以：呢個禮拜就係《絮言．狂想》嘅兩周年喎， 係咪啊？

苗：好嘢！個小朋友「yeah」。

眾：好嘢！

以：嗰個好公廁啊！

苗：好多謝你哋噉樣，咁花時間去成日聽我哋喺度亂噏廿四。

靳：我哋卌二喎。

以：係喎，我哋唔係廿四，我哋亂噏卌二喇，而家。

靳：哎啊。

苗：嘩。

[jingle]

以：歡迎大家返到嚟《絮言．狂想》第四十二集啊！我係以色列。

苗：我係三苗。

靳：我係靳呢啊。

以：噉點解我把聲咁興奮呢？噉因為呢，真係好掛住同大家傾偈啊。我哋而家……

靳：過咗成個月喇喎。

以：一……成個月喇。

靳：個半月喇。

以：冇個半月！咦？都就嚟喇喎。

靳：就嚟喇。

以：我哋好似對上一次係八月底、九月頭錄？噉點解呢？

靳：係咪有人去咗旅行呢？

苗：因為saam1 miu1 fong1 gaa1囉！

以：點解係saam1 miu1 fong1 gaa1？……係嘞，三苗放咗假啦，你放咗幾耐假話？

苗：都兩個禮拜喇。

以；我都放咗兩個禮拜假。

苗：係啊，所以就冇乜時間去錄嘢。咦？但係其實好似我哋有錄到嘢㗎喎！

以、靳：咦？咦？

以：呢個係……

苗：講唔講得㗎？

以：賣個關子先，係咪啊？

苗：係啊，如果想知道我哋錄咗咩呢，就大概半年至一年不等，之後去以色列個channel度……

以：嘩！噉都畀你抽到水嘅？OK，fair hit，fair hit，呢個係……係嘞，都理解嘅。係嘞。不過係啊，因為係片嚟嘅，所以呢，就可能要耐啲。

苗：即係以色列呢啲叫慢工出細貨啊。

以：係，希望係啦。

苗：即係你精雕細琢啲片呢，又咁有……好心機噉樣加啲粵文嘅字幕啊，又有逐字稿啊，噉樣等等，咁多工序，係咪先？噉梗係要多啲時間㗎啦。

以：之後都冇人睇吖嘛。大家多啲分享啊，我哋啲片。

靳：係啊，大家多啲分享以色列……

以：而家唔係淨係「我」喇，又「我哋」嘅片喇。噉等呢啲精雕細琢嘅……擺落去嘅時間都回返本先，係咪先？有啲人可以欣賞到。

靳：咁精緻係值得嘅。

以：其實靳尼有冇放假啊？我都唔知添。

靳：冇啊，我冇放假啊。

以：冇，OK，冇假放。好喇，唔講喇，噉。

靳：我考過試嚟囉，算唔算放假啊？Study leave算唔算放假？

苗：喂，呢個係放假嘅相反喎，好似係。

靳：好似係。

苗：仲忙過平時。

以：一個假嚟嘅，都係。咩啫？學習都係一個hobby嚟㗎嘛，係咪？

靳：又啱喎。

以：我唔爭在講埋，話說我就係前兩日呢，走去啲平時去嗰啲語言meetup嗰度同人傾偈啦，噉我平時呢，凡親有啲人好好奇噉問我：「點解你學咁多語言嘅？」我就會話：「嗯，人人都需要有個興趣嘅。」係啊，呢個就係我嘅藉口喇。

苗：都幾好啊，答得，我覺得。

以：噉之後嗰晚我同一個人傾偈呢，我哋就係講起啦，之後佢用咗exactly同一句嚟到形容我囉。即係佢話：「啊，我明嘅，人人都需要一個興趣嘅。」之後我嗰下真係……腦袋爆炸。

苗：知心友啊，有個。

靳：心有靈犀。

以：其實好容易嘅，呢個概念，但係我未聽過有人係會exactly用返同一句嚟到搶咗我白囉。係喇，所以呢，可能……可能靳尼都鍾意讀書嘅。之後你可以話唔係。

靳：我通常同人哋話呢，我學語言嘅原因呢，係因為想……我想逃避其他嘅問題同責任。所以我就會學習語言嘞。

苗：呢個係……

以：呢個……搞唔掂。

苗：有啲太……太真實。

以：太真實，太入肉啊，呢個。

靳：噉唔係嘅，我覺得……我覺得學習，其實都係自己成長嘅一部份嚟嘅。無論係學語言，或者係學其他嘅技能都好。

以：逃避成長。

靳：噉某程度上，其實都係同你同一個原因嚟嘅，我覺得。

以：其實係。

苗：減少腦退化。

以：係啊，減少腦退化，大家學多啲語言呢，冇咁快老人癡呆啊。

苗：而家叫認知障礙症。

以：係咩？哎啊，死嘞。

苗：同一樣嘢，定係兩樣嘢嚟㗎？

靳：同一樣嘢嚟㗎。你都可以話係腦退化，都得。

以：到底有幾多個名啊？

苗：呢個算唔算係咩euphemism treadmill啊？

靳：算嘅。呢個算嘅。

苗：即係佢由老人癡呆，去到咩……我已經唔記得喇，咩腦退化，之後而家係認知障礙。好似仲有一個㗎嘛！

以：仲有㗎？

靳：仲有咩？

苗：噉應該係呢三個喇。

以：死喇，我係咪太過時呢？噉。

靳：我成日用啲舊嘅詞㗎，所以我唔知。

以：哦，你都係活化石嚟嘅。

靳：我係㗎。

以：噉係啊，大家學多一隻語言呢，就會多十年，係咪啊？

靳：可以醒多十年。

以：呢個虛假陳述嚟㗎，大家唔好信我，我唔係醫療專家嚟㗎！

苗：嘩，噉你學咁多語言，噉你咪醒好多年？

以：係啊，死咗都係……仲醒緊啊，好似係。

苗、靳：死咗都仲醒緊。

以：做鬼都醒過人。好嘞！我哋呢，講我哋嘅旅行之前呢，我哋又講下我哋到底呢個月，我哋miss咗啲咩新聞呢？好似有啲都……都已經幾舊㗎喇，不過我哋都唔爭在講下啦，係……首先就係……

[05:02]

苗：首先呢，比較舊嘅新聞，就係講iOS啦。噉其實之前都好似提過嘅，iOS之前有出beta啦，好似係iOS 16啦。噉佢個beta呢，就有一個新嘅粵拼鍵盤喎，係咪啊？

以：我唔知㗎，唔好問我啊。

靳：我好似見到好多人用㗎，但係嗰個反應有少少兩極囉。即係一邊廂就係有……有好多人話，即係「啊，終於有粵拼嘅鍵盤喇！」噉樣。噉但係跟住呢，有好多人用咗之後呢，跟住就發覺，其實佢唔係一個純粵拼嘅鍵盤噉樣喇。

以：哦，即係點啊？

苗：好似就話因為呢個係……其實正式版出咗啦，噉之後有出beta，而家就係公開噉樣去測試啦。噉嗰個……佢唔係叫粵拼嘅，其實佢叫「廣東話拼音」之類嘅嘢啦。噉你其實你試下呢，你係可以用好多唔同種類嘅拼音，都係打到啲字出嚟㗎囉。你可以用粵拼啦，你可以用耶魯啦，你甚至可以用香港政府嗰一種拼啲街道名，嗰一種拼音，都可以打到字出嚟囉。佢唔係就噉畀你揀死一隻喎，佢係咁多隻都可以混用啊。

以：混打。

苗：即係如果你打jaa噉樣，噉佢又會出「也」，又會出「渣」呢啲字囉。噉有時如果你打死一套呢，你就會覺得好……出咗好多你唔想要嘅字喇，噉就有呢個問題，係囉。另一個好處就係，如果有啲人其實唔識任何有系統嘅拼音嘅，佢就即係亂打啦，都可以打到啲字出嚟囉。噉呢個係另一個好處。

靳：噉我相信其實即係真係好多香港人，佢其實都係用一種例如話可能好混打嘅方式，或者直情係用香港政府嗰套，噉樣嘅。噉所以佢又某程度，我諗係遷就咗一啲可能唔識粵拼，或者係即係未係好慣用粵拼嘅人啦。噉但係變相就變咗可能識粵拼，或者淨係用一種拼音嘅人，就會覺得有啲唔方便。

以：真係有好有唔好。點解佢唔分開幾個呢？

苗：其實係囉，呢個解決方法好簡單，就係你喺嗰個設定嗰度畀個掣你，畀你揀你用邊隻拼音囉。因為如果你係揀漢語拼音嘅話呢，你可以去個設定度揀你要唔要咩「模糊拼音」之類噉樣嘅嘢嘅。即係所以呢一個，我覺得應該係廣東話拼音可以做到類似嘅嘢囉。但係就暫時就未見到喇。

靳：大家可以去反映，可能佢下次更新，就會加咗呢個功能。

苗：係啊，多啲人用呢，就會……就會聽到㗎喇，相信。蘋果可能會聽到人哋嘅聲音。

以：佢係上帝，會聽到你嘅禱告。

苗：係啊，聽咗嘞。

以：其實佢當唔同layout，噉得唔得啊？即係好似你……譬如話之前講保加利亞文，有QWERTY嘅layout，有一個唔同嘅layout，噉樣類似噉分開佢得唔得呢？因為我用開Gboard呢，就係分開嘅。你喺設定嗰陣時，直情揀咗係粵拼，定係咩拼音囉。

苗：理論上係可以囉，總之就係喺官方嘅iOS裏面，仲未有呢樣嘢。

以：噉我仲有一個問題想問呢，就係MacOS係唔係都有個粵拼嘅輸入法㗎？

苗：好問題，我而家即刻睇下先。

靳：我都睇下先，我完全冇睇過啊，真係。

以：因為我前兩日呢，同個住喺日本、學緊廣東話嘅巴西人傾偈，係。因為我哋喺……而家係Polyglot Conference啊，網上嗰個，所以我就同好多世界唔同地方嘅人傾偈。噉佢每日有個廣東話嘅練習室嘅，噉我淨係去咗兩次啫。因為我唔使練習吖嘛。

靳：幫人練習。

以：噉但係就……係嘞，就識咗呢個人啦，都幾有趣嘅。噉佢就話，而家好咗好多，佢話MacOS而家有得用粵拼嚟輸入，噉佢就好開心。因為之前呢，佢係用漢語拼音嘅。即係就好似好多年輕香港人噉樣，用漢語拼音打廣東話。噉但係佢係巴西人。

苗：（官）做乜鳩？

靳：使唔使嘟啊？呢個。

以：佢都幾犀利。

靳：哦，真係有喎。

苗：有啊。

以：係咪新㗎？

苗：應該係。

以：哦，恭喜晒，恭喜晒。

苗：真係有嘞。

以：噉所以大家用蘋果機嘅話，就快啲去裝呢啲輸入法喇。

[09:06]

苗：跟住呢，下一單呢，都係同廣東話有關嘅。噉就唔算喺香港發生啦……算唔算喺香港發生呢？

以：算㗎！

苗：理論上係可以嘅。

靳：可以咩？

苗：係，係會有影響香港嘅人。

以：係㗎！關事㗎！

苗：噉未必會影響到我哋大部份嘅聽眾啦。噉但係呢一個係關於抖音嘅。噉中國嘅抖音呢，就好似開始禁呢個粵語嘅直播喎。

以：等陣，要強調先，呢個係關香港事嘅。因為香港呢，係用抖音㗎嘛。之前係用Tiktok嘅……

苗：Tiktok就冇咗喇。

以：但係後來Tiktok就冇咗，就換咗抖音，所以香港係用抖音，所以關事。

苗：係啊，因為香港唔係海外吖嘛，香港係中國㗎嘛。

以：係啊，海內吖嘛。

苗：海內，係啊。

靳：海內。 苗：海南島都係……都係大陸，噉就係所以……冇嘢，冇嘢。

The rest of the transcript is available to Patreon members.