力：如果呢，你用希臘文原文去睇《約翰福音》嘅話呢，你會發現，阿約翰啲preposition係炒埋一碟，用得十分之冇規格。
以：咁癲？
力：佢覺得溝通到就得㗎喇，語法唔使精準㗎。
靳：約翰啲……啲希臘文……
苗：阿約翰原來咁……咁hea㗎？
靳：阿約翰啲希臘文唔啱grammar。
力：阿約翰係一個唔啱grammar，同埋講嘢有口音嘅人囉！
苗：唔讀書。
以：好正啊，喺度片啲古人。
靳：嘩！好有趣。
[jingle]
以：歡迎返到嚟《絮言．狂想》第八十二集，我係以色列。
苗：我係三苗。
靳：我係靳尼啊。
以：係啊，冇見大家一排喇。我哋上次錄呢，好似就係啱啱選完教宗嗰兩日。即係都個零月前喇，唉。
苗：好耐嚕。
以：時間過得真係快。係啊。點解咁耐嘅？我哋……我哋有冇傾偈啊？呢個零月期間。
苗：傾偈就有嘅，但係錄音就唔係好多囉。冇時間囉。
靳：就好似冇喇。
以：冇時間。
苗：以色列走吖嘛，成日咁多地方去。
靳：係囉，成日去晒……去埋晒啲地方。
以：唔係淨係我喎！好似。
苗：係囉，唉。唔知做乜。
以：好似咁多位都有地方去喎。
苗：去埋晒啲唔知乜嘢……咩咩……Poly……咩咩Polio Conference。
靳：Poly……
苗：唔係，Polio Gathering。
靳：你係噉講錯Polyglot Conference。
苗：梳，我……我係不斷講錯，我係去到嗰個Gathering我都講錯囉。
以：係啊，你要我live我哋講緊talk嘅時候，去糾正你吖嘛。
苗：係啊。
以：之後你就話：哎，唔好告我，唔好意思講錯咗。
苗：係啊。
力：即係佢Poly完呢，Poly就變咗Polyester、Polyurethane啊，其實佢係想講佢自己膠膠地嘅。
以：其實係嘞。係。我哋講開膠膠地呢，係喇，啱啱就聽到一把冇咁熟悉嘅聲音喇囉。不如我哋介紹返先，我哋……
苗：講起一把膠膠地嘅聲。
靳：竟然係噉樣。
苗：咩叫講起膠膠地喎，你真係。
以：呢個係史上最失敗嘅一個segue。但係係嘞，因為既然有人出咗聲嘞，我哋就介紹返先！呢位係我哋嘅朋友，點稱呼呢？
力：大家好啊，各位絮言嘅聽眾大家好，我係阿Ric啊。噉我喺度嘅身分，就係我係一位絮言嘅fans啦，同埋聽講今日請我上嚟嘅原因，係因為我學過聖經希臘文。另外仲有一個身分，就係我係呢個粵文維基百科嘅管理員嚟嘅，係呢個粵語語言界嘅一個身分啊。
以：嘩，大粒啊，大粒啊。
苗：你有個好重要嘅身分喎。
靳：好重要啊，真係。
力：噉就多謝大家請我上嚟做呢個嘉賓。多謝晒。
苗：粵語嘅前途就靠你。
以：係啊。嘩，粵文係靠呢條友把關。Gate keeping啊，真係，literally。即係我上維基，我想亂咁寫啲嘢呢，就係呢條友喺度……喺度gate keep我㗎喇。
靳：就係權威喇。
力：我只係一個好細嘅部分啫。以呢個編輯數嚟講，我係應該排第可能一百都未必到。
以：係咪……啊，係㗎？我哋啱啱講到我哋喺Polyglot Gathering呢，都識咗好多唔同類型嘅語言迷啊。即係好多唔同人，有唔同角度啦、唔同出生地啦、唔同嘅興趣啦。即係……通常喺度跳舞嗰啲呢。成日有……你哋有冇見到有啲……啲廣場舞喺度發生？
苗：廣場舞啊。
靳：哦，係啊！
以：你有冇見到啊？
靳：呢個其中一個活動嚟㗎嘛！
苗：各個國家有各個國家嘅……
以：廣場舞。
靳：廣場舞。
以：啊，可惜啊Ric就嚟唔到啦，你可能有自己生活比較忙啲啊，係啊。噉但係我哋絮言就一齊……再拉多幾個朋友一齊去咗啊，噉我哋就……我哋講咗我哋早幾集有提到嗰個速記啦，我哋講咗成個workshop，係啊，個半鐘以上啊。噉大家如果有興趣呢，可以嚟睇返我哋個錄影啦，係喇。就係三苗係噉講錯Polyglot Conference嗰……
苗：咩「係噉」啊？講咗一次咋嘛！
以：兩次！我剪嘅，我知有兩次。
苗：兩次，唔係「係噉」囉！兩次都唔係「係噉」囉。
以：OK，兩次。同埋之後我哋一齊玩咗個問答比賽啦。係嘞。唔知阿Ric睇咗未啊？
力：睇咗之前個問答比賽，你係講最近你哋喺PG再玩咗一集問答比賽？
以：係啊，好好玩啊。
力：咦，未睇，miss咗。
苗：關於威爾斯文嘅問答比賽。
力：哦！嗰個！嗰個。啊，我啱啱好似係今日見到noti，係，陣間收線即刻睇。
以：係啊，快啲睇啊。係嘞，嗱，各位其他聽眾，都記住同阿Ric一樣，快啲去睇返啊。係喇，好刺激啊，plan咗成年，之後終於拉到呢啲人入水。
苗：係啊，可以聽到靳尼講英文啊。
以：係喎。聽過啦！
力：啊，磁性嘅聲音。
靳：我哋之前講過英文㗎喇！
苗：講過嘅，但係要出樣加講英文，好似第一次。
靳：啊，又好似。
以：又係嘅。噉你噉樣再噉樣……
苗：除咗嗰個workshop嘅片之外。所以唔係噉……唔係第一次。
以：繼續噉樣limit落去，係。第二次。係啊。但係見到……見到阿靳尼個大頭啊，好靚仔噉樣，對住個鏡頭。有……有……有呢個zoom in啊，大特寫。
靳：係噉遮住個mon。
苗：嗰條片係見到我個影囉，喺個電視嗰度反映咗出嚟。
靳：有你把聲嘅。
以：係啊，有三苗把聲。
苗：係啊，我係喺後面計分㗎。因為太多人玩呢，噉樣如果好多人就會好……好逼囉，所以我就去咗後面度做呢個書記。
靳：總書記。
以：做助手，做助手，係喇。
苗：我係呢個Rhapsody in Lingo總書記。
以：所以都多得三苗幫手啊，就好成功。所以呢度咁多位，係得靳尼有參與玩嘅啫。係。噉大家快啲去睇下靳尼表現點樣啦！唔好……唔好劇透。
靳：唔好劇透。
以：可能佢贏咗呢，係咪？
靳：係，一定係贏咗，點睇？
以：喂！唔知呢？唔知呢？冇人知，冇人知。
靳：唔知呢？冇人知，冇人知。睇完先至知嘅。
苗：你去睇你就知㗎喇。
以：好多變數。
靳：記得由頭到尾要睇晒，因為題題都set得好精彩嘅。
以：同埋因為靳尼真係好靚仔。係。你……你啲表情啊！你嗰啲「咩話？」嗰啲表情呢，好正。
靳：我要畀反應㗎嘛！
苗：啱吖。
以：高汁嘅反應。
靳：係啊。
以：好，我哋返返嚟喇。今日請阿Ric上嚟呢，就其實主要唔係諗住講維基百科……住嘅。係。因為我哋呢排呢，做緊一個……我都唔知點樣開始做咗呢一個系列啦，就係呢個基督教系列。
苗：咁啱嘅啫。
以：即係我哋舊年有……唔係，舊年定前年，有呢個匈牙利系列啦，之後我哋而家就做咗呢個基督教系列喇。因為我哋早幾集講咗……
力：啱啱選完教宗吖嘛！
以：係喇，教宗。係咁啱，真係。真係咁啱。我哋之前講語言復活、返生。
靳：返生。
以：係喇，噉然之後呢，咁啱復活節之後嗰日，教宗就死咗，之後就換教宗、選教宗，於是就講教宗。講完之後呢，就順水推舟啦，噉就揾阿Ric出嚟傾下啲其他同基督教相關嘅嘢啦，係喇。因為我哋冇咁熟啦，係咪？係喇，噉但係都係一個好多香港人係會關心嘅話題嚟嘅，我諗。
靳：係。
以：我諗，係咪呢？唔知啦。
[07:18]
以：噉不如我哋由最基本嘅嘢開始講啦。即係《聖經》係咩語言？ 因為《聖經》即係好出名，就係全世界翻譯得最多嘅一本書啦，係咪？因為差唔多好……好……絕大部分語言，都係有一本《聖經》㗎喇。噉……或者好多本啦。噉佢原本係咩語言嚟㗎呢？我哋……我哋之前講過一啲古語啊，噉但係可能冇乜仔細講過係點樣用、幾時用嘅。
力：一般嚟講 《聖經》係……話係有兩種原文嘅語言嘅。一般係會歸納成兩種語言，就係《舊約》就係用希伯來文寫嘅，《新約》就係用希臘文寫嘅。噉當然你去睇……
以：都係希文。
力：係，都係希字……都係希文。噉當然你去細……仔細噉樣睇嗰個文本嘅內容嘅時候，就會發現有好多係再引用其他鄰近語言嘅詞彙或者句子噉樣樣，或者甚至係整個章節係轉咗另一種語言嘅，都有嘅，噉樣。噉但係一般嚟講，就係歸納係希伯來文同埋希臘文噉樣。係嘞。你會話：哎？乜真係有第二啲語言嘅話，唔係淨係個別一兩隻借詞咩？唔係㗎！例如《但以理書》啦，《舊約》《但以理書》中間有一段係亞蘭文嚟㗎。
以：亞蘭文即係咩啊？
力：不過亞蘭文同希伯蘭文都係好鄰近嘅語言啦，噉所以面向普羅大眾嘅一啲解釋呢，就好少會咁強調中間攝咗一段係第二種語言嚟嘅。噉都係話：哦，佢係希伯來文囉，噉樣樣。而佢成書嘅時候，的確都係用希伯來字母寫出嚟嘅。噉但係你仔細去閱讀佢個原文嘅話，如果你真係淨係識……唔知點解會有人淨係識呢個聖經希伯來文啦，佢係會睇唔明嗰一段㗎。佢係一種鄰近語言，係叫做亞蘭文，係嗰個年代比較通用嘅語言寫出嚟㗎。
以：即係我講講下廣東話，突然間switch咗去咩客家話噉樣，之後轉返，就扮冇事發生。
力：係啊，係啊。係啊。係。
以：咦，你聽唔明呀？哦。
力：我諗一個更加貼切嘅描述，可能係香港人寫緊文言文，寫咗成篇之後，但係中間有一段呢，因為個語境關係，就變咗粵文。跟住寫咗一段粵文嘅對話，跟住又還原返變返文言文。個感覺應該係噉樣會似啲。因為去到先知書嗰個時代，其實聖經希伯來文已經……其實已經係一種文言文囉，佢哋已經係用緊一個早幾代人擺落嚟嘅一啲經典語法，去到記錄佢哋當時嘅想表達嘅意思。

The rest of the transcript is available to Patreon members.