靳：我想講邏輯語rap。如果大家想……想我講邏輯語rap嘅話呢，就……就快啲叫我嚟講。

以：如果大家想佢rap邏輯語嘅話呢，就留言嘞，係喇。噉先吸引到人嚟聽㗎嘛。

[jingle]

靳：歡迎返到嚟《絮言．狂想》第三十九集……

苗：我係以色列。

靳：我係靳……我係靳尼！

苗：呢個係愚人節。

以：我係以色列。我先係以色列啊！

苗：做乜嘢？發生咩事？我係三苗啊。如果啲人第一次就聽呢個，會亂晒啊，唔知邊個打邊個。係喎，近排你哋學咗咩新語言啊？近排你哋精通咗咩新語言？

以：「學咗咩新語言」？

靳：「學咗……我咗」？我學完喇！

以：嘩，係咪即係唔小心學咗一個語言。

靳：「我學完咗一個語言喇」噉樣。

苗：呢個月你哋精通咗咩新嘅語言？

靳：我精通咗粵語。

以：我未精通粵語。大家賜教下，唔該。

靳：我都未精通咗粵語。

苗：學咗廿幾年，仲係學緊。

以：係，每日都學新嘅嘢。

靳：唔記得講呢，我真係上次開口中啊。因為我啱啱上次呢，阿詹屎喺度嗰陣時呢，就係講緊我哋四個呢，三個都中咗，淨返我一個未中吖嘛。跟住仲要話我哋動態精零做得好吖嘛。跟住我錄完之後呢，過咗兩日，我就中咗嘞。跟住我仲要病咗十日啦，我個……個RAT positive咗十日噉樣啦。真係開口中。

以：所以大家就知點解我哋又錄唔到嘞。真係……呢兩個月多災多難。

靳：係啊。我依家啱啱講完嘢，我都會係噉喺度咳啊，你……你見到呢，就係以色列呢，將我啲咳嘅聲全部剪走晒。

以：唔使客氣。

靳：多謝，多謝。

以：但係起碼你而家「精通」咗呢一個……唔知啊，抵抗Covid嘅抗體。

靳：精通咗Covid，Covid畢業。

以：畢業，係。精通咗，唔使學語言喇。學咗點樣打呢個病毒。

[02:02]

苗：講起廣東話呢，好似近排有樣比較令人憤怒嘅新聞啦，就係……係啊，噉就係Spotify啦。噉呢，最近呢，好似大家對Spotify有啲怨氣啦。噉就因為……唔知大家有冇用Spotify啦，或者如果有嘅話呢，唔知大家有冇啲廣東歌喺上面啦。噉唔知……我講咗好多次「唔知大家」。

以：你真係乜都唔知。

苗：噉我嗰個playlist上面呢，就有大概一半嘅歌呢，就係啲title轉晒。噉點樣轉呢？就係佢本來由漢字嘅歌名呢，就變晒做漢語拼音囉。即係佢係普通話囉，變咗。例如話……我都唔知例如話〈十年〉噉樣，就變咗shi nian噉樣，即係就噉串出嚟，英文。聲調都冇啦，當然。

以：冇聲調啦。

苗：係啊，當然冇啦，呢個。呢個……呢個基本啦，係咪啊？基本操作，冇聲調。噉之後……之後就引起好大嘅迴響啦，係喇。噉所以就……好似過咗幾個禮拜呀？有冇幾個禮拜……都好似冇喎。一兩個禮拜就即刻就轉返啦。

以：但係我有聽講呢，有啲人已經經歷咗呢個問題好耐㗎喇。所以其實都係一個謎，因為官方又乜都冇講到，係幾時轉、點解轉、邊個會轉，噉樣。

靳：因為其實呢，我係開Spotify，係冇遇到過呢個問題嘅。即係一路其實都係寫漢字。因為之前有一堆香……即係香港人，或者係其他地方嘅人，都有講過，就轉咗，跟住唔知過咗可能一個零禮拜，跟住又會轉返噉樣。噉apparently……但係個問題就係應該係淨係有一部分人先至係噉樣囉。

苗：即係唔係新㗎喎，呢個問題。即係持續……

靳：唔係新㗎。

苗：OK。我……即係我就係第一次。

以：我其實都見過呢個問題嘅。因為呢，利申啦，我而家就唔係Spotify用家。我而家呢，就用呢個YouTube Music嘅，因為我……我好少聽唔係classic嘅音樂啦。噉但係我好多年前呢，就用咗呢個YouTube Music嘅前身，就叫Google Play Music。佢嗰陣時都係有同樣嘅問題，即係長期都係噉樣嘅。所以任何廣東話嘅……其實任何中文嘅嘢呢，佢都一律係用普通話拼音噉樣寫出嚟㗎。所以我係乜都睇唔明㗎。

苗：係啊。好似嗰啲學術嗰啲文章呢，你要……你要引用，就一定要用呢個漢語拼音囉。

以：係啊。其實都係即係之前講過標準化嗰樣嘢囉。即係唔知邊個決定咗，我哋想有一個拉丁化嘅標準。噉之後即係譬如喺學術期刊個case就係大家就引用某一樣嘢，譬如話講下一樣關於中國，或者關於香港嘅嘢都好啦，噉就全部用普通話拼音啦。噉可能喺音樂呢個case，佢都係突然間就：嗯，我哋就用呢一個標準啦！我哋方便我哋嘅用戶去到認到……認到啲歌，噉樣。

苗：係，要識睇吖嘛，起碼。認到，或者可以自己search返出嚟。

以：係咪容易啲search呢？

靳：完全成件事變咗估歌仔，真係。

苗：係，即係……死喇，呢個咩歌嚟㗎呢？噉樣，要讀返出嚟先知係咩。

靳：係，拼一次噉樣。

苗：但係佢又唔係全部喎。

以：係啊。噉睇下佢嘅用戶係邊個囉。即係有……有冇人係受惠咗呢？有冇任何人係受惠咗呢？

苗：都真係唔……可能某一啲識拼音……漢字唔係好叻，但係識拼音嘅人？我都唔知啊。

以：但係又唔識廣東話，但係又聽過東話歌，嘩，嘅人。

苗：係啊，但係又唔識粵語嘅拼音嘅人囉。因為如……假設你如果你淨係學廣東話，我係……可能我漢字唔係好叻啦，噉但係我睇拼音，都未必識㗎嘛，如果我唔識普通話。

以：一定係難咗囉！

苗：噉即係嗰個受眾係好窄囉，即係識漢語拼音，但係又唔係好叻漢字，但係有聽廣東歌嘅人囉。

以：但係又唔識廣東話發音。

苗：但係佢又會知道嗰啲歌喺普通話點講。

以：可能佢哋嘅日常生活會講起首廣東歌噉樣，就用普通話講出嚟。我都識有啲朋友，就係學廣東話嘅，噉佢哋就好鍾意聽廣東歌啦。噉就唔識普通話，噉所以就真係好嬲囉，佢哋係完全揾唔到啲歌，唯一睇到嘅就係個咩CD封面噉樣。

靳：唯一睇得明就係CD封面。

以：有幾多個字！五個字！呢隻CD裏面嘅！

苗：真係估歌仔啊。

以：大電視啊。

靳：我覺得呢個唔公平囉。我覺得啲日文歌呢，啲漢字應該全部都要變晒做呢個漢語拼音囉。

以：係喎，日文佢就正常用返羅馬字。

靳：即係YOASOBI嗰首歌就會變成……變成ye ni qu keru（夜に駆ける）噉樣囉。

苗：呢個係黐線㗎喎。

以：噉其實大家都好明顯知道，呢個case，廣東話係誤中副車啦，係咪？即係好明顯佢就係諗住將啲即係普通話嘅歌，用拼音、用羅馬字寫出嚟，噉之後因為廣東話呢，係中文啦，係咪？噉所以佢就……就一律噉樣，通通改埋拼音。即係大家都明嘅，但係就個謎就係唔知點解呢個時候會發生呢件事囉。

苗：呢個故事教訓我哋呢，IT公司裏面一定要有識語言嘅人。

靳：你係咪幫自己pub緊？

苗：唔係，唔係啊，咩啊？咩啊？唔係！點會係呢？

以：你係語言嘅IT公司嚟嘅。

苗：即係做決策嘅人……即係呢啲其實都好基本嘅嘢囉。同埋我都發現呢樣嘢呢，佢係唔跟你嗰個Spotify嘅介面語言㗎喎。即係你乜嘢語言都係噉樣㗎喎。即係呢個係另一個問題囉，我覺得。

以：即係統一……中心嗰度嘅決策嚟嘅，就全部動L就改晒。

靳：但係又唔係同時影響所有人喎，個問題就係。好奇怪啊，真係。

苗：不過呢個就唔出奇嘅，因為成日都有啲A/B testing嗰啲嘢，即係某啲用戶會有某一啲嘅功能，有啲可能冇噉樣囉

以：「功能」，係咪啊？

苗：係囉。

靳：你唔好彩噉樣。

苗：係囉。我覺得根本呢個問題係你冇一個方法去畀個用戶去揀……譬如首歌，佢想用點樣嘅方式去顯示出嚟囉。譬如有啲人好鍾意聽中文嘅歌啊、廣東歌，咩都好，普通話歌啊，或者甚至乎係啲佢唔識嘅文字，譬如日文、韓文，咩都好。如果有一個選項畀佢哋揀去變做可能羅馬化咗，噉樣其實呢個都係方便佢哋囉。即係唔……唔限你個介面語言啦，總之我有個掣，話：呢個歌，或者呢一堆歌呢，呢個album，我就想全部變晒做拼音，或者我呢個呢，就揭返做漢字噉樣。即係呢一個都係一個好好嘅功能囉，會係。雖然係應該要好大人力物力嘅，做呢樣嘢。

以：呢個完全係語言專家嘅思維嚟㗎。

苗：即係我一個理想嘅世界裏面囉，就會有呢個功能啦。

靳：理想嘅世界。因為你如果……應該自動上高，係應該做唔到呢樣嘢㗎嘛。第一有……即係兩個唔同嘅書寫系統中間變換，係一定會有一啲例外啊，或者有一啲即係資訊係冇咗嘅。

以：做到嘅，做唔好囉。

靳：噉但係即係可能你就要依靠本身入嗰個歌嗰啲資訊嗰個人，要入埋個……嗰個羅馬化咗嘅即係字落去噉樣囉。

苗：係嘅，我覺得。

以：同埋你要喺個metadata裏面有埋呢個係咩語言囉，如果唔係點知啫？即係就算而家科技去到可以辨認到廣東話嘅文字啦，噉但係一定會有啲認錯嘅case出現。

靳：歌名真係難啲嘅，講真就。

以：係囉，歌……尤其是……係囉！廣東話歌係用書面語㗎嘛！

靳：歌名應該冇可能喎！真係。

以：係喇，噉佢一定係認咗係官話嚟㗎喎。 苗：係囉，要睇嗰個本身個文化囉。有一啲地方係……即係譬如我知道韓文好多歌呢，佢都係會有個英文嘅title㗎。佢會特登有一個英文版，有個韓文版。

The rest of the transcript is available to Patreon members.