以：噉好啦！噉我哋今日呢，嘅主題就係講客家話嘅。客家話有好多種啦，噉我哋可以……

詹：唔係種種都啱小朋友獨自收睇。

苗：咩話？

詹：客家話有好多種。

以：唔係種種都……

苗：呢個intro嚟㗎喎。

[jingle]

以：歡迎大家返到嚟《絮言．狂想》第三十八集，我係以色列。

苗：我係三苗。

靳：我係靳尼啊。

以：我哋今日又有嘉賓喎。噉我哋點樣介紹佢好呢？

苗：呢個嘉賓係坐喺你隔籬㗎喎，而家好似。

詹：（客）厓係詹屎呀。

以：哈囉，詹屎。

苗：詹……暫時啊。

靳：暫時坐喺你隔籬，即係你錄錄下會走咗噉樣嘅。

以：係啊。嗱！我哋用廣東話講多次先，呢個就係詹屎。噉啱啱詹屎你講嘅係咩話啊？

詹：（客）啱先厓講嘅係客家。

苗：客家話，係咪啊？即係。

靳：客家話。

以：係，就係客家話。噉大家就估到我哋今日嘅主題喇。因為呢，我哋好耐之前呢，好似第十三集呢，就講咗一次台語啦，噉又揾咗個又係學台語嘅朋友嚟一齊傾下偈啦。今次呢，我哋就唔識用客家話開頭啦，不過呢，我哋就有個……陣間先再詳細講啦，佢係識客家話啦，叫做。

詹：識少少啦。

以：識啲啦，好啦。

詹：我都係最近一兩年先學嘅。

以：嗯，噉就上嚟同我哋傾一傾少少關於客家話嘅嘢。今次呢一個嘉賓呢，其中一個特別嘅地方呢，就我哋第一次有嘉賓喺同一間房裏面錄音喎。因為我哋之前次次都係遙距噉樣錄啦。今次呢，係啦，咁啱都喺同一個城呢，噉就請咗佢上嚟一齊傾偈。

苗：真係開心。而家有四分三嘅……

靳：幾好，幾好。

苗：……嘅人都唔喺香港。

以：我哋有……係吖，75%……

詹：四分三嘅人都係二等公民。

以、靳：二等公民！

苗：你就二等公民！我呢啲真正嘅中國人嚟㗎。

以：哦……嘅二等公民，係咪啊？

苗：你哋……你兩個係二等公民啊。係啊。

以：所以我哋而家呢一個係75%嘅英國podcast嚟㗎喇。

苗：希望遲啲係50%嘅英國podcast。

以：講呢啲？呢……呢個……呢個……

苗：要動腦筋啊，呢個。

詹：我都唔明。

苗：蘇格蘭獨立。

以：蘇獨啊。好啦，噉又問下大家最近點樣啊？因為呢，我哋又……又隔咗個禮拜啦，好似。成日都係噉。

苗：都算係啦，好多事發生。

以：好多事發生啊。噉可能大家都知道我啱啱中咗呢個武肺啦，就好返啦。

苗：個個都知，因為個個都有睇你啲片。

以：係啊，個個都知啦，應該。

詹：追晒。

靳：追晒，每一……每一段片都睇晒。

以：三苗你又點樣啊？

苗：我都中咗喎，咁啱嘅？

以：係啦，應該係隔空傳咗畀……我啊。

苗：係，係咪啊？其實呢，我喺上幾個禮拜就去咗外國啦，噉都係歐洲裏面嘅，噉就去旅行啦。噉但係就返嚟就開始病。但係我哋估呢，即係推返啲時間線呢，就應該係喺英國裏面度中嘅，就應該都唔係關旅行事嘅。

靳：你話去咗外國，係咪即係去咗英格蘭啊？

苗：嗱！其實我真係有去，因為我喺嗰度轉機。我喺倫敦轉機，所以我有去英格蘭。

詹：可能真係喺英格蘭中。

以：可能呢。

靳：可能真係喺英格蘭中。

以：倫敦都幾大機會啊。

苗：分分鐘喺Gatwick嗰度中。真係……真係唔知。噉……係啦，噉返到嚟就病咗幾日啦，噉就……都冇乜事嘅。噉都……都好好彩。

以：你都冇乜事。詹屎又係有驚無險，係咪啊？

詹：哦！我係喺二月嘅時候中過。

靳：噉而家就真係成個podcast淨返我未中過咋喎。

苗：係啊，你仲係……

靳：我未畢業喎。

苗：仲未畢業。

靳：證明我哋呢個動態清零係做得幾好，係咪先？

苗：係啊，仍然係呢個COVID virgin。

以：唔囉，唔知大家有冇留意三苗嘅呢個acoustic有冇唔同咗呢？即係你周圍嘅環境。

苗：希望冇啦。或者如果有唔同嘅，希望係好咗。但係其實我都驚有啲……噉因為我就又搬屋啦，又搬屋。噉……

靳：成日都搬屋。

苗：即係由podcast開始呢，就第四間flat喇，已經係。所以就驚唔知啲聲會點啦，噉就希望今日就唔錯啦，啲聲。

以：大家可以留言反映下有冇唔同咗啊，有冇好到啊，噉樣。

靳：噉今日喺我哋入個正題之前啦，噉都如果大家鍾意我哋嘅podcast嘅話呢，噉都可以嚟各大嘅podcast平台啦，畀啲review我哋啦，噉等多啲人呢，可以見到我哋嘅podcast呢，噉就用廣東話呢，講啲語言有關嘅嘢。

苗：係啊。因為呢個偉大嘅演算法呢，噉就好需要你哋嘅支持嘅，噉希望你哋可以多多去review啦，去留下啲……希望係正評啦，係喇，畀多啲五星我哋啦。

以：畀多啲星星。

苗：希望就可以將呢個podcast就推廣到畀更多人聽啦。

靳：推廣到全世界嘅人。

以：我都覺得有好多人可能會有興趣，但係未接觸到呢個podcast住。

靳：包括一啲未識廣東話嘅人，佢哋可能聽到呢個podcast之後呢，佢哋就會……

苗：嘩，正啊！啲內容好……好有趣啊！我學廣東話先！噉樣。

靳：係喇。就係噉樣。

詹：想為咗聽呢個podcast而學廣東話。

靳：一定係。

苗：嘩！咩係[kwh]，嘩，咁正嘅？學廣東話先！

以：我真係有啲未識廣東話嘅朋友有嘗試聽啊。即係我哋上次嗰集呢，咪提到有個朋友係……佢木身講官話嘅，噉但係佢都聽開閩語大啦，我唔知邊一隻啦。噉佢係嗰陣時講小兒經嗰個talk啊。噉……噉我同佢講：啊，我哋提起你個talk喎！之後佢真係走嚟聽咗成集囉。之後佢就話：我成世都冇聽過咁多廣東話。噉佢真係聽得明我唔知大半。

苗：嘩，都好犀利喎。

靳：啊，噉又犀利喎。

苗：即係唔識粵語……任何嘅粵語，但係都聽得明咁多。

以：係啊，可能佢本身係即係polyglot呢，所以佢習慣咗聽唔明可以估到中間唔明嗰啲位噉樣。

苗：都係一個技能嚟嘅。

詹：或者有啲人可能係會即係睇開劇集啊，或者聽開廣東歌嗰啲，所以咪會識囉。

以：以：嗯，都有可能係㗎。

詹：好多人係噉樣。

[06:12]

以：噉好啦！噉我哋今日呢，個主題就係講客家話嘅。客家話有好多種啦，噉我哋主要focus講呢個香港嘅客家話啦。噉我哋可以問下詹屎先啦，你同客家話嘅關係係咩啦，你嘅背景係點樣啦，等等。

詹：噉我覺得我同客家話嘅關係就比較特別嘅。即係一般嘅香港人應該唔會有好似我噉樣嘅情況啦。噉我就客家人嚟嘅，噉我就係香港新界嘅客家嘅原居民噉樣啦。噉但係其實我長大嘅環境係完全冇客家話嘅，即係首先我喺城市大啦，urban嗰邊，即係港島大啦。

以：市區。

詹：係啊，市區，係啊。講唔到喇，而家。講唔到廣東話，喊出嚟。

以：慘。

苗：Urban。

詹：首先我喺市區大啦，跟住之後同埋就算我返去村嘅時候呢，其實根本係冇人會講客家話，除非係可能拜年會有啲比較遠房親戚噉樣，過嚟講幾句，我就會聽到囉。噉所以基本上我長大嘅環境係完全係零客家話嘅。噉但係呢，我都會有接觸到，係因為我老竇啦，其實佢係做呢個研究嘅。噉佢就係研究客家山歌㗎啦。係嘞。噉所以呢，都會知道一啲客家話嘅嘢嘅。噉同埋佢……佢都唔算流利啦，但係佢都會講到少少，噉有時無啦啦喺屋企會同我爆幾句出嚟噉樣囉。

以：爆出嚟。唔小心漏嘴噉樣，講咗出嚟。

詹：係啊，會啊。

靳：噉會唔會喺屋企唱出歌？

以：問得啱。

詹：High大咗可能會。

苗：飲多兩杯噉，係咪啊？

以：噉你識唔識唱山歌？

詹：識啊！

以：係咪陣間要唱兩句？

苗：唱兩句，bonus！

靳：一陣要有時間畀詹屎表演！

苗：想聽唱山歌呢，就大家subscribe我哋嘅Patreon！唔係……

詹：哦，OK！Exclusive content就係呢啲嘢。

以：係啊，抵晒啊，呢個表演。

詹：首先要有人想聽。

苗：聽講啦，阿詹屎呢，你係喺電視出現過，即係講呢個客家話山歌呢樣嘢。

詹：係啊，講起有啲尷尬啊，但係呢，就……

以：點解要尷尬？

詹：嗰次係有一個記者呢，就……其實係透過我老竇啦，其實佢係訪問佢為主嘅，噉就問佢啲從事客家山歌研究嗰啲嘢，噉但係就即係聽到我係作曲嘅，而且我亦都有用過客家山歌嘅melody，同埋……即係做我嘅其中一首piece嘅內容啦。噉佢就覺得有趣噉樣，跟住佢都知道我都有學過幾句噉樣啦，就有個好搞笑嘅idea，就係叫我喺……嗰次係有一次係我rehearsal，跟住就叫我喺成班人面前就「唱山歌囉！不如。」噉樣。

苗：原來真係有。

詹：跟住之後呢，就拍咗一條片，就係我喺個弦樂團前面唱山歌。係嘞。就係噉囉。

以：嘩。噉就真係要擺條拎畀大家去聽下喇。

苗：如果揾到嘅話。

以：應該揾到嘅。喂，我……幾好吖，我都想可以喺電視上面推廣我嘅作曲。

苗：係喎，好正喎，好似。

詹：冇推廣到我首piece，其實。

苗：哦，原來係噉。

詹：嗰陣時係寫緊，其實。所以……所以冇嘢出。

以：嘥晒啦。

苗：冇嘢出？

以：即係未有……

詹：即係唔係啊，即係I mean我嗰個作品喺出嗰一個……

苗：冇嘢出，出唔到住？

詹：嗰個documentary嘅時候，係未有個……

以：未演到出嚟畀你錄囉。

詹：啊，講唔到廣東話啊，突然間。

以：慘。

詹：喊出嚟。

苗：二等公民。

以：你應該……你應該全程講客家話。

詹：但係我平時日日喺屋企係講廣東話㗎喎……唔係，平時可能真係撈埋講。

苗：可能錄音比較緊張，都好似……

以：噉你對於你爸爸嘅呢啲山歌研究，接觸有幾多啊？即係你會唔會參與吖，或者去同佢一齊聽佢講嘢啊，聽佢研究嘅內容啊，等等㗎？ 詹：哦，參與呢，就比較少嘅。我有……有幫手默過譜囉。

The rest of the transcript is available to Patreon members.