絮言.狂想#026:鍵入日文㩒實十個手機掣

打中文字點樣最快?

十粒掣,可以打到幾多語言?

你雙手下嘅字母,又因乜解究好似亂咁擺嘅呢?

今次《絮言.狂想》輕輕鬆鬆講下我哋見過嘅各種鍵盤、輸入法。

喺YouTube收聽

快啲成爲 Patreon 會員,有以下豐富嘅額外內容!
-用摩斯密碼都打到字?
當然仲有足本逐字稿,同埋投票、圍爐吹水添!

本集特別鳴謝:Klaus、Anthony、和音、サム、阿擇、Ceci

Subscribe to our newsletter!

靳:QWERTY keyboard個名就係因為佢喺最上高嗰一勒就係Q W E R T Y,所以叫QWERTY keyboard。

以:好多人唔知㗎,佢哋好shock㗎。

靳、以:吓?

苗:「啊,係喎!」噉樣。

以:「吓,原來喺度呀?」噉樣。

靳:「啊,原來嗰個名就係噉樣㗎喇!」噉樣。

苗:就唔係叫ASDFGH噉keyboard噉樣,因為比較難讀,中間。

靳:係,唔係ASDFGH,或者ZXCVB。

苗:叫做zxcbcxwu1@#$%^Y keyboard噉樣。

以:做乜嘢啊,我哋。

[jingle]

以:歡迎大家返到嚟《絮言.狂想》第廿六集,我係以色列。

苗:我係三苗。

靳:我係靳尼啊。

苗:我每次呢,我每次聽阿靳尼去自介呢,佢話「我係靳尼啊」呢,我都諗下,會唔會有人覺得佢個名係「靳尼亞」囉,三個字。

靳:唔係㗎,我係話「靳尼a3」。

苗:a3,係咪啊?即係要分清楚長短㗎喎。

靳:係啊,短嚟㗎。

苗:即係其實粵拼係唔齊㗎嘛。係有單獨嘅短a㗎。所以a3同aa3係唔同㗎,大家要分清楚。

以:唔同ga3。

靳:係喎,大家近來有冇啲乜嘢玩啊?有冇啲咩做啊?平時。

苗:都係好少喎……

以:玩倉鼠囉。

苗:但係第一次去研究呢個唱K嘅呢樣嘢,然之後就揾到一間……原來呢道都有,都有幾間。噉所以就卜咗遲啲會去囉。但係呢,有個問題,就係之前呢,就聽人講啦,呢間嘢係有好多唔同廣東話嘅歌啦,即係普通話、廣東話都有好多啦。跟住之後我就去佢個網嗰度,佢就有個叫做完整嘅歌單啦,即係佢寫住聲稱係「full list of songs」噉樣嘅物體,然之後㩒落去:冇嘅喂?全部都英文嘅?噉樣。跟住㩒咗成十分鐘,最後呢,我先發覺原來個中文版嘅網囉,要㩒入去嗰個中文版嘅網,先至會有嗰啲歌囉。噉所以就唔係full list囉,嗰個根本。即係嗰啲日文、韓文歌都係噉。

靳:會唔會你卜咗個房,跟住個房話:唔係中文版啊,呢個英文版嘅房嚟㗎,噉樣。跟住想……

苗:呢間房係英文房!

以:入錯房啊你!

苗:之後佢同你講:你英文個網卜㗎喎,所以就冇!

以:呢啲明確分工啊。呢個網淨係可以卜呢間房,嗰個網淨係卜嗰間房。

靳:係啊。因為咁啱呢,我聽日呢,又會去唱K噉樣嘅,噉就……出咗街之後,就應該我唱咗噉樣㗎喇。噉我平時都好鍾意唱啦,噉我發現呢,喺香港嘅K房入面,其實都有好多好奇……即係大家平時唔會覺得K房入面係會有嘅歌,其實都會喺度噉樣㗎。

以:咁有趣?

苗:例如啲咩?

靳:大家都會可能期望呢,嗰啲K房入面啦,大家可能揾都會揾到啲……例如話韓文歌啊、揾到啲日文歌啊,噉樣啦。噉呢,如果大家細心啲去睇呢,其實呢,都會有啲菲律賓文同埋泰文,甚至係印尼文嘅歌喺入面嘅。

苗:好似都好多喎。

靳:係啊,都好多㗎,因為其實好多即係工人姐姐啊,或者其他本身喺香港住嘅……即係泰國人啊、菲律賓人啊、印尼人,其實都係會唱K。噉所以佢哋都有一個……好多呢啲選擇喺入面啦。噉但係如果你會……你嘗試去揾嘅話呢,會有更加多呢,你意想不到嘅歌喺入面㗎。例如呢,唔知各位聽眾有冇聽過啦,以前有一首好hit嘅歌呢,係做咗個meme嚟嘅。唔知大家知唔知numa numa呢首歌?

以:估到你講numa numa啊!

苗:係啊。呢首呢,佢係當英文歌㗎,如果你去揾語言分類呢,佢係唔識㗎。即係佢總之西文……西方語言呢,都會擺落去英文囉。

以:唔係啊嘛,你講喺香港呀?

苗:係啊,係啊,香港啊。即係你可以語言選曲㗎嘛。有好多即係嗰啲即係印尼文啊、菲律賓話嗰啲呢,就可以就噉揀嘅,真係有個category。但係嗰啲歐洲語言呢,即係嗰啲despacito嗰啲呢,係英文囉,當係。因為佢冇一個category係西班牙文,或者羅馬尼亞文,即係點會有啫,係咪先?

靳:所有歐洲語言都係英文。

以:即係好似喺歐洲,所有亞洲語言都係「亞洲語言」囉,Asian languages噉,好似去圖書館呢,一勒噉樣就係亞洲語言。

苗:唔係啊,係好似去蒲飛噉樣啊。Asian buffet,即係所有嘢都有得食。

以:啊,係啊,嗰啲。

苗:壽司隔籬有呢個泰式炒飯啊,隔籬有呢個……呢個點心。或者撈埋一齊。咩啊……Red MR係多啲外語歌囉,多過Neway囉。

靳:但係啲好冷門嗰啲……你唔expect會揾到嗰啲歌呢,其實係Neway多啲。

苗:呢個我又冇乜研究。

靳:因為呢,RED MR呢,係冇Dragostea Din Tei呢首歌。By the way,Numa numa呢首歌原名叫Dragostea Din Tei,係一首羅馬尼亞文嘅歌。

苗:即係喺唔知咩樹下嘅愛吖嘛。唔知乜乜樹,linden tree啊,唔知中文叫乜。

靳:有啲人話係咩菩提樹下,但係我唔知嗰隻係咩樹啊,真係。

以:點解佛經嚟嘅?

靳:變咗佛經!

苗:Dragoste就係love啦,然之後tei係嗰樖樹囉。

靳:係喇。噉同埋呢,因為我以前呢,都會……我以前工人姐姐……我好似講過呢樣嘢喇。

以:係啊,Bollywood,係咪啊?

靳:Bollywood吖嘛,有一啲Bollywood嘅歌啊,同埋一啲印尼文嘅歌呢,跟住我去唱K嘅時候,其實都係會唱嘅,噉樣。噉所以就……我同啲朋友去唱嘅時候呢,佢哋就會望住我solo。因為佢哋全部都唔識唱。

苗:「嘩,你點解會識嘅?」噉樣。Nerd。

靳:Nerd。

以:好明顯啦,係咪啊?即係你見呢,我哋同呢班語言迷friend呢,去唱K呢,或者我哋自製唱K呢,即係開個電視喺度,之後抌啲YouTube上去啦。

苗:係啊,都係……

以:唱嚟唱去都係啲我聽唔明嘅嘢啦。

苗:冇一首歌係超過50%嘅人聽得明。

以:首首都係得一個人、兩個人知道咩嚟嘅,噉……係啊,例如……我唔知喎。會唱國歌啦好似。

苗:唔同國家嘅國歌啦。

靳:各個國家嘅國歌。

以:各個國家嘅國歌。

苗:各個國家嘅國歌。係咪又要……哎?去返嗰集。

以:我哋已經做過「各個國家嘅國歌」嘞。仲有我諗起你哋會唱咩呢?仲有你哋好多啲冇真係學嘅語言,因為我留意到你哋係會唱啲你唔識講嗰隻語言嘅歌㗎嘛。我就冇呢個習慣嘅。

苗:哦,係囉。

靳:你講到好似壞習慣噉樣。

苗:「我就冇呢個習慣嘅,哎啊,好唔健康㗎。」

靳:「我就冇呢個習慣嘅。」

以:你自己對號入座嘅?

苗:我都……都成日喎。噉你世界上咁多語言,即係唔係學得晒啦。但係有啲好聽嘅歌,都會想學囉。噉所以都識好多……真係完全唔識講嘅語言嘅歌囉,淨係識唱嗰啲囉。但係有時點解都未必明得晒㗎。即係查過可能一次噉樣,唔記得噉樣。

以:哦,即係好似香港啲𡃁妹學韓文歌噉樣!即係佢哋未識韓文嘅,之後就……就係逐隻逐隻音背晒佢噉。係啊。噉你喺蘇格蘭嗰度,個選擇有幾廣闊啊?

苗:即係語言嗰方面呀?啲歌。

以:係啊,係啊。即係有冇啲咩numa numa嗰啲呢?

苗:佢又其實都唔係好罕有嗰啲嚟嘅,即係佢通常就……即係英文啦,跟住外語歌其實係得……四隻呀?四、五隻囉。都係有即係應該廣東話、普通話啦。

以:四、五隻歌,定四、五隻語言啊?

苗:語言,語言。好多㗎,其實都。我睇嗰個中文歌單呢,應該佢就廣東話同普通話都有。佢好似都幾百頁㗎,即係好……好大㗎,嗰個歌單。其實同英文嗰個真係不相伯仲。但係如果係韓文、日文,嗰個就好似百幾頁囉,即係每一本百幾頁囉。其實都好大。

靳:噉其實都好多喎。

苗:係啊,係啊。西班牙文就好似少啲。

靳:但係佢啲歌up唔update先?最緊要。

苗:好似去到一六年嘅。所以嗰啲姜濤嗰啲就冇嘞。

靳:哎啊,冇姜濤添,唔開心。

苗:嗰啲Mirror嗰啲都冇啊。

以:應該好快有香港人開㗎喇。就淨係呢啲!

苗:淨係得呢啲。

靳:噉會唔會有啲蘇格蘭……

以:本土語言!

靳:即係例如話可能高地蘇格蘭話嘅歌噉樣啊?

苗:嘩!呢個真係唔知喎,要揾下喎。

以:可能歸入英文。

苗:未必有囉,我覺得。可能啲……都係英文。

靳:但係喺蘇格蘭唱K喎,冇高地蘇格蘭文嘅歌?即係至少〈Alba〉都要有啩?

苗:我去揾下,我再話畀你聽有冇。

以:好,待下回分解噉。

苗:係。

[08:32]

以:好啦,噉講完K房嘅語言選擇啦,我哋講下其他語言選擇先。跟住就講下你電腦上面嗰啲啦!

苗:Smooth。

以:因為我……例如話我哋有一次講過Signal有廣東話啦,噉樣。噉佢系統裏面有啲咩語言係一回事啦,喺個app有啲咩語言又係嗰一回事啦。但係我哋今次講下我哋可以用啲乜嘢語言嚟到輸入先!噉我哋都留意到有好多唔同嘅選擇啦,即係鍾意學語言嘅人呢,多數都會間唔中會cap下你手機有啲咩輸入法噉樣畀人睇。

苗:係啊,嗰啲……嗰啲語言嗰啲group呢,有好多都會cap「呢個係我個keyboard」噉樣,然之後有好多個語言,一大拃噉樣。

以:要碌幾版紙噉。

靳:冇啊,大部分都係我唔識講㗎喎。

以:手機會好啲,因為手機你一個list噉樣吖嘛,噉樣碌落去。但係電腦呢,我唔知MacOS係點啦,但係喺Windows,要逐個㩒,space space space㗎嘛。

苗:Mac呢,我就用過……即係兩個都用過啦,即係Windows同Mac。噉樣我知道Mac呢,就係可以……有一個shortcut係可以換到去上一個你用緊嘅keyboard,即係你可以兩個之間噉樣,不斷換囉。但係Windows嘅話,係到而家,我都發現唔到點樣做呢樣嘢。係好似唔得㗎。

以:我喺手機係噉樣㗎。即係我用Gboard呢,係噉樣㗎。即係你㩒……

苗:係囉,即係㩒一下吖嘛。

以:會轉咗去對上一個。但係呢,我check咗啊。你可以自己設定某一個shortcut,就直接跳去某一個語言囉。 苗:嗰個唔work㗎喎。有啲得,有啲唔得㗎,我試過,係啊。

The rest of the transcript is available to Patreon members.