絮言.狂想#023:乜你啲公仔可以有聲㗎?

其實alphabet點解叫alphabet?

熟悉嘅日本語,同神祕嘅CWY語,有啲乜嘢共通點?

文字界最偉大嘅人物,應該頒畀邊個?

喺書寫系統系列ᏟᏞᏚ嘅下集,一齊睇住我哋越講越興奮!

喺YouTube收聽

成爲 Patreon 會員除咗有足本逐字稿,仲有得投票、參與Discord添!
一週年慶典,今集有以下特別多嘅額外內容
-用韓文字母寫嘅印尼語言?
-用箭咀點樣寫到一個語言出嚟?
-男人學唔到嘅文字?!

記住2021年10月2號香港時間9pm,一齊嚟聽直播問問題!

本集特別鳴謝:Klaus、Anthony、和音、サム、阿擇、Ceci

Subscribe to our newsletter!

靳:噉佢哋有一套好靚嘅文字呢,叫做彝文。

苗:移民?唔可以講移民㗎!你個逃犯!

靳:彝文。係嘞。

苗:係嘞。噉呢,彝文……係嘞,唔係嗰個移民啦。

[jingle]

苗:好。唔識講添!咩歡……返到嚟……歡迎返到嚟?係咪啊,歡迎大家返到嚟?

靳:歡迎返到嚟《絮言.狂想》。

苗:大家好啊,歡迎返到嚟《絮言.狂想》第廿三集,我係三苗。

靳:我係靳尼啊!

苗:咦?咦?好似……係咪少咗個人啊,今次?

靳:好似少咗個人喎,嗰個……啊?

苗:少咗個人?唔記得喇,邊個啊?

靳:以色列喎,係咪啊?

苗:啊,以色列呀?係呀?啊,係喎!係喎,冇咗佢添!

靳:好似係以色列啊!哎,佢去咗邊呢?

苗:佢去咗邊,就大家估下佢去咗邊啦,留個comment……留個comment,大家估下佢去咗邊度。係喇。

靳:大家如果想估下佢去邊呢,就喺下底留下comment喇。噉呢,有個提示嘅,佢而家呢,就坐緊一架叫做火車嘅交通工具上高。

苗:啊,可以去邊呢?係喇。

靳:可以去邊呢?噉大家就估下喇,吓。

苗:係啊。唔係美國啦,噉樣。

靳:搭火車應該去唔到美國,未有……未有呢條隧道或者天橋,吓。

苗:火車……美國冇火車。

靳:係。

苗:由邊度去都去唔到。講下啫。OK。係嘞。噉呢,上次呢,我哋就做咗一個關於書寫系統嘅一集啦,噉就問咗我哋嘅Patreon嘅支持我哋嘅朋友呢,就應唔應該開下一集啦。噉好似大家都對呢個題目有啲興趣啦,噉我哋就繼續整下一集嘞。如果大家都想有機會參與去揀下一集嘅題目係咩呢,都歡迎嚟到我哋嘅Patreon去支持我哋嘅!

靳:噉我哋嚟緊都會搞一個我哋開台以嚟,第一個live啦!噉就喺呢個十月二號嘅英國時間下晝兩點、香港時間下晝九點啦!夜晚九點啊,應該係。

苗:係嘞,係嘞。唔好去錯,唔好去錯時間。

靳:下晝九點,應該冇乜……冇乜歧義嘅,噉就。

苗:係嘞。

靳:如果大家都有興趣參與嘅話呢,噉都歡迎成為我哋嘅Patreon啦,噉嚟到我哋嘅Discord嘅server入面,嚟參與我哋嘅live嘞!

苗:噉啦我哋繼續返上次嗰個題目啦!噉我哋講到好多唔同種類嘅文字喎,噉其實仲未講晒嘅,噉我哋上次就講咗呢個alphabet同埋abjad啦,噉就係呢個全音素同輔音音素嘅文字。噉上次呢,就唔記得提一樣比較特別嘅嘢呢,就想講返嘅,就係究竟呢一啲書寫系統嗰啲分類嘅名,係點嚟呢?即係譬如我哋話alphabet,即係中文全音素文字就好簡單啦,但係alphabet係咩嚟㗎呢?噉如果大家摩擦力(觀察力)強嘅話呢,都會察覺到alphabet即係alpha同beta擺埋一齊啦,係咪?Alpha-bet,alphabet。

靳:哎?係喎。

苗:係咪啊?

靳:係喎。

苗:即係呢個我都係……我都係好似好耐之後先發現嘅嘢囉,即係但係你一發現就……就覺得點解我會諗唔到嘅呢?噉樣。

靳:點解會諗唔到?點解睇唔到嘅呢?呢樣嘢,實在係……喺我哋嘅心目中,實在逗留得太長時間,所以我哋覺得係好理所當然,呢樣嘢。所以就冇嘗試去拆出嚟去睇下係乜嘢。

苗:噉點解要揀希臘字母呢?噉就可能因為即係自古以嚟,希臘文喺歐洲啊,嗰個地位比較高啦,噉所以就搵佢嚟嗰個全音素文字嘅代表啦。噉但係如果我哋話其他呢,都有一啲類似嘅名㗎喎。噉呢,就有另一隻字母呢,就係都係噉樣命名㗎喎。噉就係以前嘅北歐嘅runes啦,可以叫做盧恩字母或者北歐字母啦。佢係一種古北歐會用嘅一種文字啦,噉但係呢,去到現代呢,就大家都用咗拉丁字母嘞。噉佢嗰個字母,就叫做futhark啦,即係佢有幾種變體,有時呢,就可以叫做Elder Futhark,有啲就叫Younger Futhark噉樣。噉futhark係FUTHARK啦,futhark。噉佢嗰個來源呢,都係佢頭嗰幾個字母合埋一齊喎。即係佢有啲f啊,跟住有個u喎,又有個th啊,噉樣,即係噉樣合埋一齊噉樣,有個名噉樣,即係呢個都幾特別囉。即係唔需要諗個名係乜嘢,即係點樣改名呢?大家字母叫咩好呢?哦,噉咪頭幾個擺埋一齊囉。噉就佢哋嗰個字母個名。

靳:即係你想像下,如果喺英文入面,即係「字母」呢個字係「Abcdefg」噉樣。

苗:其實我哋近啲嘅嘢,都有㗎喎。即係注音呢,台灣嘅注音呢,可以……英文可以叫bopomofo㗎喎,噉其實同一樣嘢嚟㗎嘛,都係。

靳:係啊。噉注音其實都係一種字母嚟嘅,噉就……噉所以就會噉樣叫法囉。噉所以呢,其實我哋除咗即係全音素字母啦,alphabet之外呢,噉輔音音素字母呢,都係叫做abjad啦。噉abjad呢個字呢,如果大家眼利嘅話,其實都見到呢,佢係又係a字頭嘅。因為呢,abjad呢,呢個名稱呢,其實呢,就係喺阿拉伯文入面佢哋叫呢個字母嘅名啦。噉其實佢哋自己叫呢個字母,其實都係跟返佢嗰個字母嘅排序嚟叫嘅。噉因為佢係有幾個基本嘅字形啦,噉第一個就alif啦,一個就係ba啦,跟住就係gim啦,同埋dal啦。噉所以呢,串埋一齊呢,就變成……

苗:A B J D噉樣囉。

靳:係嘞,ABJD,就叫abjad嘞。

苗:嗰個J其實就係希臘文嗰個gamma囉,所以其實係alpha beta gamma delta,ABGD噉樣。噉佢就……G就變咗J嘞。

靳:噉所以其實都係同alphabet呢個名係同出一轍嘅。噉另外呢,我哋今集呢,會再講嘅唔同類型嘅字母啦,或者文字啦,就叫做元音附標文字。噉即係咩意思呢?我哋之前話輔音音素文字呢,如果大家記得嘅話呢,就係淨係寫啲輔音,即係淨係寫啲consonant落去,嗰啲A E I O U就唔寫落去,或者係唔使專登寫落去嘅。噉全音素文字就係呢,你無論所有其實都要寫晒落去,而且係分開噉樣寫出嚟嘅。即係啲A E I O U係一齊……分開噉樣寫嘅。噉但係呢,如果係元音附標嘅文字呢,大家聽到「附標」係咩意思嘞。噉就係呢,你都係寫啲輔音出嚟,係啲元音都寫埋嘅,噉但係啲元音呢,就會黐住啲輔音一齊嘅。噉就好似一啲……你當鎖匙扣噉樣啦,噉就黐住晒啲輔音。

苗:鎖匙扣?

靳:有啲黐喺左邊,有啲黐喺右邊,有啲黐喺上高,有啲黐喺下低。有啲係兩邊都黐埋噉樣。呢個種類嘅文字,就叫做abugida喇。噉如果大家聽得到呢,其實佢都有a b g d呢個音嘅,OK?

苗:噉呢個名係……係咩文度嚟㗎?點解又係a b g d?

靳:點解又係a b g d呢?

苗:係囉,吓?

靳:因為呢,abugida呢,呢個名呢,其實呢,係由一個大家未必有聽過嘅字母度嚟嘅。噉但係呢個字母,其實係相當之有趣。呢個字母呢,就係我哋而家喺非洲埃塞俄比亞,好多人都會用嘅文字,就係吉茲字母,或者Ge’ez呢個字母。吓。

苗:Geez!

靳:Geez!但係唔係讀geez,係ge’ez。

苗:係,佢係個串法係GE,跟住有個類似apostrophe嘅嘢,跟住EZ噉樣嘅。即係如果係英文嘅串法。

靳:噉Ge’ez呢,或者Ge’ez啦,Ge’ez或者Ge’ez呢個文字呢,其實本身呢,唔係寫我哋而家喺埃塞俄比亞……而家所講嘅語言嘅。

苗:哦,噉係攞嚟寫咩㗎?

靳:佢本身係用嚟寫呢,一種同名嘅語言,叫做吉茲語,或者Ge’ez語噉樣啦。噉呢個Ge’ez語呢,其實呢,都係阿拉伯文同埋希伯來文嘅親戚嚟嘅。噉只不過係佢……大家冇咁常聽到呢,就係因為佢本身呢,就喺埃塞俄比亞呢個地方度用啦。噉其實佢呢,喺而家埃塞俄比亞嘅正教,或者係天主教嘅教堂,或者係教會呢,其實都係會用到呢個語言嚟做書寫嘅語言嘅。噉所以呢,其實佢都係一種好源遠流長嘅語言啦,噉但係呢,佢其實就係一種好似已經變咗好似化石噉樣嘅語言喇,因為佢淨係喺呢個宗教儀式上高用,噉好似係拉丁文噉樣啦。你好少而家聽到人就喺街度講拉丁文嘅,除非有啲好勁嘅YouTuber噉㗎啦,係啦。

苗:係咪要……要show notes…… 靳:係啊,就有個好勁嘅YouTuber喺羅馬街上高,就同啲神父啊、同啲老人啊,喺度講拉丁文噉樣。噉但係其實就唔係真係好多人講㗎喇,呢啲語言。噉而家喺埃塞俄比亞呢,其實主要呢,會使用嘅語言呢,噉分別就有幾種啦。噉最常用嘅就Amharic同Tigrinya啦,係嘞。噉但係呢啲嘅字母啦,好似……好似即係英文用拉丁字母噉樣一樣,佢哋都係用返Ge’ez呢個字母噉樣嘅。噉Ge’ez呢個字母呢,如果大家呢,上去Wiki啊、或者其他地方睇呢,佢係……個形態好得意㗎,好似有啲人喺度跳舞噉樣嘅,而且呢,有時隻腳長、有時隻腳短,有時左腳長、有時左腳短噉樣,噉其實全部都係有意思嘅。

其餘嘅逐字稿可以喺Patreon睇到