以：啲阿爾巴尼人……啲阿里巴……啲阿爾巴尼亞人呢，好鍾意一走埋去，同佢講話：「你係阿爾巴尼亞人！」噉樣。
苗：就「被阿爾巴尼亞人」。
以：係嘞， 就係因為佢嘅語言係同阿里巴夷亞……阿爾巴尼亞話好似嘅。
苗：呢個係intro嚟㗎。
[jingle]
以：點啊？你哋有冇拍到啊？
靳：有啊。
苗：有啊，但係拍咗……喂，你唔得喎，你拍嗰幾下。
以：你哋一個拍咪得囉。
苗：嚟多次囉！不如。
[拍]
以：我見到靳尼呢，係有假動作。
苗：佢扮咋！佢扭波。
靳：我插水啊。
苗：係喎，你要……你都拍返三下，你補返落去。
靳：哦，好啦。
以、靳：好嘢！
苗：搞掂！
以：拍緊手就唔爭在講啦，好！歡迎返到嚟《絮言．狂想》第五十集啊！今日呢，就係我哋比較重要嘅一個數目啦，因為五十啦，係嘞， 我哋都做咗兩年幾嘞。同埋今日亦都係我哋呢個節目喺YouTube上面搬去新屋企嘅日子啊！
眾：好嘢！
苗：小朋友yeah！
靳：好嘢！我要強迫以色列呢，就擺嗰個小朋友yeah嗰個聲效落去。
以：唔……唔好啦……唔好啦。係嘞！我係以色列！
苗：我係三苗。
靳：我係靳尼啊。
以：我見大家心情都好好啊，今日。好似已經有啲慶祝嘅感覺啊。好似啱啱已經有啲埋下伏筆嘞，因為今日呢，三苗同靳尼呢，佢哋就重聚喎！係咪啊？
靳：係啊。
苗：講唔講得㗎？
靳：我哋存在喺同一個空間入面。
以：係啊。噉至於佢哋喺邊度呢？大家就估下嘞。好似三苗係即係我哋個……嗰個middleman噉樣，因為我同三苗試過一齊錄啦，之後三苗同靳尼試過一齊錄啦，但係我係成世人都未見過靳尼真人㗎。
靳：係啊。
以：係咪啊 ？係啊，你幾時嚟啊？我哋仲等緊做嗰一個重聚……即係唔係重聚，第一次聚嘅……
苗：係啊，要三個人一齊啊。
靳：要大家一齊坐喺個梳化度，跟住錄一段噉樣，係喇。
以：坐喺梳化度，唔知吹乜嘢水噉樣。
靳：吹水，係。
以：係啊，吹啲完全同語言無關嘅嘢。嗱！我哋……我就唔透露三苗同靳尼喺邊度啦，噉但係呢，靳尼你之前又去咗邊度呢？
[02:23]
靳：我係去咗瑞士銅鑼灣……唔係，瑞士同荷蘭啊。最衰我唔係去德國同荷蘭啦！我就可以講北角銅鑼灣囉。
苗：乜嘢啊？大家等咗成個月呢，又……即係就係等呢啲啊，係咪啊？
靳：係啊，我係……我係噉㗎。我係專登去，就係為咗搞呢個gag啊。
苗：即係特登去嗰個國家，就係為咗可以有呢個gag。
靳：為咗搞呢個gag，係啊。呢個gag好貴㗎。
以：點解你唔好地地去德國呢？
靳：因為同我去嗰個人唔想去德國。其實我唔想，係。
以：大家有耳福喇，等咗個幾月，就係為咗可以聽靳尼啲爛gag。
靳：係喇，唔好意思，大家。就係因為我去咗一啲……係喇，一啲地方。
苗：一啲好遠好遠……
靳：好遠好遠嘅地方。同埋啲好凍嘅地方。
以：好凍咩？啊，係喎！你係咪上咗咩雪山噉啊？
靳：上山吖嘛！係啊。上雪山。搭咗……
苗：你去咗……你去咗嗰個三角朱古力。
靳：係啊。
以：三角朱古力上面嗰個山，嗰個阿爾卑斯山嚟㗎？
靳：嗰個係阿爾卑斯山嚟㗎，嗰個就係Matterhorn，馬特洪峯囉。
苗：好有雄風。
以：完全冇諗過添。咦？三角朱古力係喺……係咪瑞士㗎？定係邊度㗎？
靳：好似係？
苗：嗰啲嘢囉！瑞士，即係你知啦，瑞士都係嗰啲嘢，即係咩錶啊、牛奶啊、朱古力啊，嗰啲嘢，火車啊，嗰啲嘢。
靳：如果唔係就偷咗人哋個地標喎。
以：睇下先。喂！阿爾卑斯山唔係屬於瑞士㗎喎！仁兄。個朱古力係瑞士嘅，係嘞。
靳：個朱古力係，係啦。跟住你就會見到一堆人喺度搦住個朱古力，跟住喺度對住個山喺度影相。我覺得係好遊客嘅嘢嚟㗎。
苗：佢呢個遊客啲吖，定係去比薩斜塔嗰度……
靳：去㧬個比薩斜塔……
以：㧬嗰個斜塔……
苗：應該係一樣咁多人做。
以：我唔知喎，我覺得比薩斜塔嗰個公廁啲喎，比較。
苗：嗰啲容易啲去吖嘛，唔使行……唔使上山。
以：噉你有……你有冇帶個朱古力去先？
靳：冇啊！
苗：佢隔籬有冇得賣啊？
靳：應該有㗎，但係我唔想做啲咁……咁行嘅嘢囉。
苗：你去嗰度，然之後而家隔籬嗰個舖頭，然之後你去買一支三角朱古力。
靳：有嘅，有得賣嘅。但係唔好噉樣啦，係……係啦。
以：梗係啦。
靳：去搭佢嗰啲好斜嘅火車已經夠㗎喇，我覺得。我喺度諗緊呢，去瑞士同荷蘭呢個trip呢，有啲咩語言嘅嘢好講啦。但係個問題就係呢，我去瑞士，我本身諗住：哎，睇下可唔可以講德文啦！但係個問題就係呢，我覺德文呢，變咗好似我同香港人講普通話噉樣囉，我會覺得。
苗：啱啊！
以：哦，係喎！
靳：係嘞，所以我就直情就講英文就算嘞，其實就。係嘞。
以：其實係有啲悲哀喎。
苗：但係如果你學瑞士德文嘅話呢，啲瑞士人又會問你：吓？你做乜學瑞士德文啊？點解唔學呢個標準德文啊？
靳：跟住你就同佢講：其實我都識嘅，噉樣。
以：咦？咁熟面口嘅？「其實我識㗎！我嘗試緊咁好咁awk咋！」
靳：即係我係捉摸唔到瑞士啲人講……講嘅德文㗎。因為……因為你去唔同嘅地方呢，佢會有少少唔同啦。跟住呢，我……我一路去同人講mercy……merci啦，跟住我聽到周圍啲人係講danke啦。跟住我去講danke，跟住周圍啲人就係講merci啦。噉所以我永遠都唔知佢哋係應該講啲乜嘢噉樣囉。
苗：可能呢，就係你要講……
以：同你作反（作對）啦，好明顯係。
苗：係咪嗰啲對答嚟㗎？即係你講一個，你就要……第二個人就要講第二個噉樣。
靳：唔係啊，係隔籬counter嗰個人嚟㗎，嗰個係。
苗：呢啲咪多語社會囉，你識咩吖？
靳：啱喎，係咪應該同……下次講意大利文？同佢哋，喺德語區度。
以：呢啲嘢你唔識㗎喇。可能你要睇定一個地圖呢，邊度講merci邊度講danke。除非佢哋可能係真係idiolect嚟㗎，嗰個人都講唔同嘅字噉樣。
靳：係喎。即係佢哋會有一啲好詳細嘅方言地圖㗎嘛。即係佢會劃咗條線，跟住呢條線隔籬就係講merci……呢條線左邊就……就merci，右邊就danke噉樣㗎嘛。跟住就話：啊，呢個會有呢個音素，嗰個冇噉樣。
以：係囉，好似我哋嗰陣時做粵語方言嗰集咋嘛。
苗：即係嗰條線就係喺嗰兩個counter中間囉。
靳：可能係啊。
以：好似咩……歐洲邊度有啲國界，係喺兩間屋中間噉吖嘛。一間屋切開一半嗰啲friend。
靳：荷蘭同比利時山嗰條。
以：係咪咩荷蘭、比利時啊？
靳：係啊，係啊。
苗：兩個門牌，一間屋。
靳：噉係有一啲語言嘅趣事嘅，雖然我全程都係講英文。
苗：Shame。
靳：係喇，噉就係由佢哋當地嘅人講嘅英文度嚟㗎，呢樣嘢。噉事源呢，我就要上一座山啦。噉上山呢，就坐吊車嘅。噉我就相安無事啦，噉樣。噉其實有少少伏筆㗎喇，因為上去呢，已經喺度落緊雨啊、跟住又開始有啲風啊，噉樣啦。跟住上到山，係落雪噉樣，然後成座山都係雪噉樣啦。嗰陣時係四月，OK。即係而家都仲係四月㗎，but anyway。噉但係呢，去到落嚟嗰陣時呢，啲雨就越嚟越大啦，啲風呢，越嚟越犀利啦。噉跟住呢，嗰個吊車呢，就出現咗一啲技術嘅問題噉樣啦。噉因為佢嗰個吊車係有三段嘅，去到最……最底、最長嗰段呢，就機件故障，噉就即係總之運行有問題，唔搭得嘞！噉樣。噉跟住就成堆人呢，就落咗呢個吊車噉樣嘞，噉啦。噉跟住呢，其實呢，嗰……嗰個座山呢，係有一啲戶外活動嘅。噉但係有啲戶外活動，其實淨係冬天先至……唔係，應該係冬天定夏天開呢？總之……總之而家係唔開㗎啦，係嘞。噉其中一個活動呢……
以：而家係唔係冬天嘅，OK。
靳：係啦，而家都唔係夏天嘅，anyway。噉……
以：兩頭唔到岸。
靳：噉呢，佢其實……其實就係有其中一個活動呢，就係可以取代吊車呢，噉就有一啲叫做……有一啲滑板車，佢哋叫scooter啦，就有一啲滑板車嘅車，係可以畀你……畀你用，然後就跣落山。噉但係其實要加錢，同埋喺呢段時間係冇嘅。噉但係因為佢要疏導啲落去嘅人潮呢，噉所以佢哋呢，就免費畀咗呢啲scooter，呢啲滑板車我哋呢，去跣落山。噉所以我哋就唔使……唔使再額外畀錢，又玩多個而家都冇得玩嘅活動噉樣囉。噉但係佢最得意嘅字……嘅……嘅時候呢，就係……咪佢要教我哋點樣用㗎嘛，係啊，噉跟住我哋個個喺度不知所措嘅時候呢，噉就嗰個……嗰個工作人員啦，噉就過嚟同我講啦：噉「OK, just wait here, you can become a scooter later. You can become a scooter」噉樣囉。
以：啊，又係become！永遠都係become，我應該估到㗎喇。
苗：解釋下。
靳：係咪……係咪要解釋下呢樣嘢係點樣運作㗎？
以：梗係要解釋下啦，三苗明唔明㗎？我唔知啊。
苗：唔知啊。
以：三苗知㗎？
苗：係點㗎？
靳：因為我哋英文呢，講become係「成為」噉解吖嘛，係咪？係啦，噉但係其實喺……即係有……喺德文入面有一個好似嘅字，就係bekommen吖嘛。噉但係bekommen呢，其實喺德文入面，係「獲得」、「搦」噉解啦。即係可以噉講啦。「收」啊、「獲得」噉解啦，噉樣囉。噉所以有好多即係德語區嘅人講嘢嘅時候，佢就會……如果佢哋英文可能有時爭啲啲嘅話呢，噉佢哋就會將「獲得」呢樣嘢，就講成become喇。噉所以我就……
苗：都唔係爭啲啲㗎喇喎。
靳：係喇。溝通到啦，至少，係。
以：所以就成日去餐廳度問可唔可以成為一塊牛扒，嗰啲係咪啊？
靳：Can I become a steak？噉樣，係。

The rest of the transcript is available to Patreon members.