靳：你想像下，就係無端端有一堆人喺就嚟到西伯利亞嗰堆山嗰度，即係無端端喺度生活緊嘅，喺度遊牧緊嘅，噉樣，跟住無端端有一堆人，就唔知係蕩失路吖，定係唔知走咗去邊吖，跟住走走下、走走下，走到去中歐噉樣囉。
以：哦，即係佢哋喺商場度蕩失路，之後就唔知點解去咗第二個地方。
靳：去咗人哋屋企。
以：之後要call咪：喂！匈牙利！你喺邊度啊？返返去……
苗：請到詢問處。
以：你嘅媽媽揾緊你。
[jingle]
以：歡迎大家返到嚟《絮言．狂想》第五十三集！嘩，今次五三喇，下次五四喇，我哋可以諗下點樣搞呢一個gag先。
苗：唔三唔四？
以：係啊。今次應該唔會唔三唔四嘅。我哋都好開心又返到嚟可以再錄返，又已經一排喇。Sorry啊吓，又係我去咗旅行。噉如果大家第一次聽嘅話呢，我係以色列。
苗：我係三苗。
靳：我係靳尼啊。我係靳尼，啊！
以：靳尼近嚟點啊？
苗：靳尼近嚟點呢？
以：有冇畀個風打親啊？
靳：未打啊。應該嚟緊先會打，而家唔知會唔會八號，但係……如果大家聽到呢一集節目呢，可以話畀我哋聽，最後有冇打到八號。
以：係，我唔知㗎，我冇乜留意㗎喇，已經，所以大家要講畀我知啊。
苗：留comment同我哋講，究竟有冇打風。
靳：未來人同我哋講有冇打到八號。
苗：天氣報告。
以：未來天氣。天氣報告本身就係未來天氣啦。過去嘅天氣報告。
苗：你要……唔係，你要講……你要報告返過去。噚日有落雨啊！
以：我有時呢，想search返啲過去嘅天氣呢，都好難揾㗎喎。
苗：有個網有齊晒㗎，好正㗎。即係如果你去一個新嘅地方呢，你就噉睇嗰啲……去維基睇嗰啲氣候數據，有時唔係好準㗎嘛。噉你咪直接睇呢幾年……譬如去你想去嗰日，七月十五號噉樣，今日啦。噉你就可以睇返上年啊、前年啊，係幾多度、咩濕度噉樣囉。噉就可以類似去估計下你將會係咩温度。噉當然，每年可以好唔同嘅，天氣呢樣嘢。
以：哦，有時我純粹想好奇知道囉。因為嗰個地方，可能佢天氣好有趣，噉我就想睇下：啊，上個禮拜係點樣嘅呢？之後揾唔到囉。即係譬如我哋嚟緊又有熱浪吖嘛，好似咩意大利去到四廿幾……四廿八度呀？將會。
苗：好似話啱啱西班牙有個地方，唔知邊個省呢，嗰個地面温度去到六十度囉。佢就唔係氣温，但係地面去到六十度，都係超熱。
靳：即係可以煎蛋㗎喇喎。
苗：真係可以啊。可以喺條路度煎蛋。
以：煎腳板底都得。
靳：不過我近排同個喺西班牙住緊嘅italki老師上堂，佢都話西班牙成四十幾度。
以：嘩，真係……終於可以同中東成為一體喇。恭喜晒。
靳：歡迎返到嚟呢個《氣象．狂想》啊。
苗：入錯podcast，啲人聽到：點解全部都係氣象嘅？無端端講天氣嘅，真係。
以：因為全球暖化吖嘛！之後我哋可以講呢個氣候嘅政策喇，幾好？阿靳尼你點解同西班牙嘅老師上堂嘅？你係上啲咩？
靳：一定係學緊西班牙文啦。唔係。
以：係咪啊？
靳：唔係。因為我發覺好得意嘅，嗱，因為我呢排啦，可能如果大家有聽過之前嗰幾集嘅podcast呢，就都知道可能我有學過……學緊少少啲匈牙利文啦。噉我發現喺italki上高呢，所以匈牙利文嘅老師呢，都係唔係住喺匈牙利㗎，我唔知點解。
以：咦？真係㗎？
靳：係啊！我之前有一個住喺秘魯，住喺利馬嘅。跟住呢個又住喺華倫西亞嗰啲地方嘅。
苗：全部都係講西班牙文。
以：都係啲……係啦，西班牙語區嚟㗎喎。咩事呢？呢個有啲咩有趣嘅……
靳：可能佢哋對西班牙文特別有興趣。
苗：鍾意啲天氣。
以：係啊，匈牙利嘅語言愛好者，都係鍾意西班牙文。我噚日先畀人shame完我嚟啊。
靳：點解啊？
以：因為我去個音樂節啦，噉識咗一個朋友，作曲家嚟嘅。噉佢係智利人啦，講西班牙文啦。之後我又識咗佢女朋友喎，之後畀我發現佢女朋友係波蘭人嚟嘅！於是呢，噉我就梗係……
苗：Shock native。
以：係嘞。就梗係……
靳：一定係shock native。
以：Shock下佢啦。今次非常之成功啊，因為佢真係窒咗兩秒鐘。
苗：窒咗兩個鐘？
以：窒咗兩秒鐘。
靳：窒咗兩個鐘，佢輕機……輕咗……使唔使reboot？
以：入廠喎，要。之後嗰個智利人就話：咦？你識咁多個語言，你應該識西班牙文啦！我話：嗯……嗯……
苗：我專唔學西班牙文㗎！
以：唔識啊！之後佢話：有冇搞錯啊！咁容易你都唔識！咁簡單！
苗：「我淨係學啲難嘅語言㗎咋」，同佢講。
以：駁唔到，駁唔到，都好似幾真實。係啊，係啊，淨係學啲難嘅語言。不過我就冇學匈牙利文嘅，我覺得呢個有少少過火喇。
靳：但係我哋遲啲要……係咪要去匈牙利㗎？
以：哎？係咪……係咪要賣下關子啊？呢度。我哋好似都其實plan好晒㗎啦喎，我哋絮言三字，係咪啊？
苗、靳：係啊。
以：係啊，買晒機票啦，卜晒BnB啦。我哋將會喺十月尾去布達佩斯嘅。
苗：係，去佢哋嘅Polyglot Conference啊。
靳：係喇，希望歐盟唔好……會咁早踢佢哋出去啦。
苗：就係今年……係啦，之前都講過，今年嗰個Polyglot Conference就會喺布達佩斯啦，喺匈牙利嘅首都舉行啦。噉即係近排都有啲匈牙利同歐盟之間唔係好愉快嘅事情吖嘛，即係……
以：政治狂想啊。
苗：政治狂想，而家又轉topic嘞。即係我哋就講笑：會唔會我哋未去呢，就呢，匈牙利已經畀歐盟踢咗出去啊？
以：講呢啲。冇事嘅，冇事嘅，係喇。
苗、靳：冇事嘅。
以：踢咗出去都可以照搞嘅，可能冇神根噉樣呢。不過係嘞，如果大家有啲混亂嘅話……因為好多人都好混亂嘅，就係有兩個好大嘅polyglot，即係語言迷嘅聚會啦，一個係Polyglot Gathering啦，就係我已經去過幾次㗎喇，噉喺podcast上面都講過兩次㗎嘞，噉啱啱我就上個月去咗波蘭，就係嗰個啦。但係另外嗰個就係Polyglot Conference，就係年年都唔同地方嘅，噉我就冇去過嘅。但係你哋去過吖嘛。
苗：我想講呢，我次次去Google度打Polyglot Conference呢，第一個結果都係Polyglot Gathering囉。我成日㩒錯嗰條拎啊。
以：SEO囉。
苗：即係我本來想㩒Conference嗰個網站，想睇佢啲資料吖嘛，再check返。但係次次我一search呢，我就好順手㩒咗第一條link，跟住就次次都去咗Polyglot Gathering嗰個網囉。
靳：係咪因為佢有賣廣告啊？
苗：好似唔係㗎。總之佢排第一名囉。
以：係啊……係咪賣廣告唔知啊，但係佢哋係有個團體喺度辦㗎。即係佢哋應該識得搞，因為佢哋嗰個團體係專係做呢啲噉嘅event嘅，譬如佢哋搞好多啲世界語嗰啲event嘅，噉同埋其他都有啦。噉所以佢哋應該叻啲搞呢……整網站都整得好啲。但係Polyglot Conference就係基本上係阿Richard一腳踢，揾啲人幫佢手噉樣。
苗：係，得幾個人咋，我見到佢嗰個主辦人名單都係好少人囉，好似唔知兩三個噉咋，真係。
以：可能有少少土炮噉樣。Anyway啦，我哋就會去嗰度啦，噉理論上呢，應該就係我哋三個第一次見面，即係全部人齊。
苗：全部人齊啊，係啊。絮言真人……
以：係啊，因為我未見過阿靳尼嘅真人。
苗：爭呢個connection啫。
靳：係，我哋唔識㗎，我哋係。
以：我哋一直就喺互聯網上面傾偈。噉嗯，話唔定我哋可能同我哋Patreon嘅朋友搞啲活動啦，喺網上，係喇。不過確實嘅時間，我哋仲要睇下到時個schedule係點先，之後再決定幾時去……嚟到見大家，同大家可能三喺一間房裏面，之後就同大家傾偈喇，之類噉樣。
靳：睇下會唔會有啲嘉賓。
以：呢個有少少太賣關子嘞。都可能係大家會認得嘅聲音吓。
苗：賣祖宗田。
靳：即係如果大家呢，到時想聽我哋嘅直播嘅話呢，噉就記得join我哋嘅Patreon。
苗：可能有咋，吓！
靳：係，可能有嘅……
以：希望有。
靳：如果大家想join我哋呢個可能有嘅直播嘅話呢，噉就記得呢，預早join咗我哋嘅Patreon先嘞，因為成為咗我哋patron呢，就可以join我哋嘅Discord server啦，噉我哋開live嘅時候呢，都會喺上高進行嘅。噉到時大家就可以同我哋……陪住我哋一齊直播啦，又可以同我哋即席即係打字傾下偈、交流下，噉樣樣。
以：同埋如果高級嘅會員嘅話呢，可以一齊開聲傾偈添㗎！
苗：噉如果做Patreon會員，有啲咩係一定會有嘅呢？
靳：一定會有嘅，就係會有我哋嘅逐字稿啦，由頭到尾打一次，嘔心瀝血噉打出嚟嘅逐字稿啦。
苗：嘔血啊。
以：三苗都嘔咗喇，真係。
靳：噉同埋呢，會有大我哋有時有啲bonus，剪咗出嚟嘅，冇擺到入去正式出街嘅節目入面嘅部份，都可以喺上高有得聽嘅。噉同埋呢，有時呢，我哋都會喺上高整啲投票啊，畀大家決定下下集講啲乜嘢嘢啦，噉都係可以做我哋嘅Patreon嘅時候，就可以一齊參與㗎喇。
以：嗱，噉我哋個Discord就算冇直播，都成日喺度傾偈嘅。大家都係啲語言愛好者啦。

The rest of the transcript is available to Patreon members.