絮言.狂想#041:世上最難語言大揭祕?!

Duolingo 又出咗新語言,絮言三子究竟點睇?
我哋同美國外交官訓練學院到底有咩仇口?
全世界最難嘅語言又係乜嘢呢?
今集《絮言.狂想》帶大家睇下點樣量度語言嘅難度,解答語言迷最有興趣嘅題目!

喺YouTube收聽

成爲 Patreon 會員除咗有足本逐字稿,仲有得投票、參與Discord,同埋以下額外內容添!
-一齊睇下七十年代嘅廣東話教材
如果想單次打賞,亦都可以請我哋飲杯咖啡

本集特別鳴謝:Klaus、Anthony、サム、阿擇

Subscribe to our newsletter!

以:起碼廣東話,你有……有我哋《絮言.狂想》畀大家聽啦,有埋逐字稿啦。

苗:即係……即係邊度揾一個東莞話《絮言.狂想》畀你聽先?係咪啊?

以:係咪……呢個係咪challenge嚟㗎?大家……

苗:Challenge……嗱,如果有咩識東莞話嘅人,想開一個語言嘅podcast,我支持。

以:支持你,支持你。

靳:呢個係idea嚟㗎。

以:精神上支持。

苗:課金!

[jingle]

靳:歡迎返到嚟《絮言.狂想》第四十一集,我係靳尼。

苗:我係以……

以:你係咩啊?

苗:我係三苗啊。

以:我係以色列啊。要加個「啊」喺後面㗎,最後一個一定要。

苗:a3!係囉。

靳:a3!

以:就好似呢,我哋嗰個自動出逐字稿嗰個軟件呢,永遠都會將「靳尼啊」當咗係你個……成個名嚟㗎。之後就好似有呢一個地方名嘅感覺,即係好似……即係英文嗰啲咩ia嗰啲名囉。

苗:靳尼啊。Kenya。

靳:係Kenya囉!咪。

以:肯尼亞。

苗:靳尼亞。

以:佢又唔會出咗肯尼亞喎。又唔會,因為靳同肯都好唔同。

苗:噉你「靳」吖嘛。

靳:靳尼……喺肯尼亞隔籬。

以:或者佢會變咗做「近嚟」,即係近排嗰個「近嚟」。

苗:近嚟。我係靳尼啊!I’m recent.

以:係啊,你啱啱出世噉樣。

靳:你近嚟幾好嗎?

以:靳尼,你幾好嗎?

苗:靳尼你幾好嗎?

靳:我近嚟幾好啊。

苗:靳尼你近嚟幾好啊?

以:大家都好啊。噉近嚟呢……

苗:我哋有啲咩新嘅資訊?

以:就如果講語言新聞嘅話呢……

苗:語源新聞?

以:其實有個係我都唔知我care唔care咁多,但係呢,有個Duocon嘅嘢喎。噉就類似係……你想像好似蘋果發佈會噉樣啦,但係就係Duolingo囉。即係佢好型噉樣又剪埋一齊啦,又好多唔同嘅產品一次過發佈啦。噉就包括啲同我哋個節目關係比較細啲嘅Duolingo數學啦。噉數學都喺一個語言嚟嘅。好似係。

靳:係啊。數學就係科學嘅語言。

苗:數學係……世界通用嘅語言。啊,唔係,嗰個係音樂,梳。

以:呢……呢個真係有排拗。絕對反對。音樂係非常之唔係universal嘅語言。係喇。不過呢個off-topic。

苗:下一集,呢個。呢個第二個podcast嚟。

靳:開個新嘅podcast。

以:「音樂係唔係世界語言」,係咪啊?慘。仲有咩啊?我唯一記得嘅,就係佢成個發佈會呢,兩個鐘到啦,裏面有兩個畀中國人睇嘅廣告囉。

苗:哦!即係……即係點啊?

靳:點樣啊?

以:即係佢話大家咩……就係講用「多鄰國」可以學到好多嘢,令你嘅生活更加多姿多彩噉樣啦。總之就全部都係普通話。

靳:即係可以有好多鄰國噉樣。

苗:噉中國都真係好多鄰國嘅。

靳:又啱喎。

苗:噉即係佢係喺個發佈會裏面,直接播呀?佢係直播吖,定係有條片畀你睇吖,定係點樣呢?

以:哦,因為佢成個發佈會都係網上㗎嘛,噉所以佢就係即係你當睇電視噉樣,中間打斷你嘅,之後就有個廣告,就係Duolingo嘅中文廣告。

靳:即係「去一去廣告先」噉樣。

苗:嘩,即係個個人都係睇呢個廣告嘅。然之後有啲人……

以:係啊,係啊,係啊。

靳:即係有個歡樂滿東華嘅牌喺度,跟住就去廣告噉樣。

以:你好老啊,你。噉佢又會有啲訪問囉,講啲……係啦,中國人學外語學得幾開心噉樣囉。噉佢都有其他嘅,譬如話有一個係英文,即係美國人學西班牙文噉樣,即係最typical啦,係咪?噉但係覺得好得意啦,即係佢好似集中想攻入呢個……唔係攻入嘅,攻陷呢一個市場。我就係諗緊係唔係……因為嗰陣時好似有一排係中國禁咗Duolingo嗰類嘅app,係咪啊?後來就解禁。

苗:哦,呢個真係唔知喎。

以:係啊,因為嗰陣時佢話想打擊呢一個補習嘅行業吖嘛。之後就影響埋啲學外語嘅服務同埋啲app噉囉。我記得有一排係噉。如果我講錯嘅話呢,大家喺留言度糾正我吓!

苗:喺留言度鬧佢啊。

以:係,我唔……我都唔知幾時嘅事,好似係舊年左右囉。就……係啊,所有學習嘅app都好似有影響。之後後來又可以用返Duolingo啦,所以而家就係咪Duolingo好想多啲人用囉。噉但係同時間呢,佢廣告裏面show嗰啲人呢,都係用英文嚟學外語囉。好似咩上海人用英文學日文噉樣。所以又唔係真係咁集中呢個市場。

苗:唔係好真實。

靳:即係要本身識英文。呢個用……用普通話學其他語言,應該要遲啲開返。我諗佢哋應該會向呢個方向邁進,但係我諗有排。

苗:都有好多喎,其實。

以:其實有幾個,但係即係譬如話學日文,你問我嘅話,一定用中文日文好啲囉。

靳:一定係,一定係。

以:不論你邊隻漢語,點都好過用英文。爭好遠。

苗:淨係學詞語都容易啲啦。即係佢會assume你識得多好多呢啲詞語。即係佢個課程設計,佢會唔同好多囉。佢……同埋佢假設你識漢字吖嘛。

靳:已經有好多詞彙係可以飛咗佢,直接係。

以:直接畀你睇一次就記得喇。如果唔係,你用英文學嘅話,好似有好多嘢都係當你BB仔噉樣。即係同你……唔識漢字嘅BB仔啦。噉樣就重新教過晒你囉,所以係……我不嬲覺得係應該用類似嘅語言嚟學嘅,尤其是我哋本身漢語係母語嘅話,噉就唔使諗啦。同埋仲有咩?個結構都係啦,譬如學日文嘅話,你想用一個句子嚟形容一個名詞嘅話,個句子擺喺前面㗎嘛。「嗰個企喺嗰度嘅人」,噉同英文係調轉㗎嘛。噉如果你用英文學嘅話,就係噉教你點樣調轉嚟諗啦,噉但係用中文嘅話,就係你可以直接翻譯到囉,呢方面。

苗:名詞嚟講都係嘅。

以:係啊,名詞嚟講。我嗰陣時開始學土耳其文呢,我個中國朋友都係噉同我講:你用中文諗!「嗰個企喺嗰度嘅人」,你唔好用英文諗。你用英文諗呢,你又要調返轉㗎喇。

苗:係,係。反而隔咗層吖嘛。

以:但係如果用普通話嚟到學嘅外語,噉上次都講過有廣東話啦,啱啱新出㗎啦。唔知點解呢,喺Duocon上面,佢話係嚟緊出囉。但係正如我哋上次講呢,係已經出咗㗎嘞。所以唔知大家有冇試過呢?有嘅話,又同我反映下有咩感受啦。

苗:啱啱查過呢,喺Duolingo用中文學嘅語言呢,係而家有七個嘅,即係另外一個係而家就嚟有啦。噉有英文、日文、韓文、法文、廣東話、西班牙文同意大利文嘅。而仲有德文呢,就係就嚟搞掂嘞。噉而家就係可以用普通話學嘅語言囉,呢啲。

以:有中文去日文㗎?

苗:有!好多㗎。

以:噉點解嗰個廣告要用英文學?等陣,我double check下先。

苗:有百幾萬個learner喎,差唔多二百萬個人,係。

靳:噉點解要用……唔make sense喎,呢件事。

以:啊,Duolingo English Test啊,有。

苗:哦,呢個第二樣嘢啦。

靳:呢個係佢做啲標準化嘅嘢啫。

苗:都有唔少嘅大學開始去接受呢個測試喎。

靳:Duolingo?哦,呢個……

苗:係啊,Duolingo test。因為真係平過你去考IELTS喎,其實OK喎。

以:同埋呢,我睇佢介紹English test嗰度呢,其實某程度上都係一個廣告啦。噉其實我覺得佢嘅selling point係幾有說服力喎。因為佢話一嚟,而家啲大嘅英語測試就好貴啦。我哋第幾集講過?第十集講過,係咪啊?

苗:IELTS死全家。

靳:IELTS死全家。

以:IELTS死全家。冇錯,係第十集,我幾深刻啊。

苗:犀利。

以:係,IELTS死全家。好貴啦,同埋佢話尤其是要考英文試嘅人呢,多數都係嚟自啲發展中國家,噉就更加貴啦。即係其實我哋香港算係幸運㗎喇,即係二千蚊都唔係太過貴。噉同埋嗰啲大嘅語言考試就係你要去某一個市場度考吖嘛。噉就算係疫情之前,都已經係困難啦。即係又係,我哋香港好幸運,其他人可能要搭唔知幾耐車去考試,噉就好煩囉。

苗:係,分分鐘自己國家都冇得考。

以:係啊,係啊。所以佢哋其實整呢個網上test出嚟,係真係幾有意義㗎喎。除咗我聽講係好難考之外。但係係有存在嘅價值。

苗:好難㗎?

以:好似係好難㗎,要求好高,同埋……我唔知有冇提過啊,上次嗰集。就係最難嘅地方就係呢,佢會track住你眼球吖嘛。

苗:哦,睇你冇出貓。

以:係啊,係啊。

苗:嘩,好犀利喎,呢個。

以:即係難嘅地方唔係個語言難囉,而係你係會個精神崩繃緊囉,因為你會畀佢𥄫實,好似Big Brother噉樣。

苗:其實佢都冇辦法嘅,因為佢要挑戰呢啲IELTS啊、TOEFL啊,呢一啲咁大嘅語言考試呢,佢一定會好多人質疑:嘩,你喺屋企考,會唔會好易出貓㗎?會唔會點點點㗎?

以:係啊,係啊,所以我明啊。

苗:噉佢係要好多呢一啲噉樣嘅嘢,去說服返人:哎,唔緊要嘅,嗱,我哋呢,係正統、正當嘅語言測試嚟㗎,你可以信我哋!噉樣囉。

以:其實都好嘅,因為Duolingo佢係一個……即係首先佢係一個科技公司嚟㗎嘛。噉所以佢用呢啲科技嘅方式嚟到解決呢啲問題,都係幾精明嘅。我終於揾到嗰個廣告喇!係啊,佢係用英文學啊。

靳:就係用英文學。

以:Select the correct character for mu.

苗:係喇,噉除咗呢個咁搞笑嘅用……中國人用英文嚟學日文之外呢,噉仲有一個新嘅新聞啦,就係Duolingo有一個新嘅語言。噉都係用英文學嘅,就唔係用普通話學喇。就係呢個Zulu喎,即係一個南非嘅祖魯語啦。噉佢係第二隻非洲語言,係咪啊?如果唔計阿拉伯文嘅話。

以:啊,唔計阿拉伯文就係。 苗:唔計阿拉伯文,佢係第二隻,係喇。即係佢之前仲有Swaili啦,即係東非嘅語言啦。噉呢個就係南非嘅語言啦,今次。噉佢呢個Zulu呢,就係……即係少數喺Duolingo上面有嘅非洲語言啦,噉都係一個……都算係一個突破嚟嘅,雖然唔係第一個。

The rest of the transcript is available to Patreon members.