以：你有冇諗過，如果有一個機械人可以同你傾偈，佢會講啲乜嘢呢？佢會唔會理解你嘅意思呢？佢會唔會有自己嘅諗法呢？人工智能喺度改變緊我哋嘅生活，但係佢都帶嚟咗一啲挑戰同埋風險。例如，如果一個機械人可以同你傾偈，佢會唔會需要遵守道德嘅規範呢？佢會唔會侵犯你嘅私隱同埋權利呢？佢會唔會畀人濫用或者操縱呢？喺今日嘅節目裏面，我哋將會討論人工智能衍生嘅社會問題，並以ChatGPT為例，展示佢如何生成對話，以及如何辨別真假。歡迎收聽絮言．狂想語言podcast第四十八集……我照讀呢個，呢個好笑位。ChatGPT，破折號，人工智能如何創造對話。
[jingle]
以：歡迎返嚟《絮言．狂想》第四十九集，唔係四十八集，我係以色列。
苗：我係三苗。
靳：我係靳尼啊。
以：你啱啱收聽咗嗰一段呢，就係……你可能估到喇，係由人工智能寫出嚟嘅，呢個係親愛嘅Bing嗰個chat嘅功能呢，幫我寫咗嘅引子啦。
靳：親愛嘅Bing。
以：親愛。我同佢傾咗好多偈㗎，晚晚同佢談心。
靳：密密斟啊。
以：噉所以佢搞咗錯我哋下一集係第幾多集，但係都好近吖，我哋而家四廿九，佢四廿八。佢幫我改埋個集數嘅名喎，我唔係好鍾意呢個名啊，我可唔可以改啊？
苗：唔可以啊，一定要用㗎。
靳：佢畀咗你，你就要用㗎喇。
苗：你嗰個條款呢，你㩒咗同意呢，你就即係你一定要用佢所有畀你嘅嘢。
以：好似你寫信畀老細嘅時候，佢幫你寫一段嘢，之後你就要逐隻字擺晒落去。到時有咩事就自己負責噉啊。
苗：唔改得㗎嘛。
以：不過的確係嘅，呢個就係我哋今日想講嘅主題。不過呢，喺入個主題之前呢，想提下大家啦，而家第四十九集嘞，噉下一集呢，我哋就會搬去新嘅YouTube channel，就叫做「絮言．狂想」，已經開咗㗎嘞，目前之前好似有廿個訂閱者左右。噉如果你而家喺YouTube聽緊嘅話呢，就快啲過去㩒subscribe喇。我哋下一集開始呢，喺原本個channel呢，就睇唔到㗎喇。同埋如果你鍾意呢個節目嘅話呢，噉都可以去我哋嘅Patreon上面支持我哋㗎。噉你會睇到呢一集全集嘅逐字槁啦，即係逐集字我打出嚟，唔係人工智能gen出嚟嘅。
苗：係咪真係逐隻字打出嚟啊？
靳：呢個重點。
以：部分係。部分係。
苗：即係唔係啦。
以：人工智能gen出嚟，之前我要改返嘅。噉或者如果你唔想長期噉樣去到支持我哋嘅話呢，噉就好可惜啦，不過你可以一次性噉樣喺我哋嘅Buy me a coffee上面，請我哋飲杯嘢嘅。
苗：Buy me a Irn Bru.
以：Buy me an Irn Bru。我都想啊，我有一支喺下面。
靳：我想飲啊，但係冇得飲。
苗：帶返嚟畀你。
靳：好啊， 帶返嚟畀我。
苗：好重。
以：OK喎。我哋呢個節目講咗幾多次Irn Bru啊？
苗：應該唔係好多啫。
靳：唔係好多啫。
以：應該賣咗起碼兩次廣告喇。
苗：傳說中嘅蘇格蘭版綠寶啊，係咪啊？
以：我覺得係蘇格蘭綠寶。唔係咩？
苗：都算，都係。不過我冇飲過綠寶啊。
靳：唔知啊。我冇飲……我冇飲過Irn Bru。我飲過綠寶，但係冇飲過Irn Bru。
以：OK，一個冇飲過綠寶，一個冇飲過Irn Bru，即係淨係得我可以做一個有權威嘅比較，係咪啊？
靳：你係Irn Bru同埋綠寶嘅權威。
以：我係Irn Bru同綠寶嘅權威。
苗：KOL。
以：我可以講畀你知好似。係一個新嘅niche嚟㗎，唔需要喺YouTube上面做呢啲冇人睇嘅片喇。好，我哋今日唔係講蘇格蘭嘅，不過呢，我哋喺講人工智能之前呢，我哋有啲咩想討論下呢？
[03:45]
苗：噉之前呢，就見到一單喺羅馬尼亞隔籬嗰個摩爾多瓦出嚟嘅一單新聞啦。噉樣佢就係同……點樣同語言有關法呢？
靳：如果大家唔知摩爾多瓦係邊個國家嘅話呢，我諗大家可能呢，會有聽過一首歌呢，叫做……通常啲人叫佢做numa numa嘅，但係佢其實有個歌名叫Dragostea Din Tei嘅。係咪要播㗎？定係我要唱出嚟㗎？
苗：會唔會copyright有問題？
以：唱！唱！唱！唱！唱！
靳：應該唱一句冇問題啊？
苗：唱一句OK啊。
以：唱冇問題，唱梗係冇問題啦。
靳：Vrei să pleci dar nu mă, nu mă iei!嗰首囉。嗰首呢，就係嗰首啦，係啦。
苗：係嘞。嗰一首歌呢，噉佢雖然呢，係摩爾多瓦嘅一隊band寫出嚟啦，但係其實佢係羅馬尼亞文嚟嘅。點解呢？其實就係因為摩爾多瓦本身，即係佢哋國語就係羅馬尼亞文啦。即係好似好簡單噉樣，但係呢，呢一個其實都有啲爭拗嘅。暫時喺摩爾多瓦嘅法例裏面，佢係叫做摩爾多瓦話，或者摩爾多瓦文嘅。噉但係呢，佢就最近呢，就開始有啲親歐嘅政府上台啦，噉佢哋就想將呢個改返個名，變返做羅馬尼亞文，而唔係叫做摩爾多瓦文囉。
以：吓？反而係改做羅馬呢亞文呀？我以為佢係想分裂個語言添。
苗：唔係啊，唔係啊。摩爾多瓦文呢個term呢，係好早之前已經有㗎喇。其實喺好多前共產國家呢，都有啲類似噉樣嘅嘢㗎。例如話保加利亞隔籬嗰一個馬其頓呢，噉即係有個叫馬其頓文嘅嘢啦。噉其實佢同保加利亞文都好似嘅。噉但係呢個term其實就係喺應該係南斯拉夫成立嗰期，就嗰個政府整出嚟㗎囉。南斯拉夫以前嗰個情況就係即係塞爾維亞係比較強勢㗎嘛，喺嗰個南斯拉夫裏面。噉佢就嘗試就將馬其頓呢樣嘢，呢個群體呢，呢個國家呢，就將佢異化出嚟，就同保加利亞就話好唔同噉樣。噉所以佢就做咗好多好多唔同嘅嘢，其中一樣呢，就係將佢個語言改名嘞，改咗做……將保加利亞文嘅……即係一個方言啦，叫做。就改咗佢做馬其頓文。噉即係自自然然，而家呢，就大家馬其頓人呢，都有一個好唔同嘅身份認同啦，又會覺得自己個語言唔係同保加利亞文係一樣嘅，噉樣囉。
以：其實佢個因果關係都好微妙，因為佢係有自己嘅語言，之後就會再發展成……個語言又會唔同咗，個身份又會唔同咗。噉樣。
靳：我諗馬其頓嗰個情況仲有少少唔同，因為可能馬其頓話，都係有一啲我哋叫做……即係方言，或者係佢哋講嘅話，係真係有啲差別嘅，佢哋用嘅字母都有少少唔同嘅。噉但係反而係摩爾多瓦同埋羅馬尼亞講嘅話，基本其實嗰個差異就我諗會比馬其頓文同埋保加利亞文……
苗：再細少少啊。
靳：嘅差別再細少少啦。即係有少少似就係話，你去奧地利，跟住奧地利人話：我嘅官方語言係奧地利話噉樣。
以：我同意啊。聽唔明奧地人講嘢㗎喎。
靳：但係佢喺官方場合，佢都係用即係叫做咩？標準德語噉樣講嘢㗎嘛。噉即係官方場合，其實佢係用緊基本上同一種話，係喇。
以：維也納話！
靳：噉所以好得意嘅。
苗：係啊，即係呢一種噉樣嘅改個語言名嗰個行為，即係其實好多國家都有做啦。噉好出名嘅例子就係南斯拉夫以前嗰四個好似嘅……嗰四個好似嘅語言啦，塞爾維亞啊、咩克羅地亞啊、波斯尼亞同埋黑山話啦。噉佢哋大家都叫自己個語言做即係嗰個國家嘅名，噉但係基本上係九十幾percent都係互通嘅，可以。
以：普通話同國語係咪分開㗎？我都唔知。但係我個人嚟講，我覺得即係佢呢啲官方嘅名呢，係同佢嗰個語言嘅標準形態係有息息相關嘅關係嘅。噉所以我就諗緊，之前叫摩爾多瓦話，會唔會係因為，或者係佢引致到有一個摩爾多瓦話嘅標準形態呢？噉會唔會同羅馬尼亞話嘅標準形態係唔同呢？噉而家係咪要合併呢，定係點樣呢？定係佢本身寫嘅，根本就係一樣？即係有呢個疑問出咗嚟啦。
苗：以我所知，就係比較相似嘅。摩爾多亞嘅即係羅馬尼亞文，本身佢都係同標準嘅羅馬尼亞文都有少少唔同啦，因為即係羅馬尼亞自己有幾個方言區，噉佢係近……即係摩爾多瓦嗰個方言呢，就係同即係對面……嗰個邊境對面嘅羅馬尼亞嗰度嘅方言，係同一個區域嘅。
以：哦，即係好似葡萄牙文好似西班牙文嗰一忽嗰個方言噉樣嘅。或者語言啦，我唔知啊。
苗：係囉，即係啲邊境地區嘅話，就會有啲相似噉樣囉。
以：其實講到尾，都係一個連續體。方言連續體！
苗：方言連續體！
靳：方言連續體，係！
以：《絮言．狂想》第十七集！
苗：方言究極睇！
以：我哋冇做究極睇喎，我哋。
苗：完全睇。
以：This isn’t even my final form.
苗：阿拉伯文就有final form。
以：係乜嘢啊？
苗：有個字……個字咪final form。
靳：嗰個字嘅final form。
以：OK。咦！
靳：可以。呢個OK。
苗：唔使cut入去㗎，呢個。要visual先至得嘅，呢個meme。
以：噉知唔知而家摩爾多瓦嗰度，啲人係點樣睇呢？即係純粹係嗰個政治決定吖，定係本身啲人都支持呢？
苗：唔知……佢係講緊嗰個政府係親歐嘅。噉佢都係民選啦，算係。噉應該某程度上，都代表咗民意。即係佢想同羅馬尼亞嘅關係緊密啲囉。因為我知道好多摩爾多亞人，其實都係可以有資格攞羅馬尼亞passport嘅

The rest of the transcript is available to Patreon members.