苗：其實白羅斯人都仲係有自己嗰個身份認同嘅，即係佢好多人都會話同俄羅斯人分得清楚啲嘅，就「我唔係俄羅斯人啊！我係白羅斯人啊！」但係呢句嘢係用俄文講㗎囉。

[jingle]

以：歡迎大家返到嚟《絮言．狂想》第三十二集，我係以色列。

苗：我係三苗。

靳：我係靳尼啊。

以：今日呢，我哋本來諗住講啲好輕鬆、好開心嘅話題啦，噉但係我諗過去呢一兩個禮拜，大家都可能係諗緊同一樣嘢啦，噉當然就係俄羅斯入侵烏克蘭呢場戰爭啦。噉因為呢件事呢，噉我諗我哋大家都可以討論下同呢兩個國家、佢哋嘅語言啦、等等（相關）嘅一啲議題啊，或者大家都應該認識下嘅一啲知識噉樣啦。

靳：首先喺我哋即係開始討論之前啦，我哋都儘快希望喺烏克蘭嘅戰事儘早去平息啦，喺侵略烏克蘭嘅俄軍呢，儘快即係撤軍，完……結束呢場戰事啦，因為呢場都係一場十分之……令到好多生命生靈塗炭啦，係嘞，噉就令到好多人……即係破壞咗佢嘅家園啦，同埋佢嘅生計啦，噉甚至即係失去咗性命啦，係嘞。噉所以就我哋都希望可以有啲嘢，可以做到嘅，係喇，噉但係就……希望呢件事可以儘快結束。

以：噉為咗幫助喺戰爭中嘅難民呢，噉我哋都決定呢，呢一集所有嘅收益呢，都會全數捐俾烏克蘭嘅人道援助啦，噉包括我哋嘅Patreon啦，同埋我哋最新開嘅Buy me a coffee嘅網站。噉如果大家想幫手嘅話呢，都可以多啲分享呢一集嘅內容啦，讓大家都可以認識下呢一啲語言啊、文化啊、呢啲人嘅社會係點樣啦。噉同埋如果喺Buy me a coffee上面，噉都記得喺個message裏面呢，寫啲同烏克蘭有關嘅嘢啦，噉我哋就會知道，呢一個係為咗嗰個嘅目的㗎喇。噉我哋由邊度開始講呢？

[02:17]

苗：係啦，噉今次嘅即係烏克蘭裏面呢個戰爭，都令到全世界都對呢個國家都開始想認識多啲啦，同埋去了解佢嘅語言文化噉啦。噉就例如喺Duolingo呢，佢哋都話學烏克蘭文嘅人係好似double咗啊，直頭。本來已經其實都唔少㗎，但係而家就直頭係雙倍噉樣啦，噉就即係因為大家都好想去為……算唔算係為烏克蘭即係叫做做一啲嘢呢？雖然唔係直接幫到嘅，但係我覺得學……即係學烏克蘭文呢個行為本身，就係對烏克蘭嘅一種支持啦。噉所以我都去玩咗一個lesson嘅，就去咗烏克蘭個Duolingo。

以：一堂！

苗：係一堂，因為我係今日先玩，其實。噉就……

以：你學咗乜嘢啊？

苗：我就學咗三種唔同講呢個and嘅方法囉。噉有і啦，有та啦，同埋有……有個й噉樣嘅……就噉一個輔音噉樣。噉就係好多方法噉樣。

以：就噉個輔音呀？噉佢點樣做呢一個作用啊？

苗：佢係擺喺一啲元音結尾嘅字囉。即係譬如мама，噉就可以мамай，噉就係「阿媽同埋」噉樣囉。

以：哦，黐咗上去呀？啊，好得意喎。哦，係咪即係好似і讀快啲噉樣？

苗：噉其實都算係і讀快啲嘅，係囉。但係佢寫法唔同囉。

靳：OK。

苗：所以其實我已經冇㗎喇，我淨係識……淨係學到呢樣嘢。

以：好好㗎喇，好好㗎喇。我都聽講有好多唔同嘅語言平台呢，都會即係推廣下烏克蘭文啦，即係譬如話LingQ呢，噉我唔知之前有冇講過啦，就係一個網站，畀人哋去透過閱讀同埋聆聽，去學一啲語言啦。噉佢就話啦，就會加強佢哋對學烏克蘭文嘅support啦，噉同埋會免費俾大家用嘅。雖然我哋錄音嘅時候呢，佢仲未做呢樣嘢，但係佢應承咗會做呢樣嘢，噉所以可能出街嘅時候，大家都可以上去LingQ睇下有冇得學啦。噉我順便擺埋條拎喺show notes畀大家㩒先。

[04:28]

以：噉但係講到學烏克蘭文呢，我覺得更加重要嘅問題，就係烏克蘭人係咪真係講烏克蘭文㗎呢？因為呢，好多人就覺得理所當然啦，噉但係其實呢一個語言喺個國家裏面嘅地位，係都幾複雜㗎喎，同埋佢嘅歷史都係非常之複雜啦。噉首先我哋講咗俄文同烏克蘭文嘅關係，同埋咩異同先啦！

靳：嗯，其實烏克蘭文同埋俄文，都係斯拉夫語言嚟嘅。噉斯拉夫語言呢，其實入面都有唔同嘅分類啦，噉就包括呢個西斯拉夫語、東斯拉夫語同埋南斯拉夫語啦。應該得三個分法嘅啫，我記得就。係嘞，噉西斯拉夫語呢，就係包括咗波蘭文啦、捷克文啦、斯洛伐克文啦，噉樣啦。南斯拉夫語呢，就係基本上我哋以前叫做南斯拉夫入面嘅國家，講嘅語言呢……斯洛文尼亞文啦、克羅地亞同埋塞爾維亞文啦，仲有呢個……

苗：馬其頓文。

靳：保加利亞文同埋馬其頓文嘅。噉……

以：我哋之前都講過呢個BCMS佢哋……佢哋嘅關係，可以睇返嗰集。

靳：係喇，大家如果想知道返克羅地亞文同埋塞爾維亞文入面，其實係有啲乜嘢異同啊、其實係咪同一個語言啊，噉可以睇返我哋講即係南斯拉夫各種語言嗰集嘅。噉另外就係嘞，東斯拉夫語呢，入面呢，其實就包含咗三隻比較大啲嘅語言啦，噉就包括呢個白俄文啦。白羅斯文啦，或者我哋叫做。烏克蘭文同埋俄羅斯文嘅。噉所以其實呢，烏克蘭文同埋俄羅斯文呢，其實呢，喺淵源上面呢，都係一啲好近嘅語言嚟嘅。噉其實就真係係好近嘅親戚，你可以噉樣講嘅。噉烏克蘭文呢，其實就根據去上次嗰個統計調查呢，就大概呢，有四千萬人係作為母語嘅。噉當然俄羅斯文呢，就會更加多啦。

以：係喇，俄文真係好大好大，因為俄羅斯本身已經好大啦，之後基本上所有前蘇聯國家，都會識啲俄文噉㗎喇。

靳：佢基本上就係前蘇聯國家嘅通用語喇，可以噉樣講。

以：……嘅普通話囉。

苗：即係烏克蘭裏面，就算係而家，好多嘅電視媒體啊，或者政府教育呢，好多都係用俄文去進行㗎囉。因為始終你嗰陣時遺留落嚟嗰啲制度啊、嗰一啲資源，都係用俄文嘅。噉直頭係連呢，即係呢個總統阿Зеленський，佢之前做嗰一套喜劇啦，噉嗰一套電視劇呢，其實大部分都好似係俄文嚟嘅。

以：大部分都係。

苗：而Зеленський自己嘅母語都係俄文嚟嘅。噉即係可想而知，見到烏克蘭裏面，同俄文嗰個關係係非常之密切㗎囉。

以：其實唔係淨係因為佢個制度囉，同埋仲有佢即係蘇聯嗰陣時啲遷徙嘅政策囉，令到好多……

苗：係啊，即係東部都有好多講俄文嘅人嘅。

以：係喇，好多即係真係俄裔嘅人，就搬咗過去嗰度住。噉所以先有而家嗰啲分離分子，因為佢哋覺得自己係俄羅斯人，佢哋係俄裔嘅人，所以佢哋先想分離，所以就……係喇，成場嘢就噉發生啦。

苗：係，呢個……呢個順帶一提呢，其實克里米亞本身係俄羅斯㗎嘛，即係佢係蘇聯嗰陣送咗畀烏克蘭SSR，然之後獨立嗰陣同烏克蘭一齊獨立，所以而家先係烏克蘭咋嘛。但係本身佢係……即係特登……本來有啲俄羅斯人喺上面啦，然之後佢將嗰個地方割咗畀烏克蘭囉。

以：哦，噉樣㗎。啊，係喇，啱啱講到嗰套喜劇呢，噉既然你都提起咗嘞，噉就要同大家推薦下啦。雖然呢個時候睇喜劇好似有啲怪怪地，但係都可以即係欣賞下阿總統佢嘅作品啦，因為佢呢，大家可能知道呢，佢以前係演員嚟嘅。佢係演呢個烏克蘭總統，佢係符碌噉樣做咗總統啦，大家都估唔到啦……係，呢個講緊佢個角色下，係喇。然之後呢，佢做完嗰套劇之後呢，佢就選咗總統嘞，噉都係大家都估唔到嘅。

苗：係，其實都係好短……幾年之後嘅事囉，即係嗰套劇就十五年，然之後佢做總統係十九年，所以其實都好快，中間。

靳：其實係第二季啱啱做完……

以：係做咗三季……係喇。第三季cut咗，之後就選總統啊，好犀利，真係。

靳：做咗總統就唔可以再做㗎喇，呢個。

以：一條龍喎，佢係。噉套嘢就叫《人民公僕》啦，係咪啊？咩啊……

苗：Слуга народу。

以：Слуга народу，係啊。

靳：Слуга народ……

以：個名就好似烏克蘭文嚟嘅。噉佢名義上套嘢呢，就係雙語嘅，噉但係我睇咗一集啦，噉大部份都係俄文。

苗：係啊。我見佢好多嗰啲嘢係俄文，但係佢有一個scene呢，係話佢就職啦，然之後佢同即係啲人演講噉樣，嗰個就應該係烏克蘭文嚟嘅。但係佢其他同……可能同個……係咪首相嚟㗎？嗰個。跟住佢嗰個。

以：我唔知乜水嚟㗎！

苗：我要睇返先！佢好似冇介紹過，我睇一睇先，睇一睇先。

以：佢完全冇講囉，係無啦啦有個人同你講話「你係總統喇」！

靳：總之就有一個人帶晒佢……係啊。

苗：嗰個係首相嚟嘅，係啊。

以：至於首相同總統嘅分別呢，我哋就唔講喇，而家。太複雜喇。

苗：噉而佢同其他人講嘢，譬如同個首相啊，或者同佢屋企人講嘢，都係用俄文㗎囉。即係喺套戲裏面。

The rest of the transcript is available to Patreon members.