靳：呢個又係……一個……呢個標籤就係個……

以：你可唔可以唔好「一個」之後飲啖水？

[jingle]

以：歡迎大家返到嚟《絮言．狂想》第三十五集，我係以色列。

苗：我係三苗。

靳：我係靳尼啊。

以：我啱啱應該係……我係係噉諗緊個「五」嗰個後鼻音呢，之後我個「三十」就變咗做唔知咩……又唔係三……三saak6……三sak6五。

苗：三saap6五。

以：同化咗，係咪啊？噉我哋都好耐冇錄音喇喎，又。我都好耐冇同大家傾偈喎。

苗：OK啊，skip咗一個禮拜囉，我哋。所以可能遲咗出噉樣。

以：咁啱約唔到時間。

苗：係，大家都好忙。其實都唔係吖，你哋去玩咋嘛。

以：係咁啱……咁啱去咗玩。時間係好難約嘅，之前都講過啦，我哋啲時區啊，之後又要返工啊，嗰啲。噉講開返工呢，噉就提醒下，大家如果鍾意我哋嘅節目嘅話呢，噉都記住嚟到我哋嘅Patreon上面支持我哋啦，噉都支持我哋喺咁忙嘅時間裏面呢，都繼續抽空出嚟呢，去到錄同埋去到剪畀大家聽嘅。噉呢，大家最近又過得點啊？呢幾個禮拜。

苗：都幾平凡啦，都係。完！噉樣。唔係。噉……

以：完咗，好！噉就完喇。

苗：唔係嘅。噉都即係近排開始有少少……多少少動力學返下語言噉樣囉。噉因為見我個朋友就突然間同我講：咦？原來以前即係Learn Greenlandic嗰個網呢，就有一啲畀錢嘅教材，但係最近呢，佢竟然免費開放咗出嚟。噉聽佢講就話係丹麥政府即係決定免費噉放出嚟啦，噉我……即係我就唔知係唔係，不過就見到：咦？免費，噉就去玩下。就個教材其實唔多嘅，但係佢有好多好得意嘅exercise囉，即係佢有一啲係電腦gen出嚟嘅一啲訓練你一啲語法啊……嘅一啲練習啦。噉嗰啲其實都幾好玩嘅。有啲……仲有啲係聽，然之後默書噉樣啦，噉嗰啲又係超難啦，即係一個你完全唔識格陵蘭文嘅人，你要學完啲音，即刻就開始做dictation，即係嗰個learning curve啊，係好……真係好陡峭嘅。

以：佢聽嗰啲係咪電腦gen出嚟㗎？

苗：唔係啊，嗰啲係有一條真人嘅片嚟嘅。佢講得好快㗎，即係佢係普通嘅說話嘅速度，但係你就要聽囉。然之後你每一個字呢，因為你知道格陵蘭文，即係如果唔知道嘅話，格陵蘭文係好多字都冇space㗎嘛，中間。冇空格嘅。

以：嗯，我哋上次講過。

苗：係喇，噉我哋去返……show notes我哋擺返講嗰一集嘅……嘅嘢啦。

以：係，上次你自己攞咗啲例子出嚟講。

苗：係嘞。噉格陵蘭文就好多嘅語素啦，即係好多詞語啦，你當，噉就黐埋一齊，就冇空格。噉就變咗你打錯咗一個字，你就完全唔知自己邊度打錯囉。你就會：哎，佢話你錯，但係係頭嗰度錯吖、中間吖、尾吖，錯啲乜嘢吖，係完全冇嘅。但係如果一個字本身……可能我哋學英文噉樣，一個字，通常唔會好長嘅。噉我錯，我都知道大概係邊度錯囉，起碼。即係你冇乜可能……得一個音節，噉咪就係個音節錯囉。噉你講格陵蘭文，勁……咁長，成個句子得一個字，即係好似我同你講：你呢句錯咗啊，呢句英文。噉但係邊個字，佢唔話你聽囉。

以：「我都唔知喎。」噉樣。

苗：係啊。嗱，噉大家可以去……如果有興趣睇下，都可以去嘅。噉擺喺show  notes裏面啦。

以：其實呢，你邊度嚟，無啦啦會有心機學格陵蘭文㗎呢？

苗：嘩，呢樣嘢就真係一個好長嘅故事。

以：你好似好耐㗎喇喎。

苗：係啊，即係不嬲都對呢個語言都幾有興趣，因為見佢嘅文法好特別啦，同埋我又鍾意啲比較凍啲嘅地方啦。噉佢又喺北歐啦，算係。即係北歐裏面算係最唔歐洲嘅語言啦。

以：北極熊。

苗：係啦。噉當然佢……

靳：最凍嘅地方。

苗：係啊，最凍嘅地方。即係當然佢唔係歐洲語言啦。噉所以即係各樣方面擺埋，都好特別囉，覺得呢個語言。噉就一路想學，但係都好難去揾方法啦。第一，教材唔係真係咁多，就算有，都係用丹麥文嚟寫嘅。噉我之前我就見到呢，有一啲上網教格陵蘭文嘅……即係都係官方嘅，即係好似係唔知大學啊，定係即係格陵蘭自己嘅language institute去自己開嘅一啲班。但係佢個問題就係佢好多班呢，佢有英文教，但係個時間都係好差囉。即係個時間都係喺星期一至五嘅晏晝噉樣囉。噉我心諗：如果要返工，噉就好似永遠都上唔到噉樣。又冇夜晚嘅班，又冇星期六日噉樣，都幾難。

以：噉佢都要返工時間教㗎嘛。

苗：都係嘅。即係……噉就即係冇辦法囉，噉就變咗即係呢一班人……返工嘅人，就變咗好難去夾時間囉。

靳：噉你除咗用呢個Learn Greenlandic之外，仲有冇用啲乜嘢資源㗎？

苗：暫時其實就……佢有一堆好多都係NLP少少嘅啲工具啦，即係佢有啲字典啦，有啲……佢……你可以打句嘢，然之後佢幫你分析佢裏面有啲咩語素囉。因為我覺得學格陵蘭文一個好特別嘅地方就係呢，你學……譬如學普通歐洲語言，你可以就噉打個字，佢就會出個字典畀你。即係佢個字典裏面會有唔同嘅字，噉佢最多有唔同嘅可能變格啊、啲動詞變化啊，最多……即係佢都係有一定嘅可能性嘅啫，最多。即係可能個verb最多present tense有六個form噉樣。

以：二百幾個噉。

苗：最多……係，最多畀幾百個你，係咪先？

以：拉丁文二百幾個。

苗：即係……拉丁文可以二百幾個，係囉。噉但係都係……都係有限制㗎嘛，即係嗰個數量。噉但係你格陵蘭文，你一個字係……即係好多個字可以就噉黐埋一齊，你基本上係一個字同一句句子一樣咁多意思嘅時候，你冇可能去記錄晒所有嘅句子嘅意思㗎嘛。噉所以就變咗要呢啲額外嘅工具去……去揾究竟呢一個……呢一個字裏面有幾多個語素，嗰啲語素係乜嘢，噉你再查返，你再要另外去學點樣擺埋一齊，因為又唔係一樣嘅，所有嘅規則，噉樣。噉呢啲都係一啲我覺得好特別嘅地方囉，即係同我學其他嘅語言。我就噉學Gaelic噉樣，我都就噉擺個字落去，就即刻有結果，我即刻我就知：哦，就係噉解喇，噉樣。但係我格陵蘭文，我要估呢個……呢串字裏面，邊一個字母係邊一個語素，我要估㗎，有好多時都。因為佢會堆埋一齊噉樣。

靳：即係未學識查字，就要學識拆開啲字先。

苗：係啊，都真係幾難啊。仲有有時嗰啲工具唔一定啱㗎嘛。

以：幾記得意喎，因為佢個語言嘅結構同即係我哋心目中大路嘅語言實在太唔同喇，所以佢哋可能對字典嘅概念啊、嘅設計，都完全唔同。即係正如中文有分字典同詞典噉樣，噉佢哋都有啲唔同嘅做法，就唔可以一本詞典就搞掂晒噉多嘢。

苗：係囉，即係有少少似呢樣嘢囉，我就覺得。

以：我諗各位聽眾學語言都應該唔夠三苗咁冷門㗎喇。

[07:27]

苗：點啊？喂，你嗰個都唔……你都冷門啦，算係。你學BSL吖嘛。

以：好冷門咩？好主流喎。

苗：OK啦。即係全個世界嚟講，比較……就算英國裏面，都唔算係好主流啦，係咪啊？

以：喂，但係唔講唔知喎，都唔少人學㗎喎。我覺得呢，可能因為即係一般大眾對於學手語嘅態度係唔同啲嘅，即係學外語呢，好似係人哋嘅嘢吖嘛，我唔需要接觸㗎嘛。噉但係手語係我自己國家裏面，即係有機會用到嘅嘢囉。所以我都一直以為好冷門啦，但係原來學嘅人，即係學過嘅人啦，唔理學得好唔好啦，係……係好多㗎喎。噉我都見好多係……都頗monolingual嘅人呢，即係……好似一個程度噉樣，但係……都頗唔熟外語嘅人呢，都會接觸過手語囉。

苗：都係嘅。

以：啊，係啊，你講起嚟，係，我啱啱考完試。

靳：你啱啱考完試啊，係咪啊？噉你跟住仲會唔會繼續學㗎？

以：應該會嘅，但係問題係點樣囉。即係因為我而家係跟大學學啦。噉佢噉樣嘅，佢有個part 1、part 2嘅。噉正常呢，就係sem 1 part 1，sem 2 part2啦，噉但係呢，我就sem 2先part 1。噉就唔係好大問題嘅，噉但係結果呢，就係要出年sem 2先可以再上埋part 2囉。

靳：哦，即係佢冇暑sem呢樣嘢嘅。

以：冇暑sem，同埋冇得sem 1 part 2囉。

靳：哦。

以：係啊。噉我都有啲朋友諗緊……因為佢哋畢業嘞，冇得喺大學上嘞。噉佢哋諗緊去出面嗰啲centre。我哋大學呢，對面街就有個叫做聾人中心。

苗：哦。

以：係啊，勁方便啊。係啊，三苗你落嚟睇下吖。

苗：好啊，得閒嚟睇下。

靳：其他人其實做咩要學手語？即係有咩原因，特別要學手語？噉樣。即係佢哋通常因為啲咩原因而去學手語？

以：我都好想知啊。但係我哋未去到個level，可以講點解你要學手語。

苗：未識表達。

以：未識表達。

苗：「因為」點講？

以：識講「因為」，但係唔識講呢啲咁抽象嘅嘢，係啊。你可以講「因為我鍾意」噉樣。

苗：答咗等於冇答嗰啲，係咪啊？

以：噉但係我班上面就……我又唔覺得有人係真係同聾人係比較接近嘅。好似有一個呢，佢係喺啲唔知咩中心度做啲義工噉樣啦，噉就會接觸到嘅。

苗：好多啊。

以：噉但係其他人可能就真係興趣啦，或者係……啊，好多係攝cred㗎啫，嗰啲……嗰啲undergrad，係。覺得：咦，我……我有幾cred要嘥喎。

The rest of the transcript is available to Patreon members.