絮言.狂想#034:如果你自己有誤導畀,會我你都唔幫可以

Snapchat 竟然開始轉型用 AR 教語言?聽 Gaelic 嗰陣點解第一個字通常最容易明?原來學日文係砌積木,但係講格陵蘭文就係玩黏土?今集《絮言・狂想》帶大家探索語言分類學,用宏觀嘅方法睇語言。

喺YouTube收聽

成爲 Patreon 會員除咗有足本逐字稿,仲有得投票、參與Discord,同埋以下額外內容添!
-蓋爾語、威爾斯語結構比較

如果想單次打賞,亦都可以請我哋飲杯咖啡

報名參加Polyglot Gathering Online 2022!

本集特別鳴謝:Klaus、Anthony、サム、阿擇、Ceci

01:30 第n次威爾斯文、高地語滙報
07:06 快啲報名參加Polyglot Gathering(睇以色列)!
10:36 有邊個會學蘇格蘭蓋爾語?
14:03 Snapchat幾時變咗語言學習app?
19:16 好多玩法嘅,語序係有
32:06 一個詞,可以點砌出嚟?
36:01 食べさせられていた
40:16 泥膠溝埋又變色:多式綜合語
45:16 飲水.思源:pisică(貓)

連結:

意見反饋 Feedback/建議題目 Suggest topics

社交媒體

靳:佢可能……即係佢吟詩啊,或者喺某啲情況之下,佢想強調某啲嘢啊,噉佢個語序就會變成唔固定喇,噉樣囉。

以:或者睇心情。

靳:係嘞,睇心情。我個語序係睇我心情嘅。

苗:啱啊。Grammatical mood啊,呢個叫。梳。

以:唔係,呢個講笑嘅,唔係grammatical mood嚟嘅,呢個。

苗:講笑,講笑,講笑。

靳:唔係grammatical mood。Grammatical mood係第二樣嘢嚟㗎。

以:澄清,唔好誤導人!

[jingle]

以:歡迎大家返到嚟《絮言.狂想》第三十四集,我係以色列。

苗:我係三苗。

靳:我係靳尼啊。

以:喂,大家復活節過成點啊?

苗:復活節?冇啊,放假囉。今日放假啊,其實我就係。

以:係啊。我哋難得喺平日可以錄到音。

苗:係啊。通常我哋係星期六嘅,揀。因為即係就返香港時間,即係有啲時差啦,有時。如果係weekday嘅話呢,就可能香港太夜噉樣。噉所以就通常都會喺weekend啦。噉但係今日就好似大家都好難得噉夾到呢個時間啦。

靳:係啦。我又放假啦。

苗:因為大家weekend去玩啊。

靳:Weekend去咗玩喇,已經。

苗:所以就要weekday嘅時候錄返音啦。

以:唉,玩喎。咩嚟㗎?食得㗎?

苗:你都去玩啦,係咪?你都就嚟去玩。

以:冇嘢玩。呢排唯一出街呢,即係除咗要做嘢之外呢,我就係去咗一個曼城嘅一個學威爾斯文嘅人嘅一個聚會噉樣啦。噉一個朝頭早,大家去食個包,飲杯咖啡,吹兩句水。之後嗰個係難得呢,啲人係識講㗎。

苗:係呀?即係佢哋係學威爾斯話吖,定係佢哋係native啊?

以:有一個係母語者囉,係喇。之後其他都係學緊嘅,係喇。佢哋都勁過我嘅。噉大家估下佢哋平均年齡係幾多?

苗:你講得,都係比較大嘅,可能。

以:係。

苗:好多啲即係所謂少眾語言,都係……嗰個年紀都係偏大㗎,好多都係。

以:係啊,我發現個trend係……因為呢個係我……算係第一個學嘅……即係真正少眾嘅語言啦,噉就發現佢多數學嘅人呢,都係同威爾斯係有啲個人嘅即係connection噉樣。噉佢一開始傾偈,就問你:你同威爾斯有咩關係啊?你呢個亞洲人,你做乜鬼啊?之後同埋好多係老啲嘅,即係佢哋多數係即係去到咁上下……多數都淨係識英文啦,有啲係英格蘭人,有啲威爾斯人,就突然間心血來潮,就學囉。之後有啲係咩六、七十歲噉樣。

苗:係,之後佢就問你:咦?點解你個樣,會學威爾斯話嘅?噉樣。你個樣唔似喎!噉樣。

靳:你係咪答返佢:因為我想用威爾斯話嚟做呢個入籍考試,噉樣。

苗:做乜嘢?呢個係。

以:呢個諗下先,諗下先,係。阿三苗係咪有類似噉嘅經驗啊?

苗:其實都唔係喎。其實有少少好嘅現象,就係而家學Gaelic嘅人,好多都係比較後生嘅,我覺得。噉我就有上堂啦,就有上online嘅堂。噉其實都有老人家嘅,都有啲退咗休嘅人啦,有啲可能就嚟退休啦。可能冇一半,都有差唔多一半嘅,其實。但係都有個別幾個係後生嘅。噉即係……但係佢哋都係同蘇格蘭有啲關係啦,當然佢哋全部都係蘇格蘭人啦。得我唔係啦,其實。

以:成為緊,成為緊。

苗:都唔係嘅,都有啲係……有一個英格蘭人,有一個好似加拿大人,但係佢哋都係即係家庭上面會同蘇格蘭有關啦。噉我就唔完全冇關啦,係囉。噉所以都算係特別啦,我哋……我同以色列都算係一啲異類啦。

以:有冇畀人問啊?你。

苗:又真係冇喎,可能佢哋唔敢問,定唔知點樣呢?或者……即係都冇問我:點解你學啊?噉樣。噉可能當……噉你住喺蘇格蘭,噉咪學囉。即係都係一個好順理成章嘅嘢囉。如果你係一個鍾意學語言嘅人,可能你住喺呢度,你好自然就想去學囉。

以:我諗係有少少唔同嘅,因為而家Gaelic個情況係比起威爾斯文更加弱㗎嘛。即係佢係更加少人講,係更加niche噉樣,好冷門噉樣。所以可能學威爾斯文嘅人,多數就係一啲想融入嗰個社區啊,想接觸下佢哋身邊講威爾斯文嘅人啊,等等,噉所以可能就係一啲……可能退休由英格蘭搬去威爾斯嘅老人家啦,或者可能就……可能本來父母係講嘅,而家想學返。噉但係Gaelic就好可惜地呢,可能真係一啲係hobby嘅嘢嚟嘅,即係大家想試下噉樣。

苗:係。噉不過我都覺得,其實Gaelic呢一個語言啦,或者呢個羣體,佢造教材嗰啲人啊,其實佢哋都對呢樣嘢好有awareness嘅。佢……即係有個電視節目啦,就係叫SpeakGaelic啦,噉就有網上教材啊、電視節目啊、podcast啊,成套噉樣嘅,一站式服務。噉就個電視節目裏面有一個環節呢,每一集都有嘅。就係會訪問一個學緊Gaelic嘅人啦。通常都係蘇格蘭人嚟嘅。但係有幾次,係有一啲同蘇格蘭本身冇關係嘅人,通常就係去咗會講Gaelic嘅地方,噉然之後佢就開始去學囉。我記得有一個係有個日本人啦,本身係。有個係咩千里達又有啦,噉樣。即係都係有一啲好遠、好似唔係好關事嘅地方,但係去咗嗰度地方,就好似想融入佢哋個羣體。噉當然佢哋係即係少數民族噉樣,但係都係會去……即係somehow,其實講Gaelic嘅人,都算係少數民族啦。噉所以有一種幾特別嘅情況出現。

以:我有聽講呢,好似有新聞話一啲烏克蘭難民呢,去到係咪蘇格蘭啊?之後佢哋學Gaelic啦,定係識Gaelic啦。之後話係有優先嘅對待。

苗:哦,係咩?竟然係噉?

以:我唔知有冇記錯。我check下先。

苗:咁快咩?我睇過有一個係敍利亞難民,小朋友,佢就去咗即係嗰間學校,係有讀Gaelic㗎囉。跟住佢就有幅相,係佢揸住張cert噉樣,話佢識即係啲基本嘅Gaelic噉樣。

以:係啊,我揾咗篇文出嚟啊。我可能擺喺show notes呢,就係有個烏克蘭難民呢,佢好鍾意Braveheart啦,即係你知嗰套講蘇格蘭嗰套歷史片啦。噉之後佢就開始咗學Gaelic啦,之後好似又唔係優先,但係佢……佢揾啲講Gaelic嘅人去到host佢,即係去住人哋屋企噉樣。噉之後就容易好多囉。

苗:打呢個温情牌。人情牌啊,係咪啊?

以:或者呢個語言牌啦,都可以話係。

靳:即係一種「weconnect」嘅手段嚟嘅……

以:#weconnect。

苗:特別啲,有一啲connection噉樣。

以:其實好似揾工噉樣呢,我想……我想同大家唔同啲,stand out啲,就有一個特別嘅技能。

[07:06]

以:噉呢,講完我去咗嘅活動之後呢,講啊嚟緊嘅活動啦。噉我哋而家錄音嘅時候,就四月中下旬啦。噉呢四月尾嘅時候呢,就係一年一度嘅Polyglot Gathering嘞。如果大家唔熟悉Polyglot Gathering,或者呢類型嘅語言迷活動嘅話呢,噉我哋之前都講過嘅。呢一個係最大嘅語言迷活動啦,噉就係一年一度呢,大家就喺某一個地方呢,噉就聚埋一齊,噉就有啲talk啦,有啲工作坊啦,同埋有啲社交嘅活動啦,噉樣嘅。對上一次真人嘅時候呢,就喺斯洛伐克。噉呢,就因為某一個世界嘅好嚴重嘅一個問題啦……

苗:唔知咩呢?

以:噉呢,過去兩年呢,都喺網上嘅,係嘞。噉今年呢,就特別啲。因為而家仲係大家仲康復緊啦,即係……

苗:康復緊?

靳:大家都康復緊。

以:世界康復緊啊。

苗:咩「地球先生病了」嗰啲啊。

以:係喇,就係……呢個即係社會回復緊正常啦,而家。

苗:係喇,係喇。開放緊啦,慢慢。

以:喺大部分嘅地方。係啦,噉所以呢,今年呢就特別啲嘅,佢做兩個event。噉就四月尾呢,就係網上嘅event嚟嘅。噉就好似舊年同前年噉樣呢,就大家喺一個網站上面,噉就有啲唔同嘅聊天室啦,噉大家傾偈啊,同埋大家聽下啲talk啊,噉樣。之後六月呢,就係二〇一九年以嚟呢,第一次真人嘅呢個Polyglot Gathering啦。就喺波蘭嘅。噉就……

苗:又係波蘭。

以:因為係啊,佢哋一九年話:我哋出年去波蘭喇!點知呢?係喇。噉就去唔到啦,之後又去唔到啦。

靳:跟住就唔知出咗幾多年喇。

以:係嘞。噉之後我識好多人呢,就兩三年之內呢,學到勁流利噉樣,黐線。

苗:為咗去Polyglot Gathering,學波蘭文。

靳:為咗去波蘭。

以:即係呢一個疫情,培養咗好多即係波蘭文嘅高手啊,係啊,唔包括我啦。噉嗱,冇收錢嘅,我哋純粹想推廣下呢個活動。噉如果就近嘅話呢,噉就推薦大家去六月頭,喺波蘭嗰個啦。如果唔就近嘅話呢,其實就唔就近都好啦,都推薦大家而家即刻就報名,就去四月尾呢一個網上嘅Polyglot Gathering嘅。噉我就畀條拎大家去報名。

靳:噉去到係咪會見到你㗎?

以:我會去周圍吹下水噉囉。同埋我呢,準備緊一個talk嘅,就係講呢個香港嘅字幕文化。我哋之前第十集都講過啦,就係即係香港嘅字幕係……即係大家都熟悉啦,好唔同嘅,同可能英語嘅世界。一嚟,我哋就興雙語字幕啦,同埋有呢一個書面語同口語嘅分別,或者係一種混合體啦。噉所以我都希望可以同啲外國人介紹下我哋呢個咁奇怪嘅現象。

The rest of the transcript is available to Patreon members.