以：雖然我哋好似今年好似錄少咗，噉但係獲益良多啊。我都學到好多嘢。
靳：好嘢，大家都係我嘅老師。
苗：三人行，必有我師。
以：三個人一定有一個攞C嘅，即係。因為拉curve。
[jingle]
以：聖誕快樂！新年進步！
苗：好嘢！
以：係講咗呢個先嘅，要。
靳：恭喜發財！
苗：有啲……有啲早。
以：未到恭喜發財，仲有咩？個零……幾耐啊？
苗：仲有個幾月啊，係咪啊？好似二月頭呀？
靳：二月中啊？
苗：二月中呀？係囉，仲有啲時間。
以：今次唔係一月嘞。好，歡迎返到嚟《絮言．狂想》第六十集，同埋歡迎嚟到二〇二四啊吓！我係以色列。
苗：我係三苗。
靳：我係靳尼啊。
以：係喇，我哋錄嘅時候呢，就係啱啱過咗聖誕若干日啦，噉我哋而家就準備緊迎接新嘅一年嘞，同埋我哋嚟到第六十集啦。我哋最近都經歷咗好多特別嘅集數吓！好似我哋係噉話：啊，呢個唔計個集數嘅，嗰個唔計一個集數嘅，好似我哋有兩集直播啦，我哋一集變咗兩集啦。之後，嗯，我哋上一集係咩話？都係好特別嘅一集嚟㗎喎。
苗：上一集係同《粵語白白講》嘅crossover。
以：係喇。大家聽咗未呢？
苗：快啲去聽啦！同埋都去埋聽佢哋……《粵語白白講》佢哋個podcast。我哋都有份出現喎，因為係crossover嚟㗎嘛。噉我哋就一次過錄咗一個好長嘅一段嘢啦，噉就分開咗兩個podcast噉樣，分別噉播出嚟嘞。
以：係，好似加埋個半鐘？噉樣。經過以色列我精心嘅裁剪呢，就變成咗兩集嘞。係嘞，我哋都係有返我哋嘅〈思源〉喺度嘅。噉我哋之前嗰兩集呢，即係包括我哋mek1嗰集啦，再加埋上集crossover呢，我哋都係噉諗：嗯，邊一集係第六十集呢？之後後來就靈光一閃呢，就諗到：OK，我哋不如第六十集呢，我哋就……淨係我哋絮言三字，就傾下偈啦。我哋過去呢兩個月都係噉同其他人傾偈，好似比較少我哋自己傾偈。
苗：又好似係喎，你噉講。
以：歡迎大家返到嚟我哋嘅錄音室喇。係，呢個就係我哋三個人嘅錄音室。
苗：之前都好多嘉賓。打逐字稿都要打多幾個名。今次真係三個。
以：係啊。有冇好懷念啊？淨係打三個。
靳：係嘞，唔使打四個、五個喇，一個打三個就得喇。
以：我要打十個！
苗：幾時先可以有十個？
靳：你……你下次揾七個嘉賓上嚟，跟住我哋就可以打十個。
以：噉我哋講我哋今日想吹嘅水之前呢，係嘞，因為我哋今日都好多水想吹嘅。不如就講下我哋最近發現咗啲咩有趣嘅語言新聞先啦！我哋快快講下。
[02:54]
苗：好嘞。噉第一單呢，就其實本身之前都想講，不過一路都冇機會啦，一路都做咗好多唔同嘅題目。噉今次就返嚟講返我哋……回歸我哋本行喇，就係講下啲正經嘅語言新聞。
以：喂喂喂，回歸？
苗：噉呢一篇呢，就係講不丹嘅一啲語言啦。佢就點樣因為有一啲社交媒體，就令到佢好似有一個新嘅生命喎。噉樣講一講少少背景先啦：不丹嗰個官方語言就係叫做咩啊？Dzongkha？有冇人識讀啊？宗卡語。
靳：佢有IPA㗎喎。[dzòŋkʰɑ́]。
苗：[dzòŋkʰɑ́]。係一種漢藏語嚟嘅，噉就同藏文呢，就有啲關係啦。噉呢，佢就係呢個不丹嘅……即係國家語言啦，叫做national language啦，但係其實佢好多嘅教育啊、一啲比較正式嘅嘢，其實都係用英文去進行嘅。噉但係就因為呢一啲社交媒體呢，就令到宗卡語呢，多咗一個機會去存在啊。因為我哋講以前呢，你要傾偈啊、要打字，好多時呢，你冇嗰個語言嘅鍵盤，噉其實就打唔到嗰個語言。即係好似其實我哋以前打中文，啲人唔係好識嘅時候，或者冇語音輸入啊、冇啲手寫輸入嘅時候呢，都係照打英文㗎嘛。因為大家覺得：哦，方便囉。就噉㩒個keyboard就打到啲英文出嚟。
以：而家都係喎。
苗：而家都係。係囉，即係一路都有呢個問題啊。噉喺不丹呢，就更加嚴重啦。噉但係就因為而家好多一啲messaging嘅app呢，就可以錄一啲錄音吖嘛。噉開始呢，就啲人唔打字嘞，就直接講自己嘅方言、講自己嘅語言。噉就反而係因為呢樣嘢，就令到嗰個語言可以一路流傳落去囉，就唔需要限制咗用文字呢個媒介囉。
以：嗯，幾有趣喎。因為好似成日聽人講話社交媒體，或者互聯網發達呢，係威脅咗好多細嘅語言㗎嘛。因為好多時候大家就會湧向一個大嘅語言。但係從另一個角度睇，又係幫到佢喎。可能睇下個科技去到邊個位？即係你都話嘞，佢哋一開始因為打唔到出嚟，所以就有負面嘅影響。但係而家當科技發達到可以就噉講嘅時候，又有返啲正面嘅影響。
靳：噉我就喺度想像緊，即係如果佢哋係用佢哋嘅話嚟傾偈嘅話，噉就成個group全部都係voice message噉樣㗎喇喎。
以：咪好似啲長輩group噉囉。
苗：我都見過呢樣嘢發生啊。係啊，好多長輩group呢，你見到係全部都係錄音㗎，你會見到。你唔……唔㩒入去聽呢，係會唔知佢哋講乜㗎囉。其實中國都……呢樣嘢都好多發生啊，我都觀察過。即係就算用……可能用WeChat噉樣呢，佢哋都係就噉用錄音嘅功能，然之後講返自己嘅方言囉。噉佢就唔需要去打字，咩都唔使。即係一來對老人家嚟講，比較方便啦，呢樣嘢。佢唔需要去諗其他嘢，佢直接噉講嘢咋嘛，即係㩒個掣就得嘞。二來就可以用返佢哋自己嘅母語囉，真係。
以：點解唔用語音輸入呢？噉。既然有喇，噉點解仲要錄音呢？係咪啲人本身真係prefer錄音呢？
苗：因為語音輸入唔係咩語言都有㗎嘛。即係例如你……你係講一啲中國裏面咩方言，或者我哋講不丹呢個Dzongkha，噉佢係冇呢個科技嘅，佢嗰個AI嘅科技未發展到呢個地步嘅時候，佢就唯有用齋錄音嘅方式囉。
以：唉，噉但係中國全部都講普通話㗎嘛，唔係咩？（笑）
苗：噉相信佢哋都識嘅。噉但係始終母語呢家嘢，講母語係會有唔同嘅感覺囉，講落去。
以：啊，係，係。我講笑啫。其實有啲似以前打電話嗰陣時，用嗰啲留言信箱。
苗：噉但係留言信箱係單向㗎嘛。
以：唔係，而家都係單向㗎！其實都係你錄，之後畀人哋聽……
靳：語音嘅短訊，好嘅地方，就係如果你聽唔明嘅話，係可以再㩒多次。你鍾意聽幾多次都得㗎嘛。
以：係咪㩒一就可以聽多次，㩒三就刪除。
苗：嗰啲囉。
以：係咪暴露年齡啊？我。
靳：唔係，而家都有留言信箱呢樣嘢嘅。
以：係，冇人用啫。
苗：所以咪暴露年齡囉。
靳：唔係㗎！你做嘢要打電話，就……就要用㗎喇。
苗：噉咪暴露年齡囉！噉後生仔唔使做嘢㗎嘛！
以：唔係，睇文化嘅。某啲文化會講多啲電話嘅，係喇。香港人就唔鍾意講電話嘅，包括我。
[07:17]
靳：噉呢個呢，就真係去返一啲比較近期啲嘅新聞喇。呢排呢，上網就見到呢，你突然間彈咗一個嘢出嚟呢，就係呢個日本造字比賽啊。噉我就心諗：哎，日本都係用漢字吖，噉我哋之前可能……有冇講過年度漢字啊？可能都有講過呢樣嘢。噉但係年度漢字呢，佢哋基本上就係大家投一個即係現有嘅漢字出嚟，嚟代表呢一年吖嘛。噉但係呢，另外呢，有一個更加有創意嘅比賽，就叫做造字比賽噉樣㗎嘛。噉個造字比賽呢，其實就係你就要做一個新嘅字出嚟，跟住你要畀一個讀音佢㗎。可以係……我想講文讀同白讀，唔係……訓讀同埋音讀。訓讀同埋音讀佢噉樣樣啦。噉就係都係好有啲年代感㗎。我覺得嗰陣時COVID嗰啲，更加有年代感。但係今年嗰啲其實都幾有創意嘅。
以：我發覺呢，佢啲漢字有好多唔同類型嘅邏輯喎。即係有啲係真係用返漢字本身嘅系統，即係嗰個邏輯嚟到設計嘅。有啲就真係象形文字囉。
苗：好似好多都象形文字啊。
靳：真係天馬行空噉樣。
以：其實好多都係。
苗：我覺得大部分都係囉，起碼今年嗰啲。或者佢係一啲本身現有嘅漢字，再去加啲嘢畀佢囉。
以：嗯，係喇，係喇，係喇。我幾鍾意呢啲。
靳：或者減一啲嘢囉，係啊。
以：今年我最鍾意呢，係水滴石穿囉。日文係叫做咩啊？雨垂咩石咩穿咩，呢個香港嘅讀法啦。
苗：噉我哋喺show notes度畀返幅圖畀大家睇。
靳：咩雨……雨垂れ石を穿つ。
苗：唔好噉啦。佢就係……個字就係上面有個雨字啦，即係好似我哋平時講落雹啊、落雪嗰個……嗰個雨啦。下面呢，就有個石字嘅。但係呢，佢嗰個雨字邊呢，中間戙落嚟嗰劃呢，佢戙穿咗個石囉。成個石穿咗，噉就真係啲雨……噉就滴水，滴水就穿咗個石嘞。
以：我鍾意佢就係保持咗本身即係漢字有嘅一啲特色啦，但係就加咗一樣嘢啫，就係延長咗嗰一條線，就表達到呢個成語嘅意思嘞。
靳：我喺度諗緊一樣嘢啊。因為佢呢，設計呢度呢，佢穿落去嗰一劃呢，係分開咗個石㗎嘛。噉如果寫呢個字嘅時候呢，係咪要兩邊分開寫呢？
苗：即係個石字要寫開左右，然之後先戙落去，係咪啊？定係呢個純粹係印刷體字先係噉㗎？
以：冇諗到呢個問題添！可能手寫體就噉穿過去算㗎喇喎。
苗：手寫呢，你要呢，戙落去，戙得好大力，然後搣爛咗張紙，噉就分開咗。

The rest of the transcript is available to Patreon members.