以：呢個唔知大家知唔知呢？Vodka個語源就係呢個「水」嘅小稱啊，係喇。

苗：Diminutive啦。即係「水仔」噉樣囉，變咗。

以：「水仔」，係啊，水仔。

苗：飲支……「飲支水」噉樣，就變咗vodka。

以：飲酒思源啊。

苗：飲酒……耶穌？

靳：搦住支vodka，跟住同……同個BB講：我哋飲水仔吖！

苗：「飲水水」噉樣。就變咗vodka。

[jingle]

以：歡迎返到嚟《絮言．狂想》第三十七集，我係以色列。

苗：我係三苗。

靳：我係靳尼啊。

以：係喇，我哋錄嘅時候呢，上一集係啱啱出嘅。所以首先要同大家講對唔住先。

苗：哦，唔使。

以：我哋其實五月尾就錄咗㗎喇，上一集。但係之後我又要做學校嘅嘢啦，之後就放咗一個禮拜㗎啦……

苗：係啊，要放假嘅。

靳：要放假，人係需要放假。

苗：唔需要道歉！天經地義啊，放假。

以：結果就係我啱啱先開始寫上一集嘅逐字稿，我哋就錄下一集喇，已經。幾好吖，可以畀大家連續聽兩集。

苗：如果都好快出嘅話，就係囉。

以：呢個可能用幾日時間啦。我而家叫得閒少少，所以可能快啲，真係爭好遠。我之前真係諗住呢，放假嘅時候，可以抽到時間去繼續剪個podcast啦。係咪太……

苗：太天真喇。

以：太天真。

靳：噉就唔叫放假喇喎。

以：噉又係嘅。

苗：係囉。嘩，噉你咁忙，你係忙啲乜嘢先？

以：點為之忙？我不嬲就冇乜放假嘅概念㗎，我不嬲就係：啊，去某一個地方，即係玩啦；玩之餘就係同時間做嘢啦。噉但係呢一個係真係好耐以嚟，第一次真係淨係放假囉。噉因為其實上次都有講㗎喇，六月頭就係呢一個一年一度嘅Polyglot Gathering啦。噉雖然係一年一度啦，但係今年有兩度嘅，因為就之前四月尾有一個網上嘅版本啦，噉我就講咗個talk嘅。噉之後啱啱六月頭就係一個真人嘅，噉就喺波蘭。噉我本來呢，都準備咗個talk嘅。噉但係……係啦，因為太忙啊，所以放棄咗，即係中途cancel。

苗：希望之後再有機會啦。

以：不過諗返轉頭呢，我覺得我個talk應該唔係好收得。因為嗱，我係諗住用波蘭文講啦，噉但係我諗唔到講咩好喎，就不如講個podcast啦！之後有幾多人會想用波蘭文聽一個人講一個廣東話嘅podcast，做乜嘢呢？

苗：即係佢自己應該會聽唔到個podcast。

以：真係打飛機㗎喎，呢個。

靳：鼓勵大家學廣東話。

[02:48]

以：都係嘅。哎？我就係睇咗一個talk呢，佢係講一啲唔同嘅語言之間，呢個用漢字嗰個connection啦。因為佢哋有共同嘅詞彙吖嘛。噉但係唔知點解講講下呢，喺度講咗台灣語言啦，介紹台語啦，之後我話：呢個係咪借啲意喺度sell緊台語㗎？

苗：哦，呢個有……有陰謀喎。

以：有陰謀啊，真係。

靳：呢個陰謀幾好吖，我覺得。

苗：陰啲陰啲就唔小心學咗台語喇。

以：係囉。我係咪應該學下佢呢？潛移默化。

靳：哎啊！唔覺意又學咗台語，唔記得我識台語添！噉樣。

以：起碼可以畀人哋認識下呢樣嘢啦。尤其是台語嘅知名度更加低過廣東話啦。

苗：係啊，即係可能好多唔係好熟漢語嘅人，都以為：啊，中文就係有Mandarin同Cantonese，跟住可能唔係好識其他，或者甚至乎唔知道有其他嘅漢語嘅語言噉樣囉。噉所以介紹畀佢哋都係好嘅事吖。

靳：好事嚟㗎。

以：係啦。佢只不過真係好搞笑，唔知點解講講下……一開始就喺度介紹：啊，呢個詞語……譬如話「經濟」，噉有jīng jì，有keng-chè。之後：咦，呢個咩嚟㗎呢？啊，台灣呢，就有咁多語言嘅。

靳：佢轉得好鬼快。

苗：即係好似將個備註變咗做主要嘅題目。

以：唔係，佢都係講咗一兩個slide啫。不過好搞笑囉。即係爭在冇講到呢個雙語乜鬼政策噉樣。

苗：個tangent真係好長。

以：係啊。

[04:14]

苗：噉呢，即係其實呢，我同阿靳尼呢，之前都去過另一個類似嘅語言嘅event啦，噉就叫做Polyglot Conference嘅。噉佢就同Polyglot Gathering有少少唔同啦。噉都係唔同嘅人搞嘅。我哋去嗰一次呢，就係二〇一九年啦，就喺日本嘅福岡啦，噉就有呢個Polyglot Conference啦。噉因為佢哋嗰陣時係唯一一次……暫時都係唯一一次喺亞洲搞嘅，噉嗰陣時大家都喺附近啦，噉所以就可以一齊去喇。

以：我仲係唔啹緊。因為我嗰陣時成日等緊佢嚟亞洲吖嘛。因為佢嗰個就係周圍走嘅，全世界都有嘅，噉譬如話嚟緊就係去墨西哥啦。噉我就諗：嗯，幾時嚟亞洲呢？噉等咗好多年，佢終於嚟亞洲喇，但係我就去咗歐洲讀書。

苗：嗱，我好彩啲，我係啱啱返咗香港冇耐嘅。就可以去喇。係啊，噉我就想知其實呢個Conference同埋Gathering嗰個分別喺邊度囉，即係大家不如……即係我想知道譬如我哋嗰陣時參加Conference呢，噉其實都係有好多有晒個schedule，跟住有唔同嘅地方、有唔同嘅talk可以聽啊，跟住有時又有啲文化嘅活動可以去一齊參加啊，噉樣囉。即係我……其實你哋嗰個Gathering係咪都係啲類似噉樣嘅嘢？

以：其實據我所知呢，Gathering嘅起源呢，就係受到呢個Conference嘅啟發嘅。有咗Conference先，之後Gathering再抄佢嘅。噉名義上呢，Gathering係比較非正式嘅、比較放鬆嘅。噉但係佢個格式其實我諗都差唔多囉，都係有啲演講啦、好多唔同嘅工作坊啦，之後可能佢會多啲社交嘅空間囉，我會話係。

苗：OK，點樣「空間」法？

以：係喇，譬如話我第一次去柏林嘅時候呢，嗰個就係二〇一六年嘅Gathering啦。噉佢就有一間房，就係傾偈嘅，一間房就係English-free zone啦，係喇。

苗：唔可以講英文嘅。

以：係喇，好正嘅。如此類推囉。噉我唔知Conference有冇啲噉嘅嘢。

苗：嗰陣時就冇嘅。

靳：其實嗰陣時就真係有劃定啲時間，即係畀你喺個大廳度，即係大家噉樣去即係一齊傾偈啊，噉樣。噉我諗有一部分其實係當時嗰個場地嘅限制嚟嘅，因為喺大學入面呢，噉佢哋可能要卜場啊，噉樣。噉佢就指定咗一……其實都成日㗎，都成日有畀大家有好多張枱啊，大家都可以喺度周圍喺度傾偈啊，噉樣嘅，係喇。噉之後其實都會有返……有返個大廳喺度，噉但係通常就喺樓上會做好多呢啲實體嘅講座啊，噉樣。噉所以好多……其實大家都上咗去，噉留喺大廳嘅人，就相對嚟講比較少啲啦。噉所以真係大家即係可以一齊傾偈啊、一齊即係講嘢啊，噉其實除咗喺個conference入面，都有好多……其實唔喺conference嗰個時間入面，噉大家可能去食下飯啊，噉樣，噉都會比較多啲嘅。

以：係喎，你哋有冇呢個大會提供嘅膳食㗎？

苗：呢樣嘢就真係冇喇，我哋應該係自己去食。因為佢係大學啦，噉所以都有啲飯堂嗰啲，噉就可以去自己去……直接去買嘢食噉樣囉。

以：哦。因為喺Gathering嘅時候呢，嗰個共同進食嗰個活動係好緊要。因為……係囉，食嘢傾偈吖嘛，即係好似我以前喺牛津噉。噉所以佢都好鼓勵你係卜晒咁多餐嘅，即係晏晝、夜晚都一齊食噉樣。噉如果你鍾意，你當然可以自己出去出面食啦。噉譬如話我上一次去嘅時候，喺Bratislava，噉大城市好多嘢食啦。噉但係就你要自己organise，揾一堆人陪你去囉。噉但係如果係喺佢大會提供嘅飯堂食嘢嘅時候呢，噉就變咗容易啲識多啲新嘅人啦。噉尤其是今年呢一個呢，佢係喺華沙附近嘅一個鎮，周圍真係荒蕪。所以……

苗：所以都冇地方可以食嘢喇。

以：所以你都冇得揀乜滯。係啊，我譬如話呢，我第一日呢……呢個我個vlog裏面有講嘅。就係我本來諗住夜晚先到嘅，但係因為啲飛機嘅問題呢，就調咗去朝頭早到咗啦。噉變咗我夜晚就冇卜到嘢食。之後我就好納悶喇，點算呢？唯一做到嘅呢，就係去對面間舖頭仔買啲pierogi返嚟，之後凍食囉。好慘。因為你出面呢，就係……

靳：凍食pierogi？

苗：凍食？咩概念啊？

以：係啊，好崩潰啊，佢嗰個場地係一間酒店嚟嘅。出面呢，就係一個油站……唔係，佢係……啊，洗車嘅地方嚟嘅。之後一直行落去，就係一條吉嘅街，就係啲住嘅屋企囉。之後有個墳場，一間鋪頭，係咁多。

靳：啊，真係好sad。

苗：同埋呢，我記得我哋嗰個Conference呢，之前都有……有一啲日本嘅學生啊。好似係咪大學生嚟㗎，定係中學生？其實我都唔係好知。佢哋係……

靳：係啊，大學生。

苗：大學生啊，係啊。噉佢哋就嚟咗我哋嗰個會場嗰個hall嗰度，噉就去周圍……佢哋有張工作紙嘅，就去周圍去問人，佢哋識咩語言啊？佢哋係來自邊度啊？即係噉樣嘅嘢。噉就變咗我哋係畀人訪問噉樣，好似。佢哋就周圍行。

以：哦，咁搞笑。

苗：係喇，即係好似佢哋去動物園，然之後而周圍去睇啲……嘩！睇下！呢度有隻……有個polyglot啊！噉樣。

靳：呢度有個polyglot。

苗：跟住就去……埋去訪問佢噉樣。跟住佢哋好多都話：嘩！好勁啊！噉樣，之後佢哋：えぇ？噉樣，嗰啲呢。

以：えぇ？すごい！

苗：嘩，好叻喎！啊！講一句日文，跟住就「嘩，好勁啊！」噉樣嗰啲。係囉，即係都有啲噉樣嘅活動。因為佢一個搞手係……係咪喺大學教書㗎？

靳：係啊，係啊，係啊。

以：Tim，係咪啊？

靳：佢就喺嗰間大學度教書。

苗：係嘞，佢就喺嗰間大學度教。噉佢就用嗰間大學嘅場地，噉就順便呢，就帶埋佢啲學生嚟一齊……都係去參與呢一個噉樣嘅活動囉。我覺得幾得意囉，呢樣嘢。

The rest of the transcript is available to Patreon members.