以：我有個學生呢，我教佢廣東話嘅時候呢，佢……佢同我講咗一個詞語，我成世人都未聽過。Jaa1 si1，佢話jaa1 si1啊。
苗：咩jaa1 si1？咩意思？
以：我唔知。我話你邊度揾出嚟㗎？CantoDict呀？佢話：ChatGPT。
靳：ChatGPT嘅廣東話都係唔係好可靠㗎，我發覺。
苗：笑咗。嘩，呢啲真係學壞手勢喎。好有問題喎。
[jingle]
以：歡迎返到嚟《絮言．狂想》第五十一集，我係以色列。
苗：我係三苗。
靳：我係靳尼啊。
以：呢一集可以錄到，真係得來不易啊，因為呢，我哋啱啱經歷咗大半個鐘嘅苦難，先可以問始到錄音。
靳：唉，真係……
以：到底發生咩事呢？
苗：大半個鐘嘅技術問題啫。
以：你自己解釋！
靳：唔知我個咪定係我部電腦出現咗技術問題，跟住就變咗一個……唔知啊，Dalek嘅聲。
苗：係，如果大家有睇Doctor Who呢，就好似嗰個……嗰個Dalek，好似嗰個……點樣叫啊？嗰個形狀。乜乜機械人。
以：我都唔知。
苗：咪有個搞笑版㗎嘛，有個……
靳：總之係機械人聲。
苗：即係有啲人即係insult啲Dalek，係……
以：好似結婚蛋糕噉樣。
苗：越講越……越亂喎。好似垃圾桶噉樣㗎嘛。
以：佢有好多波波嗰個……垃圾桶囉，咪。
靳：成個垃圾桶噉嘅樣。
苗：成個……成個桶噉樣。
以：垃圾桶裏面有隻魷魚嗰個啊。
苗：畀條片大家聽下。噉呢，啱啱呢，阿靳尼就係噉嘅聲囉。就係不斷喺度oaö噉樣。有啲電音。
靳：öa……
以：係啊！嗱！唔係！Dalek佢係有輔音㗎，啱啱靳尼呢，佢講嘢呢，係冇晒輔音。
靳：係冇輔音。
以：我哋淨係……
靳：啲輔音係食晒噉樣。
苗：嗰個技術問題非常之奇怪。
靳：真係有啲……
以：喺度唱緊Old MacDonald噉樣。
靳：eieio。
以：eieio。
苗：即係平時呢，靳尼把聲都好有磁性㗎啦。今次係更加有磁性。即係電音噉樣，咁磁性。
以：係電磁嘅聲音。
靳：簡直就係磁力共振啊，呢個。
以：係。所以呢個故事教訓我哋呢，科技真係信唔過啊。雖然去到二〇二三年喇，但係仲係搞唔掂呢啲基本嘅技術嘢。
靳：呢個故事嘅教訓，就係千祈唔好用科技。
苗：即係正所謂「現代嘅解決方法，就有現代嘅問題」。
以：係咪調轉咗㗎？
苗：係啊。Modern solutions produce modern problems.
以：嗰啲解決方法，產生一啲新嘅問題呀？
苗：係啊，冇錯。
以：哦，OK。的確係嘅。我哋一直都喺度改善緊我哋嘅setup啦，係啊，我哋有更加好嘅軟件、硬件啦。噉但係同時間亦都有新嘅問題。雖然我係未換過咪嘅。
靳：我都未換過嘅，其實。
苗：大家都未換過咪囉。
靳：我係試過唔記得帶咪啫。同埋用三苗個咪囉。
以：係喎，你上次用三苗個咪㗎喎。
靳：係啊。
以：哦，可能因為你冷落咗你支咪呢，佢唔開心，就同你作反啊。
苗：佢話：哼！佢傲嬌啊！個咪。
靳：係啊。真係有幾個禮拜冇用喇，發覺係。
以：佢掛住你啊，同你發脾氣。
靳：發脾氣咪唔用佢！
以：所以呢，嗱，如果大家想我哋有更加靚聲、更加可靠嘅咪嘅話呢，噉就……噉就記住嚟Patreon度支持我哋嘞！
苗：嘩！唔得啊！呢個。好夾硬嚟啊。
以：我哋會好好噉用……喂！我……咩啊！真係㗎喎，我哋一開始講嘅時候，我哋講緊營運嘅費用吖嘛！噉係包括我哋嘅軟件、硬件嘅。
苗：係，營運成本，冇錯，冇錯。
以：所以我哋……係啊，可能唔知幾時會upgrade呢？噉就靠大家支持喇。係喇。
[03:40]
以：噉講起一啲科技嘅問題呢，不如我哋睇下我哋上次冇講到嘅新聞啊！即係其實係舊聞啦，噉但係因為我哋上次就忙住喺度吹水啦，因為又有去旅行啊，又喺度慶祝我哋五十集啊，於是呢，就冇時間講新聞嘞。噉我哋就發覺呢，呢兩個月都發生咗幾多事下喎。
苗：變咗舊聞㗎喇喎。
以：係啊，舊聞啊。冇所謂啦，我哋討論，小組討論。試加以討論。
苗：好，我同意你嘅睇法。
以：哎啊，冇口試啊，今年。我哋取代嗰個中文口試啊。
苗：係，我好贊同一號同學嘅睇法。
以：我哋睇一啲科技嘢先啦。因為呢，我哋上一集之前嗰集，就喺度講緊親愛嘅AI吖嘛。我哋就喺度討論緊ChatGPT，或者呢啲大型語言模型產生嘅問題啦，噉然之後，我哋三個人呢，就一齊玩咗ChatGPT啦。噉如果大家未睇嗰條片嘅話呢，記住睇返喇。我哋同佢玩得好開心。噉但係之後呢，就有好多唔同嘅國家啦，同組織啦，都開始用呢啲技術嚟到達成佢哋一啲新嘅目標喎。例如咩呢？
苗：呢一單呢，就係都係同ChatGPT有關嘅。噉呢，OpenAI呢，就都……其實幾耐之前喇，都。出咗一篇……一篇blog post啦，一篇網誌啦，就話冰島政府呢，就竟然利用呢個GPT4呢，就去幫助保育冰島文呢樣嘢嘅。噉佢係點樣做㗎呢？噉佢就講到呢，通常呢一啲語言模型有個問題，就係一啲比較小眾嘅語言呢，佢係都係唔識，或者唔係好叻嘅。個原因就係因為佢哋嘅training data非常之少啦，即係佢畀佢輸入嘅資料、畀佢睇嘅文，其實唔係真係咁多啊。你會諗下，成個互聯網咁大，一定會有好多英文嘅文，甚至乎其實中文啊、或者你話法文、西班牙文，都有好多好多嘅材料嘅。但係冰島呢個咁細嘅國家，得三十幾萬人，其實就好少呢啲材料嘅。
以：我哋早兩集講過呢啲模型，係需要好多好多嘅輸入啦。噉所以我哋就話佢哋會加劇咗可能啲語言之間嘅不均等啦。因為當大嘅語言好多人用嘅時候，就自然會有個好啲嘅結果出到嚟囉，有好多嘅AI囉。噉冰島文就細好多啦，噉所以就應該你……我估你而家同我個ChatGPT講冰島文，可能會cap cap地。我估啦。三苗應該試下。
苗：我諗都始終會冇英文咁好嘅。
靳：因為而家嘅ChatGPT呢，其實係呢個GPT嘅三點五嚟嘅，噉樣。噉就真係有好多人呢，試過呢，用唔同嘅語言同呢個ChatGPT傾偈，即係呢個舊啲嘅version啦。因為ChatGPT 4係付費嘅項目嚟㗎嘛。
苗：要課金啊。
靳：噉就真係有人試過用啲小眾啲嘅語言，例如話冰島文呢，噉佢哋係會整一啲即係唔啱grammar啊，或者會作啲唔存在嘅字出嚟啊，噉樣嘅情況。
苗：佢大致上都算啱嘅，但係就硬係有少少唔係好自然囉。
靳：有啲唔對路囉，就係。
以：即係「不自然語言處理」。
靳：係嘞。不自然嘅語言處理，係咪嗰個「不正常人類研究中心」啲friend嚟㗎？
苗：係啊，即係你相比起話英文，基本上你而家用嘅話，其實冇任何文法嘅問題囉。佢可能會講啲錯嘅資訊，但係佢會好啱grammar噉樣講畀你聽囉。
以：哦，係吖，係吖，係吖。因為GPT佢講英文、用英文係好叻嘅。就係佢講乜嘢先係個問題啫，噉但係可能佢其他語言就講都唔識講囉。哦，即係好似你叫佢教你廣東話，佢會教你啲唔存在嘅字㗎嘛！我記得我見過㗎。我有個學生呢，我教佢廣東話嘅時候呢，佢同我講咗個詞語，我成世人都未聽過。我話你邊度搵出嚟㗎？CantoDict呀？佢話ChatGPT。
靳：ChatGPT嘅廣東話都係唔係好可靠㗎，我發覺。
苗：喂，呢個OK喎。係咩字嚟㗎？笑咗。
以：我想揾出嚟，我想揾出嚟。
苗：嘩，呢啲真係學壞手勢喎。好有問題喎。
以：Jaa1 si1，佢話jaa1 si1啊。
苗：咩jaa1 si1？咩意思？
以：我唔知。
靳：係㗎！我之前呢，去瑞士之前呢，叫佢教我啲即係common嘅瑞士德文嘅詞語啊，或者瑞士德文會講嘅嘢呢，佢一係就畀咗標準德文我，一係就畀咗啲我查唔到嘅嘢我。
苗：應該都係作出嚟㗎喇。
以：應該就係類似噉喇。
靳：係啊，作出嚟㗎，應該。
以：但係你好難證實囉。
苗：佢好有自信噉樣……噉樣吹水。
靳：一本正經地胡說八道啊。
苗：啱啊，呢個就係ChatGPT嗰個座右銘。
以：噉我一睇冰島文呢單嘢嘅時候呢，我就諗緊：佢點樣利用嗰個GPT嚟到幫佢保育呢？係咪即係用GPT嚟到gen多啲文本吖，定係……定係愛嚟翻譯吖，定係點樣呢？
苗：佢嗰個大致上個原理，就係佢改善個GPT對於冰島文嘅理解，噉就從而就即係可以將呢個冰島文嘅知識保育咗係佢嗰個……嗰個演算法裏面囉。即係變咗係教咗個電腦識得講冰島文，噉樣嘅概念。
以：即係佢幫個GPT。
苗：噉佢點樣做嘅呢？佢就請咗四十個唔同嘅志願者啦，就不斷去同ChatGPT去傾偈啦，其實就係。噉但係點樣傾呢？就係佢會問佢一條問題啦，然後呢，嗰啲志願者呢，就會叫ChatGPT講四個答案出嚟嘅，就直接叫佢生成四個答案。之後呢，嗰一啲參與者呢，就會揀一啲啱嘅答案，然之後再同返ChatGPT講，就話：啊，呢啲就啱，呢啲就錯。噉就不斷去做呢個過程啦，就可以慢慢調教返佢啊。即係好似一個老師喺度教啲學生，個學生做練習，個老師就話：哦，你呢度錯，你呢度啱，就慢慢噉樣教識返佢囉。噉樣之後嗰個結果呢，都係……都幾好㗎，發……起碼佢畀我哋嘅嗰啲例子係……係當然係啱㗎，佢先會post出嚟啦。但係佢都有比較到直接生成咗出嚟嗰段字，同埋佢人手再改咗之後嗰段字囉。其實都真係爭少少㗎。所以其實都見到都有……都仲有一啲進步空間嘅。

The rest of the transcript is available to Patreon members.