以：好似你喺度……後面做緊minutes噉款。
靳：吓？唔係啊！
以：你係噉po啲拎出嚟，之後你又唔講嘢喎，好似……好似做minutes。
[jingle]
以：歡迎返到嚟《絮言．狂想》第四十八集，我係以色列。
苗：我係三苗。
靳：我係靳尼啊。
以：好嘞，我哋又嚟到呢個有嘉賓上嚟同我哋傾偈嘅時候嘞。噉不如你哋講下呢位嘉賓有咩來頭？好似好犀利噉喎。
靳：OK，噉我哋今日嘅嘉賓呢，就係呢個道路研究社嘅社長，阿Gary啦。好嘢！
社：係，你好，hi！我係咪拍手㗎？
靳：哈囉，哈囉。係嘞，噉阿Gary呢，就係一手呢，就創辦咗呢個道路研究社出嚟啦。噉我知道呢，佢本身都係對香港嘅道路啊、路牌啦，尤其是，係好有興趣噉樣嘅。噉佢喺過去呢幾年呢，噉甚至呢，係將香港以前一啲即係由喺監獄入面嘅人整出嚟嘅……即係特別嘅字體啦，我哋叫做監獄體啦，就電子化咗啦，噉就做咗一個字體出嚟嘅，電腦字體啦，噉樣。據聞呢個過程係歷時咗好耐嘅時間㗎喎，係咪啊？社長。
社：係啊。都……如果由二〇十六年起計，噉其實都接近七年嘅時間喇，已經係。
以：嗱，喺我哋仔細講監獄體之前呢，因為我哋呢一集有排我哋傾啊，噉不如又問下大家可能會喺邊一度見過或者聽過阿社長呢？
苗：如果大家有睇呢個小薯茄呢，可能有少少會聽過嘅，如果有睇其中一個系列，係講香港嗰啲問答遊戲之類呢，佢哋都有介紹過呢個監獄體呢樣嘢嘅。
以：不如Gary介紹下自己吖，你有咩想大家認識，關於你嘅嘢？我哋都未畀機會你講添。
社：噉自我介紹嚟講，噉我叫Gary啦，噉有啲朋友會鍾意叫我做社長嘅。噉我嘅呢個正職呢，就係叫做用戶界面及用戶體驗設計師，係嘞，係嘞。
苗：即係嗰啲叫UX嗰啲嘢，係咪啊？
社：UX/UI，係喇。
以：UI/UX囉，係喇。
社：UI/UX啦，係。噉雖然我……我嗰個職銜就叫做技術設計啦，噉但係實情呢，就係咩都做嘅。噉就無論係頭先講過嘅用戶界面啊，又或者係一啲產品嘅設計啊，噉差啲連嗰啲marketing啲嘢呢，都關我事。噉但係我盡量都唔會話唔關我事嘅，噉但係簡單而言呢，就係呢個設計打雜啦，係。噉……噉副業呢，就好多嘅，甚至我老細會話我……我嘅正職先係副業，我嘅副業先係正職噉樣啦。噉就係喇。
以：咁似我嘅？
社：我覺得我返工係可以……死喇，好唔好講呢？返工係可以……如果唔係太忙嘅話呢，做副業呢，即係……即係做自己嘢呢，老細都唔會點理嘅。噉所以都叫幾好玩，可以平衡到啦。噉副業就頭先有講過，係……我有個組織，係叫做道路研究社啦，噉有個Facebook page，不過依家就冇咗啦。噉遲啲可能開返噉樣啦。噉道路研究社就係我喺大學一年級時候創辦嘅一個……當其時唔算係組織，因為係一個人㗎咋。我只可以話佢係一個Facebook專頁噉樣啦。噉所以好多時候呢，有人會（？）：道路研究社，研究啲咩㗎？噉但係其實個範疇都可以話好廣嘅。你無論係一……講緊話啲道路嘅設計啊、路口啊，去到話路牌。 路牌，好似話：咦？關條路事喎！但我哋會連路牌上面嘅字體啊，都會有研究。噉亦都係透過呢一啲嘢，可以砌返一個香港一個歷史，即係喺第二個角度去睇……即係睇香港歷史，唔係淨係得一個好官方嘅角度去睇歷史，而係可以係有第二啲角度去睇返出嚟。噉路牌其實都係其中一個可以睇到嘅嘢，但係未必好多人知啦。噉所以嗰陣喺大學畢業前嗰陣，就寫咗本書，就叫《香港道路探索》啦，噉就出咗啦，都……
以：我哋link返畀人先。
苗：係啊，show notes裏面。
社：係喇，係喇。雖然過咗去四年嘅，不過啱啱好似本書又瘋狂噉炒冷飯，早排喺書店有啲展覽噉樣啦。噉就所以就一……一系列嘅嘢啦。噉頭先講到話研究呢個路牌字體啦，噉我哋都喺道路研究社成立呢六年間，我哋仲有做一個好大嘅項目，就係叫監獄體再現計劃。噉呢個都……我唔知要講幾耐，不過係喇，呢個就係自我簡介。
以：哦，其實噉某程度上，都係研究緊呢啲道路嘅用戶界面同埋體驗啫。
社：都係㗎，都係㗎。
以：差唔多嘅嘢嚟㗎喎。
苗：係，只不過唔係喺個……喺個mon度，係喺個現實世界裏面嘅一啲體驗。
以：即係作為一個道路嘅用者，我完全理解到好重要喎，呢啲嘢。
苗：即係你想像下你坐喺架……司機位呢，噉你嗰個……嗰個玻璃，其實都係一個……一個正方形，一個四方形。
以：你有個介面！講到好似有個……
苗：噉嗰個就係你個mon啦。然之後你出面又……唔同嘅路牌，就係啲……就係啲screen。
社：都合理，係啊。
以：之後啲字體啊，睇清唔清楚啊……
苗：一個不斷向你衝埋嚟嘅一個……一個用戶界面。
以：其實好似打機。梳。噉你呢幾年嚟，你個研究社，其實一齊做咗啲乜嘢呢？除咗最近呢一個監獄體之外，同埋嗰本書之外。
社：除咗書啊，或者監獄體計劃之外呢，本身比較多為人熟知，係我哋有一啲叫做「投訴路牌」，又或者係叫做有人叫我哋做狙擊路牌啊。噉但係就未至於咁誇張嘅，係喇。我哋其實呢，就如果你話要狙擊，真係要揸正牌嚟做，你攞本守則去check佢啲指引呢，噉其實香港每一塊牌都可以錯嘅。噉我……我個page唔係專係攞嚟狙擊路牌㗎嘛，但係有一啲好嚴重嘅錯誤，或者真係引致到可能交通安全嘅問題，或者啲排版真係好唔靚嘅，噉我哋會post出嚟講：喂！或者條路未通車啦，可以改到啦，噉梗係post咗出嚟講先啦。即係有譬如將藍隧道嗰陣未通車之前，啲路牌啲排版亂七八糟啊，又或者屯赤隧道個飛機標誌十百八十度向下，好似墜機噉樣。即係呢一啲係當其時都引起一啲迴響啦。噉就比較多人去……開始去關注，其實……即係有可能有好多唔少嘅駕駛者，都會話：啊，揸車，係啊，呢塊牌好難睇啊。噉但係有冇一個解決方法呢？噉其實我都覺得可以……凡事都可以有一個解決方法，噉就嘗試下去……呢個係路牌設計上要關注嘅嘢，即係其實你話運輸署自己有一定嘅標準，佢入面亦都有好多嘅設計嘅守則啦。噉但係跟唔跟，係一回事。同埋有陣時，可能寫到太複雜啊，又或者佢冇考慮到好多唔同嘅情況，噉就冇講明啊，又或者本身……係囉，根本冇講到點設計，噉唯有嗰個工程師就自由發揮啦。
以：睇心情。
社：係喇，睇心情㗎咋。即係好似馬路字師傅喺馬路上畫字。啊，點解呢隻字畫得咁靚？我覺得呢啲全部睇心情，你可能行……行過幾個街口，呢個就好潦，都未定。噉呢一啲係睇心情。噉呢個係一個幾有趣嘅位囉，我會覺得係。
以：係，即係可能好多所謂道路嘅用者啦……其實唔係所謂，係真係道路嘅用家啦，就會feel到某一啲牌係怪怪哋，或者好難睇嘅，但係佢哋解釋唔到點解。噉你就可能用一啲標準嘅守則，或者一啲佢指引，噉就去揾下呢啲問題喺邊度，解釋下點解咁難睇囉，係咪啊？
社：係啦，都主要係呢方面嘅嘢。
以：其實好似……係啦，設計都係噉。
[08:47]
靳：係啦，噉我哋《絮言．狂想》都係一個語言嘅podcast啦，噉今日請到阿社長過嚟呢，噉同我哋傾偈。噉固之前呢，都係講一啲關於語言嘅嘢啦。噉我哋今日想講多少少嘅嘢呢，其實就有少少係關於呢，呢個字體啦，同埋去……呢個電腦啊，去……或者其他地方啦，點樣去顯示一啲字嘅一啲……關於一啲……呢啲系統啊，或者一啲得意嘅嘢，噉樣樣。噉我哋又知道阿社長之前用咗噉多時間、心力，去整咗監獄體呢樣嘢呢，相信佢對呢一方面嘅經驗都有好多嘅，噉所以就想請佢上嚟呢，同我哋一齊分享下關於呢……呢方面嘅嘢。噉我哋啱啱都講到呢個監獄體啦，噉監獄體其實都籌備咗有……一開始到而家，啱啱都講到差唔多六年，差唔多七年喇，噉樣。噉其實監獄體係啲咩嚟㗎呢？
以：係啦，點解叫監獄呢？係咪監獄先用得㗎呢？
社：其實嗰陣都有解釋，即係尤其是香港以外嘅人啦，我以前喺澳洲試過有個好細嘅分享會，都有介紹過監獄體囉。即係我會話：哦，今日要講嘅係監獄體。

The rest of the transcript is available to Patreon members.