航班取消、機場淪陷 😱 我到底去唔去得成Polyglot Gathering? 【粵字/en subs】曼城✈️阿姆斯特丹✈️華沙,DAY 0 VLOG

(en sub/粵字)

我既然出得呢條片,梗係去得成啦!而因為早咗半日,你哋仲有得睇下蕭邦出生地嘅本地遊添!

大家繼續留意呢個頻道,睇下我同新朋友會有咩多語言嘅偈傾啦!

背景音樂:蕭邦練習曲 Op. 25 No. 12 《海洋》

2019年出發前嘅演出

想支持我拍片、推廣廣東話,不妨請我飲杯茶🍵

送你US$10搵老師學語言

Wise低價國際轉賬,首次免手續費

VOXI送你£20加入無限社交媒體、無限睇片嘅平靚正電訊商

機場都亂到不堪,係塞爆晒。全部啲舖頭閂晒。我之前都覺得不妙,取消咗我班機。我多數都會出事。

一出發已經頂唔順,喺呢一架好少人嘅巴士上面。點解?因為我要半夜兩點鐘撲去機場。個故事就係噉。

我而家出發緊去今年喺波蘭嘅Polyglot Gathering。我本來訂咗一班聽日晏晝嘅飛機,經過阿姆斯特丹飛去波蘭。但係過去呢一個禮拜到,都係噉睇到新聞話我出發嘅曼城機場同埋阿姆斯特丹機場都亂到不堪,係塞爆晒。我之前都覺得不妙,之後今朝不出我所料,真係取消咗我班機。結果幾經辛苦,我就將佢改早一班朝頭早嘅機,但係就六點鐘。

同埋為咗可以早啲去到排隊,唔好miss咗班機,我就要半夜就撲出去,就一秒鐘都冇瞓到,所以真係辛苦。

最搞笑嘅係,我上次去Polyglot Gathering,就係疫情前喺斯洛伐克,2019年嗰次,我都係啱啱做完一啲音樂嘅嘢,之後就漏夜搭車去機場。所以都幾有詩意,疫情前後兩次,都係同樣嘅情況。

之前睇新聞,就係係噉講話啲人排隊排到上呢條天橋。但係咦?唔通我杞人憂天咗?

歡迎嚟到半夜三點鐘嘅曼城機場,連我個check-in counter都仲有幾個字先開。但係因為我網上check-in咗,又冇得寄艙,所以我一嚟到就一支箭噉樣衝去實Q。實Q嗰度等咗一陣,都搞咗半個鐘,但係之後喺起飛前三個鐘,我已經入咗嚟呢個禁區裏面。

所以我睇departure嗰塊版,我嗰行係寫住「relax」。所以我開始諗緊點樣relax,我應該睇下書,定係喺度嘗試下瞓覺?

點都好,大家可以欣賞下後面呢個六角形嘅設計。你會見到呢度周圍都好多六角形,因為曼城嘅標誌係蜜蜂。所以呢個城市所有設計都好鍾意蜂巢。

我諗諗下,都係想喺嘗試瞓覺之前周圍行一轉,睇下有咩行先。呢度當然都好多舖頭,但係三點鐘有啲咩開,就成問題。

諗返轉頭,我都幾好彩。當初我驚到死,晨早流流仆過嚟,原來一啲問題都冇。就算我過實Q都完全冇任何問題。我多數都會出事,同埋我見到我前後嗰啲人,全部都畀人扣起咗啲嘢,但係我就zyup2噉就通過咗。所以就變咗咁順噉樣……啊,好似有嘢食!

嘩, 我喺度坐一個鐘啫,呢度已經質滿晒人。而家真係朝頭早喇。

趁天光之前,影多啲呢個景先,天光就會背光。

可能有啲朋友唔係好熟Polyglot Gathering係做咩,雖然我喺podcast都成日講。其實好簡單,有名你嗌。Polyglot本來嘅意思就係識好多語言嘅人,而家發展到個意思就係鍾意語言嘅人。Gathering就係大家聚埋一齊。

有時我同人解釋,就會話係一個會議,好似學術會議。但係係咪真係學術,就見仁見智。因為佢有好多唔同嘅演講、講座,講各種同語言相關嘅題目,但係又唔一定好學術。我見過有啲係真係好似寫論文,但係多數都係啲生活化嘅嘢,分享下個人嘅經驗。我之前喺網上嗰一個Gathering,就講咗一個關於香港字幕嘅歷史嘅talk,我諗嚟緊都差唔多。

但係對我嚟講,呢個Gathering要做嘅最重要嘅嘢就係,識人、識朋友。因為會有好多唔同嘅活動,或者唔同嘅房畀大家吹水,用下唔同嘅語言,或者傾下啲同語言相關嘅話題、經驗。

所以我都好興奮,因為呢個係疫情以嚟第一次,可以面對面識人。

早晨!我哋而家喺阿姆斯特丹Schiphol機場,我就啱啱識咗2022年Polyglot Gathering嘅第一個朋友。

你叫咩名?

Jeanine。

Jeanine?你冇同我講點讀添。我而家知喇,因為佢係荷蘭人,係荷蘭文發音啊可?呢個係咪你第一次去Gathering?

係我第一次親身去,但係我去過網上嗰啲Gathering。

今次會好唔同,因為對我嚟講,呢啲Gathering最重要嘅嘢係同人聚會,同人傾偈,同埋……因為我真人同網上都去過。我知道佢哋都盡咗力,但係如果想好似而家噉識人,喺聊天室係好難做到。我想問你嘅問題就係:今次Gathering你最期待乜嘢?

我唔知喎,我成件事都好期待,真係揀唔到最期待乜嘢。

你揀咗你最想去嘅講座未?

我揀咗一啲,但係有啲真係好難揀得落手。

我知啊。係喎,你同時間學緊幾多語言?

我諗七隻。

七隻?嘩 — 六隻。

我覺得我應該問下你,你覺得噉樣係唔係好嘅做法?但係你都做緊……

唔係,但係好好玩。

係,係好玩。我限住自己兩隻語言,但係你加油!我希望嚟緊喺Gathering會多啲見到你。

今次就肯定背咗光。我啱啱到咗阿姆斯特丹,其實我已經去到我嚟緊出發嗰個登機閘口,但係佢又delay咗。但係除咗delay之外,我都係發覺我之前驚嗰啲嘢,全部都係冇發生到。

我喺英國飛嚟歐盟就需要過關,我諗住過關嗰度排好耐,但係都係正常咁耐。即係都好耐,但係正常。之後機場有冇塞爆?都冇。好多人,但係都好正常。

因為我上次嚟阿姆斯特丹機場嘅時候,仲係疫情中間,嗰陣時真係鬼影都冇隻。全部啲舖頭閂晒,好似死城。你想食個包都冇。

而家真係好有生氣,好開心可以見到呢個情況。好想去飲杯嘢!我哋嚟緊又再飛下一程,之後喺波蘭見。

自從我上一次嚟波蘭之後,波蘭接收咗好多烏克蘭嘅難民,所以周圍都多咗好多烏克蘭文嘅牌,就連火車都喺度教波蘭人講烏克蘭話。

呢度就係華沙西站。啱啱我哋嚟到市中心,但係直接轉車去Teresin,所以都唔嘥時間去觀光。因為好攰,大家都想快啲去酒店。

到達小鎮Teresin!但係要去到活動場地嘅酒店,就要開始半個鐘嘅長征!

我哋到咗喇 — 咩話?

哈囉 — 哈囉,哈囉。

哈囉,我哋喺酒店,終於到達咗。

「拿破崙鐵匠鋪 」。望落完全唔似酒店。乜咩係鐵匠鋪?

唔係你個腦壞咗,而係周圍都播緊音樂。

通常都係壞咗。

一係啲花播緊音樂,一係我哋大家都黐咗線。

隻綠色好靚。

我同意,影出嚟好靚。

我喺美國嚟,呢度連空氣都好清新。平時我要去郊區先……

你都覺得咧!

我一嚟到就覺得嘩,好綠、好舒服。