話說我最近喺大學上緊拉丁文暑期班喎。我本身已經對唔少歐洲語言都頗爲熟悉，見到啲複雜嘅語法都唔陌生。但係睇住個老師講解，又快又唔清楚，仲成日叫人死記硬背，就覺得，如果第一次接觸哩啲概念，頭都應該大埋。所以就諗，不如我一路學，一路喺哩道寫下我啲心得，俾有興趣嘅人睇下、認識下，都唔錯吖。

一嘗試講文法，啲人多數一係就從語言學角度講，一係就剩係同你講你要點點點用呢個字，無乜時間解釋箇中嘅原理或者因由。爲咗滿足啲好似我噉無乜語言學底、但係有鍾意一路讀規則一路思考下「點解」嘅人，我就決定從學外語嘅角度出發，講下啲文法嘅概念可以點樣去理解。

言歸正傳，多數人學德文、法文之類嘅語言，都未去到動詞，首先就要面對「男女」嘅問題。「男女」又稱爲「陰陽」，係指一個名詞嘅性，喺好多語言（尤其歐洲語言）用嚟將名詞分類。好多人初接觸分陰陽嘅語言時，第一個問題係：都多鬼餘嘅，又唔見張枱紮辮打呔，點解要理佢咩性別呢？所以呢道就同大家講下，陰陽到底點嚟、點樣可以容易啲學到。

1. 陰陽只係分類，同性別冇必然關係。

好多人最迷茫嘅原因，係意識上嘗試將「陰陽」等等性別同人類嘅性別拉上關係，夾硬將燈想象成女仔、將書想象成男仔，以致好辛苦好混亂。其實最先要記住嘅係，性別嘅目的係將名詞分類，唔係將名詞指嘅事物分類。

英文其實都有性別，只不過將所有人分入he、she兩種類別，而將其餘嘅都分入it呢個類別。好多人學嘅法文、西班牙文將所有名詞都分成男女／陰陽兩類，佢哋嘅祖先拉丁文、或者德文就有埋中類。瑞典文等等反而將陰陽夾埋做den，中類保留爲det。波蘭文嘅衆數，就將女人同事物歸成一類。遙遠喺非洲嘅共同語斯華希里文，甚至根據名詞嘅意思分成十八個類別，有少少似我哋嘅量詞。

重點係，所謂「陰陽」只係方便我哋討論嘅稱呼，你鍾意叫做A、B都得，因爲咁啱指男人女人嘅名詞分咗入呢兩個類別，先叫做男女。記住性別剩係屬於個名詞，所以同一樣嘢可以由兩個唔同性別嘅名詞去指代；有時個詞所指嘅一個人，同名詞本身嘅男女有所出入，都唔係太奇怪。例如德文初學者成日好困惑嘅中性詞Mädchen（女仔），只係話你知-chen（-仔）係中性，唔係話個人不男不女。

2. 陰陽係個指示牌，係教你個詞點用。

名詞性別起初喺（歐洲）語言裡面，好多時候係決定個詞尾點樣變法嘅因素。例如，陰性多數係最容易用嘅詞，喺德文裡面，只要你知道一個詞係陰性，就知道衆數係加個-(e)n：

die Frau: die Frauen（女人）
die Tasse: die Tassen（杯）

喺波蘭文，你注意到個詞係中性，就知道佢嘅方位格可能係將詞尾變-ie：

społeczeństwo: w społeczeństwie（社會上）
piwo: w piwie（喺啤酒裡面）

有時句子變得太複雜，無論係德文裡面一層又一層嘅分句，定係俄文嗰啲任你調嘅語序，性別就係幫你按圖索驥嘅工具。例如：

das jedem Bürger gegebene Geld（畀每一位市民嘅錢）：一見到das（中性）之後第一個名詞唔係中性而係陽性（der Bürger），就知有景轟，原來das係對應後面嘅Geld（錢）。

3. 將詞語分類，有助建立聯想關係，加強記憶。

正常人諗一件事物嘅時候，個腦會自動聯想起意思相關嘅字，譬如講手就會諗起腳。學一種新嘅語言嘅時候，最難嘅事就係短時間內記住大量陌生嘅詞語；但係學緊一種有性別嘅語言嘅話，因爲老師會逼你記住陰陽、或者因爲同類嘅詞語喺變法嘅相似之處，個腦會將佢哋分類嚟記住。結果，除咗可以用意思嚟建構生字之間嘅聯想，亦多咗「同性別」呢種關係。每次你諗起一個詞，你會聯想到其他用法類似嘅詞語，從而加強嗰啲詞嘅記憶。

4. 男女爲語言帶嚟另類嘅想象。

雖然我係噉話陰陽同背後嘅事物冇必然關係，但係因爲死物嘅名詞會用人類用嘅代詞，例如法文嘅月亮（lune）會用elle（相當於英文she），所以小朋友或者詩人會將月亮想象成月亮姐姐，更有親切感。

就算係喺日常生活裡面，名詞性別都影響母語者對某啲事物嘅理解。同一樣嘢，會因爲喺唔同嘅語言裡面有唔同嘅「性別」，而引起唔同嘅聯想。陰類嘅詞會令人諗起常用於女性嘅形容詞，反之亦然。大至太陽月亮，小至銀包鎖匙，呢啲聯想令每個文化嘅文學、民謠都有其獨特嘅味道。

每種語言喺性別嘅分類、使用等各方面，都有稍微唔同嘅做法，有與衆不同嘅地方。當你下次再接觸到一套新嘅「性別」嘅時候，唔好驚佢，反而可以細心留意一下呢個文化係從點樣嘅角度睇我哋嘅世界㗎添。

下次講一樣冇咁直觀嘅概念——變格，等我解釋點解佢冇你想像中咁複雜。