以：好攰啊！大家早晨啊。

苗：早晨。

以：唔係，三苗早晨。

苗：以色列早晨。

靳：早晨，早晨。

以：歡迎大家返到嚟《絮言．狂想》第四十集啊！我係未瞓醒嘅以色列。

苗：我係瞓醒嘅三苗。

靳：我係已經晏晝嘅靳尼啊。

苗：打完乞嚏嘅華哥……去完廁所嘅明仔……

[jingle]

以：今日我哋比較早錄啊，所以呢，係嘞。同埋我都好攰。陣間講下點解咁鬼攰，呢個唔係淨係瞓覺嘅問題。同埋今日都好熱囉，正所謂「夏日炎炎……最好眠」。

靳：「夏日熱辣辣，食西瓜消暑解渴」。

以：「楊枝甘露……」

苗：我呢度十七度啊，而家。

以：十七度？死仔包吖。我哋喺英格蘭喺度……仲捱緊。我哋第二個熱浪喇，大佬。

苗：慘，我過咗啦。前兩日最高廿七噉樣囉。

以：最高廿七，我哋都去到卅二啊。我仲要噚日出咗去行山噉樣。係，已經透露咗出嚟添。

苗：咦，噉阿靳尼嗰度天氣又點啊？

靳：啱啱打完風幾日？

以：有風打呀？

靳：而家都幾熱下？三十度喎。

苗：輕鬆啦。

以：喂！咦？我哋熱啲喎！

靳：噉你哋熱啲嘅時候，一定熱過我哋嘅，噉就。

苗：係啊，裏面就慘囉，室內。

以：裏面慘，係啊。我住喺頂樓冇隔熱就慘囉。

靳：啊，頂樓就真係慘啲。

以：係啊。喺頂樓度錄音囉，同埋。

靳：同埋冇冷氣係慘啲嘅。

苗：高處不勝……暑。

靳：不勝熱。

以：不勝寒都係㗎，都……冬天會凍啲㗎。

苗：都係。係啊，噉咁熱呢，大家梗係留喺屋企玩Duolingo啦。

以：啊，係咪啊？係咪啊？咦，不如大家透露下玩緊啲乜嘢？

苗：我呢，就……因為近排知道Duolingo出咗廣東話啦。噉但係就唔係英文學嘅，係用普通話嚟學廣東話啦。噉就貪得意，就走咗去試下個course玩啦，噉就做咗嗰個test out啊，即係嗰個測試呢，即係你如果好叻嘅話，可以直接……直接跳咗好多堂啊，直接一次過攞一千個XP。

以：你叻唔叻啊？

苗：我呀？我原來我唔叻㗎，廣東話。

以：你係咪精通廣東話喇？

苗：我做完發覺原來我唔識廣東話。因為成個course呢，佢有兩個checkpoint嘅，暫時啦。但係我淨係過到第一個囉。第二個我係……我係完全……我連續錯四個，跟住就fail咗，已經。我唔識講廣東話㗎，原來。

以：返返香港讀書啦！

靳：要學多啲廣東話先至得！

以：大家都要學多啲廣東話。

苗：其實點解呢？就因為如果係玩第一個checkpoint嗰個測試呢，佢全部都係有得畀你揀嘅，有得畀你㩒㩒㩒啲字啦，重組句子噉樣㗎嘛。噉你㩒完，你通常都可以㩒到個啱嘅。但係呢，你玩第二個checkpoint嘅時候呢，佢全部都係直接要你打字囉。噉首先佢淨係畀你打簡體字啦，有時我唔記得轉呢，唔記得擺落Google Translate呢，噉就㩒，跟住就錯咗囉。但係句嘢係啱嘅。噉就算識轉啦，有時嗰句嘢唔係exactly佢想你噉樣寫呢，都係會錯嘅。噉所以就連續錯咗三、四題噉樣。跟住就冇咗。

以：哦，其實即係好似Duolingo其他語言都有呢個問題，就係佢會限死咗你某一種寫法噉囉。

苗：係囉。同埋有時係考你普通話多啲囉。因為佢要你寫返個……

以：點啊？你又未精通普通話呀？

苗：……普通話嘅翻譯，跟住我又唔知佢應該……佢想我點講喎，係咪先？跟住就錯咗。

以：學好啲普通話啦！

靳：但係我覺得繁簡轉換呢樣嘢，應該係可以同佢講下嘅嘢嚟㗎喎，呢樣係應該有嘅嘢嚟㗎喎。

苗：係嘅，應該……應該係容易整嘅。冇辦法啦。

以：呢一樣嘢都吸引咗好多嘅質疑，係咪啊？即係好多人就話：咦？點解廣東話係用簡體字啦，同埋點解係用中國國旗啦。

苗：啊，係啊。呢個都係。

以：噉有好多討論嘅。

苗：可能純粹係貢獻者係中國講粵語嘅人囉，即係好自然就用咗呢兩樣嘢。即係唔需要深究嘅，我覺得又。

以：我都覺得唔使諗太多嘅。

靳：或者佢用咗其實講粵語最大嘅羣體嘅人喺邊度嚟。噉始終真係講粵語最大嘅羣體，其實都仲係喺中國入面，係咪？

苗：都的確係喺中國裏面。

以：係啊，係啊。即係我哋係比較出名啲啦，但係我哋就唔係最大囉。

苗：有時我覺得佢有啲用字嘅……嘅choice，有少少……唔係好知我認唔認同囉。或者即係擺喺一個畀初學者嘅課程裏面。譬如佢話「華仔的女朋友是會計」，噉呢句嘢啦。噉佢就譯做「華仔條女係會計」。

以：真係㗎？

苗：係嘞，係嘞。佢真係「條女」喎。即係我覺得如果一開始，噉樣好唔好呢？真心。佢又冇啲notes畀你，，即係佢冇戴頭盔啊，即係講清楚：啊，呢個呢，用法係點㗎？噉樣。佢係完全係冇任何嘅……即係好似其他語言嗰啲grammar note噉樣呢，佢真係冇㗎。起碼第一個checkpoint嗰啲係啦，因為我解鎖唔到第二個checkpoint。

以：慘，慘。

靳：你可以喺討論區入面真係畀返啲意見佢哋㗎喎，我覺得佢哋其實都想……

苗：冇咗討論區啦嘛！

以：Duolingo冇咗討論區喇！

靳：冇咗嗱？哦，我太耐冇上Duolingo喇，真係。

苗：係啊，冇咗好耐喇。

以：搞錯啊！你。扮晒嘢！冇玩Duolingo咩？你。

苗：唔係扮嘢啦！你。成日都post啲cap圖出嚟。

以：成日都匈牙利文。

靳：我嗰啲Clozemaster嚟㗎！唔係Duolingo嚟㗎！

苗：係咩？哦。

以：我諗起呢，好似我哋講過粵語維基嗰個問題啊。因為佢哋係特登為咗同中文維基有多啲唔同嘅地方，所以佢哋嘅選字係比較即係所謂地道廣東話啲㗎嘛。我諗緊Duolingo會唔會做緊同一樣嘢呢？因為佢嘅目標用者係想學廣東話、可以喺生活裏面用到嘅中國人啦。所以可能佢哋就覺得：嗯，即係共同嗰啲詞語，你都識喇。即係「女朋友」你識啦，呢個字。你見到都知咩嚟啦。噉所以你會唔會想學一啲比較地道廣東話啲嘅詞語呢？唔同啲嘅呢？噉樣。

苗：都係一個考慮嚟嘅。

靳：噉但係係咪你打例如話「女朋友」落去，跟住佢就會話你係錯噉樣？

苗：呢個就未知喎。可以試下。

以：即刻試！

靳：呢個可以試下。

苗：學緊廣東話嘅朋友，如果大家有玩呢個course，可以試下。

以：聽呢個節目嘅，可能唔會玩Duolingo廣東話。應該過咗。

苗：噉又係。已經程度過咗啦嘛。係……我都有玩啦！因為我唔識廣東話㗎喎。

以：你唔識吖嘛！你要學多啲吖嘛。

苗：係喎，係喎。梳。

以：即係除咗啲用字有啲可愛……即係得意之外，你覺得佢教嘅廣東話係唔係……即係同香港嘅比較似吖，定係有啲唔同呢？

苗：我又覺得冇乜特別分別嘅。我會覺得係自然嘅，啲講法。

靳：但係你就要跟佢啲講法囉。

苗：係啊，真係要好……跟得好足囉。爭少少已經錯咗。噉我相信佢係因為啱啱開始啫，如果佢多啲人去畀啲意見佢，噉佢都會慢慢加返啲……

以：Report佢啊。

苗：係喇，慢慢加返啲啱嘅句子嘅。

靳：舉報佢！

苗：舉報佢……

以：即係你要喺Duolingo……如果你有一句係應該啱嘅，噉但係佢就唔畀你pass，噉你就要同佢講話：啊，你應該接受我嘅答案。噉之後啲管理員呢，就會有成堆呢啲噉嘅滙報啦，就喺度揀：啊，呢個OK，呢個OK，呢個唔OK，噉，係。點解我咁熟呢？因為呢，我成日都聽威爾斯文嗰啲admin喺度……喺度呻：好多呢啲report啊！噉樣。所以我好熟㗎喇。

苗：係嗰啲人係以為自己啱吖，定係真係啱啊？佢哋。

以：我都係噚日同人講起。學威爾斯文嘅人，因為好多係即係淨係得英文嘅人呢，所以好多都係會硬係堅持自己啱，但係佢哋係錯㗎。特別多㗎，比起其他語言，係嘞。

靳：特別有自信。

以：係，好有自信，係嘞。

苗：「我威爾斯人嚟㗎嘛！我點會唔知啊？」

以：即係譬如佢哋會堅持話「雙重否定係錯嘅」噉樣。之後就喺度同人拗囉。「因為唔啱邏輯㗎嘛！」噉樣。噉但係係噉樣用嘅。所以佢哋特別辛苦。但係我覺得廣東話都有同樣嘅危機，因為廣東話有咁多呢啲句末助詞呢，之後可能同一個句子，你有十種寫法噉樣。噉點算？

苗：慢慢加囉，要。用個咩regular expression，可以套十個落去。

靳：但係又唔係個個都啱㗎喎。即係你所有句子都加個「㗎喇喎」落去，跟住都會當你啱，噉就有問題。

以：「㗎喇嘛」、「㗎喇噃」。

靳：係嘞。話時話，如果大家鍾意呢，我哋嘅節目呢，都想多啲人聽到我哋嘅節目啦，噉其實喺唔同各大平台呢，都可以畀多啲評語我哋嘅。因為如果我哋個節目有評語嘅話呢，先至呢，會推廣到畀更加多人聽到我哋嘅節目。噉所以如果大家都想即係我哋節目可以有多啲人聽到啦，或者係都想支持嘅話呢，噉留一個rating，留一個意見，或者㩒個like，其實都已經幫到我哋好多㗎嘞。噉就多謝大家先嘞。

苗：係啊，即係點解rating咁重要呢？因為如果你同人講：啊，你有個podcast，你去聽下吖？噉樣。噉我就去揾啦。噉我揾到，我第一個page，就係可能見到iTunes上面嗰個podcast㗎嘛。噉我會睇到啲評語啊，或者幾多星啊，我就會去判斷嗰個係一個好唔好嘅podcast囉。第一個睇到嘅就係嗰啲rating，噉所以嗰rating係非常之重要。如果乜都冇嘅話，就覺得：嘩，呢個得唔得㗎？噉樣。

以：同埋佢哋個演算法，我唔知係點樣計。總之佢有時會無啦啦喺度推廣某一個show噉樣。噉係都視乎大家嘅rating啦，同埋呢個收視率嘅。所以都多多支持啊！

The rest of the transcript is available to Patreon members.