耶。如果係patron嘅話呢,就可能見到我已經po咗幅相上去嗰度,畀大家睇到我呢個新嘅setup。係啊,因為我都搬咗房啊,而家間房細啲呢,唔知大家有冇一啲pro嘅聽眾呢,會知道係好啲定係冇咁好呢?

苗:你始終唔係studio,點都唔會pro……即係如果係pro嘅聽眾,就會點都唔……唔會開心㗎。

以:哎啊,對唔住喇,噉就。

靳:你可能下一集呢,要全部整晒隔音板先至得。

苗:Home studio。

以:我都想,唉。有朝一日啦,嗱。

苗:成間房都係……都係嗰啲……嗰啲蛋殼嗰啲……

以:黐晒喺牆嗰啲吖嘛。如果我哋夠patron嘅話呢,就……就可以支持到我哋去買晒、鋪晒嗰啲板喺度嘞。

靳:或者有贊助。

以:或者有贊助啦。

苗:贊助我哋卜studio。

以:如果大家識啲咩大公司呢,可以同佢哋宣傳下我哋,叫佢哋贊助我哋,係嘞。係喇,噉其實我哋都幾個禮拜冇錄嘞,係,好似大家都忙啲啦。即係又……我又搬咗房啦,之後呢,又有呢個農曆新年啦。大家有咩做啊?

苗:冇啊。

以:冇咩做,係咪啊?冇咩做到啊。

苗:真係冇嘢做囉。

以:就係坐定定喺屋企睇電視,係咪啊?

苗:係啊,我冇TV licence。

靳:冇TV licence唔睇得電視。

苗:我坐喺屋企睇Netflix,唔使。

以:噉你哋有冇唔睇奧運啊?

苗:係啊,我有唔睇啊。咦,你呢?

靳:我有唔睇啊,我……

苗:你又有冇唔睇啊?

以:我都有唔睇喎!

苗:噉雖然大家都唔睇,噉但係呢,有時就會有啲新聞,即係講奧運嘅嘢啦。噉就其中一個同語言有關嘅呢,就係……即係都最近好似都好矚目啊,就係中國隊呢,就請咗好多唔同嘅、本身唔係中國人嘅人啦,噉嗰啲乜嘢……咩黃頭髮、白皮膚啊、藍眼睛嗰啲啦,都有啦。噉係玩咩㗎?冰上曲棍球啦。係啦,噉中國隊就係今次就非常之有層次啦,噉就有好多唔同國家嚟嘅人,噉佢就……就畀咗個中國籍佢,就可以喺中國隊度參選啦。

以:幾容易啊,真係。我想知佢入籍中國呢,要坐幾多年移民監嘅呢?

苗:佢好似係唔係好耐㗎咋喎!

以;因為好似……係咪有啲係早兩年先第一次去中國吖嘛。

苗:係啊,佢哋唔知join咗咩崑崙嘅唔知咩隊,跟住之後就……依家就已經代表中國,幾犀利。

以:幾好喎,喂,即係我哋要五加一年呢,佢哋可能五加一日,噉嘅已經搞掂咗喇。

靳:因為佢哋係專才吖嘛。

以:哦,專才計劃!

苗:我哋就唔係吖嘛。

以:我哋梗係唔係啦,我哋喺度網上乞食嘅啫,係喇。

苗:低端人口。

以:即係好似咩以前咩郎朗變香港人噉樣呀?

苗:哦,係啊,嗰啲咩專才計劃吖嘛,都係。

以:嗰啲啊,哦。幾方便喎。係喇,當然啦,佢哋做咗中國人啦,噉梗係有個中國名啦。好得意啊,因為我哋呢,我哋好似講過好多類似嘅嘢,我哋舊年已經講咗奧運新聞啦,之後早兩集又講咗呢個英國官員嘅漢名啦。

苗:係啊,擺埋一齊。

以:噉如果你對比返之下呢,咦,呢啲人好似啲名有啲唔同嘅味道啊,即係比起莊漢生噉樣。

苗:係啊,噉其中一個例子就係Jeremy Smith啦。噉佢本身呢,就係美國人嚟嘅。噉佢去到中文呢,佢嗰個名就係直接噉樣音譯,就變咗「杰瑞米史密斯」噉樣啦。噉但係呢……

以:都正常嘅,成日聽到。

苗:其實OK嘅,冇問題嘅,本身噉樣。噉但係有個比較特別嘅地方就係呢,噉佢顯示佢個名出嚟嘅時候呢,佢用英文㗎嘛。但係呢,佢就用個漢語拼音噉樣去顯示返佢嗰個用音譯嘅英文名囉。噉所以係……唔係Jeremy Smith,係真係jier乜乜乜乜乜噉樣囉。成個名就會變咗有啲奇怪。

靳:同埋冇聲調㗎,跟住你出面就會變咗Jieruimi Shimisi噉樣。

以:即係啲人announce,即係讀佢個名出嚟嘅時候,都係讀呢個呀?係咪啊?

苗:Jieruimi Shimisi,唔知,噉樣?Shimisi,唔知啊,唔識讀。就會變咗啲好特別嘅讀音啦。噉呢個就……即係有啲人就覺得比較好笑啦,即係……即係為乜呢?如果你係……本身有個英文名,噉點解唔用個英文名呢?

以:呢啲叫back translation啊,好似。即係譯完去另一個語言,再譯返返嚟。

苗:即係anime噉樣囉,係咪啊?

以:係咪啊?

靳、苗:係啊。

以:係喎。即係anime就係animation,之後變咗日文,再變返英文。你笑咩啫?你都係叫三苗同靳尼啦!笑咩啫你?

苗:係喎,我唔應該笑!你講得啱,你講得啱!唔係,其實噉嘅,即係大家笑……即係笑還笑啦,噉其實即係背後嗰個原因就係純粹因為佢係跟嗰個國家嘅……嘅命名嗰個規則囉。即係如果你係中國嘅,噉佢就統一用漢字名,再變拼音。噉即係好似之前何詩𦹷都係……

以:係喇,我就係諗起呢個。

苗:嗰個Haughey係擺最前啦,因為所有嘅香港隊嘅人,都係個姓擺喺前囉。噉所以唔理你本身個名係點樣,佢總之就係跟嗰個國家,或者嗰隊嘢啦……嘅慣例囉,噉樣去做囉。

以:總之佢就統一,即係可能每個國家各自有一啲嘅規則噉樣囉,噉佢就話:哦,呢個國家,我就噉樣做噉樣做嘅。

苗:係囉。

以:係喇。噉我哋可以分享下呢一個中國隊嘅成員嘅名單啦。噉……唔好笑,唔好笑,係喇。噉有好多都係呢啲噉嘅……即係英文名譯咗中文,再轉寫返去漢語拼音噉樣啦。噉但係你見到有啲呢就唔係一睇落去就覺得係鬼佬名嘅。即係譬如有啲應該係華裔,係咪啊?

苗:應該有一啲係有……即係部分華裔血統。

以:姓Ip、Foo、Foo嗰啲,應該係啲廣東話嚟㗎喇。

苗:呢個就應該係嘅,如果佢個姓係即係廣東話啦,有葉啦,有傅啦,有王啊、袁啊,嗰啲呢。Brandon Ip,噉佢就變咗Ye唔知乜嘢啦,我唔知佢個漢字係咩啦。但係佢就係有個漢名噉樣。噉我估呢啲本身係華裔,就有個名,就用返囉。

以:應該係直情廣東裔嚟㗎喇,即係因為可能美國嗰邊嘅Chinatown多數都係廣東人噉樣,所以就全部都係王啊、袁啊,即係英文名都係Wong啊、Yuen嚟嘅,就唔Wang、Yuan嚟㗎。噉但係當然佢去到中國隊,噉就用返漢語拼音,噉就變咗做Wang囉,係囉。

苗:仲有一啲呢,就係佢嗰個英文名,所謂original name啦,佢就係唔似係漢名嚟嘅,例如嗰個Jason Fram啊,或者Luke Locker啊,呢兩個呢,佢嗰個中文名都係好似完全唔同噉樣嘅。噉就應該係……我查一查呢,就見到佢哋應該係有部分嘅華裔血統啦,噉可能本身可能一半係噉樣,噉都會有個中文名囉。例如嗰個Jason Fram呢,就叫做Liu Jie,噉就完全唔同㗎嘛。噉應該我估可能Liu係佢媽媽姓,或者……之類嘅嘢囉,係啊。

以:我都聽過有啲混血兒,譬如話阿爸係西方人,之後阿媽係東方人,噉可能佢會有個英文名,之後有個中文名,就會跟咗阿媽姓嘅。

苗:係啊,咪之前我哋講過噉樣,一人跟一邊噉樣……

靳:一人跟一邊。

以:係喇,一人跟一邊啦,係囉。係啊,我哋已經埋下伏筆喇,我哋幾集前已經講咗……

苗:立flag……

以:係啦。預先講咗我哋可能未來會發生呢件事,喺個節目上面,係喇,我哋真係犀利。噉但係之後有啲呢……我見到有啲就直情唔係混血兒,但係佢都有個完全唔關事嘅漢名嘅。噉我……嗱,我亂咁估啦,我估佢係唔係可能同中國嘅可能關係比較……

苗:即係佢可能比較想融入少少嗰個文化,可能有學少少漢語嘅。噉你上堂可能老師都會改個名畀你,或者佢自己改,都唔出奇。佢見到……佢好鍾意Enlai呢個名噉樣,佢好……好……好崇拜某啲差唔多名嘅人,噉佢咪叫自己做「恩來」囉,係咪?噉呢個Ty Schultz就……嗰個漢名就係「鄭恩來」囉。

以:係啦。我諗Schultz同鄭有啲啲啲似嘅……

苗:都……都有啲夾硬嚟。

以:有啲夾硬……但係Werek變成Wei就OK,係make sense嘅。係啦。我都知道啲人……多數外國人學漢語嘅時候,噉就會成班噉樣,就去上堂啦,噉之後老師呢,就要……有個任務呢,就係幫佢哋改漢名嘞。噉我都聽過好多老師講呢,佢哋改到好厭啊,所以呢,開始亂咁改啊。

苗:係,畀你list你算。

以:即係正如中國人上英文堂呢,都好多老師係亂咁同人改名嘅,同樣道理。

靳:畀啲罐頭名人哋。

苗:呢個表裏面抽一個啦,噉樣。

以:係,畀個list你,噉樣「你就呢個,你就呢個」噉。

苗:好似嗰個……哎啊,要講嗰個咩Chinese alphabet嗰個啊。 以:因為我哋見到有個……我都唔知係meme定係有人想伏人呢,總之就係出現咗有幅圖呢,就係有人話Chinese alphabet就係噉寫嘅。噉就係點呢?逐個英文字母呢,就搵個個樣似似地嘅中文字,就話:嗱,係噉寫㗎喇。噉之後啲人就開始呢,就攞呢個,就寫佢個名出嚟啦。

The rest of the transcript is available to Patreon members.