靳：希望係，希望仲係。
苗：如果係嘅話就即係我剪得好快。
以：係啊。
苗：如果唔係呢，大家七月先聽到，噉就即係剪唔切喇。
以：係喇，睇你喇今次。好啦，噉我就精彩，你就七彩啊。噉但係今次唔單只有我哋絮言三子嘅回歸啊吓，我哋又有嘉賓嚟同我哋傾偈喇。噉我哋首先介紹下邊個先，噉我哋今日就有阿Jon上嚟同我哋傾偈，同大家say個hi先啦。
莊：Hello，大家好。
以：Hello。
莊：係阿John，噉我係做咗套廣東話字體，噉對廣東話有啲興趣，然後聽完《絮言》嘅⋯⋯嘅爛gag之後覺得上嚟傾吓偈會好有趣。
苗：係咪有第一次⋯⋯第一次有人係因為啲爛gag所以想上嚟講。
靳：竟然爛gag係有吸引力嘅。
以：呢個係史上最誠實嘅嘉賓。
苗：其他嗰啲都係：「因為我對廣東話好有熱誠啊」噉樣，跟住你就係「因為爛gag」。
[intro]
苗：我哋之前有冇提過呢個字體啊其實？
以：未呀，應該未啊，就係等阿Jon上嚟同我哋傾吖嘛。
苗：之前呢一個字體呢，其實就我哋都留意咗好耐嘅，「爸打我留意咗你好耐」。噉就，之前就未有得免費download嘅時候，就都係⋯⋯即係喺個網度見到啫，見到啲示範嘅片段，但係之後呢就，你就好慷慨啦，噉就開放咗去免費download啦。噉就，唔知大家有冇啦，但我就去試咗嘅，噉都覺得幾正喎，真係，成件事。
以：係啊，我哋都未講有點樣「正」法。不過係啊，我當初接觸阿Jon就係我見到佢喺Twitter上面po佢嗰個字體嘅示範啦。有咩特別呢，陣間就再仔細講喇。噉但係就覺得好有趣，噉於是就DM咗阿Jon啦，想同佢傾吓偈啦，問下佢點樣整出嚟㗎啦。噉佢就，一開始就私底下畀咗一個字體我試用啦，但係之後就好似三苗講噉樣，變咗大家都可以用啦。嗱，大家可能諗緊啊，我哋冇幾耐之前先做咗一集字體嘅，但係⋯⋯
苗：死喇，又嚟。
以：但係忍唔住，因為太有趣喇呢個，我覺得有啲唔同嘅，因為我哋上次呢，係講字型設計吖，主要係。今次就再額外講少少唔係淨係字型上面嘅，而係講緊唔同嘅用法，即係點樣用呢啲字體嚟到做到教學嘅功用吓。噉我哋唔好再賣關子喇，不如呢，我哋嚟講吓到底呢一個係咩字體嚟㗎啦。
莊：噉我叫佢做廣東話字體啦，噉個主要其實就唔係正式字體嚟㗎。
以：Mhm。
莊：係一個有啲借屍還魂噉攞字體嚟做一個⋯⋯點樣將廣東話發音嘅方式。
以：嗯。
莊：噉你係打咗個字嘅時候，或者copy咗個字嘅時候，佢會喺上面加個粵拼。
以：嗯。
莊：噉啲粵拼就係彩色嘅，噉就係好似譬如台灣啲ㄅㄆㄇㄈ啊，日本啲振り仮名啊，或者普通話可能會用拼音，噉就係一個粵語同等噉上下樣嘅功能囉，其中一個賣點就係彩色囉，係囉。
以：彩色好靚啊。
苗：即係我覺得嗰個諗法就好似內嵌字幕噉樣囉，即係你直接copy and paste一啲漢字啦，你擺去一個，譬如TextEdit噉樣，或者個Notepad噉樣，然之後你轉咗個字體做嗰個⋯⋯你嘅廣東話字體啦，佢就唔需要用一啲工具囉，直接copy and paste，直接轉字體就搞掂囉，即係一啲好方便⋯⋯用家唔需要做好多額外嘢就可以知道嗰個字點樣發音囉。
以：嗯。
莊：所以本身係一個⋯⋯成個概念係比較廣闊啲㗎，係啊，可以用字體嚟做啲文字做唔到嘅嘢。其實成個系列啊，係叫做「是像字體」啦。
以：哦！
莊：噉我哋講開爛gag，噉係一個⋯⋯「是」係「是非」個「是」，「像」係「像是」個「像」，噉「是像字體」，噉一方面係視覺嘅字體，一方面係好似字體，但係又唔係字體。
苗：是像字體。
以：你而家先get到啊。
苗：我見到個chat呢，阿Jon打咗個字出嚟，即係，係囉。「是非」個「是」，「好似」嗰個「像」啊，「是像字體」。嘩，呢個真係好⋯⋯即刻融入咗我哋呢個《絮言》嘅大家庭啊，即刻用呢啲爛gag。
以：咦，我好好奇喎，你話譬如ㄅㄆㄇㄈ嗰啲成日都做呢樣嘢啦，其實係咪本身都有啲類似嘅字體㗎？即係係咪可以好似你個字體噉樣就打個中文字，然之後上面有注音㗎？因為我記得以前細細個，睇啲台灣書呢，上面有註音噉啦，噉但係我都唔知佢點樣打出嚟，係咪分別打，定係內嵌㗎都係？
莊：台灣嗰啲，我就唔係好清楚，但係日本可能會叫ruby text或者係叫「振り仮名」嘅。
以：哦～
莊：佢哋嗰啲嘅做法通常就係會，有咗個字之後再喺上面打一個佢適合嘅讀法，即係譬如你哋都係啲多語言嘅人啦，噉可能知道日本漢字每一個字有兩個以上嘅唔同讀法，噉你係需要係每一個特別嘅位度選擇，噉佢哋通常就係需要人手每一個位度打㗎。
以：嗯～
莊：如果你話融入隻字體度啦，噉係有人攞華康嘅一隻字體嚟噉樣做過，但係佢哋就當然係做普通話啦。而另外冇呢個一字多音嘅概念。
以：嗯？OK。
莊：即係譬如行人個行字噉⋯⋯
苗：係，係。
莊：噉佢嘅做法就係⋯⋯Sorry我普通話好差。
以：大家噉話啦。
莊：你哋選擇一個字，一字多音。
以：咩啊？係「行」咪係囉，有兩個啊。
莊：噉佢可能會係有一隻⋯⋯完全一隻字體，係你打個行字嘅時候，佢係⋯⋯唔係啊，háng噉，噉跟住另外如果你嗰一個位嘅讀法，需要係第二啲讀法嘅時候，佢係需要個用家自己去選擇換另外一隻字體。
苗：哦，嘩。
莊：即係由細明體A轉咗去細明體B。
苗：哦，嘩。
以：咁得意呀？
苗：好似幾麻煩喎。
莊：我本身做嘅時候係想畀學廣東話嘅人用啦，噉如果係到佢哋用嘅時候係唔知嗰個字點讀吖嘛。
苗：係囉。
莊：噉你冇可能叫佢自己去選擇，所以就⋯⋯
以：嗯。
莊：要做嗰個可以跟住個環境改變讀音嗰一個工序囉。
以：哦～
苗：好犀利喎，即係佢係⋯⋯舊嘅字體就唔識得根據上文下理，譬如話「銀行」個「行」，或者去「行人」個「行」，我唔識得去根據呢個隔離嘅字去轉咗嗰個拼音，但係⋯⋯
以：淨係老師可以用到囉。
苗：係囉。
以：即係譬如老師整教材嘅時候，噉就可以自己揀邊一個囉，噉但係⋯⋯
苗：我要本身知佢點讀先至可以標，噉就有啲有啲⋯⋯有啲⋯⋯套喺學廣東話嘅人身上就冇用囉，因為我都唔識，我就係要學佢點讀吖嘛，噉你又要我識咗先，噉所以就⋯⋯呢個方法就唔得，但係你嗰個字體就反而可以自動轉換喎。
莊：Mhm。
靳：即係好神奇㗎喎，如果我打⋯⋯即係例如我打個「行」字，跟住我再打個「山」字落去，跟住就會變成「行山」，噉「行」上高嗰個粵拼就會變咗haang4噉樣㗎喇喎，係咪噉樣運作㗎？
莊：係啊，你使唔使我share screen，我分享螢幕嚟畀你哋睇吖？
苗：我哋podcast睇唔到。
莊：明白。
苗：係，我哋會喺show notes度擺返你個網有一段示範嘅片嘅，我哋就會link返佢噉樣。
以：噉其實係點樣做出嚟㗎？因為我覺得呢個係最令我覺得有趣嘅，因為我覺得好多工序喎，嗰度。即係一方面技術上啦，同埋你⋯⋯其實你個過程係要點樣逐步逐步整出嚟呢？點樣加落去呢？嘥幾多時間啊，噉樣呢？我好想知道個過程係點樣。
莊：噉我哋可以分三個步驟啦，第一個步驟係需要點樣選擇邊啲漢字、邊啲詞語，第二個步驟會係點樣畫、點樣組織嗰啲圖，然後第三個係點樣將佢放入一套字型裏面。
以：嗯。
莊：個做法，首先我哋要講一講有一個現代字體嘅功能，英文叫做ligature，噉中文可能係叫做連字，噉樣。
靳：係。
莊：因為譬如我哋當英文噉吖，個細階f個頭係側咗去右邊𠺢嘛，上面嗰一忽。
以：Mhm。
苗：嗯，係。
莊：噉如果係連續兩個f嘅時候，噉或者可能音樂人會講話三個f嘅時候，噉個頭會撞得唔係咁好睇。
苗：嗯。
莊：噉為咗令喺某依啲情況嘅時候好睇啲，噉佢係會將見到f同f黐埋左右隔籬嘅時候，佢會用一個新嘅圖像嚟代替咗兩個f。

The rest of the transcript is available to Patreon members.