苗：即係依啲developmental嘅嘢，你唔係用一個時間上，你唔係用佢嘅本身嗰個年齡，physical嗰個年齡去界定㗎嘛。你好多人……可能個stage唔同嘅，你未必可以用個chronological age嚟計。

以：你而家講緊英文，師兄……你成段英文嚟㗎。

苗：嗰個……我唔知點講啊，即係……

[jingle]

以：歡迎大家返到嚟《絮言．狂想》第二十五集，我係以色列。

苗：我係三苗。

靳：我係靳尼啊。

以：唔小心chok咗聲添。係啦。

苗：唔小心……而家我哋已經專業到唔小心就chok咗聲㗎喇。唔小心噉樣就chok咗個聲出嚟。

靳：變咗電台聲啊。

以：唔係囉，平時講嘢係唔用呢把聲㗎。錄音嘅今日呢，就係萬聖節，所以祝大家萬聖節快樂啊！

苗：應該已經十一月頭喇，大家聽到嘅時候。同埋噚晚就瞓多咗一個鐘。

以：係嘞，我哋喺英國啱啱轉咗冬令時間。

靳：呢個垃圾嘅夏令時間終於完結咗。

苗：即係係嘞，唔講語言住，即係冬令時間、夏令時間呢樣嘢，真係……真係好……好低能㗎，喺呢個現代。

靳：極之戇居，係啊。

苗：即係冇用囉，即係大家睇CGP Grey嗰條片，係喇，show notes。

靳：Show notes。

以：咁快已經離咗題？

苗：……有show notes！已經有一個唔關……

以：但係我覺得起碼而家多數嘢都自動轉呢，會好咗好多囉。反而屋企掛個鐘噉樣呢，或者個微波爐有個鐘噉，嗰啲就麻煩嘞。

苗：哦，係啊，係啊，係啊。我焗爐嗰個鐘，我冇校呢，跟住今日我嚇親囉。我煮飯嗰陣：「吓？已經過咗咁耐……啊，唔係，哦。唔記得校啫 」噉樣。

以：係啊，係啊。但係即係譬如話你喺手機set個event噉樣啦，噉佢會自動幫你校返時區。

苗：係啦。噉都幾好嘅。

以：噉都好啲。Set鬧鐘都會。

苗：但係好得意嘅，即係兩點去返一點噉樣。好似time travel。

靳：但係我哋今日即係就錄嘢嘅時間，其實都要就返呢個冬令時間。我啱啱都唔知道其實已經轉咗做冬令時間。

以：喺香港應該唔會知，除非你有好朋友喺英國，噉就哎啊！（喊）

靳：好朋友係……

苗：或者其他有夏令時嘅國家。都好多嘅，全世界。

以：係，係嘅，好多。唔應該咁多。

苗：應該要零噉樣吖嘛。

以：之後咩歐洲、美洲又唔同㗎嘛，唉，算啦。

苗：係啊。歐洲、美洲、澳洲係三個唔同時間轉㗎囉，所以係亂晒嘅。

以：澳洲梗係啦，澳洲就調轉咗嘅。係嘞。不過大家都不妨留言講下啦，大家有冇慶祝萬聖節啊，即係有冇受呢個西方文化嘅侵略呢？

苗：應該一街都係嗰啲粉紅色衫啊、綠色衫嗰啲㗎喎。

以：即係好似我哋上次講嘅聽唔明嘅人啦，係嘞。大家如果扮《魷魚遊戲》，記住學韓文先喎。係嘞。學一個字夠㗎喇。

苗：學嗰一個字，大家都知道係咩字。

以：係喇，大家都心中有數喇。

靳：係喇，淨係睇IG已經夠啦，萬聖節係應該避開呢個中西區㗎，我覺得。

苗：係啊，暫時即係而家噉嘅情況都最好……多人地方都避免啦，儘量。

靳：係啊。

[3:05]

苗：一啲唔係幾好嘅語言新聞啦，我哋有一啲。唔算係好消……壞消息啦，算係。噉第一個呢，就係呢個《早辰。早晨》呢個節目呢，噉就已經停播喇，係咪啊？佢就變咗做另一個節目，變咗做一個共產黨整出嚟，唔知咩……即係嗰啲咩宣傳部定唔知乜嘢整出嚟嗰啲節目囉。

靳：好似啲黨史嘅嘢嚟㗎，好似。

苗：就本身呢，即係《早辰。早晨》呢個節目，就喺……喺即係朝早啦，噉有啲新聞啊、天氣資訊。噉佢個最特別嘅地方，就係佢有即時手語傳譯。即係佢成個節目係直播嘅，而同時有手語傳譯囉。噉但係而家就冇咗呢樣嘢。噉好多嗰啲聾人羣體都覺得係一個損失囉，即係對於聾人羣體，冇咗呢一個接觸資訊嘅渠道，噉又……即係又難咗囉，去接觸資訊。又要睇字啊，呢樣嗰樣。就冇得睇新聞，好似我哋平時……

以：我都唔想睇字。

苗：冇得好似我哋平時即係睇電視、睇新聞噉樣囉。

靳：十月廿二號完咗。

以：係啦，噉本身我都好少睇呢個節目嘅。因為唔係朝頭早嘅人，多數起咗身都已經過咗幾個鐘喇。同埋而家唔喺香港啦，係啊。不過都覺得呢個係好有用嘅節目嚟嘅，即係就算對於唔係聾人羣體嚟講，即係因為朝頭早，一開個電視就係最新嘅消息，就好似我以前學德文嘅時候，朝頭早聽德國新聞噉。係啊。噉而家如果朝頭早變咗睇啲唔關事嘅嘢呢，就好似唔知做乜噉，即係食早餐嘅時候，睇呢一個中共黨史……當然了解中共黨史係非常之有意義嘅嘢啦！噉但係冇手語就可惜啲囉，係咪啊？

靳：噉所以我哋係咪要睇下嗰個「中棟港史」嘅節目係咪有返手語傳譯，係……

以：「中棟港史」啊，乜嘢？

靳：嘅節目。

苗：咩話，「講屎」？

以：唔係啊，「港史」……香港史啊。好似……好似唔知要ban定點樣，要，呢個。係啊。

苗：係囉，噉我就冇睇過呢個新嘅節目，噉我就不予置評喇。

以：哦！你有冇睇過《早辰。早晨》啊？

苗：其實冇！

靳：我試過重播嗰陣時睇囉。

以：但係重播就冇咗個意義啦嘛。

苗：噉都叫做即係睇過嘅。

以：噉其實而家香港嘅電視上面，仲有幾多呢啲手語嘅節目呢？

苗：真係唔知。

以：因為我喺英國呢邊見到好多㗎喎。即係又唔係好多嘅，但係間唔中會無啦啦有個節目有手語噉囉，都幾有驚喜。但係以前喺香港，就冇印象見過囉，完全。除咗呢啲資訊性之外。

靳：係啦，資訊性嘅節目會比較多啲囉。港台節目有時會有囉。

苗：港台會多啲嘅。同埋啲政府廣告囉，通常都係。

靳：通常係嗰啲……例如話可能見到啲咩選舉論壇啊、《城市論壇》啊嗰啲，可能會見到啦。

苗：係啊，嗰啲……同埋立法會本身都有嘅。有即時傳譯嘅。

以：噉睇返官方資訊呢，而家係仲有《新聞天地》、《盤點政策》同埋有……呢個好似唔係正常節目嚟㗎喎，就係呢個立法會選舉嘅資訊短片。短片？短片唔算係節目啦，係咪啊？

靳：即係嗰啲略略介紹下啲人噉樣嘅啫。

以：即係恆常嘅節目就得兩個囉。

苗：嗯，係啊。噉而家又少咗一個啦。

以：都係嘅，噉我都覺得呢啲公營嘅電視係應該照顧多啲唔同人嘅需要。不過可能又好似上次講噉樣：「哎啊！你哋有個手語傳譯喺度，阻住我睇電視啊！」

苗：呢個係咩……又係呢個……

以：上次講緊聾人睇字幕，今次係手語。

苗：我又真係未聽過有人有呢個噉樣嘅講法。

以：冇啊，講下啫。

苗：就算係嗰啲網上嗰啲呢，即係大家都知道，即係網上啲留言都係口不擇言㗎囉，即係……但係都好似冇乜人去反對呢樣嘢。未見過啦，暫時。噉有就一定有嘅。不過就似乎香港都算係支持呢樣嘢。

以：比較體諒啲。但係可能就係喺呢個支出方面，就係上頭唔想要啦：「唉，又要畀錢請個人返嚟做。」係囉。

苗：同埋你……同時你要有限嘅時間同資源，你淨係可以播咁多嘢，噉你應該擺落去邊度呢？個資源。噉港台就選擇咗去播呢個……或者唔係佢哋選擇啦，或者係佢哋要播呢個新嘅……

以：《敢教日月換新天》啊，叫做。中共奮鬥史嚟㗎，紀錄片，OK。吓？紀錄片呀？我以為係……

苗：咪嗰啲乜乜「奮鬥」嗰啲嘢啦，係啊。

以：噉希望佢加返手語啦，係啦。即係聾人都需要睇呢個奮鬥史嘅，係嘞。好，噉唔講呢個喇。

[7:50]

苗：係喇，噉另一個關於電視……好啲嘅消息啦，噉就係澳洲呢，就一個新嘅劇集，噉就有好多廣東話對白喎。噉佢就唔係成套嘅，但係佢就係聲稱係一個有大量廣東話對白嘅本土嘅澳洲劇啦，噉就叫做《新金山》啦，New Gold Mountain。噉佢就講呢，十九世紀嘅時候，即係澳洲有呢個淘金嘅熱潮啦。噉就有好多喺中國去嘅移民，噉就好多呢，都係講廣東話嘅，或者一啲唔知咩嘅粵語啦。噉佢所以就有好多好多嘅廣東話對白。佢就話三成係囉。

靳：噉都幾多喎。

苗：係啊，都好多啊。即係佢一個英文國家嘅劇嚟講，係算多啊。即係篇文呢，佢就中間都話呢，佢嘅廣東話呢，都係同即係現代好唔同啦。噉所以佢都有改，即係佢有參考一啲好似古裝片，有少少……少少好似古舊啲啊、老積啲啊，噉樣嘅廣東話嘅。噉就即係睇下做唔做到嗰個效果啦，我就未睇過嘅。其實係咪出咗啊？好似係啊。

以：好似出咗喎。我哋而家即刻live睇！

苗：喺呢個SBS呀？

靳：唔知會唔會分「慈」同「遲」呢？

苗：噉就未必喇，即係嗰個「遲」同「慈」，係咪啊？呢啲就睇嗰個演員同埋嗰啲research嗰啲人嘅功力喇。即係啲口音點樣。

以：應該再舊啲喎，我諗。因為佢哋係幾個世紀前㗎啦嘛，係咪啊？即係十九世紀，係嘞。

苗：都係嗰啲一八幾幾年噉樣囉。

靳：噉係咪分埋呢個「𫐶」同埋「日njat6」啊？

苗：唔係，噉佢就篇文呢，就話佢係咩「要求咬字」嘅，「就會希望避免到啲現代人嘅……」嗱，佢係講「懶音」啦，佢呢篇嘢。噉佢就會要求佢哋「清楚發音」嘅。噉但係有好多其實我哋一個可能唔係好熟廣東話演變歷史嘅人會未必知嘅嘢囉，即係有好多其實而家已經唔分，而家已經……我哋直頭唔知以前有分嘅嘢，唔知佢哋有冇做囉，呢個就。

以：Shaa1田，係咪啊？

苗：係啊，即係嗰啲沙田啊，嗰啲慈雲山啊，嗰啲呢。

靳：慈雲山。

The rest of the transcript is available to Patreon members.