苗：係啊，應該有好多可能台語家庭嘅小朋友，而家係唔會講嘅。父母都唔會同……而……因為而家父母，其實咪即係我哋呢啲年紀囉。而家……而家做父母嘅人……
以：喂喂喂，嗱嗱嗱！
靳：嗱嗱嗱嗱嗱嗱嗱！哎哎哎哎哎？
苗：人身……人身攻擊！即刻人身攻擊你哋先！你哋（痛）痛啊！
以：你講「我哋」喎，唔係講「你哋」㗎喎。
靳：呢啲真係「人生攻擊」喎，呢啲係。
苗：係啊，我再講多句人身攻擊，就係你知唔知呢，零七年出世嘅人已經十八歲？係嘞。
以：頂你個肺。
靳：做乜嘢？
苗：係啊。
[jingle]
以：歡迎返到嚟《絮言．狂想》第八十集，我係以色列。
苗：我係三苗。
靳：我係靳尼啊。
苗：啱啱阿以色列喺度開個錄音，但係……但係佢有技術問題喎。
以：講呢啲……錄影，嗰個係錄影有技術問題。你就錄音有技術問題。呢個係好大嘅問題。We hebben een serieus probleem。
靳：We hebben een serieus probleem……
苗：黐線。係啦，我哋而家個setup呢，就係會錄片同埋錄聲啦。噉我平時上幾個禮拜呢，都一路都冇問題嘅。噉我錄聲，就係用一個軟件，跟住錄片用另一個軟件。噉但係唔知點解今日呢，我嘗試錄聲嘅時候呢，我㩒咗錄音呢，我就會乜嘢聲都聽唔到囉。即係我個耳筒就會突然間好似唔work噉樣。我要將佢轉……轉做電腦喇叭，再轉返做耳筒，先至得囉。噉但係我噉樣嘅時候，我完全錄唔到嘢囉。噉而家我哋就……
以：有冇Mac嘅專家，可以打救下三秒。
苗：唉，算啦。我……我重新開機都冇用啊。I turned it off and on again啊，都……都唔得啊。
以：啲genius都救唔到你啊。
靳：哎啊。
苗：蘋果嘅天才。
靳：IT部門幫唔到你啊。
以：IT部門表示熄機開過，唔該，係。之後冇呀？啊，噉算啦，買過部新機啦。公司出錢噉樣。
苗：噉所以而家我係用……淨係錄片囉，噉希望個聲係會同錄音一樣咁好喇。
以：夠做啦……
靳：唔緊要啦，三苗好靚聲㗎嘛。用咩咪錄，都係咁靚聲。
苗：應該OK嘅。因為佢個咪……我唔知啊。佢……我用……我都一樣係用QuickTime嚟錄㗎嘛，我以前係用QuickTime錄音，我而家攞佢嚟錄片。噉我估應該差唔多啩。
靳：其實……
苗：佢個quality呢，永遠都係得兩個選擇㗎。佢係high同maximum。噉我平時用high嘅，噉我而家都係用high，噉應該……我估啲嘢差唔多嘅啫。係囉。
以：哦，希望係噉啦。 但係仲有兩日就係四二零喇，所以你要high啊。
靳：嘩。
苗：係啊，今日係四月十八，今日係受難節啊，係咪啊？
靳：耶穌受難節。
苗：係啊，而家我哋都有啲受難啊，即係呢啲技術問題。
以：嘩，我哋真係多災多難啊，我哋好似輪住出呢啲技術問題噉樣。不過唔緊要！
苗：係啊，星期日就會復活。
以：係嘞，受完難嘞。我哋啲聲……有聲畀大家聽到就開心㗎嘞。
苗：好嘢！
靳：OK啊。
以：我哋陣間講多啲復活嘅嘢啦。啱啱我哋等緊三苗重新開機期間呢，已經傾咗好多嘢喇。已經……爭在冇錄㗎啫，我哋已經開咗幾個唔同嘅話題出嚟喇。噉我哋……我哋呢，就去問……首先問咗靳尼最近學咗啲乜嘢啦。不如你又講下，你啱啱學咗呢個咁有用嘅詞語係乜嘢呢？
靳：就係因為我而家呢，一路都喺度學緊匈牙利文㗎嘛，就上網一對一同個老師學啦。噉我上堂呢，就有一個功課呢，就係各自要……個老師又要畀三幅圖出嚟，我又要畀三幅圖出嚟。跟住大家喺度互相喺度解釋嗰三幅圖入面呢，發生緊啲咩事噉樣樣。噉全部都係三個……三幅我哋平時喺生活入面，關於我哋自己嘅圖畫噉樣啦。
以：三幅屁。
靳：噉佢其中一幅圖呢，就係佢啦，同埋佢老婆啦，同埋佢一個friend噉樣樣。噉我哋講講下呢，佢就教咗呢隻字，叫做電燈膽嘞。係嘞，跟住我就無端端學咗匈牙利文點樣講電燈膽喇。就係噉樣。
以：上次先講完你識講「蠑螈」，今次你又講電燈膽，你有幾niche呢？到底。
靳：我唔知啊，學埋啲字都係好冷門啦，但係我又講唔到㗎喎。跟住我就會唔記得啲最簡單嘅詞噉樣囉。
以：但係係好有用嘅，電燈膽。
靳：係嘅。
以：我就諗緊電燈膽，其他語言點講呢？因為我好似都好少講呢樣嘢啊吓。噉我就走去search啦，噉見到呢，發現原來歐洲有好多語言呢，都係點講啊？
靳：蠟燭座。
以：蠟燭座。
靳：係喇。
以：蠟燭座，係喇。即係hold住蠟燭嘅一個座。
苗：蠟燭咗。蠟燭緊。
以：定係揸住蠟燭嘅人啊？
靳：或者揸住蠟燭嘅人囉。
以：都可以係人。
靳：因為喺匈牙利文係一樣嘅，係喇。都係gyertyatartó。
苗：噉其實好似差唔多啊，都係……個形象都係電燈膽好似有樣嘢照住噉樣，又係揸住個蠟燭，又係有個光喺度阻住晒。
以：係喎。
靳：好似啱喎。
以：係喎。
苗：我要瞓覺㗎嘛，做乜擺支蠟燭喺我隔籬？
以：喂，瞓覺係咪真係瞓覺先？
靳：但係我想像呢，有啲唔同㗎。即係我係諗緊呢，例如話就係兩個人好浪漫噉樣燭光晚餐啦，噉嗰個燭光就係一條友搦住噉樣。你就係電燈膽喇。
苗：佢就係個電燈膽啊。
以：哦！
靳：因為……因為好好笑㗎，佢仲同我講咗一個……嗰個故事呢，就係呢，唔知有一日佢屋企突然間停電啦，噉樣。噉咁啱就係佢呢，同埋佢老婆，同埋個friend一齊喺屋企。
以：真……真？真人真事。
靳：噉……噉呢度呢，要再……要再講畀大家聽呢，喺拉丁美洲呢，西班牙文呢，呢個電燈膽係乜嘢？就係……咩啊？violinista。唔識……唔識讀喇。
以：Violinista。
靳：Violinista。
以：做咩有個芬蘭口音嘅？
苗：Violinista。
靳：對唔住。Violinista啦，即係……
以：Violinistä。
靳：即係……劏雞嘅人……唔係，係拉小提琴嘅人。
以：乜嘢？
苗：嗱！
以：屠夫！唔係。係，小提琴手。
靳：係嘞，噉樣。噉所以佢哋，就影咗一幅相呢，就係呢，佢同佢老婆喺張枱度，對住面噉樣坐啦。跟住中間有個蠟燭啦，跟住佢個朋友呢，喺度搦住個小提琴噉樣，喺度拉。
苗：幾好笑喎，呢個。
以：即係真係喺度拉噉樣。
靳：真係喺度拉……即係扮拉緊，噉樣囉。
以：哦，真係扮拉，OK。
靳：因為我嗰個匈牙尼文老師係住喺阿根廷嘅。噉所以佢哋係三個人都識西班牙文嘅。係啊，呢個係一個好好笑嘅一幅圖嚟。即係我哋同（逢）停電，就可以玩啲噉嘅嘢喇。
以：哦，原來停電就係噉樣嘅。噉……噉停電就冇電燈膽㗎喇喎！
苗：係啊，唔着囉。
以：除非你用太陽能電筒噉樣囉。
靳：太陽能電燈膽？
以：太陽能電燈膽。
靳：係啊。
以：係。有啲難……有啲難度喎。噉我見到係其實真係好多語言都係蠟燭座喎。即係法文嘅咩……佢係用動詞，揸住支蠟燭。Tenir la chandelle。之後喂，委內瑞拉又係lampar……啊，唔係喎！委內瑞拉係……係電燈膽喎！真係literally電燈膽。
靳：哦！Lamparita。
以：但係更加常見嘅係咩呢？係……即係英文嗰個囉，third wheel。
苗：Third wheel，哦。
靳、以：第三個轆。
以：但係有好多係第五個轆囉。即係……
苗：哦，即係睇佢架車係……
以：即係睇咩車。單車就第三個轆。
苗：馬車都可以係兩個轆㗎咋喎。
以：係咩？
靳：馬車……哦，哦。因為前面係拖住嘅。
苗：即係佢有個車……有個馬，跟住之後後面……我其實我唔知馬車係有幾多個轆。應該有……有……有唔同。
以：可唔可以留言講馬車有幾多個轆啊？
靳：係。
以：我唔係好……未搭過馬車添，係。嗰啲手推車咪四個轆囉，即係因為啲言語都OK舊啦，所以都係用啲好舊嘅車啦，就唔係而家嗰啲車啦。咁佢係用手推車，噉就有四個轆，噉就……
苗：輔助轆喎。
以：你就係第五個轆嘞。喂，噉但係唔make sense喎！你想講兩個人拍拖……
苗：係囉！點解係五個轆嘅？第五個轆，噉好似係有四個人喺度。即係打牌噉樣，然之後你多個人，企喺度。噉佢就係第五個轆嘞。
以：哦，你真係成日諗打牌。
靳：即係……即係一個……點樣講？一個四人嘅情侶噉樣。
以：Double date！
苗：係，一個quadru……druple……quadrouple。
靳：即係唔係throuple，係quadrouple。
以：嘩。
苗：係啊。
以：嘩，好……好開放吓！
苗：Four……frouple。
以：唔識。
靳：Fro……couple。
以：嗱，我見到呢，佢呢個威爾斯文佢係比較flexible啲嘅。佢係叫olwyn sbâr，即係士啤轆。士啤軚……
靳：士啤軚……
以：士啤轆，係嘞。唔係軚嚟嘅，嗰陣時仲。係轆啫。就多咗個轆。都係噉嘅意思囉。所以好有趣啊。噉都係有啲光噉樣，或者有啲……有啲車車。可能佢哋係真係喺度share呢啲噉樣嘅俗語喎。成個歐洲裏面喺度講講下，就變咗講同一句說話。
[09:27]
以：仲有呢，喂係喎！啱啱仲問到阿靳尼最近學乜嘢啊。不如再分享下啲咩有趣嘅事啦！我哋大家都好關心你嘅學習啊。
靳：點解要關心我嘅學習啊？
以：關心你，因為好有趣囉，你學啲嘢。我哋學嗰啲嘢咁悶，係咪？
靳：係喇。因為我依家香港手語有學到第二班啦。噉其實都仲係學緊啲好基本嘅嘢啫。噉我哋之前就有學過下一啲香港地名啊、時間啊，嗰啲噉嘅嘢啦。跟住我發覺一樣好正嘅嘢呢，就係呢，因為你知道手語其實係一樣好空間性嘅語言嚟㗎嘛。

The rest of the transcript is available to Patreon members.