苗：今日第三十集係咪要企喺度噉錄㗎？
以：點解啊？
靳：但係點解啊？
苗：因為三十而立囉。
[jingle]
以：歡迎大家返到嚟《絮言．狂想》第三十集，我係以色列。
苗：我係三苗。
靳：我係靳尼啊。
以：點解話咁快又去到三十嘅，好似二十仲係尋日嘅事噉。
苗：係啊。第一集好似係尋日嘅事。
以：第一集係⋯⋯
苗：唔係，都好耐喇，其實。
靳：好耐喇，呢個就係時間嘅流逝喇。
以：好喇，我哋今日可以點樣慶祝三十呢一個咁神聖嘅數字呢，噉我哋就講下數字啦。
苗：噉呢，呢個題目呢，其實就好早之前就已經想講㗎喇。噉但係呢，就畀我諗一諗然之後就決定呢，將呢個題目delay到今集先講。噉點解呢，噉大家睇下今集嗰個title呢就可能會知道㗎喇。
以：我哋好似幾乎未試過係諗咗標題先錄囉。
苗：係啊，呢個第一次。
靳：仲要係專登去到咁多集先至到呢個題目，就係因為個標題，要就個標題。
以：等咗幾個月。
苗：係啊，遲咗可能兩三個月。
以：我係第一集呢都係諗咗標題先嘅。
苗：哦，第一集就係，因為，即係大家都未知道其實講咩好呢，噉所以就諗定啲想講嘅嘢，真係寫晒point噉樣。而家呢就⋯⋯即係有少少point噉樣然之後就自由發揮啊⋯⋯
以：嗱嗱嗱嗱。
苗：有時講下題外話啊，好多tangent啊噉樣呢，噉就一集㗎喇。
以：不過呢喺入到今日嘅主題之前呢，我都想首先呢，多謝下大家咁耐以嚟嘅支持啦，我哋做咗三十集都⋯⋯每一集都擺好多時間落去嘅，噉我哋睇住我哋嘅聽眾越嚟越多啊，同埋越來越有熱誠啦⋯⋯
苗：唔。
以：仲會嚟到同我哋傾偈啦，反映意見啦等等呢，其實都好激勵嘅。
苗：係啊，尤其是呢，真係多謝支持我哋嘅patron啦，噉就最近就多咗一啲，即係比較活躍嘅patron，噉就喺我哋個Discord嗰度呢，就即係都有啲傾下偈啊，或者啲分享下自己嘅嘢啊，睇到嘅嘢啊，噉樣都幾好玩嘅，噉就如果大家有興趣一齊嚟傾呢，噉都可以去我哋嗰個Patreon就去支持我哋喇。
靳：係喇。
以：就算唔係呢，去YouTube多啲留言都開心㗎，都想睇下大家諗啲乜嘢，費事我哋一言堂吖嘛。
苗：谷engagement！鬧我哋都得㗎，都係有engagement。
靳：啱啊。如果大家對我哋嘅節目有啲咩意見啊，想我哋講啲乜嘢嘅題目啊，或者純粹係覺得我哋講嘅嘢都好有趣嘅話，都可以留返啲comment啊畀我哋，噉我哋收到其實都好開心嘅。
以：噉都希望我哋可以永續《絮言・狂想》啦。噉講起永續呢⋯⋯
苗：嗱。
以：噉我呢排呢有個係噉發生緊嘅一個trend啦，就係Worlde喇。因為日日呢就有人係噉喺度po啲格仔出嚟啦，噉可能大家都會見到朋友po出嚟呢，就唔知佢哋做緊咩嘢嘅。
苗：即係嗰啲黃色綠色嗰啲格仔囉。
以：黃色綠色黑色。
靳：跟住唔知幾多幾多over六噉樣嗰個。
苗：係喇。
以：噉都估唔到一個好簡單嘅遊戲，一個文字嘅遊戲會成為咗喺咁多唔同嘅地方都好興嘅一個潮流啦。噉嗱，萬一大家未試過去玩呢，都好
推薦大家試下嘅，不過我哋可以大概講下係咩嚟嘅先。
靳：噉其實，如果大家冇玩過嘅話，Wordle呢其實基本上就係一個估字嘅遊戲。佢個遊戲嘅目標呢，就係你要估一隻五隻字母長嘅英文字，係。噉呢個遊戲呢，下低呢就有個keyboard啦，噉有晒個二十六個英文字母啦。噉如果你呢，估咗一隻字嘅話呢，佢就會顯示出嚟。如果大家有玩過，例如話Mastermind呢啲噉嘅game嘅話呢⋯⋯
以：啊！
靳：噉佢就會估完一隻字之後呢，佢就會顯示，黃色呢就係你估中咗一隻字母，但係嗰個字母係唔啱位嘅；如果綠色呢，就係嗰個字母呢，既啱位又啱
嗰個字母噉樣啦。噉，喺呢個最classic，最基本嘅Worlde上高呢，噉佢就可以畀你試六次噉樣嘅。其實試六次都OK夠㗎喇，對於好多嘅字嚟講。
苗：正常就應該夠嘅，因為如果你唔係玩hard mode⋯⋯即係呢，你可以任估任用嗰啲字母嘅話呢⋯⋯你廿六個字母咋嘛，噉你五六中三十，噉其實係唔會⋯⋯即係應該唔會用晒嘅，應該六次之內係應該估到嘅。
靳：係喇。要估啱埋位啦，噉當然就係，即係要你估啱埋嗰隻字。如果嗰隻字唔係一個佢字典入面有嘅字呢，佢都係會ban你㗎，係冇得估嘅。
苗：係啊，噉都簡單啲嘅，某程度上。
以：唔會⋯⋯
苗：唔會蝦你，即係唔可以ABCDE噉樣打落去嘅。
靳：即係佢個謎底都唔會係ABCDE噉樣。
苗：係喇，噉唔係⋯⋯random嘅。
以：但係佢就確保咗你唔會嘥咗一次機會囉。
苗：係啊。
以：係啊，噉同埋佢有個有趣嘅特點呢，就係佢係⋯⋯喺原版裏面呢，係每日一次嘅啫，好似小朋友《每日一篇》噉樣。噉就⋯⋯
苗：呢個字係全世界都一樣嘅，噉所以，大家點解見到即係⋯⋯大家嘅social media上面都有好多啲格仔啦，就因為大家嘅字都一樣嘅，噉所以就可以比較，就可以post，哦，我原來今次三次就估到，或者我兩次就估到，或者你⋯⋯嘩，你六次都估唔到，噉樣就可以⋯⋯即係玩呢啲嘢囉，有一個social噉樣嘅角度囉，呢一個game。
以：係啊，群體噉樣玩遊戲囉，即係好似Pokémon Go噉，大家一齊玩，之後可以比較下⋯⋯
苗：係啊。
以：就可以分享下自己嘅心得，噉同埋呢，佢⋯⋯你見人哋share嘅時候呢佢就唔會直接show個字出嚟嘅，就係用嗰啲格仔，可以畀人知道自己估嘅結果係點啦，有幾成功啦，但係同時間又唔會劇透咗人哋囉。
苗：係喇。
以：其實我覺得有少少似呢⋯⋯喂，唔知你有冇玩過啊，以前報紙嗰啲crossword嗰啲呢⋯⋯
苗：係啊，係啊。
以：或者數獨呢，每日一個噉樣，係喇。同埋呢，你哋get到我講咩呢，證明你老喇。
苗：一開始我以為呢，呢個game係crossword嗰啲嘢嚟㗎。我見到啲人post，即係睇嗰啲格仔，咦又有好多個字喎，我就以為真係類似crossword嘅嘢囉。跟住「唉，咁煩啊，點玩啊，咁多個字」，原來係估一個字噉樣，都好快玩完嘅，噉所以之後就開始試下囉。
以：係啊，睇下你幾認真啦，不過呢我覺得估估下呢，去到中間都會棘好耐，即係你好想用盡每一次機會啦⋯⋯
苗：下～
以：但係同時間呢，你淨係得堆字母呢，好難砌到字出嚟嘅。
苗：都有技巧嘅，玩呢個。
以：噉你哋有咩技巧啊。
苗：其實都係用一啲⋯⋯可唔可以叫語言學嘅一啲知識呢，或者啲英文嘅⋯⋯
靳：都係嘅。
苗：知識啦，係喇，即係因為英文⋯⋯噉你啲字母唔係亂咁砌㗎嘛，啲聲都唔係亂咁砌嘅，噉點都有啲規律啦。噉我哋呢就有一位識嘅人呢，就寫咗一篇
講Wordle嘅文啦，噉就大家⋯⋯我link去show notes嗰度。噉呢，嗰篇文呢，就提到一個叫做音響層級嘅概念啦，就叫sonority啦，即係一個語言裏面每一個音呢，都有分佢係⋯⋯即係大聲啲吖定係細聲啲嘅，譬如話，T或者P啊呢啲音，[t] [p]噉樣呢，就叫做細聲嘅音啦。噉啦，係一啲元音嘅話，譬如話[a]啊、[ɔ]啊、[i]啊，噉呢啲就叫做大聲，叫做響啲嘅音。噉呢英文普遍啦，比較響嘅音就會喺個音節嘅中間嘅，噉而一啲冇咁響就會喺側邊啦，噉所以就會有「trap」就唔會有「rtap」噉樣，即係，係喇，或者比較少啦。噉當然都有例外，噉呢個就可以睇返嗰篇文啊，佢就講嘅。噉就可以用呢啲噉樣嘅規律呢去估，一啲咩字係比較會常見啲囉，即係你唔可以亂咁擺埋一齊嘅時候，有個限制，就可以縮窄咗你可以估嘅範圍囉。噉呢一個係一個⋯⋯算係一個trick啦。即係，知唔知大家有冇去，特登用呢啲噉樣嘅技巧呢？
以：我冇。
靳：我就會用一啲技巧嘅，因為英文入面呢，如果可能有查過或者喺其他地方睇過呢，你會知道其實英文呢，喺字母入面最常見呢，首先係E啦，然後係T，
跟住A、I、O、N噉樣一路落去⋯⋯
以：哦～
苗：唔！
以：即係Scrabble嗰啲分數⋯⋯
靳：類似Scrabble嗰啲func⋯⋯Scrabble唔係完全跟呢個最常見嘅字嘅，但係佢係差唔多係噉樣嘅，噉所以我一開始我就會用一啲好常用嘅字母先啊，例如話會用「noted」呢隻字噉樣。因為佢又有N啦，又有T啦，又有E，又有O噉樣。
苗：啊。
以：我係用「raise」先㗎喎。
靳：都得喎，S都好常見𠺢嘛。
苗：都幾好喎。
以：因為有三個元音，係，同埋有S有R，都係常見嘅。
苗：係囉。
以：噉你就淨係試嗰啲常見嘅字母呀，定係⋯⋯
靳：會試咗常見嗰啲字母先囉。即係，你覺得其實，如果呢啲全部都已經排除咗，即係如果佢慢慢真係冇，去排除咗之後，噉其實你淨返嘅選擇其實都少。噉如果你中咗嘅話噉你咪已經知道有啲咩字喺度，噉跟住你咪可以繼續估啊，繼續試噉樣囉。
以：嗯，嗯。好似呢大家，一開始都係求其玩，之後玩玩下呢，自動自覺噉樣就會諗咗啲噉嘅技巧出嚟。
苗：係啊，每一次就會用返同一隻字嚟開始。
以：係。我就會好鍾意諗嗰啲，即係英文容許嘅組合啦，即係⋯⋯有啲好明顯嘅，譬如CH呢啲組合就好常見啦。
苗：嗯。
以：噉但係譬如話，尋日嗰個啦，「wince」啦，噉有個N，有個E，之後中間可以擺啲咩其實都好多限制㗎喇，即係⋯⋯
靳：係啊。
以：可以擺G，但係G畀佢ban咗就，淨返一個㗎喇。
苗：係喇。
以：即係去到諗呢啲噉嘅可能性囉，噉因為英文其實都好多呢啲規律嘅，噉所以已經可以心裏面排除咗啲冇可能嘅組合囉。
苗：係囉。

The rest of the transcript is available to Patreon members.