絮言.狂想#036:又講咩話?????

除咗數字同調號,仲有咩創新方法,可以標聲調?適逢Pride Month,我哋認識到意大利文漸漸有個新字母,你估係邊個?

第二次估語言遊戲,今次以色列都玩埋一份,但係結果學廣東話多過玩遊戲……?

快啲同我哋一齊玩gong? me! waa????

喺YouTube收聽

成爲 Patreon 會員除咗有足本逐字稿,仲有得投票、參與Discord,同埋以下額外內容添!
-一條額外題目
-講[某語言]係咪一定要用某種聲?
-[某語言]點解成日用呢個詞尾?
如果想單次打賞,亦都可以請我哋飲杯咖啡

本集特別鳴謝:Klaus、Anthony、サム、阿擇、Ceci

Subscribe to our newsletter!

00:00 同科技搏鬥
02:31 jung… biu! dim? se? gwong? dung! waa?
05:39 南非第十二種官方語言
10:28 italianə
16:00 第二屆「講咩話」開始!
18:09 熱身題(一)
20:39 熱身題(二) 
22:14 熱身題(三) 
24:26 挑戰題(一)
26:54 挑戰題(二)
31:35 挑戰題(三)
36:16 挑戰題(四)
38:38 挑戰題(五)
41:57 挑戰題(六)
45:28 挑戰題(七)
52:11 飲水.思源:edit

連結:

意見反饋 Feedback/建議題目 Suggest topics

社交媒體

以:點解又係噉容易嘅?

苗:Skip啦,喂。做馬啊。

以:吓?呢個hard㗎嗱?呢個……

苗:不如第一個就……不如直接去omniglot啦,喂。

以:係囉。我覺得佢難嘅位,就係好多選項囉。

苗:因為唔使估㗎喎。第……一聽第一個,就知。即係唔係真係要估囉。我覺得要真係玩估呢,我要omniglot。

以:唔係,有啲人要估嘅,有啲人要估嘅。

苗:但係唔好聽吖嘛。

靳:噉omniglot囉。

苗:好似好玩啲喎,omniglot。

以:好啦。

[jingle]

以:大家好,歡迎返到嚟《絮言.狂想》第卅六集,我係以色列。

苗:我係三苗啊。

靳:我係靳尼啊。

以:係喇。點解我哋笑到噉樣呢?就係因為呢,我哋啱啱用咗一個鐘零三個字嘅時間呢,嚟到做一個好特別嘅setup啊。就係我哋今日想錄啲特別啲嘅嘢。

苗:同啲電腦搏鬥啊。

以:係啊,同電腦搏鬥。

苗:係啊。即係今日呢,我哋本來就做一啲可以同時聽到我哋把聲啦,同埋聽到啲電腦錄音嘅一啲小遊戲噉啦。噉但係就因為呢一啲呢,實在太複雜喇,我就唔係好叻呢啲嘢,噉就搞咗好耐好耐。噉首先就係我整啦,跟住之後就整咗……真係爭少少㗎咋,好似又得,哎啊,但係最後又唔得。最後呢,就都畀以色列解決咗喇。

以:一個小問題,令到成樣嘢唔work。

苗:係啊。因為好多樣嘢啊,你又唔可以……你首先呢,你要自己聽到自己喺電腦播出嚟嘅嘢啦,你要錄到你講嘢啦,錄到電腦播出嚟嘅嘢啦。但係呢,你又唔可以錄到個voice chat裏面其他主持嘅聲啦,然之後你又要畀佢哋聽到你自己講嘢同埋你個電腦講嘢啦,即係就好複雜好複雜。最後都OK嘅,係喇。好叻嘅以色列,最後解決咗。

靳:好在,好在。

以:成功噉樣呢,開咗個混音嘅軟件出嚟。即係好似我而家做緊一個混音師傅噉樣㗎喇,我……就為咗可以幫大家錄到呢樣嘢。

苗:果然係呢個音樂家。

以:我做音樂都未試過噉做啊,要。冇試過咁多唔同嘅儀器擺埋一齊,最多都係支咪插落電腦噉樣㗎咋。

苗:係啊,真係好複雜啊。

靳:派上用場喇!

苗:今日真係學咗好多嘢。

靳:每日都學嘢,每日都成長。

以:噉希望都值得啦。希望呢個零鐘呢,係可以錄到有趣嘅嘢畀大家聽。

[02:31]

以:首先呢,我想同大家分享下我哋呢一個絮言.狂想Discord上面嘅一啲有趣嘢啊。因為呢……其實不如三苗你講啦,你諗出嚟嘅。

苗:其實諗……所以諗,其實係用咗呢個三十秒嘅時間諗。噉因為唔知點解,講開就……傾開嗰個「嚕」呢一個句末助詞點樣寫啦。噉呢,就有啲朋友,就……就話,會用呢個蛇仔嗰個符號啦,就寫lu蛇仔噉樣,lu~噉樣。噉然之後我就諗嘞:我成日呢,就用呢一個符號嚟寫一啲第三、第五聲嘅嘢啊。即係譬如你話「哦」噉樣,噉就就噉寫口字邊一個我字啦。噉但係如果你話:「o5」噉樣呢,我就會加個蛇字囉。噉我就忽發奇想,就話:不如,啊,將粵拼嗰啲標調嘅數字,變做標點符號囉。噉譬如第一聲就係感嘆號,第二聲就係問號噉樣,一路如此類推,係嘞。噉一路落去,噉就會睇落去呢,就好直覺噉樣,你見到個標點,就會好自然就會講咗嗰個聲調出嚟囉。好搞笑,即係……擺個sample喺個show notes度畀大家睇一睇,睇下大家會唔會覺得……讀得點樣囉。

以:你講第一聲係感嘆號、第二聲問號啦。第三聲係hyphen啦,即係好似講嘢平噉樣囉。之後第四聲就係句號,第五聲係嗰個蛇仔,即係「哦~」嗰個蛇仔。之後第六聲就係省略號。其實係成件事真係好make sense喎。

靳;好make sense啊。

苗:係啊,我都係求其諗㗎。

以:估唔到咁work。

苗:但係呢,就有個效果呢,就會好似一個一個字扽出嚟噉樣。

靳:啲節奏就會錯晒喇。

苗:係啊,每一個字都係。

以:絮~言。狂。想?

靳:人。人。生!而。自……由。

以:大……家!好?呢個就令我諗起有時有啲人教本身母語冇聲調嘅人,學一個有聲調嘅語言呢,都係用呢啲噉嘅諗法。即係因為譬如講英文,本身都有啲啲起伏啦。噉就透過啲標點符號,嚟到令人哋聯想啲起伏,從而學到嗰啲聲調囉。噉所以可能就因為噉啦,所以呢一套系統呢,係咁……咁容易捉到囉。你見到問號,自然就會想上去。如果你係一個問題會升上去嘅語言嘅人。係咪多數語言都係噉㗎?

苗:其實我又唔知係咪多數囉。即係有一部分囉,起碼。有啲真係唔知。有啲問題向下㗎嘛,反而。

以:係啊。英式英語,係咪啊?

靳:英文都係。

苗:例如啦,係啦。即係英文其實兩樣都有㗎。有一啲人係向上,有啲人向下。

靳:有啲……有啲人唔係問句,都有向上。

以:噉所以呢,如果大家都想參與呢啲咁有趣嘅討論呢,或者有啲咩騎呢、天馬行空嘅諗法,想分享下呢……

苗:有啲咩狂想。

以:係啊,有啲咩狂想呢,都快啲嚟我哋嘅Patreon啦,噉就可以成為我哋Discord呢個群體嘅一份子啦,可以嚟吹水啦,可以問下問題啊、畀意見啊,噉樣。噉當然都係支持緊我哋呢個節目嘅運作嘅。

[05:39]

靳:好嘞。跟住我哋就分享我哋呢一排發生嘅第二樣有趣嘅語言新聞喇。其實唔係新聞嚟㗎喎,之前嗰個係。其實呢,就近來呢,喺呢個南非啦,就出咗一單新聞呢,就係呢,南非呢個……呢個國家呢,就即將呢,有第十二個官方嘅語言。

苗:嘩,本身已經有十一隻喇,即係。

靳:本身已經有十一隻㗎喇。因為南非呢,喺即係消除咗呢個種族隔離之後呢,其實就佢嗰個國家啦,噉就變咗……變咗做呢,將佢基本上境內差唔多最大嘅語言呢,都全部列咗做佢嘅官方語言。噉其實有好多種嘅,噉大家都有……有興趣可以去睇下啦,噉樣。噉但係今次呢,加第十二隻嘅官方語言呢,就同佢本身有嘅官方語言有啲唔同嘅。其實佢就係加咗南非嘅手語上去第十二隻官方語言啦。噉呢個都係隨有啲其他國家嘅腳步嘅。因為之前就應該係阿紐西蘭,都有將紐西蘭手語列咗做佢個官方語言之一噉樣啦。噉都……我都諗緊,會唔會可能之後會有更加多嘅國家去效仿呢樣嘢啦。噉因為始終手語其實都係有一個比較大嘅群體用嘅語言,而且個個國家都……

以:有各個國家嘅國歌。

靳:基本上係用唔同嘅手語嘅。各個國家有各個國家嘅手語啦。係啦。噉就……呢個其實都係對聾人群體應該係一個好鼓舞嘅新聞嚟嘅。

以:咦,你哋知唔知道南非手語係邊一個語族㗎?

苗:哦,佢應該係英國手語吖嘛。

以:哦,都係嗰一堆嚟嘅。

苗:係啊,係啊。佢係即係英國啊、澳洲啊、紐西蘭啊、南非,都係同一個手語語系嘅。

靳:噉你應該睇得明㗎喇喎。

苗:係囉,以色列應該睇得明。

以:可能……我識好少啫。咁得意,好似真係成個英聯邦,就係冇咗加拿大。

苗:因為加拿大用美國手語吖嘛。

以:係啊,加拿大用美國手語。畀佢同化咗。噉但係之後成個英聯邦都係英國嗰個語系。甚至有啲人話係可能係比較似一個語言嘅唔同方言嘅。都係又係嗰個語言同方言嘅問題啦,噉冇得拗㗎喇。噉但係真係係通嘅。我記得當初我識一啲用澳洲手語嘅人啦,噉我嗰陣時淨係識啲啲啲啲啲多英國手語嘅啫。噉之後佢哋都話:其實呢,如果你自學呢,你可以上紐西蘭手語嗰個網站。因為嗰個course好好,之後你學完之後,你可以改返少少,就英國手語㗎喇。噉所以可能真係好相似囉。

苗:噉都幾得意喎。

以:可能文法上啊、啲詞彙,都係比較接近。

苗:係喇。噉講返即係呢個手語做官方語言呢樣嘢呢,其實香港呢,都係曾經試過做呢樣嘢嘅。噉喺大概十六、十七年嘅時候呢,噉立法會都嘗試過去將香港手語變做官方語言啦,噉就係梁耀忠提出嘅一個議案啦。噉最後呢,就係喺地方直選,其實係通過咗,但係呢,就功能組別否決嘅。噉所以最後就冇通過啦。噉所以都……即係香港都係好近嘅,曾經喺呢樣嘢上面。雖然佢係冇約束力嘅法案,但係都仍然……即係喺象徵上,都係重要嘅嘢囉。噉但係可惜就冇通過到囉,最後。

以:哦。「香港嘅官方語言係……」咩啊?「中文同埋英文」,係咪啊?

苗:係啊,即係其實連廣東話都唔係明文規定嘅官方語言囉。

以:係囉,廣東話都唔係啦。

苗:即係……即係香港政府對語言就唔係太過去重視囉,或者話。或者淨係對某啲語言重視囉。

以:唔係好深入呢啲語言嘅議題囉,佢哋。即係我哋上次都講咗嗰個……又係廣東話同埋普通話……嗌口令嘅問題啦。嗰個即係佢已經糾纏不清喇。即係乜嘢係中文,即係政府完全係唔諗呢個問題嘅,我相信。噉就何況手語呢?真係比較偏門少少嘅問題。

The rest of the transcript is available to Patreon members.