苗：呢個就好似係啱啱十二月出嘅，十二月中啊，都大概一個幾月啦，噉就好平㗎啫，都……

以：而家講咗一個幾月，即係限制咗我一定要兩個禮拜之內剪好，係咪啊？

苗：梳，梳。噉我講兩個月囉。

以：唔使。

[jingle]

以：歡迎返到嚟《絮言．狂想》第四十七集，我係以色列。

苗：我係三苗。

靳：我係靳尼啊。

以：咦？係咪三苗你delay咗，定係我呢邊啊？

苗：吓？唔通係我有問題？

以：因為我新電腦啫，我個網絡冇唔同到㗎嘛。

靳：係喎，你……以色列，你又話……你咪話你有個新setup嘅？你而家新嘅電腦用成點啊？

以：佢真係爽快好多囉。轉嗰啲片啊，嗰啲呢，好快手搞掂囉。之後理論上可以打機嘅，不過呢，我就好少打機拉，所以好似得物無所用噉樣，淨係愛嚟剪片。之後次次同人講呢，即係人哋一知道我電腦個spec呢，就喺度話：嘩！你電競㗎？我話唔係啊，我做YouTube咋。

苗：剪片。鬥快剪片。

靳：係啊， 好重要㗎。

苗：Competitive editing。

以：我都想練下剪得快啲。定係鬥快ren片咋？不過呢個唔關我事，呢個係個spec嘅問題。

苗：即係你好似嗰啲騎師，騎馬噉樣，但係隻馬自己喺度跑，個騎師唔喺上面啊。

以：遙控……咩啊？遙控車車比賽囉。

苗：都要㗎！要控制㗎嘛！遙控車。

以：都係喎，都要揸㗎喎，係喎。

苗：自動車比賽就話啫。都唔係喎，都可能要整出嚟㗎喎。

以：自動車比賽啊？你問下Elon啦！死啦，會唔會遲啲啲人攞啲Tesla，走去賽車？會唔會勁……

靳：可能會。

苗：吓？未開始就爛咗喇喎。

以：唔知啊，我唔識揸車㗎。

苗：一開車即刻撞咗。

以：係啊。揸車嗰啲，我隔籬房好似熟啲。係囉，個個同我講打機。之後我就走去好奇睇下有啲咩遊戲嗰啲啦。噉有見到其實而家都好多啲虛擬實境喎。

苗、靳：VR呀？

以：VR。

苗：講返VR都得，係喇。

靳：VR係廣東話嚟㗎。

以：係啊。VR可能大家聽得多啲，係咪啊？死啦，我唔想講Metaverse，可唔可以唔講Metaverse？

苗：戴住個頭套呀？點樣叫啊？Headset。「戴住個頭套」好似有啲奇怪。

靳：笠……笠住個套喺個頭……

以：頭盔，戴頭盔。

苗：戴頭盔。

以：我都唔知喎。

苗：眼罩囉。

靳：都係嘅。

苗：算唔算啊？

以：眼罩……即係總之又係有個mon，又有耳機，又有……乜都有嗰啲呢。

苗：係喇，成個笠落個頭。

靳：總之就遮住你隻眼噉樣。跟住有啲……隻手又揸住啲嘢噉樣囉。

以：係啊。我就對VR冇乜接觸嘅。我唯一接觸就係我有個friend，佢早兩年話佢細佬送咗個聖誕禮物畀佢，就係嗰啲……嗰啲VR頭盔啦，唔知乜嘢啦。噉佢就掹咗我入去玩VRChat囉。噉其實我係望住個正常嘅mon，之後就係用個鍵盤喺度控制。之後我係噉跌落水啦。之後佢話：點解你玩VRChat，玩到好似Minecraft噉樣嘅？係噉仆街。睇得出我幾唔識打機。唔知大家有冇玩過VRChat啦，係……就係一個虛擬嘅世界，之後大家可以識人。

苗：我都聽過囉。啲人話係好似……好似Metaverse，但係好啲囉。

以：唔知點為之好啲喎。Metaverse佢淨係得嗰啲……

苗：起碼多啲人用，成熟少少囉，嗰個……嗰樣嘢。

靳：即係會有人同你傾偈，唔係係噉sell你嘢。同埋即係同啲人係會傾偈。

以：唔係淨係賣廣告，係咪啊？

靳：係傾到偈嘅，噉樣。

以：我係感覺好奇怪嘅。因為入到去好似……係囉，即係好多陌生人囉。即係depends on你去一個咩環境嘅。噉但係你真係身邊就係你全世界唔同嘅人，一齊喺度講緊嘢噉樣。之後有少少怕醜，因為你行埋去人哋度，人哋會聽到㗎嘛。我唔知啊，類似噉樣啦。

靳：噉但係佢嗰個目標就係噉吖嘛。

以：我知啊。冇啊，我呢啲可能太過習慣呢個現實世界。

苗：呢個好似大部分人都係喎。

靳：你唔係話「哎？我作為一個語言學習者……」，跟住佢就叮一聲，跟住話：「哎啊，可唔可以用呢樣嘢嚟做語言交換呢？」噉樣㗎嘛，應該係。

以：好似係……好似係噉喎，係咪啊？可以識到啲人，之後做語言交換。呢個我哋陣間再講。比較習慣啲就係去跟現有嘅朋友入去嗰個世界裏面囉，或者係有時有啲group噉樣啊，即係好似我入咗個BSL嘅group呢，就係VRChat裏面，佢哋就要好先進科技嘅，要嗰啲咩有個鏡頭track住你隻手，嗰啲嘅頭套嘅。

靳：啊，有啲噉嘅嘢㗎？原來。

以：係啊，而家貴嗰啲好勁㗎。即係你唔需要戴手套囉。佢係有個鏡頭喺前面，望住你隻手，噉你就可以用手語囉。但係冇表情㗎，冇表情。

苗：噉點解唔直接用個cam睇住成個人呢？

以：人哋怕醜，唔想畀你睇佢個樣吖嘛。

靳：又啱喎。

以：想睇佢個虛擬嗰個……阿凡達，avatar。

苗：可以變做一個虛擬，即係……

靳：遲啲可以detect埋你個樣，即係可以……可以整埋……

苗：係啊，即係你個cam呢，可以望住個樣吖嘛。跟住佢知道你係個表情係咩、你啲手……眼耳口鼻啊、啲手係邊，噉佢咪變做你嗰個虛擬嗰個人。

以：可能而家平民嗰啲產品仲未去到嗰度，我諗。可能啲企業嗰啲，可能會去到嗰度。

靳：應該幾年之內喇，我諗都有。

以：我唔知啊，據我所知係噉啦，而家淨係去到睇到你隻手嘅啫。噉所以佢哋自己有一套手語係冇表情㗎。

苗：哦，手勢啦，即係。

[05:38]

苗：講起呢樣嘢呢，我之前有個朋友就腥咗一個廣告畀我睇，噉就係同語言有關，同埋同呢個VR都係有關嘅。佢就係一個叫做Noun Town嘅app啦，佢係一個用呢個虛擬實境去學語言嘅遊戲囉。你大家估下係……係咩嚟嘅？叫Noun Town，即係呢個名詞嘅小鎮啦。

以：點解我會諗咗去代名詞嗰度嘅？梳。係咪睇得太多啲……

苗：Pronouns。

以：啲政治嘢多。

靳：Pronouns，呢啲係noun啫。

以：入到去就係係噉講「我嘅pronoun係佢／佢／佢」噉樣。

苗：只係noun啫，係喇，唔pro嘅。

以：名詞，係咪……

靳：係咪有個地方，你行入去，跟住就會有好多唔同嘅嘢，跟住你就會學嗰啲嘢叫咩名噉樣？

苗：係喇，係喇，其實基本上……

靳：學晒全部都係noun，冇verb嘅，全部都係noun噉樣。

以：淨係得名詞，唔准郁嘅，唔准使用嗰啲物件。

苗：係啊，下一集……下一集就叫做Verb Suburb啊，可能。

以、靳：嘩！

以：押韻㗎，好犀利啊，三苗。

靳：不得了啊，真係。

苗：呢個Noun Town好似都係有其他字嘅，唔係真係淨係得noun嘅。但係佢嗰個主要嗰個成分，都真係學一啲係物件嘅單詞囉。因為你真係可以喺個虛擬實境度，同唔同嘅嘢去互動啦，或者有唔同嘅虛擬角色，你可以去對話，噉樣就從中學到一啲新嘅單詞囉。

以：哦。有冇話可以點樣互動法啊？例如。如果我哋唔想播片嘅話。

苗：噉要……真係要睇返條片。我都唔記得，因為。好快睇，睇 下先。

靳：係咪有得切生果㗎？好似。

以：切生果係Overcooked喎。

苗：Noun Town VR game……

以：喺三苗揾緊期間呢，我喺度諗緊，嗰啲切嘢啊……啲身體動作嗰啲嘅動詞呢，我想講喺外語學真係好難啊。

靳：係好……好難。因為好細啊。真係……真係啲好……

以：好……好specific嘅嘢囉。

靳：好難形容。

以：係啊。彈手指，定係捽啊……

靳：即係抌啊、掟啊、拋啊、掉啊……

以：掉啊。

靳：有咩分別？

苗：一啲用手做嘅嘢。

靳：你好難解釋畀人聽。

以：如果有人教我都好。

苗：我見到有一個……佢嗰個廣告呢，佢有一個場景，就係佢全部嘢都係灰色嘅，都係黑白嘅。然之後你只要每學一個新嘅單詞呢，佢就會將嗰樣嘢變成彩色囉。即係譬如有個……有個鋪頭噉樣啦，裏面有好多唔同嘅食物。你就學呢個……哦，呢個生果，呢個係西瓜！噉樣。你就學咗西瓜嗰個字啦。然之後啲西瓜就會變做彩色囉，你就可以搦起啲西瓜，我唔知可以點……可以切個橙噉樣。唔知仲可以做啲咩，應該都係用手做嘅。

靳：可以掟啲西瓜。

以：Fruit Ninja！

苗：變咗Fruit Ninja，噉就。係。暴露年齡嘅一個……一句嘢。係。

以：Angry Bird啊。喊出嚟。噉但係嗰個遊戲點樣知道你學識咗未啊？定係你㩒啱一次，Duolingo噉樣，啱一次就當你識嘞。

苗：冇玩過喎。佢……佢網上面嗰啲片都係好短啫，我又冇特登去深入去睇佢嗰啲遊戲嘅片段，所以都唔係真係好知。不過都係一個幾得意嘅app嚟嘅，即係用呢一個概念。即係因為VR呢樣嘢都好新啦，所以大家都喺度實驗緊佢究竟可以做啲咩囉。就算唔同嗰啲遊戲呢，我都睇過有少少講即係呢個遊戲設計嘅一啲……一啲YouTube channel，佢哋都有講即係VR究竟係咪一個導啲人入去玩遊戲嘅一個好好嘅方法呢？因為你如果要打機嘅話，你要識用鍵盤、要識用滑鼠，噉其實要學本身點樣去控制個鏡頭啊、望嚟望去呢，已經有……其實好困難喇，如果你唔熟嘅話。你冇打過機，完全冇打過機，一個可能老人家噉樣，你真係唔識㗎喎。但係反而呢啲虛擬實境就可以你就噉戴住個頭套，你周圍望，即係我成世都有做啦，我都……我知咩係周圍望，我知咩係用手去……

以：你係咪歧視盲人啊？

苗：去㩒……大部分人都知道咩係周圍望，咩係用隻手去掂啲嘢、去搦起啲嘢噉樣。噉所以就令到呢樣嘢係好大好大嘅潛能囉，呢個虛擬實境。噉所以就將呢樣嘢套用到學語言，其實都係一個好新嘅嘗試囉，就唔係好似……

以：即係攞走咗控制嗰個呢layer吖嘛。

The rest of the transcript is available to Patreon members.