苗：好搞笑㗎，嗰個。係啊，日治時期嘅時候，知唔知維港叫咩啊？

翊：好似有印象，但係我唔係好記得。

苗：叫香港港啊。好可愛啊。但係佢係ほんこんこう啊。日本本。

靳：ほんこんこう。

苗：香港港！

靳：玩疊字？

苗：上面有好多船船。

[jingle]

以：歡迎返到嚟《絮言．狂想》第四十四集，嘩，呢個數字好似有啲唔吉利，係咪啊？不過唔緊要，我係以色列。

苗：我係三苗。

靳：我係靳尼啊。

以：今日呢，我哋又有嘉賓嘞！

翊：我係翊少啦，或者可以叫Kieran都得嘅。係啊。

苗：好，歡迎，歡迎。

靳：歡迎！好嘢！

苗：又要嗰個……

以：唔好再叫我用嗰個聲，警告你。好憎嗰個聲。

苗：因為呢，我次次呢，有親呢啲嘢呢，我都會叫以色列用嗰個小朋友嗰個「yeah!」嗰個聲效。次次佢都加落去喎，好乖啊，次次都。

以：用咗不下十次喇。

苗：噉今次就算。

靳：我哋自己整個聲效出嚟，就OK㗎喇。

苗、靳：Yeah!

以：噉不如介紹下啦，呢一位嘉賓係咩來頭呢？

苗：好似大家都可能聽過佢個名喎，如果大家有玩過呢個地理達人挑戰。我哋上次第卅三集呢，就……

以：嘩，卅三，之後卌四。

苗：嘩！提過呢個粵語達人挑戰啦。噉呢個本身就係受到地理達人挑戰啟發嘅。噉今日我哋就好榮幸噉樣請到呢個挑戰嘅創辦人啦。創辦人？點樣叫啊？作者呀？

翊：始作俑者。

眾：始作俑者。

苗：就上到嚟我哋嘅……我哋嘅節目啦。噉就點解會請佢呢？唔知大家知唔知。

以：我唔知喎。我……你哋有冇玩到嗰個挑戰先？

苗：我梗係有啦！我好渣啊，玩得。

靳：有啊，玩咗喇。

以：我好怕輸啊，所以我唔夠膽挑戰。我覺得玩十題已經收咗皮。

苗：唔玩就唔會低分啊。

靳：又啱喎，好似。

以：唯一贏嘅方法就係唔玩。

苗：駁唔到。

靳：噉係咪請佢今日上嚟考我哋香港嘅地理呢？

以：喂！唔好啦！

靳：我哋轉型做地理podcast。

以：你哋兩個伏我嘅！

苗：嗱，噉呢個語言podcast嚟㗎嘛。噉地理究竟同語言有咩關係呢？噉就係地名啦。噉所以今日，我哋嗰個題目都係圍繞住呢個地名嘅。噉可能有外國嘅地名啦，香港嘅地名啦，或者即係一啲週邊可能粵語地區嘅地名啦，可能都會講下嘅。噉喺講地名之前呢，我哋今日就有啲乜嘢語言嘅新聞呢？

[02:41]

以：呢個好似同地理有少少關係，啲啲啲咁多。因為呢，我哋又返嚟講呢個多鄰國嘞，Duolingo喇。係啦，講嚟講去都係佢，佢成日有啲咩update呢，我哋就要講下㗎喇。因為……點解同地理有關係呢？因為佢呢個新嘅path啊。佢有個路徑啊。噉你哋有冇見過嗰個path啊？

苗：我就聽人講過囉，亦都睇到有一啲……有啲screenshot喺度有人話：「哎啊，好唔鍾意呢個新嘅路徑」噉樣啦。通常係唔鍾意嘅。

以：哦。噉阿翊少有冇玩開Duolingo㗎？

翊：曾經畀人推薦過玩呢隻game嘅，不過最後都冇玩到。

苗：畀人呃過啊。

翊：又冇呃嘅。

以：呃過……

靳：畀人呃咗去玩Duolingo係咩玩法？

苗：畀人氹咗去玩Duolingo。

以：我鍾意你講「玩呢隻game」，因為Duolingo係game多過係學語言。

苗：啱啊，即係佢將學語言呢樣嘢變咗遊戲化囉。

翊：其實唔錯㗎，不過暫時未有新嘅語言想學，所以就未接觸囉， 係啊。

以：係嘞。噉可能大家記得呢，如果有玩開嘅話呢，就係Duolingo不嬲都……好多年，自古以來，佢嘅結構就係有個所謂嘅樹啦，噉其實就係一層層噉樣，每層有一至三、四個所謂嘅技能啦。做完晒成層之後，佢先會解鎖嘅。噉但係同一層之內呢，你就可以自己決定做邊個先嘅。噉同埋你亦都可以做完下面嗰啲，再返返上面嗰度，再增強你嗰個技能嘅技能點啊，係咪啊？即係升呢噉樣。升呢好似已經係好老嘅潮語嚟㗎嘞。真係慘。

苗：唔潮喇，已經。

以：係嘞，噉但係呢，而家呢個新嘅路徑呢，其實就係佢幫你決定咗你咩次序囉，做每一個技能。即係你就唔係話我而家可能學現在式，之後我學過去式，而係決定話：你而家就學現在式，之後再過去式，之後佢幫你決定埋你返返去温習返現在式，噉樣。呢個就係我哋當初嘅理解啦。

翊：即係有個重温嘅概念喺裏面。

苗：係喇，係喇。即係好似好強調嗰個叫做spaced repetition啊。即係要有系統噉樣去重覆唔同嘅嘢啦，或者佢會幫你set埋幾耐會重覆某一啲乜嘢嘅題目囉。

靳：即係因為以前嗰個做法，就係佢係有幾個技能喺度，跟住你自己可以揀返唔返去嗰個技度温書啊、自己返唔返去level up嗰個技能，噉樣㗎嘛，即係我理解就係。即係你成個玩咗一圈嘞，噉你嗰個技能就叫第一個level，噉你跟住就可以落去噉樣㗎喇。噉但係而家佢就將嗰個……嗰幾個圈拆開之餘，就即係決定埋你幾時去温嗰啲嘢吖嘛。係咪個理解係啱啊？呢個。

以：係啊，因為我知道有好多唔同嘅用者呢，都係用自己嘅方式去到用呢個app嘅，呢個game嘅。噉可能好多人就一味噉樣衝啦，係噉學新嘢學新嘢啦，噉然之後就冇温書啦，噉學到尾就唔記得晒一開始嗰啲嘢啦。噉我知道三苗係相反嘅，我哋之前講過。

苗：其實我係唔正常嘅，我呢個玩法。

以：你就係好極端嘅。

苗：我係違背咗Duolingo嗰個原意。

靳：我係「一路衝」派。

苗：所以呢個係for我呢啲人㗎囉。就係佢逼你：「嗱，你唔可以做晒上面嗰啲。總之呢，你要……」佢幫你設計好成個課程，「總之呢，你而家就玩呢啲，之後呢，就會返返去玩返呢啲」噉樣嘅。即係佢唔會係玩完一個就永遠都唔掂噉樣。

翊：哦，即係總之就畀你可以重新玩返以前玩過嘅嘢，就……

以：唔係畀你，係逼你。

苗：佢係逼你一定要囉。即係有少少係……之前係有得畀你揀……

翊：強制温書。

苗：係喇。之後就強制温書，要……你一定要玩呢個，如果唔係你冇得繼續落去噉樣。

翊：哦，喺學習上其實幾好喎，呢個。不過其實會唔會話悶㗎？即係係噉重覆做返之前啲嘢。

以：佢又唔會太重覆，即係冇三苗咁重覆囉。佢係一個平衡噉樣囉，重覆同埋新嘢。噉其實好似係比較適合我嘅，因為我不嬲玩法都係呢，玩到下面，之後又返返上面。我有個系統噉樣，數住有幾多層係玩咗幾多個level噉樣嘅。

翊：哦，明白，明……

以：噉但係佢就成件事自動化咗囉，而家。據我所知，係咪大家都未轉去呢個路徑啊？你哋。

靳：我呢排冇玩。

苗：我就未有嘅。啲人就話十一月一號會變做新個介面囉，但係我到而家，我手機版同埋電腦版，都係舊嘅。

靳：我有一排冇玩，但我之前check呢，都係舊嘅版面嚟嘅。噉我都想睇下新嘅版面，之後嗰個機構會係點樣。

以：我畀個account你哋玩囉。因為我喺電腦上就轉咗，但係手機上未轉喎。噉所以我又講下我留意到啲咩啦。首先就係佢啲文法嘅碌士冇晒囉。

苗：吓？喂，呢個精髓嚟㗎喎。

以：係啊。係唔係呢？因為我覺得Duolingo嘅原意呢，係你唔使讀文法，都可以吸收到囉。呢個係佢一開始個諗法。所以後來加咗啲文法嘅碌士，係好似輔助角色，即係可能一開始係法文、西班牙文，就容易啲。後來其他語言，就要幫下你噉囉。噉但係我知道某一啲course呢，係好依賴嗰啲碌士嘅。噉突然間就冇咗喇。

苗：噉佢某程度上，係逼佢其他嗰啲設計改囉。

以：係啦，要改設計啦。

苗：但係好似而家係啲堂係一樣㗎喎，只不過佢係分開咗唔同嘅部分，去擺喺條……嗰條徑上面咋喎，但係嗰個內容本身係冇改過㗎喎。

以：係啊，你入到去，都一模一樣㗎。係只係你入去嘅方式，好似畀咗道新嘅門，去通去同一個終點噉樣。係嘞，噉因為佢課堂內容嘅設計，就係好依賴嗰啲碌士啦，噉之後好多學習者就一頭霧水囉。因為已經冇咗嗰啲幫助。之後好似有第二個網站，叫duomi，定duome噉啦，噉就backup晒所有Duolingo啲文法碌士，噉就一版睇晒，可以search到添，其實係好方便。

苗：唔單止係新嘅介面啦，有時呢，因為呢一個notes呢，係手機版就一路都冇得睇嘅。噉所以我都係用嗰個網，我都喺手機度用嗰個duome嚟睇返嗰啲碌士，然之後先至開始玩囉。

以：嗯，不嬲個app都好奇怪。可能佢個app一直係準備緊轉去呢個path嘅。

苗：嗯，應該係。 以：噉我哋又link個duome畀人先，係啊。但係佢而家個組織，就係……instead of技能，即係可能係一個文法嘅技能，或者一個特定嘅生字嘅主題噉啦，噉佢就係所謂units啦。其實感覺就好似你攞本語言教科書，噉就裏面有啲唔同嘅units噉樣。噉每個unit可能係一個主題，噉就包括啲生字，包括一啲文法噉樣。噉佢就扮咗嗰個組織囉。噉係咪成功呢？我仲未知道。噉但係起碼佢每個unit有個主題，寫出嚟畀你睇噉樣：「啊，你讀完呢個unit呢，你就可以講到呢樣嘢、做到呢樣嘢喇！」噉樣。同埋佢有啲重點嘅句子囉，每個unit。噉就係話：「哦，你而家就學講呢啲嘢。」

The rest of the transcript is available to Patreon members.