以：之後佢一飛到呢，就有個朋友接佢啦，波蘭人啦，之後就同佢拍片喺度講嘢囉。之後就係扮聽得明囉，佢……

苗：扮……即係嗯嗯嗯，係啊，係啊。

以：其實好似我喺……同人講嘢噉樣。

苗：係喎，係喎。

[remix]

[jingle]

靳、以：哈囉！

苗：聽到喇，終於。

以：聽唔聽到啊？

苗：希望聽到啦。

靳：終於聽到喇。我哋live終於可以正式噉樣kickstart嘞，十分之好。

苗：有啲咩問題都可以……或者有咩想講，可以打定啊、諗定啊，都得㗎喎。

以：係吖，係啦，寫定先啦。

苗：或者吹水吖，唔一定要問問題㗎，真係。

靳：吹水。食咗飯未？

苗：任何……講任何嘢……係啦，食咗飯未啊？要飲水啊，記得。

靳：食多啲健康嘅食物啊。

苗：食生果啊，要。

靳：話說呢，我歐洲語言日呢，咪搞嘅？但係我冇去到啦，跟住啲friend去咗啦。

苗：啊，歐洲語言……係喎，好似前幾日吖嘛，係咪啊？

以：上個禮拜日啊，好似係。有咩搞啊？

靳：其實都係同之前啲歐洲語言日，我諗係一樣嘅。即係佢有啲攤位啊，然後有啲唔同歐洲……即係歐洲各個領事館嘅即係啲職員啊，會喺度啊，噉就教你啲basic嘅……即係點樣用佢哋國家嘅話嚟講呢樣嘢啊，噉樣。

以：「哈囉！」

靳：Sh’mae。

苗：淨係得歐盟嗰啲有咋。所以係……所以係冇嗰啲咩挪威。

以：英國拜拜。

苗：英國！英文呀？英文……

靳：英文應該……

苗：以前有㗎，好似！以前有英文……

以：有冇㗎？

苗：British Council好似有㗎，英文隊㗎。

以：唔需要推廣啦，英文。

苗：但係應該冇人想排。

以：做領事館就係做呢啲嘢。

苗：我之前都去過玩嗰啲咩……好多喎，啲瑞典文啊，愛爾蘭文囉，有玩。係囉，愛爾蘭就係玩愛爾蘭文。

以：梗係啦！

苗：但係啲人都唔識講嘅。

以：係喎，係喎。噉啲領事點教你啊？

苗：唔係，一個人咋嘛，佢識咪得囉。但係應該佢都唔係native囉。

以：佢識唔識㗎？

苗：即係佢應該係……佢識嗰啲phrase囉，佢教你啲phrase咋嘛，佢會有個表噉樣嘅，跟住有啲……嗰啲咩dia dhuit，嗰啲high啊，咩thank you啊，嗰啲囉。但係佢應該唔係……唔係native囉。佢自己都可能唔係好叻啊。

以：可能係學校掂喎噉樣囉。

苗：個個喺學校都要學嘅。

以：係囉。

苗：但係就未必會識囉，真係。都冇用啦，平時。淨係得嗰啲Gaeltacht嗰啲地方會用囉，即係喺愛爾蘭西部嘅某啲地方，嗰啲Connemara嗰啲。

靳：係已經淨返係得幾條村㗎咋嘛，啲area好細嘅。

以：縮水。

苗：係囉。諗返起嗰陣時有個……有套短嘅short film。

以：係咪Yu Ming？

苗：噉就《Yu Ming is ainm dom》，就叫做。即係Yu Ming is my name啦，my name is Yu Ming啦，或者。噉就係講一個……一套fictional嘅十幾分鐘嘅一套短嘅戲，噉就係講一個中國人呢，噉佢叫Yu Ming啦，噉佢就覺得生活好乏味，噉佢就想離開個家鄉噉樣。

以：辱華喎，條片。

苗：噉佢就呢，就想去呢個……即係佢就唔知去邊啦，噉佢就去圖書館度……度攞咗個地球儀，然之後轉，跟住一篤，就篤正呢，就篤正愛爾蘭。即係唔知點解咁細都畀佢篤正。即係你淨係記chance，應該篤，篤到個海㗎嘛，會。噉又畀佢好彩，咁好彩篤到愛爾蘭，又唔係篤到咩埃塞俄比亞噉樣啫。如果唔係，佢咪真係去先？係咪？即係你……

以：佢應該可能真係去。

靳：佢咪學Amharic囉，啱㗎。

苗：即係去咗唔知咩Lesotho噉樣，跟住……

以：講故唔好駁故！

苗：篤……篤咗……篤咗去唔知咩Eritrea噉樣，係咪真係去先？

靳：去啦！

苗：仲要篤到個咁北嘅添。即係唔係篤下面㗎喎，佢篤下面，噉就可能篤……

以：噉唔係，正常你都係篤北面㗎啦，佢喺上面篤落去吖嘛。

苗：係喎，你……上面篤落去啊，噉就篤到愛爾蘭噉樣，係喇。噉佢就……就篤到愛爾蘭，噉佢就睇書嘞，噉就睇……見到：哦，愛爾蘭原來講愛爾蘭文嘅，原來佢嘅官方語言就係Gaelic噉樣。噉所以佢就……就唔知點解喺嗰個圖書館度，有一本學愛爾蘭文嘅嘢，有錄音嘅，跟住就學學學啦。跟住最後就去到……佢真係去咗愛爾蘭，最後發覺冇人識講囉。跟住之後啲人以為佢講中文囉。之後「我唔識中文」噉樣。

以：喂，劇透！

苗：冇啊，一套特別嘅短片，但係之後點樣，就……你就可以去睇下。喺YouTube都有嘅，《Yu Ming is ainm dom》。係咪有……係咪有直播show notes㗎？

以：可以喎。

靳：可以啊。

以：喂，得啊！

苗：Post出嚟先。

以：但係好似愛爾蘭人好憎呢套戲啊。

苗：係咩？啲愛爾蘭人話咩學校要睇呢套戲吖嘛。

以：係啊，佢哋上堂，上愛爾蘭文堂呢，要睇呢套，之後個個好憎佢囉。

靳：應該畀人睇到爛咗喇，呢套戲已經。

以：灌輸。但係我哋外人睇，係幾搞笑。尤其是以為佢講中文嗰下。

靳：我想講呢，之前做Yu Ming嗰個演員呢，嗰陣時好細個㗎咋嘛。跟住佢呢，走去讀咗law啦，跟住而家係唔知邊間firm嘅Head of Legal噉樣，好勁，佢係成功人士啊，變咗。

苗：哦，我好似喺LinkedIn見過佢。係啊，可以畀我揾㗎。成熟咗好多。

以：佢係咪愛爾蘭人嚟㗎？

靳：應該係。

苗：應該係。佢喺愛爾蘭讀書㗎嘛。

以：係咪啲first generation嘅移民噉樣。已經吹咗去愛爾蘭喇。我仲諗咗開場白添㗎，不過我哋都未……唔知幾時開始開場。開場前嘅吹水。

[5:32]

苗：呢個呢，就好似呢，之前有個comedian，佢話咩佢表演啦，然之後表演……講講下，啲人一個走一個噉樣，啲人走晒，得返一個人，噉佢就一個人企喺度……一個人坐喺度啦，佢自己企喺度，攞住個咪噉，都唔知攞唔攞個咪好。因為佢淨係同一個人表演噉樣。好似好搞笑。

以：呢個係專業嘅表現嚟㗎！一個人睇，都當一百個人睇噉。

苗：即係究竟係應該放低個咪，直接同佢講噉啊。

靳：呢個敬業啊，呢個。

以：我哋平時都係噉吹落去㗎啫，冇所謂。

靳：噉我哋係咪開估啊，而家？

苗：可以嘅，有人入嚟咪再開多次。

以：不如，嗱，如果有第二個人入呢，我就開估啦。

靳：好啊。

苗：噉如果冇第二個人？

以：冇……冇嘅話，就繼續永遠蒙在鼓裏㗎喇，即係冇人知道。

靳：冇人知。

苗：即係我哋會講下點解以色列上一集唔喺度啦。

以：但係可以估下我哋而家呢個咁奇怪嘅情況，就係……

靳：其實應該估到㗎，如果係……

以：「以色列」係through「三苗」嗰度講嘢。啊，William，哈囉！有冇聽我哋上一集啊？

苗：係喎。

以：係啊，我哋之所以有嘢要開估，就係因為……

靳：上一集透露咗啲嘢，上一集唔見咗以色列。

以：有啲好有趣嘅……有個hint喺裏面。

苗：如果觀察力強，其實都應該知道。

以：你講「摩擦力」，搞到我……我transcription唔知點打好。

苗：冇啊，咪照打囉。

靳：結果要括返落去。

以：我有括返「觀察力」啊。

苗：噉㗎咩？

以：呢啲唔係正常嘅vocabulary吖嘛。

苗：即係唔係正常vocab就要括住，即係[sic]噉樣，係咪啊？「編按」。

靳：「小編」。

以：係啊。即係你想像如果有即係香港以外嘅粵語聽眾，噉唔知你講乜嘢。

苗：即係要有註解，係咪啊？噉咪好多嘢都要註解囉？如果註解呢樣嘢。

以：噉又唔係！噉即係如果用正常嘅詞彙嘅話，我覺得冇問題囉。噉但係呢啲真係好……唔知啊。特別嘅。

苗：都啱。

靳：有啲好似meme噉嘅嘢。其實佢係一個meme嚟嘅。

以：係啦係啦，即係尤其是meme啊、笑話呢啲，會過期噉，過時㗎嘛。過咗時未啊？可能我哋已經過晒時。

靳：我哋已經停留咗唔知咩年代。

以：上次靳尼講「屈機」已經暴露年齡喇。

靳：「潛水怕屈機」。

苗：潛水怕屈機！咩「見鬼勿O嘴」吖嘛！

以：仲唔係暴露電齡？

苗：潛水～♫

靳：有歌唱㗎咩？呢個。

以：作咪有囉！

苗：有啊，咩〈Moskau〉吖嘛，一首好耐好耐以前嘅……

靳：即係改〈Moskau〉？

苗：嗰啲林忌作嗰啲啊。係啊，林忌作㗎嘛。睇下先。就噉打咩「硬膠潛水怕屈機」就會揾到。係一個十三年前嘅一條片。

以：嘩，仲唔係暴露年齡？

苗：唔係，我十三年前好細個㗎嘛，因為。

靳：噉我都好細個。

以：我唔知我哋嘅聽眾係咩年齡層。

苗：係，我都想知喎，其實。

靳：我諗唔同年齡層都有。

以：應該都有嘅。

苗：根據我哋有時收到嘅message，都知道有唔同嘅年齡層，由後生、中年都有。

以：後生就……有，應該有。係囉，所以……

苗：有冇啲細個？

以：所以用潮語要註釋囉。

苗：即係驚太後生聽唔明，定係驚太老聽唔明？

以：梗係驚太後生聽唔明啦，我哋咁老，係咪？我哋啲「老餅潮語」。

靳：噉同埋有語言學習者吖嘛，即係本身學緊廣東話嘅人吖嘛，噉所以其實一定要註解嘅，呢啲嘅話。

苗：有啊，呢度都有個啊。

靳：應該唔止一個㗎，係啊，噉啦。我哋啱啱講到邊啊？呢個Gaelteacht係咪啊？Gaeltacht啊，係。

[8:57]

苗：Gaeltacht，係。

以：兜咗個圈返嚟。你有冇去過愛爾蘭㗎，你哋？

靳、苗：我冇啊。

以：哦，我都冇。大家都係聽過傳說。

苗：唔好話Gaeltacht啦，愛爾蘭都未去過。本來諗住有機會去嘅，但係就……

靳：近咗好多啊，係咪啊？

以：遲啲會有機會嘅。之後就拖㗎喇。一諗「遲啲有機會」呢，就成世都唔去㗎喇。

靳：跟住就會拖㗎喇。其實要去即係周圍啲地方，其實都係要時間嘅，我諗。

以：冇啊，即係愛爾蘭唔係一個咁出名嘅旅遊勝地啦，所以……

苗：即係除咗Dublin囉，應該。

以：Dublin……即係你諗下Dublin有咩玩？

苗：其實我唔知喎。

以：咪就係囉。即係唔係其他國家啲地方咁出名囉。

苗：即係一個普通嘅歐洲城市。

靳：我諗係一定有嘢玩，但係啲人唔知有啲咩玩囉，通常就係。

以：係喇，係喇。即係佢哋marketing唔夠囉。

苗：去飲Guinness。

以：Guinness就邊度都飲到嘅。

靳：淨係去愛爾蘭飲Guiness。

以：所以你諗旅行，你會諗咗法國、德國先啦。

The rest of the transcript is available to Patreon members.